గౌరవ అధ్యక్షుడు లూలా,
ఇరుదేశాల నుంచి వచ్చిన ప్రతినిధులు,
మీడియా మిత్రులారా,
శుభాకాంక్షలు!
శుభ మధ్యాహ్నం!
అధ్యక్షుడు లూలా, వారి ప్రతినిధి బృందానికి భారతదేశానికి స్వాగతం పలకటం నాకు సంతోషంగా ఉంది.
గతేడాది మీరు నన్ను బ్రెజిల్కు ఎంత ఆత్మీయతతో, స్నేహపూర్వకంగా ఆహ్వానించారో.. అదే స్ఫూర్తితో నేను కూడా మిమ్మల్ని భారత్కు సాదరంగా ఆహ్వానిస్తున్నా. ఇది నాకెంతో సంతోషకమైన విషయం.
అధ్యక్షుడు లూలా దార్శనికత, స్ఫూర్తిదాయకమైన నాయకత్వం వల్ల భారత్-బ్రెజిల్ ఎంతో కాలంగా ప్రయోజనం పొందుతున్నాయి. గత కొన్నేళ్లుగా ఆయన్ని పలు సందర్భాల్లో కలిసే అవకాశం నాకు లభించింది. ప్రతి సమావేశంలోనూ భారతదేశం పట్ల ఆయనకున్న మిత్ర భావాన్ని, అచంచలమైన విశ్వాసాన్ని నేను గమనించాను.
అధ్యక్షుడు లూలా పర్యటన చరిత్రాత్మకమైన ఏఐ ఇంపాక్ట్ సమ్మిట్కు ప్రత్యేకతను తీసుకువచ్చింది. మన వ్యూహాత్మక భాగస్వామ్యంలో సరికొత్త ఉత్తేజాన్ని నింపింది. ఆయన చూపిన స్నేహ భావానికి, మన రెండు దేశాల మధ్య సంబంధాల పట్ల ఆయనకున్న నిబద్ధతకు నేను మనస్ఫూర్తిగా కృతజ్ఞతలు తెలియజేస్తున్నా.
మిత్రులారా,
ఇవాళ జరిగిన చర్చల్లో ఉమ్మడి ఆశయాలు, లక్ష్యాల స్ఫూర్తితో అన్ని రంగాల్లో సహకారాన్ని పెంపొందించుకోవటంపై సమాలోచనలు చేశాం.
లాటిన్ అమెరికాలో భారతదేశానికి బ్రెజిల్ అతిపెద్ద వాణిజ్య భాగస్వామి. రాబోయే ఐదేళ్లలో ద్వైపాక్షిక వాణిజ్యం ఇరవై బిలియన్ డాలర్ల మార్కును దాటేలా చేసేందుకు మేం కట్టుబడి ఉన్నాం. మన వాణిజ్యం కేవలం అంకెలకు పరిమితమైనది కాదు.. పరస్పర విశ్వాసానికి ప్రతిబింబం. అధ్యక్షుడు లూలాతో వచ్చిన వ్యాపార ప్రతినిధుల బృందమే ఈ నమ్మకానికి నిదర్శనం.
భారత్-మెర్కోసూర్ వాణిజ్య ఒప్పంద విస్తరణ మన ఆర్థిక సహకారాన్ని మరింత బలోపేతం చేస్తుంది. సాంకేతికత, ఆవిష్కరణల రంగాల్లో సహకారం ఇరుదేశాలకే కాక, మొత్తం గ్లోబల్ సౌత్ ప్రయోజనాలకు కీలకమైనది.
బ్రెజిల్లో డిజిటల్ పబ్లిక్ ఇన్ఫ్రాస్ట్రక్చర్ కోసం ఒక ఎక్సలెన్స్ సెంటర్ ఏర్పాటు దిశగా మనం అడుగులు వేయటం నాకు ఎంతో సంతోషాన్ని కలిగిస్తోంది. కృత్రిమ మేధ, సూపర్ కంప్యూటర్లు, సెమీ కండక్టర్లు, బ్లాక్చైన్ వంటి రంగాల్లో సహకారానికి కూడా మేం ప్రాధాన్యతనిస్తున్నాం.
"సాంకేతికత అందరికీ అందుబాటులో ఉండాలని, ఉమ్మడి పురోగతికి అది వారధిలా నిలవాలి" అని ఇరుదేశాలు బలంగా విశ్వసిస్తున్నాయి.
మన భాగస్వామ్యంలో ఇంధన రంగ సహకారం కీలకంగా నిలిచింది. హైడ్రోకార్బన్లతో పాటు పునరుత్పాదక ఇంధనం, ఇథనాల్ బ్లెండింగ్, పర్యావరణహిత విమాన ఇంధనం, ఇతర అభివృద్ధి చెందుతున్న రంగాల్లో సహకారాన్ని మరింత వేగవంతం చేస్తున్నాం. గ్లోబల్ బయోఫ్యూయల్స్ అలయన్స్లో బ్రెజిల్ క్రియాశీలకంగా పాల్గొనటం.. హరిత, సుస్థిర భవిష్యత్తు పట్ల మనకున్న ఉమ్మడి నిబద్ధతను తెలియజేస్తుంది.
విపత్తులను తట్టుకోగల మౌలిక సదుపాయాల కూటమికి సహ-అధ్యక్షత వహించేందుకు బ్రెజిల్ ప్రతిపాదన చేసింది. ఇందుకుగానూ అధ్యక్షుడు లూలాను నేను అభినందిస్తున్నా. ఈ రంగంలో బ్రెజిల్కున్న విస్తృత అనుభవం సీడీఆర్ఐని మరింత బలోపేతం చేయటంలో కీలక పాత్ర పోషిస్తుంది.
కీలకమైన ఖనిజాలు, అరుదైన మూలకాల విషయంలో కుదిరిన ఒప్పందం, దృఢమైన సరఫరా వ్యవస్థల నిర్మాణంలో ఒక కీలక ముందడుగు.
రక్షణ రంగంలో మన మధ్య సహకారం క్రమంగా విస్తరిస్తోంది. ఇది ఇరుదేశాల మధ్య పరస్పర విశ్వాసం, వ్యూహాత్మక సమన్వయానికి బలమైన ఉదాహరణగా నిలుస్తుంది. రాబోయే ఏళ్లలో ఈ పరస్పర ప్రయోజనకరమైన భాగస్వామ్యాన్ని మరింత బలోపేతం చేసుకుంటాం.
భవిష్యత్తు అవసరాలకు అనుగుణంగా వ్యవసాయం, పశుసంవర్ధక రంగాల్లో మన భాగస్వామ్యానికి కొత్త అంశాలను జోడిస్తున్నాం. వాతావరణ మార్పులను తట్టుకోగల వ్యవసాయం, కచ్చితమైన సాగు, జీవ ఎరువుల వంటి రంగాల్లో సహకారం ఇరుదేశాల్లో ఆహార భద్రతను మరింత బలోపేతం చేస్తుంది.
ఈ దిశగా.. నూనెగింజలు, పప్పుధాన్యాలు, సమగ్ర వ్యవసాయానికి బ్రెజిల్లో సెంటర్ ఆఫ్ ఎక్సలెన్స్ ఏర్పాటు చేయటం కీలకం కానుంది.
ఆరోగ్యం, ఔషధ రంగాల్లో సహకారానికి అపారమైన అవకాశాలున్నాయి. భారత్ నుంచి బ్రెజిల్కు తక్కువ ధరకే నాణ్యమైన మందుల సరఫరాను పెంచేందుకు మేం కృషి చేస్తాం. సంపూర్ణ ఆరోగ్య సంరక్షణను మెరుగుపరిచే లక్ష్యంతో బ్రెజిల్లో ఆయుర్వేదం, ఇతర సంప్రదాయ వైద్య పద్ధతులను మరింత ప్రోత్సహించేందుకు ప్రయత్నిస్తున్నాం.
మిత్రులారా,
ప్రపంచ వేదికపై భారత్, బ్రెజిల్ మధ్య భాగస్వామ్యం ఎంతో బలంగా, ప్రభావవంతంగా ఉంది. శక్తిమంతమైన ప్రజాస్వామ్య దేశాలుగా గ్లోబల్ సౌత్ ప్రాధాన్యతలను, ఆకాంక్షలను మేం ముందుకు తీసుకెళ్తాం.
"భారతదేశం, బ్రెజిల్ కలిసి పనిచేసినప్పుడు గ్లోబల్ సౌత్ గళం మరింత బలంగా, ఆత్మవిశ్వాసంతో ఉంటుంది"
ఏ సమస్యనైనా చర్చలు, దౌత్యం ద్వారానే పరిష్కరించుకోవాలని మనం బలంగా విశ్వసిస్తున్నాం. ఉగ్రవాదం, దానికి మద్దతిచ్చేవారు.. మానవాళికి శత్రువులనే విషయంలో భారత్, బ్రెజిల్ ఏకాభిప్రాయంతో ఉన్నాయి. ప్రస్తుత సవాళ్లను సమర్థవంతంగా ఎదుర్కోవటానికి అంతర్జాతీయ సంస్థల సంస్కరణలు అత్యవసరమని మేం అంగీకరిస్తున్నాం. ఈ దిశగా మేం కలిసి పనిచేస్తాం.
గౌరవనీయులారా,
మీ పర్యటన మన వ్యూహాత్మక భాగస్వామ్యాన్ని మరింత బలోపేతం చేస్తుందని, భవిష్యత్తులో సహకారానికి నూతన మార్గం అవుతుందని నేను పూర్తిగా విశ్వసిస్తున్నా.
మీ సందేశాత్మక పర్యటనకు, మిత్ర భావానికి నా హృదయపూర్వక కృతజ్ఞతలు తెలియజేస్తున్నా.
ధన్యవాదాలు.
"ధన్యవాదాలు!”