ইকায়খুম্নরবা রাষ্ট্রপতি লুলা,

লৈবাক অনিমক্কী শক্নাইরবা মীহুৎ কাংবু,

মেদিয়াগী মরুপশিং,

য়াইফ পাউজেল পীজরি!

“বোয়া তারদে!”

রাষ্ট্রপতি লুলা অমসুং মহাক্কী মীহুৎ কাংবু ভারত্ত তরাম্না ওকপদা ঐ অপেনবা ফাওই।

হৌখিবা চহিদা অদোম্না ঐ ব্রাজিলদা তরাম্না ওকখিবা অদুগুম্না মরুপ-মপাং ওইবা অমসুং তরাম্না ওকপগী চপ মান্নবা ৱাখল্লোনগা লোয়ননা ঐনা অদোম ভারত্ত তরাম্না ওকচরি। 

রাষ্ট্রপতি লুলাগী পান্দম অমসুং লুচিংবগী মখাদা ভারত-ব্রাজিলগী মরীশিং মতম কয়াদগী কান্নবা ফংদুনা লাক্লি। হৌখিবা চহি খরদা, থৌরম কয়াদা মহাক্ক উনবগী খুদোংচাবা ঐনা ফংখ্রে। উনবা খুদিংগী, মরুপ-মপাং ওইবগী মহাক্কী অচেৎপা মরী অমসুং ভারত্ত থম্লিবা থাজবা অদু ঐ ইশানা থেংনখি।

রাষ্ট্রপতি লুলাগী খোঙচৎ অসিনা পুৱারি ওইরবা এ.আই ইম্পেক সম্মিৎ মশক থোকহল্লে অমসুং ঐখোয়গী অচেৎপা মরীদা অনৌবা ইনোৎ অমা হাপ্লে। মহাক্কী মরুপ-মপাং ওইবা অমসুং ঐখোয়গী লৈবাক অনিগী মরীশিংদা মহাক্না পীরিবা থাজবশিংগীদমক ঐনা মহাক থম্মোয় শেংনা থাগৎপা ফোঙদোকচরি।

মরুপশিং,

ঙসি ঐখোয় ৱারি শানবদা, ঐখোয়গী মান্নবা পান্দমশিং অমসুং মান্নবা অনিংবশিংনা লমজিংদুনা, হিরম খুদিংমক্ত মতেং পাংনবা খুমাঙ চাউশিন্নবা ঐখোয় খন্ন-নৈনখ্রে।

লেতিন অমেরিকাদা ব্রাজিল ভারতকী খ্বাইদগী চাউবা ললোন-ইতিক্কী মরুপনি। মথং চহি ৫ দা ঐখোয়গী লৈবাক অনিগী ললোন-ইতিক দোল্লার বিল্লিয়ন ২০ দগী হেনগৎহন্নবা ঐখোয়না থাজবা পীনরে। ঐখোয়গী ললোন-ইতিক অসি ইচম চম্বা মশিং খক্তগী ৱাফম অমা নত্তে, মসি অমনা অমবু থাজনবগী মমি অমনি। রাষ্ট্রপতি লুলাগী অচৌবা ললোন-ইতিক্কী মীহুৎ কাংবু অমা লোয়নরক্লিবা অসি থাজবা অসিগী খুদম অমনি।

ইন্দিয়া-মেরকোসুর ত্রেদ এগ্রিমেন্ত পাকথোক-চাউথোকহনবনা ঐখোয়গী শেন-থুমগী মতেং পাংনবা মখা তানা ফগৎহনগনি। তেক্নোলোজি অমসুং ইন্নোবেসনগী হিরমশিংদা পুন্না থবক তৌমিন্নবনা ঐখোয়গী লৈবাক অনি খক্তগী মরুওইবা খক নত্তনা, অপুনবা গ্লোবেল সাউথকীসু কান্নবনি।

ব্রাজিলদা দিজিতেল পব্লিক ইনফ্রাষ্ট্রকচরগী সেন্তর ওফ এক্সলেন্স অমা লিংখৎনবা ঐখোয়না থবক পায়খৎলিবা অসিদা ঐ অপেনবা ফাওই। আর্তিফিসিএল ইন্তিলিজেন্স, সুপর কম্পুতরশিং, সেমিকন্দক্তরশিং অমসুং ব্লোকচেনগুম্বা হিরমশিংদা মতেং পাংন্নবা ঐখোয়না মরুওইনা লৌরি।

“তেক্নোলোজিনা মীওই খুদিংমক কোনশিনগদবনি অমসুং চাউখৎপা শরুক য়ামিন্ননবা থোঙ অমা ওইনা থবক তৌগদবনি” হায়বসিদা ঐখোয়গী লৈবাক অনিমক চেৎনা থাজৈ।

ইনর্জিগী মতেং পাংনবা অসি ঐখোয়গী মরীগী অকনবা য়ুম্বী অমনি। হায়দ্রোকার্বোনশিংগা লোয়ননা, রিন্যুএবল ইনর্জি, ইথানোল য়ানশিনবা, এভিএসন ফ্যুল অমসুং অতোপ্পা অনৌবা হিরমশিংদা ঐখোয় মখা তানা য়াংনা পুন্না থবক তৌমিন্নরি। গ্লোবেল বাইওফ্যুলস এল্লাইন্সদা ব্রাজিলনা থৱায় য়াওনা শরুক য়াবা অসি মৈখু থাংদবা অমসুং তুংকোইনা চৎনবা য়াবা তুংলমচৎ অমগী ঐখোয়গী থবক্কী মমি তারে।

ব্রাজিলনা কোলিএসন ফোর দিজাষ্টার রেসিলিয়েন্ত ইনফ্রাষ্ট্রকচরগী কো-চিয়ার ওইনবা ৱাফম পুখৎলে। থবক অসিগীদমক ঐনা রাষ্ট্রপতি লুলা থাগৎপা ফোঙদোক্লি। হিরম অসিদা ব্রাজিলগী লৌশিং অসিনা মখা তানা কোলিএসন ফোর দিজাষ্টার রেসিলিয়েন্ত ইনফ্রাষ্ট্রকচর চাউখৎনবা শিংথাবা য়ানা মতেং পাংগনি।

ক্রিতিকেল মিনরেলশিং অমসুং রিয়ার আর্থশিংদা য়ানবশিং পুরকখিবা অসি অফবা সপ্লাই চেনশিং শেমগৎনবা মাইকৈদা থাংজিনবা মরুওইবা খোঙথাং অমনি।

দিফেন্স সেক্তরদা মতেং পাংনবা তপ্না তপ্না ফগৎলক্লি। মসি অমনা অমবু থাজনবা অমসুং ঐখোয়গী লৈবাক অনিগী মরক্ত লাল্লোং মান্নবগী অকনবা খুদম অমনি। লাক্লিবা চহিশিংদা মসিগী নাকল অনিমক কান্নবা ফংবা মরী অসি ঐখোয়না মখা তানা চাউখৎহনগনি।

তুংগী দরকার ওইবশিংগী মতুংইন্না, লৌউ-শিংউ অমসুং শা-ষন লোইবগী হিরমশিংদা ঐখোয় পুন্না থবক তৌমিন্নবগী অনৌবা শক্তমশিং ঐখোয়না তাক্লে। নোংজু-নুংশা মায়োক্নবা ঙম্বা লৌউ-শিংউগী থবক, অরুবা লৌউ-শিংউ অমসুং বাইও-ফর্তিলাইজরশিংগুম্বা হিরমশিংদা মতেং পাংনদুনা ঐখোয়গী লৈবাক অনিমক মখা তানা চীঞ্জাক ৱাৎতনা ফংহনবা হেনগৎহনগনি।

থাউ থোকপা মরুশিং, হৱায়শিং অমসুং অপুনবা লৌউ-শিংউগী থবকশিংগীদমক ব্রাজিলদা সেন্তর ওফ এক্সলেন্স অমা লিংখৎপা অসি মাইকৈ অসিদা পায়খৎপা মরুওইবা থবক অমা ওইগনি।

হকশেল অমসুং হিদাক-লাংথকশিং শুংবগী হিরমশিংদা মতেং পাংন্নবা খুদোংচাবা কয়া লৈরি। ভারত্তগী ব্রাজিলদা মমল হোংবা অমসুং অফবা হিদাক-লাংথকশিং ফংহনবা হেনগৎহন্নবা মাইকৈদা ঐখোয় থবক তৌগনি। মসিগা লোয়ননা, থবকশিং অসিনা ব্রাজিলদা অয়ুর্বেদা অমসুং মহৌশাগী লাইয়েংগী থবকশিং মখা তানা চাউখৎহনগনি। 

মরুপশিং,

মালেমগী ফম্বাক্ত, ভারত অমসুং ব্রাজিলগী মরক্ত পুন্না থবক তৌমিন্নবা অসি মপাঙ্গল কল্লে অমসুং কান্নবা পীরে। মপাঙ্গল কনবা গনতন্ত্র চৎপা লৈবাকশিং ওইনা, ঐখোয়না মখা তানা গ্লোবেল সাউথকী মরুওইবশিং অমসুং অনিংবশিং থুংহনগনি।

“ভারত অমসুং ব্রাজিল পুন্না থবক তৌমিন্নবা মতমদা গ্লোবেল সাউথকী খোঞ্জেল হেন্না মপাঙ্গল কনখৎকনি অমসুং হেন্না থাজগনি”।

য়ানদবা খুদিংমক ৱারি শানবা অমসুং কুতনিতিগী খুৎথাংদা ৱারোইশিন পুরকপদা ঐখোয়না অচেৎপা থাজবা থম্লি। তেরোরিজম অমসুং মসি শৌগৎলিবশিং মীওইবা খুন্নাইগী য়েক্নবশিং হায়বা ৱাখল্লোন অসিদা ভারত অমসুং ব্রাজিল অমতা ওইরি। ঐখোয়গী মতমগী মুক্নবশিং মপুংফানা য়ানবা পুরক্নবা মালেমগী লুপশিং অওনবা পুরকপা তঙাইফদে হায়বসিদা ঐখোয় য়ানরে। মাইকৈ অসিদা ঐখোয় মখা তানা পুন্না থবক তৌমিন্নগনি।

ইকায়খুম্নরবা,

অদোমগী খোঙচৎ অসিনা ঐখোয়গী মরী মখা তানা ফগৎহনগনি অমসুং লাক্লিবা চহিশিংদা মতেং পাংন্নবা অনৌবা খুদোংচাবশিং পীগনি হায়বগী থাজবা ঐনা থম্লি।

অমুক হন্না, অদোমগী খোঙচৎ অমসুং অদোমগী অচেৎপা মরুপ-মপাংগী মরীগীদমক ঐনা থম্মোয় শেংনা থাগৎপা ফোঙদোকচরি।

অদোম থাগৎপা ফোঙদোকচরি।

“মুইতো ওব্রিগাদো!”

দিসক্লেমর: মসি প্রধান মন্ত্রীগী ৱারোলদগী চাউরাকপা হন্দোকপনি। অশেংবা ৱারোল হিন্দীদা পীখি।

***