ମହାମହିମ ରାଷ୍ଟ୍ରପତି ଲୁଲା,

ଉଭୟ ଦେଶର ପ୍ରତିଷ୍ଠିତ ପ୍ରତିନିଧିମାନେ,

ଗଣମାଧ୍ୟମର ବନ୍ଧୁମାନେ,

ନମସ୍କାର!

"ବୋଆ ତାର୍ଡେ!"

ରାଷ୍ଟ୍ରପତି ଲୁଲା ଏବଂ ତାଙ୍କ ପ୍ରତିନିଧିମଣ୍ଡଳକୁ ଭାରତରେ ସ୍ୱାଗତ କରି ମୋତେ ଅତ୍ୟନ୍ତ ଆନନ୍ଦ ଲାଗୁଛି।

ଗତବର୍ଷ ବ୍ରାଜିଲରେ ଆପଣ ଯେପରି ବନ୍ଧୁତା ଏବଂ ଆତିଥ୍ୟର ସହ ମୋତେ ସ୍ୱାଗତ କରିଥିଲେ, ମୁଁ ମଧ୍ୟ ସେହିପରି ବନ୍ଧୁତ୍ୱ ଏବଂ ଆତିଥ୍ୟର ଭାବନା ସହିତ ଭାରତରେ ଆପଣଙ୍କୁ ସ୍ୱାଗତ କରୁଛି। ଏହା ମୋ ପାଇଁ ଅତି ଆନନ୍ଦର  କଥା।

ଭାରତ-ବ୍ରାଜିଲ ସମ୍ପର୍କ ରାଷ୍ଟ୍ରପତି ଲୁଲାଙ୍କ ଦୃଷ୍ଟିକୋଣ ଏବଂ ପ୍ରେରଣାଦାୟକ ନେତୃତ୍ୱରୁ ଦୀର୍ଘ ସମୟ ଧରି ଉପକୃତ ହୋଇଆସୁଛି। ଗତ କିଛି ବର୍ଷ ମଧ୍ୟରେ, ମୁଁ ତାଙ୍କୁ ଅନେକ ଥର ଭେଟିବାର ସୌଭାଗ୍ୟ ପାଇଛି। ଏପରି ପ୍ରତ୍ୟେକ ଆଲୋଚନାରେ, ମୁଁ ବ୍ୟକ୍ତିଗତ ଭାବରେ ତାଙ୍କର ଗଭୀର ବନ୍ଧୁତା ଏବଂ ଭାରତ ପ୍ରତି ଥିବା ତାଙ୍କର ବିଶ୍ୱାସକୁ  ଅନୁଭବ ମଧ୍ୟ  କରିଛି।

ରାଷ୍ଟ୍ରପତି ଲୁଲାଙ୍କ ଗସ୍ତ ଐତିହାସିକ ଏଆଇ ଇମ୍ପାକ୍ଟ ଶିଖର ସମ୍ମିଳନୀରେ ମଧ୍ୟ ସ୍ୱତନ୍ତ୍ରତା ଯୋଡିଛି ଏବଂ ଆମର ରଣନୈତିକ ସହଭାଗୀତାରେ ନୂତନ ଗତି ଆଣିଛି। ତାଙ୍କ ବନ୍ଧୁତା ଏବଂ ଆମ ଦୁଇ ଦେଶ ମଧ୍ୟରେ ସମ୍ପର୍କ ପ୍ରତି ତାଙ୍କର ପ୍ରତିବଦ୍ଧତା ପାଇଁ ମୁଁ ତାଙ୍କ ପ୍ରତି ଆନ୍ତରିକ କୃତଜ୍ଞତା ପ୍ରକାଶ କରୁଛି।

ବନ୍ଧୁଗଣ,

ଆଜିର ଆଲୋଚନାରେ, ଆମେ ଆମର ସମାନ ଉଦ୍ଦେଶ୍ୟ ଏବଂ ସମାନ ଆକାଂକ୍ଷା ଦ୍ୱାରା ପରିଚାଳିତ ସମସ୍ତ କ୍ଷେତ୍ରରେ ସହଯୋଗକୁ ଆଗକୁ ବଢାଇବା ଉପରେ ଆଲୋଚନା କରିଛୁ।

ଲାଟିନ୍ ଆମେରିକାରେ ବ୍ରାଜିଲ୍ ହେଉଛି ଭାରତର ସବୁଠାରୁ ବଡ଼ ବାଣିଜ୍ୟିକ ଅଂଶୀଦାର। ଆମେ ଆଗାମୀ ପାଞ୍ଚ ବର୍ଷ ମଧ୍ୟରେ ଆମର ଦ୍ୱିପାକ୍ଷିକ ବାଣିଜ୍ୟକୁ କୋଡ଼ିଏ ବିଲିୟନ ଡଲାର ଅତିକ୍ରମ କରିବାକୁ ପ୍ରତିବଦ୍ଧ। ଆମର ବାଣିଜ୍ୟ କେବଳ ସଂଖ୍ୟାର ବିଷୟ ନୁହେଁ, ଏହା ପାରସ୍ପରିକ ବିଶ୍ୱାସର ପ୍ରତିଫଳନ ଅଟେ । ରାଷ୍ଟ୍ରପତି ଲୁଲାଙ୍କ ସହ ଆସିଥିବା ବୃହତ ବ୍ୟବସାୟିକ ପ୍ରତିନିଧି ଦଳ ଏହି ଆତ୍ମବିଶ୍ୱାସର ଜ୍ୱଳନ୍ତ  ପ୍ରମାଣ।

ଭାରତ-ମର୍କୋସୁର ବାଣିଜ୍ୟ ଚୁକ୍ତିନାମାର ବିସ୍ତାର ଆମର ଅର୍ଥନୈତିକ ସହଯୋଗକୁ ଆହୁରି ମଜବୁତ କରିବ। ପ୍ରଯୁକ୍ତିବିଦ୍ୟା ଏବଂ ନବସୃଜନ କ୍ଷେତ୍ରରେ ସହଯୋଗ କେବଳ ଆମ ଦୁଇ ଦେଶ ପାଇଁ ନୁହେଁ, ବରଂ ସମଗ୍ର ବିଶ୍ୱ ଦକ୍ଷିଣ ପାଇଁ ମଧ୍ୟ ଗୁରୁତ୍ୱପୂର୍ଣ୍ଣ ଅଟେ ।

ମୁଁ ଅତି ଆନନ୍ଦିତ  ଯେ ଆମେ ବ୍ରାଜିଲରେ ଡିଜିଟାଲ୍ ସାର୍ବଜନୀନ ଭିତ୍ତିଭୂମି ପାଇଁ ଏକ ଉତ୍କର୍ଷ କେନ୍ଦ୍ର ପ୍ରତିଷ୍ଠା କରିବା ଦିଗରେ କାର୍ଯ୍ୟ କରୁଛୁ। ଆମେ କୃତ୍ରିମ ବୁଦ୍ଧିମତ୍ତା, ସୁପର କମ୍ପ୍ୟୁଟର, ସେମିକଣ୍ଡକ୍ଟର ଏବଂ ବ୍ଲକଚେନ୍ ଭଳି କ୍ଷେତ୍ରରେ ସହଯୋଗକୁ ମଧ୍ୟ ପ୍ରାଥମିକତା ଦେଉଛୁ।

ଆମର ଉଭୟ ଦେଶ ଦୃଢ଼ ଭାବରେ ବିଶ୍ୱାସ କରନ୍ତି ଯେ "ପ୍ରଯୁକ୍ତିବିଦ୍ୟା ଅନ୍ତର୍ଭୁକ୍ତ ହେବା ଆବଶ୍ୟକ ଏବଂ ଆବଂଟିତ  ପ୍ରଗତି ପାଇଁ ଏକ ସେତୁ ଭାବରେ କାର୍ଯ୍ୟ କରିବା ଉଚିତ।"

ଶକ୍ତି ସହଯୋଗ ଆମର ସହଭାଗୀତାର ଏକ ଦୃଢ଼ ସ୍ତମ୍ଭ ହୋଇଛି। ହାଇଡ୍ରୋକାର୍ବନ ସହିତ, ଆମେ ନବୀକରଣୀୟ ଶକ୍ତି, ଇଥାନଲ୍ ମିଶ୍ରଣ, ସ୍ଥାୟୀ ବିମାନ ଇନ୍ଧନ ଏବଂ ଅନ୍ୟାନ୍ୟ ଉଦୀୟମାନ କ୍ଷେତ୍ରରେ ସହଯୋଗକୁ ଆହୁରି ତ୍ୱରାନ୍ୱିତ କରୁଛୁ। ଗ୍ଲୋବାଲ୍ ଜୈବ ଇନ୍ଧନ ଆଲାଏନ୍ସରେ ବ୍ରାଜିଲର ସକ୍ରିୟ ଅଂଶଗ୍ରହଣ ଏକ ସବୁଜ ଏବଂ ସ୍ଥାୟୀ ଭବିଷ୍ୟତ ପାଇଁ ଆମର ସହଭାଗୀ ପ୍ରତିବଦ୍ଧତାକୁ ପ୍ରତିଫଳିତ କରେ।

ବ୍ରାଜିଲ୍ ବିପର୍ଯ୍ୟୟ ପ୍ରତିରୋଧୀ ଭିତ୍ତିଭୂମି ପାଇଁ ମେଣ୍ଟର ସହ-ଅଧ୍ୟକ୍ଷତା କରିବାକୁ ମଧ୍ୟ ପ୍ରସ୍ତାବ ଦେଇଛି। ମୁଁ ଏହି ପଦକ୍ଷେପ ପାଇଁ ରାଷ୍ଟ୍ରପତି ଲୁଲାଙ୍କୁ ପ୍ରଶଂସା କରୁଛି। ଏହି କ୍ଷେତ୍ରରେ ବ୍ରାଜିଲର ବ୍ୟାପକ ଅଭିଜ୍ଞତା CDRIକୁ ଆହୁରି ମଜବୁତ କରିବାରେ ଏକ ଗୁରୁତ୍ୱପୂର୍ଣ୍ଣ ଅବଦାନ ରଖିବ।

ଗୁରୁତ୍ୱପୂର୍ଣ୍ଣ ଖଣିଜ ଏବଂ ବିରଳ ପୃଥିବୀ ଉପରେ ହୋଇଥିବା ଚୁକ୍ତିନାମା ସ୍ଥିର ଯୋଗାଣ ଶୃଙ୍ଖଳ ନିର୍ମାଣ ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ଅଟେ ।

ପ୍ରତିରକ୍ଷା କ୍ଷେତ୍ରରେ ମଧ୍ୟ ଆମର ସହଯୋଗ ନିରନ୍ତର ବୃଦ୍ଧି ପାଉଛି। ଏହା ଆମ ଦୁଇ ଦେଶ ମଧ୍ୟରେ ପାରସ୍ପରିକ ବିଶ୍ୱାସ ଏବଂ ରଣନୈତିକ ସମନ୍ୱୟର ଏକ ଦୃଢ଼ ଉଦାହରଣ ଭାବରେ ଠିଆ ହୋଇଛି। ଆଗାମୀ ବର୍ଷଗୁଡ଼ିକରେ ଆମେ ଏହି ପାରସ୍ପରିକ ଲାଭଦାୟକ ସହଭାଗୀତାକୁ ଆହୁରି ମଜବୁତ କରିବୁ।

ଭବିଷ୍ୟତର ଆବଶ୍ୟକତା ସହିତ ସମନ୍ୱିତ ହୋଇ ଆମେ କୃଷି ଏବଂ ପଶୁପାଳନ କ୍ଷେତ୍ରରେ ଆମର ସହଭାଗୀତାକୁ ନୂତନ ପରିମାଣ ଦେଉଛୁ। ଜଳବାୟୁ-ପ୍ରତିରୋଧୀ କୃଷି, ସଠିକ୍ କୃଷି ଏବଂ ଜୈବ-ସାର ଭଳି କ୍ଷେତ୍ରରେ ସହଯୋଗ ଆମ ଉଭୟ ଦେଶରେ ଖାଦ୍ୟ ସୁରକ୍ଷାକୁ ଆହୁରି ମଜବୁତ କରିବ।

ତୈଳବୀଜ, ଡାଲି ଏବଂ ସମନ୍ୱିତ କୃଷି ପାଇଁ ବ୍ରାଜିଲରେ ଉତ୍କର୍ଷତା କେନ୍ଦ୍ର ପ୍ରତିଷ୍ଠା ଏହି ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ହେବ।

ସ୍ୱାସ୍ଥ୍ୟ ଏବଂ ଔଷଧ କ୍ଷେତ୍ରରେ ମଧ୍ୟ ସହଯୋଗ ପାଇଁ ଅପାର ସମ୍ଭାବନା ରହିଛି। ଆମେ ଭାରତରୁ ବ୍ରାଜିଲକୁ ସୁଲଭ ଏବଂ ଗୁଣାତ୍ମକ ଔଷଧ ଯୋଗାଣ ବୃଦ୍ଧି କରିବା ଦିଗରେ କାର୍ଯ୍ୟ କରିବୁ। ସେହି ସମୟରେ, ବ୍ରାଜିଲରେ ଆୟୁର୍ବେଦ ଏବଂ ପାରମ୍ପାରିକ ଔଷଧ ବ୍ୟବସ୍ଥାକୁ ଆହୁରି ପ୍ରୋତ୍ସାହିତ କରିବା ପାଇଁ ପ୍ରୟାସ କରାଯିବ, ଯାହା ଦ୍ୱାରା ସାମଗ୍ରିକ ସ୍ୱାସ୍ଥ୍ୟସେବା ଆହୁରି  ଆଗକୁ ବଢ଼ିବ।

ବନ୍ଧୁଗଣ,

ବିଶ୍ୱ ସ୍ତରରେ, ଭାରତ ଏବଂ ବ୍ରାଜିଲ ମଧ୍ୟରେ ସହଭାଗୀତା ଦୃଢ଼ ଏବଂ ପ୍ରଭାବଶାଳୀ ହୋଇଛି। ସ୍ପନ୍ଦନଶୀଳ ଗଣତନ୍ତ୍ର ଭାବରେ, ଆମେ ଗ୍ଲୋବାଲ୍ ସାଉଥ୍ ର ପ୍ରାଥମିକତା ଏବଂ ଆକାଂକ୍ଷାକୁ ଆଗକୁ ବଢ଼ାଇବା ଜାରି ରଖିବୁ।

"ଯେତେବେଳେ ଭାରତ ଏବଂ ବ୍ରାଜିଲ୍ ଏକାଠି କାମ କରନ୍ତି, ଗ୍ଲୋବାଲ୍ ସାଉଥ୍ ର ସ୍ୱର ଆହୁରି ଦୃଢ଼ ଏବଂ ଆତ୍ମବିଶ୍ୱାସୀ ହୋଇଯାଏ।"

ଆମେ ଦୃଢ଼ ଭାବରେ ବିଶ୍ୱାସ କରୁଛୁ ଯେ ପ୍ରତ୍ୟେକ ଚ୍ୟାଲେଞ୍ଜକୁ ଆଲୋଚନା ଏବଂ କୂଟନୀତି ମାଧ୍ୟମରେ ସମାଧାନ କରାଯିବା ଉଚିତ। ଭାରତ ଏବଂ ବ୍ରାଜିଲ୍ ଏହି ଦୃଷ୍ଟିରୁ ଏକଜୁଟ୍ ଯେ ଆତଙ୍କବାଦ ଏବଂ ଏହାକୁ ସମର୍ଥନ କରୁଥିବା ଲୋକମାନେ ମାନବତାର ଶତ୍ରୁ। ଆମେ ଏହା ମଧ୍ୟ ସହମତ ଯେ ଆମ ସମୟର ଚ୍ୟାଲେଞ୍ଜକୁ ପ୍ରଭାବଶାଳୀ ଭାବରେ ମୁକାବିଲା କରିବା ପାଇଁ ବିଶ୍ୱ ପ୍ରତିଷ୍ଠାନଗୁଡ଼ିକର ସଂସ୍କାର ଅତ୍ୟାବଶ୍ୟକ। ଆମେ ଏହି ଦିଗରେ ଏକାଠି କାମ କରିବା ଜାରି ରଖିବୁ।

ମହାମହିମ,

ମୁଁ ନିଶ୍ଚିତ ଯେ ଆପଣଙ୍କ ଗସ୍ତ ଆମର ରଣନୈତିକ ସହଭାଗୀତାକୁ ଆହୁରି ଗଭୀର କରିବ ଏବଂ ଆଗାମୀ ବର୍ଷଗୁଡ଼ିକରେ ସହଯୋଗର ନୂତନ ପଥ ଖୋଲିବ।

ପୁଣି ଥରେ, ମୁଁ ଆପଣଙ୍କ ଗସ୍ତ ଏବଂ ଆପଣଙ୍କ ଗଭୀର ବନ୍ଧୁତା ପାଇଁ ମୋର ହୃଦୟରୁ ପ୍ରଶଂସା କରୁଛି।

ଆପଣଙ୍କୁ ବହୁତ ବହୁତ ଧନ୍ୟବାଦ।

"ମୁଇଟୋ ଓବ୍ରିଗାଡୋ!"

                  *****

SPD