الیکشن کمیشن آف انڈیا (ای سی آئی) نے اس بات کو دوبارہ واضح کیا ہے کہ انتخابی عمل کی کوریج کے لیے پولنگ اسٹیشنوں میں میڈیا نمائندگان کے داخلے کو پریزائیڈنگ افسران کے ذریعے انتخابی عمل کے اصول، 1961 کے قاعدہ 32 کے مطابق سختی سے منظم کیا جائے گا۔

1. اسی کے مطابق، ہر عام، ضمنی یا دو سالہ انتخاب کے اعلان کے بعد نامزد اسپانسرنگ اداروں کو ہدایات جاری کی جاتی ہیں کہ وہ میڈیا نمائندگان سے درخواستیں حاصل کر کے اتھارٹی لیٹروں کے اجرا کے لیے آگے بھیجیں۔ ان اداروں میں پریس انفارمیشن بیورو (پی آئی بی) اور ریاستی محکمہ اطلاعات و تعلقات عامہ کے ذریعے چیف الیکٹورل افسران (سی ای او) شامل ہیں۔
2. پی آئی بی سے منظور شدہ میڈیا نمائندگان کے لیے اتھارٹی لیٹر پی آئی بی کو فراہم کیے جاتے ہیں، جو اپنے طور پر جانچ پڑتال کے بعد یہ خطوط جاری کرتا ہے۔ بعد ازاں پی آئی بی منظور شدہ میڈیا نمائندگان کی فہرست ای سی آئی کو ارسال کرتا ہے، جس سے عمل میں شفافیت اور جوابدہی کو یقینی بنایا جاتا ہے۔
3. ریاستی ڈی آئی پی آر کے ذریعے درخواست دینے والے میڈیا نمائندگان کی درخواستیں پہلے ریاستی ڈی آئی پی آر کے ذریعے جانچی جاتی ہیں، جو اپنی سفارشات متعلقہ سی ای او کو بھیجتا ہے۔ سی ای او/ڈی آئی پی آر اس بات کی تصدیق کرتے ہیں کہ فہرست کی مکمل جانچ ہو چکی ہے، درخواست دہندگان حقیقی میڈیا نمائندگان ہیں اور ای سی آئی کی ہدایات کے مطابق معیار پر پورا اترتے ہیں۔
4. تجویز کردہ میڈیا نمائندگان کی مجموعی فہرست بعد ازاں سی ای او کی جانب سے کمیشن کو منظوری کے لیے بھیجی جاتی ہے۔ اتھارٹی لیٹر صرف سی ای او/ڈی ای او یا مجاز افسر کی باقاعدہ تصدیق کے بعد جاری کیا جاتا ہے۔ کمیشن نے ہدایت دی ہے کہ اس عمل میں کسی بھی قسم کے فیکس یا ربڑ اسٹیمپ کا استعمال نہ کیا جائے تاکہ صداقت اور شفافیت برقرار رہے۔
5. اتھارٹی لیٹر کا کسی بھی طرح غلط استعمال سختی سے ممنوع ہے۔ ووٹنگ کمپارٹمنٹ کے اندر فوٹوگرافی یا ویڈیوگرافی مکمل طور پر ممنوع ہے تاکہ ووٹ کی رازداری متاثر نہ ہو۔
6. کمیشن نے دوبارہ واضح کیا ہے کہ یہ منظم اور کثیر سطحی تصدیقی نظام اس بات کو یقینی بنانے کے لیے ہے کہ صرف تصدیق شدہ اور مجاز میڈیا نمائندگان کو ہی پولنگ اسٹیشنوں اور گنتی مراکز تک رسائی دی جائے، تاکہ انتخابی عمل کی سالمیت، سکیورٹی اور منظم انعقاد برقرار رہے۔
7. اس کے علاوہ، کمیشن نے یہ بھی واضح کیا ہے کہ انتخابی دن کی کوریج کے لیے مجاز میڈیا نمائندگان کو لازمی خدمات کے زمرے میں شامل کیا گیا ہے اور وہ پوسٹل ووٹنگ سینٹر (پی وی سی) پر پوسٹل بیلٹ کی سہولت کے حقدار ہوں گے۔

********

ش ح۔ ف ش ع

U: 6025