1. ಚುನಾವಣಾ ನಿಯಮಗಳ ನಡವಳಿಕೆ, 1961ರ  ನಿಯಮ 32ರ ನಿಬಂಧನೆಗಳಿಗೆ ಅನುಸಾರವಾಗಿ, ಚುನಾವಣಾ ಪ್ರಕ್ರಿಯೆಯ ವರದಿಗಾಗಿ ಮಾಧ್ಯಮ ಪ್ರತಿನಿಧಿಗಳ ಮತಗಟ್ಟೆ ಪ್ರವೇಶವನ್ನು ಮತಗಟ್ಟೆ ಅಧ್ಯಕ್ಷಾಧಿಕಾರಿಗಳು ಕಟ್ಟುನಿಟ್ಟಾಗಿ ನಿಯಂತ್ರಿಸಬೇಕು ಎಂದು ಭಾರತೀಯ ಚುನಾವಣಾ ಆಯೋಗ (ECI) ಪುನರುಚ್ಚರಿಸಿದೆ.
2. ಅದರಂತೆ, ಪ್ರತಿ ಸಾರ್ವತ್ರಿಕ, ಉಪ ಅಥವಾ ದ್ವೈವಾರ್ಷಿಕ ಚುನಾವಣೆಯ ಘೋಷಣೆಯ ನಂತರ, ಮತದಾನ ವರದಿಗಾಗಿ ಮತಗಟ್ಟೆ ಪ್ರವೇಶಕ್ಕಾಗಿ ಅಧಿಕೃತ ಪತ್ರಗಳನ್ನು ನೀಡಲು ಮಾಧ್ಯಮ ಪ್ರತಿನಿಧಿಗಳ ವಿನಂತಿಗಳನ್ನು ಸ್ವೀಕರಿಸಲು ಮತ್ತು ಸಂಬಂಧಪಟ್ಟವರಿಗೆ ರವಾನಿಸಲು ಗೊತ್ತುಪಡಿಸಿದ ಪ್ರಾಯೋಜಕ ಪ್ರಾಧಿಕಾರಗಳಿಗೆ ಸೂಚನೆ ನೀಡಲಾಗುತ್ತದೆ. ವಾರ್ತಾ ಶಾಖೆ (ಪಿಐಬಿ) ಮತ್ತು ರಾಜ್ಯ ವಾರ್ತಾ ಮತ್ತು ಸಾರ್ವಜನಿಕ ಸಂಪರ್ಕ ನಿರ್ದೇಶನಾಲಯ (ಡಿ ಐ ಪಿ ಆರ್) ಮೂಲಕ ಮುಖ್ಯ ಚುನಾವಣಾ ಅಧಿಕಾರಿಗಳ (ಸಿ ಇ ಒ ಗಳ) ಕಚೇರಿ ಈ ಪ್ರಾಯೋಜಕ ಪ್ರಾಧಿಕಾರಗಳ ಪೈಕಿ ಸೇರಿವೆ.
3. ಪಿಐಬಿಯೊಂದಿಗೆ ಮಾನ್ಯತೆ ಪಡೆದ ಮಾಧ್ಯಮ ವ್ಯಕ್ತಿಗಳಿಗೆ ಸಂಬಂಧಿಸಿದಂತೆ, ಪಿಐಬಿಗೆ ಅಧಿಕೃತ ಪ್ರವೇಶ ಪತ್ರಗಳನ್ನು ನೀಡಲಾಗುತ್ತದೆ. ಅಂತಹ ಪತ್ರಗಳನ್ನು ಪಿಐಬಿ ತನ್ನ ಮಟ್ಟದಲ್ಲಿ ಪರಿಶೀಲಿಸಲಿದೆ. ಈ ಪ್ರಕ್ರಿಯೆಯಲ್ಲಿ ಪಾರದರ್ಶಕತೆ ಮತ್ತು ಹೊಣೆಗಾರಿಕೆಯನ್ನು ಖಚಿತಪಡಿಸುತ್ತಾ ಅನುಮೋದಿತ ಮಾಧ್ಯಮ ವ್ಯಕ್ತಿಗಳ ಪಟ್ಟಿಯನ್ನು ಇಸಿಐಗೆ ಸಲ್ಲಿಸಲಿದೆ. 
4. ರಾಜ್ಯ ಡಿಐಪಿಆರ್ ಮೂಲಕ ಅರ್ಜಿ ಸಲ್ಲಿಸುವ ಮಾಧ್ಯಮ ಪ್ರತಿನಿಧಿಗಳ ವಿನಂತಿಗಳನ್ನು ಮೊದಲು ರಾಜ್ಯ ಡಿ ಐ ಪಿ ಆರ್ ಪರಿಶೀಲಿಸಿ, ತನ್ನ ಶಿಫಾರಸುಗಳನ್ನು ಸಂಬಂಧಪಟ್ಟ ಸಿಇಒ ಗೆ ರವಾನಿಸಲಿದೆ. ಪಟ್ಟಿಯನ್ನು ಸರಿಯಾಗಿ ಪರಿಶೀಲಿಸಲಾಗಿದ್ದು ಅರ್ಜಿದಾರರು ನಿಜವಾದ ಮಾಧ್ಯಮ ಪ್ರತಿನಿಧಿಗಳು ಮತ್ತು ಅವರು ಇಸಿಐ ಮಾರ್ಗಸೂಚಿಗಳಲ್ಲಿ ನಿಗದಿಪಡಿಸಿರುವ ಮಾನದಂಡಗಳನ್ನು ಪೂರೈಸುವರು ಎಂದು ಸಿಇಒ/ಡಿಐಪಿಆರ್ ಪ್ರಮಾಣೀಕರಿಸುವರು.
5. ಶಿಫಾರಸು ಮಾಡಲಾದ ಮಾಧ್ಯಮ ವ್ಯಕ್ತಿಗಳ ಕ್ರೋಢೀಕೃತ ಪಟ್ಟಿಯನ್ನು ಸಿಇಒ ಅವರು ಆಯೋಗಕ್ಕೆ ಅನುಮೋದನೆಗಾಗಿ ಕಳುಹಿಸುವರು. ಸಿಇಒ/ಡಿಇಒ ಅಥವಾ ಅಧಿಕೃತ ಅಧಿಕಾರಿಯಿಂದ ಸೂಕ್ತ ದೃಢೀಕರಣದ ನಂತರವೇ ಅಧಿಕೃತ ಪ್ರವೇಶ ಪತ್ರವನ್ನು ನೀಡಲಾಗುತ್ತದೆ. ಈ ಪ್ರಕ್ರಿಯೆಯಲ್ಲಿ ದೃಢೀಕರಣ ಮತ್ತು ಸಮಗ್ರತೆಯನ್ನು ಕಾಪಾಡಿಕೊಳ್ಳಲು ಯಾವುದೇ ನಕಲು ಮತ್ತು/ಅಥವಾ ರಬ್ಬರ್ ಸ್ಟಾಂಪ್ ಅನ್ನು ಬಳಸಬಾರದು ಎಂದು ಆಯೋಗವು ಆದೇಶಿಸಿದೆ.
6. ಅಧಿಕೃತ ಪ್ರವೇಶ ಪತ್ರಗಳ ದುರುಪಯೋಗವನ್ನು ಕಟ್ಟುನಿಟ್ಟಾಗಿ ನಿಷೇಧಿಸಲಾಗಿದೆ. ಮತದಾನದ ಗೌಪ್ಯತೆ ಕಾಪಾಡಲು ಮತದಾನ ಘಟಕದೊಳಗೆ ಛಾಯಾಗ್ರಹಣ/ ವಿಡಿಯೋಗ್ರಫಿಯನ್ನು ಕಟ್ಟುನಿಟ್ಟಾಗಿ ನಿಷೇಧಿಸಲಾಗಿದೆ.
7. ಈ ರಚನಾತ್ಮಕ ಮತ್ತು ಬಹು-ಹಂತದ ಪರಿಶೀಲನಾ ಪ್ರಕ್ರಿಯೆಯು, ಸಮರ್ಪಕವಾಗಿ ಪರಿಶೀಲಿಸಿದ ಮತ್ತು ಅಧಿಕೃತ ಮಾಧ್ಯಮ ಸಿಬ್ಬಂದಿಗೆ ಮಾತ್ರ ಮತದಾನ ಕೇಂದ್ರಗಳು ಮತ್ತು ಎಣಿಕೆ ಕೇಂದ್ರಗಳಿಗೆ ಪ್ರವೇಶ ಅನುಮತಿಯನ್ನು ಖಚಿತಪಡಿಸಿಕೊಳ್ಳುವ ಗುರಿಯನ್ನು ಹೊಂದಿದೆ ಎಂದು ಆಯೋಗವು ಪುನರುಚ್ಚರಿಸಿದೆ. ಇದರಿಂದಾಗಿ ಚುನಾವಣಾ ಪ್ರಕ್ರಿಯೆಯ ಸಮಗ್ರತೆ, ಭದ್ರತೆ ಮತ್ತು ಕ್ರಮಬದ್ಧ ನಡವಳಿಕೆಯನ್ನು ಕಾಪಾಡಿಕೊಳ್ಳಬಹುದಾಗಿದೆ.
8. ಚುನಾವಣಾ ಆಯೋಗದಿಂದ ಮತದಾನದ ದಿನದ ವರದಿಗಾಗಿ ಅಧಿಕೃತ ಪತ್ರ ಪಡೆದ ಮಾಧ್ಯಮ ವ್ಯಕ್ತಿಗಳನ್ನು ಸಹ ಅಗತ್ಯ ಸೇವೆಗಳ ವರ್ಗದಲ್ಲಿ ಸೇರಿಸಲಾಗಿದ್ದು, ಅವರೂ ಕೂಡ ಅಂಚೆ ಮತದಾನ ಕೇಂದ್ರದಲ್ಲಿ (ಪಿವಿಸಿ) ಅಂಚೆ ಮತಪತ್ರ ಸೌಲಭ್ಯಕ್ಕೆ ಅರ್ಹರಾಗಿರುತ್ತಾರೆ ಎಂದು ಆಯೋಗ ಪುನರುಚ್ಚರಿಸಿದೆ.

*****