ഉത്തർപ്രദേശിലെ ജെവാറിൽ നോയിഡ അന്താരാഷ്ട്ര വിമാനത്താവളം പ്രധാനമന്ത്രി ശ്രീ നരേന്ദ്ര മോദി ഇന്ന് ഉദ്ഘാടനം ചെയ്തു. ഈ അവസരത്തിൽ അഭിമാനവും സന്തോഷവും പ്രകടിപ്പിച്ചുകൊണ്ട്, വികസിത് യുപി, വികസിത് ഭാരത് അഭിയാനിൽ ഇന്ന് ഒരു പുതിയ അധ്യായം അടയാളപ്പെടുത്തുന്നുവെന്ന് പ്രധാനമന്ത്രി പറഞ്ഞു. ഇന്ത്യയിലെ ഏറ്റവും വലിയ സംസ്ഥാനം ഇപ്പോൾ ഏറ്റവും കൂടുതൽ അന്താരാഷ്ട്ര വിമാനത്താവളങ്ങളുള്ള സംസ്ഥാനങ്ങളിലൊന്നായി മാറിയെന്ന് അദ്ദേഹം അഭിപ്രായപ്പെട്ടു. ഈ വിമാനത്താവളത്തിന് തറക്കല്ലിട്ടതിലും ഇപ്പോൾ ഉദ്ഘാടനം ചെയ്തതിലും ഇരട്ടി അഭിമാനം തോന്നുന്നുവെന്നും രണ്ടാമതായി ഈ മഹത്തായ വിമാനത്താവളത്തിന്റെ പേര് ഉത്തർപ്രദേശുമായി ബന്ധപ്പെട്ടിരിക്കുന്നുവെന്നും പ്രധാനമന്ത്രി മോദി പങ്കുവെച്ചു. "എന്നെ പ്രതിനിധിയായി തിരഞ്ഞെടുത്തതും എന്നെ പാർലമെന്റ് അംഗമാക്കിയതും ഈ സംസ്ഥാനമാണ്, അതിന്റെ വ്യക്തിത്വം ഇപ്പോൾ ഈ മനോഹരമായ വിമാനത്താവളവുമായി ബന്ധപ്പെട്ടിരിക്കുന്നു," ശ്രീ മോദി അഭിപ്രായപ്പെട്ടു.

പുതിയ വിമാനത്താവളത്തിന്റെ ദൂരവ്യാപകമായ സ്വാധീനം എടുത്തുകാണിച്ചുകൊണ്ട്, നോയിഡ വിമാനത്താവളം ആഗ്ര, മഥുര, അലിഗഡ്, ഗാസിയാബാദ്, മീററ്റ്, ഇറ്റാവ, ബുലന്ദ്ഷഹർ, ഫരീദാബാദ് എന്നിവ ഉൾപ്പെടുന്ന വിശാലമായ പ്രദേശത്തിന് ഗുണം ചെയ്യുമെന്ന് പ്രധാനമന്ത്രി പറഞ്ഞു. പടിഞ്ഞാറൻ ഉത്തർപ്രദേശിലെ കർഷകർക്കും ചെറുകിട, ഇടത്തരം സംരംഭങ്ങൾക്കും യുവാക്കൾക്കും വിമാനത്താവളം നിരവധി പുതിയ അവസരങ്ങൾ കൊണ്ടുവരുമെന്ന് അദ്ദേഹം ഊന്നിപ്പറഞ്ഞു. "വിമാനങ്ങൾ ഇവിടെ നിന്ന് ലോകത്തേക്ക് പറക്കും, വികസിത ഉത്തർപ്രദേശ് പറന്നുയരുന്നതിന്റെ പ്രതീകമായി ഈ വിമാനത്താവളം മാറും," ശ്രീ മോദി പറഞ്ഞു, സംസ്ഥാനത്തെ ജനങ്ങൾക്ക്, പ്രത്യേകിച്ച് പടിഞ്ഞാറൻ ഉത്തർപ്രദേശിന് തന്റെ ഹൃദയംഗമമായ അഭിനന്ദനങ്ങൾ നേർന്നു.

നിലവിലെ ആഗോള സാഹചര്യത്തെക്കുറിച്ച് സംസാരിക്കവെ, പശ്ചിമേഷ്യയിൽ ഒരു മാസത്തിലേറെയായി നടക്കുന്ന യുദ്ധം, പല രാജ്യങ്ങളിലും ഭക്ഷണം, പെട്രോൾ, ഡീസൽ, ഗ്യാസ്, വളങ്ങൾ എന്നിവയുൾപ്പെടെയുള്ള അവശ്യവസ്തുക്കളുടെ പ്രതിസന്ധി സൃഷ്ടിക്കുന്നതിൽ ലോകം മുഴുവൻ ഇന്ന് വളരെയധികം ആശങ്കാകുലരാണെന്ന് പ്രധാനമന്ത്രി നിരീക്ഷിച്ചു. സംഘർഷബാധിത മേഖലയിൽ നിന്ന് ഇന്ത്യ വൻതോതിൽ അസംസ്കൃത എണ്ണയും വാതകവും ഇറക്കുമതി ചെയ്യുന്നുണ്ടെന്ന് അദ്ദേഹം ചൂണ്ടിക്കാട്ടി. "ഈ പ്രതിസന്ധിയുടെ ഭാരം സാധാരണ കുടുംബങ്ങളുടെയും കർഷകരുടെയും മേൽ വരാതിരിക്കാൻ ​ഗവൺമെന്റ് സാധ്യമായ എല്ലാ നടപടികളും സ്വീകരിക്കുന്നുണ്ട്," ശ്രീ മോദി സ്ഥിരീകരിച്ചു.

ആഗോള പ്രതിസന്ധിയുടെ സമയത്തും ഇന്ത്യയുടെ ദ്രുതഗതിയിലുള്ള വികസനത്തിന്റെ വേഗത അടിവരയിട്ടുകൊണ്ട്, പടിഞ്ഞാറൻ ഉത്തർപ്രദേശിൽ മാത്രം സമീപ ആഴ്ചകളിൽ ഉദ്ഘാടനം ചെയ്യപ്പെടുകയോ തറക്കല്ലിടുകയോ ചെയ്യുന്ന നാലാമത്തെ പ്രധാന പദ്ധതിയാണിതെന്ന് പ്രധാനമന്ത്രി ചൂണ്ടിക്കാട്ടി. "ഈ കാലയളവിൽ നോയിഡയിൽ ഒരു പ്രധാന സെമികണ്ടക്ടർ ഫാക്ടറിയുടെ തറക്കല്ലിട്ടു, രാജ്യത്തെ ആദ്യത്തെ ഡൽഹി-മീററ്റ് നമോ ഭാരത് ട്രെയിൻ വേഗത കൈവരിച്ചു. മീററ്റ് മെട്രോ വികസിപ്പിച്ചു. ഇന്ന് നോയിഡ അന്താരാഷ്ട്ര വിമാനത്താവളം ഉദ്ഘാടനം ചെയ്യപ്പെടുന്നു," പ്രധാനമന്ത്രി മോദി എടുത്തുപറഞ്ഞു.

യുപിയുടെ വികസനത്തിലെ ഈ ശ്രദ്ധേയമായ നേട്ടങ്ങൾക്ക് പ്രധാനമന്ത്രി നിലവിലെ ​ഗവൺമെന്റിനെ പ്രശംസിച്ചു. സെമികണ്ടക്ടർ ഫാക്ടറി ഇന്ത്യയെ സാങ്കേതികവിദ്യയിൽ സ്വയംപര്യാപ്തമാക്കുന്നുണ്ടെന്നും, മീററ്റ് മെട്രോയും നമോ ഭാരത് റെയിലും വേഗതയേറിയതും മികച്ചതുമായ കണക്റ്റിവിറ്റി നൽകുന്നുണ്ടെന്നും ജെവാർ വിമാനത്താവളം മുഴുവൻ ഉത്തരേന്ത്യയെയും ലോകവുമായി ബന്ധിപ്പിക്കുന്നുണ്ടെന്നും അദ്ദേഹം അഭിപ്രായപ്പെട്ടു. "ഇന്ന് നിലവിലെ ​ഗവൺമെന്റിന്റെ കീഴിൽ അതേ നോയിഡ യുപിയുടെ വികസനത്തിന്റെ ശക്തമായ എഞ്ചിനായി മാറുകയാണ്," ശ്രീ മോദി പറഞ്ഞു.

വിമാനത്താവള പദ്ധതിയുടെ ചരിത്രം വിശദീകരിച്ചുകൊണ്ട്, 2003 ൽ തന്നെ ജെവാർ വിമാനത്താവളത്തിന് അടൽ ജി അംഗീകാരം നൽകിയിരുന്നുവെന്ന് പ്രധാനമന്ത്രി അനുസ്മരിച്ചു. നിലവിലെ ​ഗവൺമെന്റ് ഇവിടെ രൂപീകരിച്ചയുടൻ, അടിത്തറ പാകി, നിർമ്മാണം നടന്നു, ഇപ്പോൾ അത് പ്രവർത്തനം ആരംഭിച്ചു," ശ്രീ മോദി പറഞ്ഞു.

ഒരു ലോജിസ്റ്റിക്സ് ഹബ്ബായി ഈ മേഖലയുടെ ഉയർന്നുവരുന്ന പങ്കിലേക്ക് ശ്രദ്ധ ആകർഷിച്ച പ്രധാനമന്ത്രി, ഈ പ്രദേശം രണ്ട് പ്രധാന ചരക്ക് ഇടനാഴികളുടെ കേന്ദ്രമായി മാറുകയാണെന്ന് ചൂണ്ടിക്കാട്ടി, ഗുഡ്സ് ട്രെയിനുകൾക്കായി സ്ഥാപിച്ച പ്രത്യേക റെയിൽവേ ട്രാക്കുകൾ, ബംഗാൾ, ഗുജറാത്ത് കടലുകളുമായുള്ള ഉത്തരേന്ത്യയുടെ ബന്ധം വർദ്ധിപ്പിച്ചു. ദാദ്രി ഈ രണ്ട് ഇടനാഴികളും സംഗമിക്കുന്ന തന്ത്രപ്രധാനമായ സ്ഥലമാണെന്നും, അതായത് കർഷകർ ഇവിടെ വളർത്തുന്നതും വ്യവസായങ്ങൾ ഉൽപ്പാദിപ്പിക്കുന്നതും കരമാർഗവും വായുമാർഗവും ലോകത്തിന്റെ എല്ലാ കോണുകളിലും വേഗത്തിൽ എത്തിച്ചേരാൻ കഴിയുമെന്നും അദ്ദേഹം അഭിപ്രായപ്പെട്ടു. "ഇത്തരത്തിലുള്ള മൾട്ടി-മോഡൽ കണക്റ്റിവിറ്റി ഉത്തർപ്രദേശിനെ ലോകമെമ്പാടുമുള്ള നിക്ഷേപകരുടെ ഒരു പ്രധാന ആകർഷണമാക്കി മാറ്റുന്നു," പ്രധാനമന്ത്രി മോദി വിശദീകരിച്ചു.

മേഖലയുടെ പ്രതിച്ഛായയിലെ പരിവർത്തനത്തെ അഭിസംബോധന ചെയ്തുകൊണ്ട് പ്രധാനമന്ത്രി പറഞ്ഞു. "ഇന്ന്, നോയിഡ ലോകത്തെ മുഴുവൻ സ്വാഗതം ചെയ്യാൻ തയ്യാറാണ്. ആത്മനിർഭർ ഭാരത് എന്ന ദൃഢനിശ്ചയത്തെ ഈ മേഖല മുഴുവൻ ശക്തിപ്പെടുത്തുകയാണ്”.

ഈ പദ്ധതി യാഥാർത്ഥ്യമാക്കുന്നതിനായി ഭൂമി വിട്ടുകൊടുത്ത കർഷകരോട് പ്രധാനമന്ത്രി നന്ദി പറഞ്ഞു, കൃഷിയും കാർഷികമേഖലയുേം ഈ മേഖലയുടെ സമ്പദ്‌വ്യവസ്ഥയിൽ വലിയ പ്രാധാന്യമുള്ളതാണെന്ന് അദ്ദേഹം ചൂണ്ടിക്കാട്ടി. ആധുനിക കണക്റ്റിവിറ്റിയുടെ വികാസം പടിഞ്ഞാറൻ യുപിയിലെ ഭക്ഷ്യ സംസ്‌കരണ സാധ്യതകളെ കൂടുതൽ വർദ്ധിപ്പിക്കുമെന്ന് ശ്രീ മോദി അഭിപ്രായപ്പെട്ടു, "ഇവിടെ നിന്നുള്ള കാർഷിക ഉൽപ്പന്നങ്ങൾ ഇപ്പോൾ കൂടുതൽ കാര്യക്ഷമമായി ആഗോള വിപണികളിൽ എത്തും" എന്ന് അദ്ദേഹം കൂട്ടിച്ചേർത്തു.

ഇന്ത്യ അസംസ്കൃത എണ്ണയെ ആശ്രയിക്കുന്നത് കുറയ്ക്കുന്നതിൽ കരിമ്പ് കർഷകരുടെ സംഭാവനയെ അംഗീകരിച്ച പ്രധാനമന്ത്രി, കരിമ്പിൽ നിന്ന് ഉത്പാദിപ്പിക്കുന്ന എഥനോളിന്റെ പ്രധാന പങ്ക് എടുത്തുപറഞ്ഞു. എഥനോൾ ഉൽപാദനത്തിൽ വർദ്ധനവും പെട്രോളുമായി കലർത്തലും ഇല്ലായിരുന്നെങ്കിൽ, ഇന്ത്യയ്ക്ക് നാലര കോടി ബാരൽ കൂടി, അതായത് പ്രതിവർഷം ഏകദേശം 700 കോടി ലിറ്റർ അസംസ്കൃത എണ്ണ ഇറക്കുമതി ചെയ്യേണ്ടിവരുമായിരുന്നുവെന്ന് പ്രധാനമന്ത്രി മോദി എടുത്തുപറഞ്ഞു, "പ്രതിസന്ധി സമയത്ത് നമ്മുടെ കർഷകരുടെ കഠിനാധ്വാനം രാജ്യത്തിന് വളരെ വലിയ ആശ്വാസം നൽകി" എന്ന് കൂട്ടിച്ചേർത്തു.

എഥനോൾ രാജ്യത്തിന് മാത്രമല്ല, കർഷകർക്കും വളരെയധികം ഗുണം ചെയ്തുവെന്നും, ഏകദേശം 1.5 ലക്ഷം കോടി രൂപയുടെ വിദേശനാണ്യം ലാഭിച്ചുവെന്നും പ്രധാനമന്ത്രി വിശദീകരിച്ചു. കരിമ്പ് കർഷകർക്ക് അവരുടെ കുടിശ്ശികയ്ക്കായി വർഷങ്ങളോളം കാത്തിരിക്കേണ്ടി വന്ന മുൻകാലങ്ങളെ അദ്ദേഹം ഓർമ്മിപ്പിച്ചു. "ഇന്ന്, നിലവിലെ ​ഗവൺമെന്റിന്റെ ശ്രമങ്ങൾക്ക് നന്ദി, കരിമ്പ് കർഷകരുടെ അവസ്ഥ ഗണ്യമായി മെച്ചപ്പെട്ടു," ശ്രീ മോദി പറഞ്ഞു.

വിമാനത്താവളങ്ങൾ കേവലം സൗകര്യങ്ങൾ മാത്രമല്ല, പുരോഗതിയുടെ ഉത്തേജകങ്ങളുമാണെന്ന് ഊന്നിപ്പറഞ്ഞ പ്രധാനമന്ത്രി, ഇന്ത്യയുടെ വ്യോമയാന അടിസ്ഥാന സൗകര്യങ്ങളുടെ ശ്രദ്ധേയമായ വികാസം ചൂണ്ടിക്കാട്ടി. ഇന്ന് 160-ലധികം വിമാനത്താവളങ്ങളുണ്ടെന്ന് എടുത്തുകാണിച്ച പ്രധാനമന്ത്രി മോദി, വ്യോമയാന കണക്റ്റിവിറ്റി ഇപ്പോൾ മെട്രോപൊളിറ്റൻ നഗരങ്ങളിൽ മാത്രമല്ല, ചെറിയ പട്ടണങ്ങളിലും എത്തുന്നുണ്ടെന്ന് അഭിപ്രായപ്പെട്ടു. "സാധാരണ ഇന്ത്യക്കാർക്ക് വിമാന യാത്ര പ്രാപ്യമാക്കിയിട്ടുണ്ട്," ശ്രീ മോദി ഉറപ്പിച്ചുപറഞ്ഞു, ഉത്തർപ്രദേശിലെ വിമാനത്താവളങ്ങളുടെ എണ്ണം പതിനേഴായി വർദ്ധിപ്പിച്ചിട്ടുണ്ടെന്ന് അദ്ദേഹം കൂട്ടിച്ചേർത്തു.

ഉഡാൻ പദ്ധതിയുടെ സ്വാധീനം എടുത്തുകാണിച്ചുകൊണ്ട്, വിമാനത്താവളങ്ങൾ നിർമ്മിക്കപ്പെടുമ്പോൾ തന്നെ, വിമാന നിരക്കുകൾ സാധാരണ കുടുംബങ്ങൾക്ക് എത്തിച്ചേരാനാകുന്ന വിധത്തിൽ നിലനിർത്താൻ ​ഗവൺമെന്റ് നിരന്തരം പരിശ്രമിച്ചുവെന്ന് പ്രധാനമന്ത്രി പറഞ്ഞു. ഉഡാൻ പദ്ധതി പ്രകാരം ടിക്കറ്റ് ബുക്ക് ചെയ്തുകൊണ്ട് ഒരു കോടി അറുപത് ലക്ഷത്തിലധികം പൗരന്മാർ താങ്ങാവുന്ന നിരക്കിൽ വിമാനയാത്ര നടത്തിയിട്ടുണ്ടെന്ന് ചൂണ്ടിക്കാട്ടിയ ശ്രീ മോദി, “അടുത്തിടെ, കേന്ദ്ര ​ഗവൺമെന്റ് ഏകദേശം 29,000 കോടി രൂപയുടെ അംഗീകാരത്തോടെ ഉഡാൻ പദ്ധതി കൂടുതൽ വിപുലീകരിച്ചു. വരും വർഷങ്ങളിൽ ചെറിയ നഗരങ്ങളിൽ 100 ​​പുതിയ വിമാനത്താവളങ്ങളും 200 പുതിയ ഹെലിപാഡുകളും നിർമ്മിക്കും. യുപിക്കും ഇതിൽ നിന്ന് വളരെയധികം പ്രയോജനം ലഭിക്കും.”

ഇന്ത്യയുടെ അതിവേഗം വളരുന്ന വ്യോമയാന മേഖലയെക്കുറിച്ച് സംസാരിക്കുമ്പോൾ, പുതിയ വിമാനത്താവളങ്ങൾ നിർമ്മിക്കപ്പെടുന്നതിനനുസരിച്ച്, പുതിയ വിമാനങ്ങൾക്കായുള്ള ആവശ്യവും വർദ്ധിച്ചുവരികയാണെന്നും വിവിധ വിമാനക്കമ്പനികൾ നൂറുകണക്കിന് പുതിയ വിമാനങ്ങൾക്ക് ഓർഡർ നൽകുന്നുണ്ടെന്നും പ്രധാനമന്ത്രി ചൂണ്ടിക്കാട്ടി. പൈലറ്റുമാർ, ക്യാബിൻ ക്രൂ, മെയിന്റനൻസ് പ്രൊഫഷണലുകൾ എന്നിവരുൾപ്പെടെയുള്ള യുവാക്കൾക്ക് ഇത് വളരെയധികം അവസരങ്ങൾ സൃഷ്ടിക്കുന്നുവെന്ന് ശ്രീ മോദി നിരീക്ഷിച്ചു. വർദ്ധിച്ചുവരുന്ന ഈ ആവശ്യം നിറവേറ്റുന്നതിനായി "നമ്മുടെ ​ഗവൺമെന്റ് വ്യോമയാന മേഖലയിലെ പരിശീലന സൗകര്യങ്ങളും വികസിപ്പിക്കുകയാണ്" എന്നും അദ്ദേഹം കൂട്ടിച്ചേർത്തു.

ഇന്ത്യയുടെ വ്യോമയാന ആവാസവ്യവസ്ഥയിലെ ഒരു നിർണായക വിടവ് പരിഹരിച്ചുകൊണ്ട്, മെയിന്റനൻസ്, റിപ്പയർ, ഓവർഹോൾ (എംആർഒ) മേഖലയിലേക്ക് പ്രധാനമന്ത്രി ശ്രദ്ധ ആകർഷിച്ചു, ഇന്ത്യൻ വിമാനങ്ങളിൽ 85 ശതമാനവും ഇപ്പോഴും എംആർഒ സേവനങ്ങൾക്കായി വിദേശത്തേക്ക് പോകേണ്ടതുണ്ടെന്ന് അദ്ദേഹം ചൂണ്ടിക്കാട്ടി. എംആർഒ മേഖലയിലും ഇന്ത്യയെ സ്വയംപര്യാപ്തമാക്കാൻ ​ഗവൺമെന്റ് ദൃഢനിശ്ചയം ചെയ്തിട്ടുണ്ടെന്ന് പ്രധാനമന്ത്രി മോദി ചൂണ്ടിക്കാട്ടി, ഇന്ന് ജെവാറിൽ ഒരു എംആർഒ സൗകര്യത്തിന് തറക്കല്ലിട്ടതായി അദ്ദേഹം എടുത്തുപറഞ്ഞു. “സജ്ജമാകുമ്പോൾ, ഇന്ത്യയിലും വിദേശത്തുമുള്ള വിമാനങ്ങൾ ഇത് ഉപയോഗിക്കും, രാജ്യത്തിന് വരുമാനം ഉണ്ടാക്കും, നമ്മുടെ പണം ഇന്ത്യയ്ക്കുള്ളിൽ സൂക്ഷിക്കും, യുവാക്കൾക്ക് നിരവധി തൊഴിലവസരങ്ങൾ സൃഷ്ടിക്കും,” ശ്രീ മോദി പ്രഖ്യാപിച്ചു.

പൗരന്മാരുടെ സൗകര്യം ഉറപ്പാക്കുന്നതിനും അവരുടെ സമയവും പണവും ലാഭിക്കുന്നതിനും ഗവൺമെന്റിന്റെ മുൻഗണന അടിവരയിട്ടുകൊണ്ട്, മെട്രോ, വന്ദേ ഭാരത് തുടങ്ങിയ ആധുനിക റെയിൽ സേവനങ്ങളുടെ വിപുലീകരണത്തെക്കുറിച്ച് പ്രധാനമന്ത്രി സംസാരിച്ചു. "ഡൽഹി-മീററ്റ് നമോ ഭാരത് റെയിൽ ഇതിനകം രണ്ടര കോടിയിലധികം യാത്രക്കാർ ഉപയോഗിച്ചു കഴിഞ്ഞു. മണിക്കൂറുകൾ എടുത്തിരുന്ന ഡൽഹിക്കും മീററ്റിനും ഇടയിലുള്ള യാത്ര ഇപ്പോൾ മിനിറ്റുകൾക്കുള്ളിൽ പൂർത്തിയാകുന്നു," പ്രധാനമന്ത്രി മോദി പറഞ്ഞു.

ഒരു വികസിത ഭാരതത്തിനായി ആധുനിക അടിസ്ഥാന സൗകര്യങ്ങളിൽ അഭൂതപൂർവമായ നിക്ഷേപം അടിവരയിട്ടുകൊണ്ട്, കഴിഞ്ഞ പതിനൊന്ന് വർഷത്തിനിടെ, അടിസ്ഥാന സൗകര്യ ബജറ്റ് ആറ് മടങ്ങ് വർദ്ധിപ്പിച്ചിട്ടുണ്ടെന്നും, ഹൈവേകൾക്കും എക്സ്പ്രസ് വേകൾക്കുമായി 17 ലക്ഷം കോടി രൂപ ചെലവഴിച്ചതായും ഒരു ലക്ഷം കിലോമീറ്ററിലധികം ഹൈവേകൾ നിർമ്മിച്ചതായും പ്രധാനമന്ത്രി പങ്കുവെച്ചു. 2014 ന് മുമ്പ് 20,000 കിലോമീറ്ററായിരുന്നു റെയിൽവേ വൈദ്യുതീകരണം, അതിനുശേഷം 40,000 കിലോമീറ്ററിലധികം വളർന്നു, ബ്രോഡ്-ഗേജ് ശൃംഖലയുടെ ഏകദേശം 100 ശതമാനവും ഇപ്പോൾ വൈദ്യുതീകരിച്ചു. ആദ്യമായി കശ്മീർ താഴ്‌വരയും വടക്കുകിഴക്കൻ സംസ്ഥാനങ്ങളുടെ തലസ്ഥാനങ്ങളും റെയിൽ ശൃംഖലയുമായി ബന്ധിപ്പിക്കപ്പെടുന്നുണ്ടെന്നും, കഴിഞ്ഞ ദശകത്തിൽ തുറമുഖ ശേഷി ഇരട്ടിയിലധികം വർദ്ധിച്ചിട്ടുണ്ടെന്നും ഉൾനാടൻ ജലപാതകളുടെ എണ്ണം വർദ്ധിച്ചുകൊണ്ടിരിക്കുന്നുവെന്നും പ്രധാനമന്ത്രി എടുത്തുപറഞ്ഞു. "ഒരു വികസിത ഭാരതം കെട്ടിപ്പടുക്കുന്നതിന് ആവശ്യമായ എല്ലാ മേഖലകളിലും ഇന്ത്യ അതിവേഗം പ്രവർത്തിക്കുന്നു," ശ്രീ മോദി പറഞ്ഞു.

ആഗോള വെല്ലുവിളികൾ നേരിടുന്നതിൽ കൂട്ടായ പരിശ്രമത്തിനും ദേശീയ ഐക്യത്തിനും ആഹ്വാനം ചെയ്ത പ്രധാനമന്ത്രി, നിലവിലുള്ള സംഘർഷത്തിൽ നിന്ന് ഉടലെടുക്കുന്ന പ്രതിസന്ധിയെ നേരിടുന്നതിനെക്കുറിച്ച് പാർലമെന്റിൽ ദീർഘനേരം സംസാരിക്കുകയും മുഖ്യമന്ത്രിമാരുമായി വിശദമായ ചർച്ചകൾ നടത്തുകയും ചെയ്തിട്ടുണ്ടെന്ന് പറഞ്ഞു. ശാന്തമായ മനസ്സോടെയും ക്ഷമയോടെയും ഈ പ്രതിസന്ധിയെ നേരിടാൻ അദ്ദേഹം ജനങ്ങളോട് അഭ്യർത്ഥിച്ചു, അത് ഇന്ത്യക്കാരുടെ ഏറ്റവും വലിയ ശക്തിയാണെന്ന് അദ്ദേഹം പറഞ്ഞു. ഇന്ത്യക്കാരുടെയും ഇന്ത്യയുടെയും താൽപ്പര്യം എന്താണോ അത് മാത്രമാണ് ഇന്ത്യാ ഗവൺമെന്റിന്റെ നയവും തന്ത്രവുമെന്ന് പ്രധാനമന്ത്രി മോദി ആവർത്തിച്ചു. "രാജ്യത്തിന്റെ ഐക്യ ശ്രമങ്ങൾക്ക് എല്ലാ രാഷ്ട്രീയ പാർട്ടികളും ശക്തി പകരുമെന്ന് എനിക്ക് പൂർണ്ണ വിശ്വാസമുണ്ട്", ശ്രീ മോദി പറഞ്ഞു.