مدھیہ پردیش کے دھار اور کھرگون اضلاع کے کسانوں نے نئی دہلی میں زراعت اور کسانوں کی بہبود اور دیہی ترقیات کے مرکزی وزیر جناب شیوراج سنگھ چوہان سے ملاقات کی اور انہیں لوکی کی کاشت میں غیر معیاری بیجوں اور پودوں کی وجہ سے ہونے والے بھاری نقصانات سے آگاہ کیا ۔  اس مسئلے کو سنجیدگی سے لیتے ہوئے، جناب چوہان نے اسے کسانوں کی روزی روٹی پر براہ راست حملہ قرار دیا اور حکام کو فوری طور پر ہدایت دی کہ وہ متاثرہ کسانوں کے لئے  مناسب معاوضہ کو یقینی بنائیں اور اس کے لئے ذمہ دار کمپنی کے خلاف سخت قانونی کارروائی شروع کریں ۔

وزیر موصوف کی ہدایات پر عمل کرتے ہوئے فوری انتظامی کارروائی کی گئی ۔  متعلقہ کمپنی ننہمس انڈیا پرائیویٹ لمیٹڈ ، حیدرآباد ، تلنگانہ کے خلاف دھار ضلع کے ماناور پولیس اسٹیشن میں ایف آئی آر درج کی گئی ہے اور جانچ شروع کر دی  گئی ہے ۔

کسانوں کے تئیں اپنے عزم کا اعادہ کرتے ہوئے جناب شیوراج سنگھ چوہان نے کہا کہ کسانوں کے مفادات ان کی اولین ترجیح ہیں ۔  دھار اور کھرگون کے کسانوں کی یہ شکایات سننے کے بعد کہ لوکی کے ناقص بیجوں اور پودوں کی وجہ سے فصلوں کو شدید نقصان پہنچا ہے ، انہوں نے متعلقہ حکام کو واضح ہدایات جاری کیں کہ وہ متاثرہ کسانوں کے لیے انصاف کو یقینی بنائیں اور مناسب معاوضہ فراہم کرنے کے عمل کو تیز کریں ۔   انہوں نے یہ بھی ہدایت دی کہ اس معاملے کے لئے ذمہ دار کمپنی کے خلاف سخت قانونی کارروائی کی جائے ۔

ان ہدایات پر عمل کرتے ہوئے ، انتظامی کارروائی میں تیزی لائی گئی اور ضلع دھار کے ماناور پولیس اسٹیشن میں ایف آئی آر نمبر  266 درج کی گئی۔   یہ مقدمہ  بھارتی نیائے سنہتا (بی این ایس) 2023 کی دفعہ 318 (4) اور 324 (5) ، ضروری اشیاء ایکٹ 1955 کی دفعہ 3 اور 7 اور بیجوں سے متعلق ایکٹ 1966 کی دفعہ 19 کے تحت درج کیا گیا ہے ۔  ننہمس انڈیا پرائیویٹ لمیٹڈ ، حیدرآباد ، تلنگانہ کو ایف آئی آر میں ملزم کے طور پر نامزد کیا گیا ہے ۔

کسانوں کے مطابق انہوں نے نومبر 2025 میں مختلف نرسریوں اور زرعی خدمات کے مراکز سے مذکورہ کمپنی کے بیج اور پودے خریدے تھے ۔  تاہم ، بوائی اور روپائی کے بعد ، لوکی کی فصل توقع کے مطابق پیداوار دینے میں ناکام رہی ۔  پھل چھوٹے تھے ، پیلے رنگ کے ہو گئے ، اور وقت سے پہلے گرنے لگے ۔  فصل کی پیداوار میں تیزی سے کمی کے بعد کسانوں نے 17 فروری 2026 کو شکایت درج کرائی ۔

اس کے بعد زرعی سائنسدانوں اور محکمہ جاتی عہدیداروں نے تحقیقات کیں ۔  ابتدائی نتائج سے پتہ چلا ہے کہ اس طرح کے بیجوں سے تیار کردہ غیر معیاری بیج اور پودے کسانوں کو تصدیق شدہ مواد کی آڑ میں فروخت کیے گئے تھے ، جس کی وجہ سے کسانوں کو کافی مالی نقصان ہوا ۔

نئی دہلی میں اس معاملے سے آگاہ کیے جانے پر ، جناب چوہان نے مشاہدہ کیا کہ یہ مسئلہ صرف فصلوں کی ناکامی کا نہیں تھا ، بلکہ کسانوں کے اعتماد ، محنت اور سرمایہ کاری کو کمزور کرنے کا تھا ۔  معاملے کو سنجیدگی سے لیتے ہوئے،  انہوں نے ہدایت دی کہ متعلقہ قانونی دفعات کے تحت مقدمہ درج کیا جائے اور اس کی مکمل تحقیقات کی جائے ۔  لوکی کی ناقص قسم "روبستا" پر پابندی لگانے کی ہدایات بھی جاری کی گئی ہیں ۔

ایک سخت پیغام بھیجتے ہوئے جناب شیوراج سنگھ چوہان نے کہا کہ کسانوں کے خلاف نا انصافی ، لاپرواہی یا دھوکہ دہی کو کسی بھی حالت میں برداشت نہیں کیا جائے گا اور حکومت متاثرہ کسانوں کے ساتھ مضبوطی سے کھڑی ہے ۔  دھار اور کھرگون کے کسانوں سے وابستہ واقعہ اس بات کی عکاسی کرتا ہے کہ جب کسانوں کے خدشات براہ راست مرکزی وزیر تک پہنچتے ہیں، تو انہیں نہ صرف باضابطہ اعتراف کے ساتھ بلکہ معا وضے اور سخت قانونی اقدامات دونوں کے لحاظ سے فیصلہ کن کارروائی کے ساتھ حل کیا جاتا ہے ۔

جناب چوہان نے کسانوں کی شکایات کے فوری ازالے ، غیر معیاری اور جعلی بیجوں اور زرعی پیداوار  کے خلاف سخت کارروائی کرنے اور کسانوں کے لئے حقیقی راحت کو یقینی بنانے پر مسلسل زور دیا ہے ۔  انہوں نے بار بار واضح کیا ہے کہ جو لوگ بیجوں اور زرعی اجناس کے معیار سے سمجھوتہ کرتے ہیں   اور اس طرح کسانوں کی محنت ، فصلوں اور مستقبل کو خطرے میں ڈالتے ہیں ، انہیں کسی بھی قیمت پر بخشا نہیں جائے گا ۔

*****

) ش ح –م ع  -ق ر)

U.No. 5966