ମୋରାରଜୀ ଦେଶାଇ ଜାତୀୟ ଯୋଗ ପ୍ରତିଷ୍ଠାନ (ଏମଡିଏନଆଇୱାଇ), ଆୟୁଷ ମନ୍ତ୍ରଣାଳୟ ପକ୍ଷରୁ ଆଜି ମହାରାଷ୍ଟ୍ରର ବୁଲଧାନା ଜିଲ୍ଲା ଲୋନାରସ୍ଥିତ ଛତ୍ରପତି ଶ୍ରୀ ଶିବାଜୀ ମହାରାଜ ଉଦ୍ୟାନଠାରେ ଯୋଗ ମହୋତ୍ସବ - ୨୦୨୬ ଆୟୋଜନ କରାଯାଇଥିଲା। ତ୍ରିକୋଣାସନ ପ୍ରଦର୍ଶନ କରୁଥିବା ସର୍ବବୃହତ ସମାବେଶ ପାଇଁ ଏସିଆ ବୁକ୍ ଅଫ୍ ରେକର୍ଡସ୍ ରେ ସ୍ଥାନ ପାଇବା ସହିତ ଏହି କାର୍ଯ୍ୟକ୍ରମ ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ ଭାବରେ ଚିହ୍ନିତ ହୋଇଛି।

ପ୍ରାୟ ୫,୦୦୦ ଅଂଶଗ୍ରହଣକାରୀ ଭୋର ସମୟରେ ସାଧାରଣ ଯୋଗ ପ୍ରୋଟୋକଲ୍ (ସିୱାଇପି) ପ୍ରଦର୍ଶନ କରିବା ପାଇଁ ଏକତ୍ରିତ ହୋଇଥିଲେ। ଏହା ଐତିହାସିକ ଲୋନାର ସହରକୁ ସାମୂହିକ ସୁସ୍ଥତାର ଏକ ଚଳଚଞ୍ଚଳ କେନ୍ଦ୍ରରେ ପରିଣତ କରିଥିଲା। ଏହି ବୃହତ୍ ମାତ୍ରାରେ ଅଂଶଗ୍ରହଣ ଏକତା, ସ୍ୱାସ୍ଥ୍ୟ ଏବଂ କଲ୍ୟାଣକୁ ପ୍ରୋତ୍ସାହିତ କରିବା ପାଇଁ ଯୋଗର ଏକ ଶକ୍ତିଶାଳୀ ମାଧ୍ୟମ ଭାବରେ ବୃଦ୍ଧି ପାଉଥିବା ବିଶ୍ୱସ୍ତରୀୟ ଗ୍ରହଣୀୟତାକୁ ଆଲୋକିତ କରିଥିଲା।

କେନ୍ଦ୍ର ଆୟୁଷ ରାଷ୍ଟ୍ରମନ୍ତ୍ରୀ (ସ୍ୱାଧୀନ ଦାୟିତ୍ୱ) ଏବଂ ସ୍ୱାସ୍ଥ୍ୟ ଏବଂ ପରିବାର କଲ୍ୟାଣ ରାଷ୍ଟ୍ରମନ୍ତ୍ରୀ ଶ୍ରୀ ପ୍ରତାପରାଓ ଜାଧବ ଏହି କାର୍ଯ୍ୟକ୍ରମକୁ "ଅନ୍ତର୍ଜାତୀୟ ଯୋଗ ଦିବସ (ଆଇଡିୱାଇ) ୨୦୨୬ ପାଇଁ ୭୫ ଦିନିଆ କାଉଣ୍ଟଡାଉନର ଏକ ଦୃଢ଼ ଆରମ୍ଭ" ଭାବରେ ବର୍ଣ୍ଣନା କରିଥିଲେ। ସେ ଉଲ୍ଲେଖ କରିଥିଲେ ଯେ, ଭୌଗୋଳିକ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ ଲୋନାର ଅଞ୍ଚଳରେ ଏହି ଉତ୍ସବ ଆୟୋଜନ କରିବା ସାମଗ୍ରିକ ସ୍ୱାସ୍ଥ୍ୟ ଏବଂ ସମନ୍ୱୟ ପ୍ରତି ଏକ ବ୍ୟାପକ ବିଶ୍ୱ ଜାଗରଣର ପ୍ରତୀକ। ଯୋଗର ଆବଶ୍ୟକତା ଉପରେ ଗୁରୁତ୍ୱାରୋପ କରି ସେ କହିଥିଲେ ଯେ ଏହି ଅଭ୍ୟାସ ଶାରୀରିକ ସ୍ୱାସ୍ଥ୍ୟ, ମାନସିକ ସୁସ୍ଥତା ଏବଂ ଭାବପ୍ରବଣ ସନ୍ତୁଳନକୁ ବୃଦ୍ଧି କରି ଚାଲିଛି।

ରେକର୍ଡ ସ୍ଥାପନକାରୀ ତ୍ରିକୋଣାସନ ପ୍ରଦର୍ଶନର ଗୁରୁତ୍ୱ ଉପରେ ଆଲୋକପାତ କରି, ଶ୍ରୀ ଜାଧବ କହିଛନ୍ତି ଯେ ଏହି ସଫଳତା ଯୋଗରେ ନିହିତ ସାମୂହିକ ଅଂଶଗ୍ରହଣ ଏବଂ ସହଭାଗୀ ସୁସ୍ଥତାର ଭାବନାକୁ ପ୍ରତିଫଳିତ କରେ। ସେ ଆୟୁଷ ଆହାରର ଗୁରୁତ୍ୱ ଉପରେ ମଧ୍ୟ ଗୁରୁତ୍ୱାରୋପ କରିଥିଲେ। ରୋଗ ପ୍ରତିରୋଧକ ଶକ୍ତି ବୃଦ୍ଧି ଏବଂ ସାମଗ୍ରିକ ସ୍ୱାସ୍ଥ୍ୟକୁ ପ୍ରୋତ୍ସାହିତ କରିବାରେ ବାଜରା, ମାଣ୍ଡିଆ, ନଡ଼ିଆ ତେଲ ଏବଂ ଔଷଧୀୟ ମସଲା ଭଳି ପାରମ୍ପରିକ ଏବଂ ପ୍ରାକୃତିକ ଖାଦ୍ୟର ଭୂମିକା ଉପରେ ସେ ଉଲ୍ଲେଖ କରିଥିଲେ।

ସମାବେଶକୁ ସମ୍ବୋଧିତ କରି, ଆୟୁଷ ମନ୍ତ୍ରଣାଳୟର ଯୁଗ୍ମ ସଚିବ ଶ୍ରୀମତୀ ମୋନାଲିସା ଦାଶ ଯୋଗକୁ ବିଶ୍ୱ ପ୍ରତି ଭାରତର ସବୁଠାରୁ ମୂଲ୍ୟବାନ ଅବଦାନ ମଧ୍ୟରୁ ଗୋଟିଏ ଭାବରେ ବର୍ଣ୍ଣନା କରିଥିଲେ। ଉଲ୍ଲେଖ କରିଥିଲେ ଯେ ଏହା ଏକ ଜୀବନଶୈଳୀକୁ ପ୍ରତିନିଧିତ୍ୱ କରେ ଯାହା ମନ, ଶରୀର ଏବଂ ଆତ୍ମା ମଧ୍ୟରେ ସମନ୍ୱୟକୁ ପ୍ରୋତ୍ସାହିତ କରେ।

ଏହି କାର୍ଯ୍ୟକ୍ରମରେ ଏମଡିଏନଆଇୱାଇର ନିର୍ଦ୍ଦେଶକ ପ୍ରଫେସର (ଡକ୍ଟର) କାଶୀନାଥ ସମାଗଣ୍ଡିଙ୍କ ନେତୃତ୍ୱରେ ସାଧାରଣ ଯୋଗ ପ୍ରୋଟୋକଲ୍ ଉପରେ ଏକ ସିଧାପ୍ରସାରଣ ପ୍ରଦର୍ଶନ କରାଯାଇଥିଲା। ଏହି ଅଧିବେଶନରେ ଯୋଗାସନ, ପ୍ରାଣାୟମ ଏବଂ ଧ୍ୟାନ ଅନ୍ତର୍ଭୁକ୍ତ ଥିଲା, ଯାହା ଅଂଶଗ୍ରହଣକାରୀମାନଙ୍କୁ ଯୋଗର ବ୍ୟାପକ ଲାଭ ଅନୁଭବ କରିବାକୁ ସକ୍ଷମ କରିଥିଲା।

ଯୋଗ ମହୋତ୍ସବ - ୨୦୨୬ରେ ଆୟୁଷ ମନ୍ତ୍ରଣାଳୟର ଅନେକ ପ୍ରମୁଖ ପଦକ୍ଷେପକୁ ମଧ୍ୟ ପ୍ରଦର୍ଶନ କରାଯାଇଥିଲା। ଯେଉଁଥିରେ "ବିମାନ ଯାତ୍ରା ପାଇଁ ଯୋଗ" ପ୍ରୋଟୋକଲ, "ଅଣ-ସଂକ୍ରମିତ ରୋଗ ପାଇଁ ୧୦ ଯୋଗ ପ୍ରୋଟୋକଲ," ଏବଂ ଯୋଗକୁ ଦୈନନ୍ଦିନ ଜୀବନରେ ସାମିଲ କରିବା ପାଇଁ ଯୋଗ ୩୬୫ ଅଭିଯାନ ଅନ୍ତର୍ଭୁକ୍ତ। ୧୪ ଦିନର ମାଗଣା ମାର୍ଗଦର୍ଶିତ ଯୋଗ ଅଭ୍ୟାସ ପ୍ରଦାନ କରୁଥିବା ଏକ ଟୋଲ୍-ଫ୍ରି ହେଲ୍ପଲାଇନ୍ ନମ୍ଵର (୧୮୦୦-୩୧୫-୭୦୦୮) ସମ୍ପର୍କରେ ମଧ୍ୟ ଉଲ୍ଳେଖ କରାଯାଇଥିଲା।

ଏହି କାର୍ଯ୍ୟକ୍ରମରେ ୧୨ତମ ଅନ୍ତର୍ଜାତୀୟ ଯୋଗ ଦିବସ (ଆଇଡିୱାଇ) ୨୦୨୬ ପାଇଁ ୭୫ ଦିନିଆ କାଉଣ୍ଟଡାଉନର ଆନୁଷ୍ଠାନିକ ଆରମ୍ଭ ହୋଇଥିଲା। କାର୍ଯ୍ୟକ୍ରମରେ ଆୟୁଷ ମନ୍ତ୍ରଣାଳୟର ବରିଷ୍ଠ ଅଧିକାରୀ, ଜିଲ୍ଲା ପ୍ରଶାସନର ପ୍ରତିନିଧି ଏବଂ ଅନ୍ୟାନ୍ୟ ସମ୍ମାନିତ ଅତିଥିମାନେ ଉପସ୍ଥିତ ଥିଲେ।

ବିଗତ ଏଗାର ସଂସ୍କରଣ ମଧ୍ୟରେ, ଅନ୍ତର୍ଜାତୀୟ ଯୋଗ ଦିବସ ସ୍ୱାସ୍ଥ୍ୟ ଏବଂ କଲ୍ୟାଣ ପାଇଁ ସର୍ବବୃହତ ବିଶ୍ୱ ଆନ୍ଦୋଳନ ମଧ୍ୟରୁ ଗୋଟିଏ ଭାବରେ ମୁଣ୍ଡ ଟେକିଛି, ଯେଉଁଥିରେ ପ୍ରତିବର୍ଷ ଅନ୍ତର୍ଜାତୀୟ ଅଂଶଗ୍ରହଣ ବୃଦ୍ଧି ପାଉଛି। ଆଗାମୀ ଦ୍ୱାଦଶ ସଂସ୍କରଣରେ ଅଣ-ସଂକ୍ରାମକ ରୋଗର ସମାଧାନ, ବାର୍ଦ୍ଧକ୍ୟ ଅବସ୍ଥାରେ ଉତ୍ତମ ସ୍ୱାସ୍ଥ୍ୟକୁ ପ୍ରୋତ୍ସାହନ ଏବଂ ଯୋଗ ସହିତ କୃତ୍ରିମ ବୁଦ୍ଧିମତ୍ତା ସମେତ ଉଦୀୟମାନ ପ୍ରଯୁକ୍ତିବିଦ୍ୟାର ସମନ୍ୱୟ ଉପରେ ଧ୍ୟାନ ଦିଆଯିବ।

ଆୟୁଷ ମନ୍ତ୍ରଣାଳୟ ଜନ ଭାଗୀଦାରୀ ମାଧ୍ୟମରେ ଯୋଗକୁ ଏକ ଗଣ ଆନ୍ଦୋଳନ ଭାବରେ ପ୍ରୋତ୍ସାହିତ କରିବା ପାଇଁ ନିଜର ପ୍ରତିବଦ୍ଧତାକୁ ପୁନଃସ୍ଥାପିତ କରିଛି। ଆଇଡିୱାଇ ୨୦୨୬ ପୂର୍ବରୁ ସାରା ଦେଶରେ ଏବଂ ବିଶ୍ୱବ୍ୟାପୀ ବ୍ୟାପକ ଅଂଶଗ୍ରହଣକୁ ଉତ୍ସାହିତ କରୁଛି।

***

SSP