ক্ৰিয়েট ইন ইণ্ডিয়া চেলেঞ্জ (চিআইচি)ৰ প্ৰথম ছিজনৰ অধীনত ‘ইনোভেট টু এডুকেট’ চেলেঞ্জৰ মুখ্য লক্ষ্য আছিল শিক্ষা আৰু প্ৰযুক্তিৰ সৃষ্টিশীল সমন্বয়ৰ জৰিয়তে উদ্ভাৱনক উৎসাহিত কৰা। ছাত্ৰ-ছাত্ৰী, ষ্টাৰ্টআপ আৰু উদ্ভাৱকসকলে এই প্ৰত্যাহ্বানত হেণ্ডহেল্ড শিক্ষণ ডিভাইচৰ পৰিকল্পনা আৰু বিকাশৰ ওপৰত বিশেষ গুৰুত্ব আৰোপ কৰিছিল।

প্ৰত্যাহ্বানটোৰ গঠনমূলক কাঠামোৱে অংশগ্ৰহণকাৰীসকলক এনে সমাধান পৰিকল্পনা কৰিবলৈ অনুপ্ৰাণিত কৰিছিল, যিবোৰ উদ্ভাৱনীমূলক আৰু সুলভ হোৱাৰ লগতে বিভিন্ন শিক্ষণ প্ৰয়োজনীয়তা থকা শিশু, যেনে দৃষ্টিশক্তিহীন আৰু স্নায়ুবিচ্ছিন্ন শিক্ষাৰ্থীসকলৰ বাবেও উপযোগী। এই পদক্ষেপে দেশৰ বিভিন্ন প্ৰান্তৰ পৰা ব্যাপক অংশগ্ৰহণ আকৰ্ষণ কৰে, য’ত বিভিন্ন পটভূমিৰ ছাত্ৰ-ছাত্ৰী আৰু উদ্ভাৱকসকলো অন্তৰ্ভুক্ত আছিল। মন্ত্ৰালয়ৰ সহযোগত এটি উদ্যোগ সংস্থাই এই প্ৰত্যাহ্বানটো ৰূপায়ণ কৰিছিল আৰু বিদ্যালয়, বিশ্ববিদ্যালয় আদি প্ৰতিষ্ঠানত আউটৰিচ কাৰ্যসূচী গ্ৰহণ কৰিছিল, যাতে সকলো অংশীদাৰৰ সক্ৰিয় অংশগ্ৰহণ নিশ্চিত কৰা যায়।

প্ৰত্যাহ্বানৰ নিৰ্দেশনাসমূহে ১,০০০ টকাৰ সীমাৰ ভিতৰত হাৰ্ডৱেৰ উপাদান ব্যৱহাৰ কৰি হেণ্ডহেল্ড ডিভাইচসমূহ পৰিকল্পনা আৰু বিকাশ কৰিবলৈ খৰচৰ এক সুস্পষ্ট মানদণ্ড নিৰ্ধাৰণ কৰিছিল। ইয়াৰ মূল উদ্দেশ্য আছিল শৈক্ষিক প্ৰযুক্তি সমাধানৰ ক্ষেত্ৰত ব্যয়সাধ্যতা, সুলভতা আৰু মিতব্যয়ী উদ্ভাৱনক প্ৰসাৰিত কৰা। প্ৰাথমিকভাৱে নিৰ্বাচিত অংশগ্ৰহণকাৰীসকলৰ সৈতে মেণ্টৰিং আৰু কৰ্মশালাৰ অধিবেশন সম্পন্ন হোৱাৰ পিছত সমাধানসমূহ অধিক পৰিশোধিত আৰু উন্নত কৰা হৈছিল।

১,৮০০ৰো অধিক পঞ্জীয়নৰ পৰা মুঠ ১০টা চূড়ান্ত প্ৰতিযোগী দল নিৰ্বাচিত কৰা হয়। চৰ্টলিষ্ট কৰা দলসমূহক ক্ৰিয়েট’স্ফিয়াৰ, ৱেভছ ২০২৫ত তেওঁলোকৰ প্ৰ’ট’টাইপ প্ৰদৰ্শন কৰাৰ লগতে উদ্যোগৰ অংশীদাৰসকলৰ সৈতে সংযোগ স্থাপন কৰাৰ এক মূল্যবান সুযোগ প্ৰদান কৰা হৈছিল।

ইয়াৰ উপৰিও শীৰ্ষ তিনিটা বিজয়ী দলক তেওঁলোকৰ উদ্ভাৱন আৰু প্ৰচেষ্টাৰ স্বীকৃতি স্বৰূপে ৫০,০০০ টকা পৰ্যন্ত পুৰস্কাৰ ধন প্ৰদান কৰা হয়। প্ৰদৰ্শিত ডিজাইন আৰু প্ৰ’ট’টাইপসমূহে অভিগম্যতা, ইন্টাৰেক্টিভ শিক্ষণ আৰু প্ৰযুক্তি-সক্ষম শিক্ষাৰ বৈচিত্ৰ্যপূৰ্ণ পদ্ধতি স্পষ্টভাৱে প্ৰতিফলিত কৰিছিল।

শীৰ্ষ সন্মিলনৰ অন্তত ১০টা চূড়ান্ত প্ৰতিযোগী দলৰ ভিতৰত ৪টা দল ইতিমধ্যে ষ্টাৰ্টআপ ৰূপে বিকশিত হৈছে, আৰু ইয়াৰে ২টা ষ্টাৰ্টআপে ৱেভেক্স ষ্টাৰ্টআপ এক্সিলেটৰ প্ৰগ্ৰেমৰ জৰিয়তে ইনকিউবেচনৰ সুযোগ অনুসন্ধান কৰি আছে। ৱেভছ বজাৰৰ আউটৰিচ অনুষ্ঠানসমূহৰ জৰিয়তে বিজয়ীসকলক তেওঁলোকৰ সমাধানসমূহ বিস্তাৰ কৰিবলৈ সম্ভাৱ্য বিনিয়োগকাৰীৰ সৈতে মত বিনিময় কৰাৰ সুবিধাও প্ৰদান কৰা হৈছে।

এই তথ্য আজি লোকসভাত শ্ৰী বাসৱৰাজ বোম্মাইয়ে উত্থাপিত কৰা প্ৰশ্নৰ লিখিত উত্তৰত তথ্য আৰু সম্প্ৰচাৰ ৰাজ্যিক মন্ত্ৰী ড° এল মুৰুগানে দাখিল কৰে।

*****

Mahesh Kumar/ Vivek Vishwash/AA