ঐগী নুংশিরবা ইরৈচাশিং।

‘মন কি বাত’ তা অমুক হন্না তরাম্না ওকচরি। মার্চ থা অসি মালেমগী ওইনা লৈতাদবনা পীক থল্লে। কোবিদনা মরম ওইদুনা মালেম শীনবা থুংনা খুদোংচাদবা কয়া মায়োক্নখিবা অদু ঐখোয় খুদিংমক্না নিংশিংলি। তশেংনা, কোরোনাগী অৱাবা মরক্তগী মালেম অসি অনৌবা চাউখৎপগী লম্বীদা চঙশিনগনি হায়না ঐখোয়না থাজখি। অদুবু, মালেমগী তোঙান তোঙানবা মফমশিংদা লাল অমসুং মুক্নবগী ফিবম কয়া লাকখি। হৌজিক, ঐখোয়গা য়ুম্লোন্নবদা থা অমরোম অকনবা লাল অমা চৎথরি। গল্ফ লৈবাকশিংদা নুংশিরবা ঐখোয়গী ইমুং-মনুংগী মীওই লাখ কয়া থবক তৌদুনা লৈরি। মফম অদুদা লৈরিবা ভারতমচা করোর ১ হেনবদা মখল কয়াগী মতেং পাংলিবা গল্ফ লৈবাকশিংদা ঐনা তৌবীমল খঙবা উৎচরি।

মরুপশিং,

হৌজিক লাল শোক্নরিবা মফম অসি ঐখোয়গী দরকার ওইবা ইনর্জিগী মরুওইবা মফম অমনি। মসিনা মরম ওইদুনা, পেত্রোল অমসুং দিজলগী মতাংদা মালেম শীনবা থুংনা অৱাবা অমা মায়োক্নরে।

ঐখোয়গী মালেমগী লৈবাকশিংগা লৈনবা মরীশিংদা; তোঙান তোঙানবা লৈবাকশিংদগী ঐখোয়না ফংবা মতেং অমসুং হৌখিবা চহি ১০ দা লৈবাক অসিনা শাগৎখিবা মপাঙ্গলশিংনা ভারতনা থৌনা ফনা ফিবমশিং অসি মায়োক্নবা ঙম্লিবনি।

মরুপশিং,

ফিবমশিং অসি তশেংনা খুদোংথিনিঙাইনি। ঙসি, মন কি বাতকী খুৎথাংদা, অৱাবা অসি মায়োক্ননবা ঐখোয় অমতা ওইনবা ঐনা অমুক হন্না ঐগী ইরৈচাশিংদা হায়জরি। থৌদোক অসিদা রাজনিতি তৌবা মতম নত্তে। মসি লৈবাক অসিগী মীওই করোর ১৪০ গী য়াইফনবা খনবা মতম অমনি; রাজনিতিগী খুদোংচাবা লৌনবা মফম লৈতে। মরম অদুনা, তোকঙা শন্দোকপনা লৈবাক অসিগী অচৌবা অমাঙবা অমা থোকহল্লে। মীয়াম মীকুপ-নাহুম শিংনা লৈনবা অমসুং তোকঙা থাজদনবা ঐনা হায়জরি। সরকারনা পীবা পাউশিং খক্ত থাজবীয়ু অমসুং মদুদা য়ুম্ফম ওইদুনা থবকশিং পায়খৎকনি। ঐখোয়গী মীয়াম করোর ১৪০ গী মপাঙ্গল খক্তনা মমাঙদা অৱাবশিং মায়োক্নখিবনিগুম্না; হন্দক্কী অৱাবা অসিসু, ঐখোয় পুন্না মাইপাকপা ঙমগনি হায়না ঐনা থাজৈ। 

ঐগী নুংশিরবা ইরৈচাশিং,

ভারতকী মপাঙ্গল লৈবাক অসিগী মীওই করোর কয়াগী মখুত্ত লৈরি। ঙসি, মন কি বাত্ত, ঐখোয়গী মীয়াম মরক্ত লৈরিবা শরুক য়াবগী ৱাখল্লোন অদু মমি তাবা থবক অমা ঐনা অদোমদা ফোঙদোকপা পাম্মী। মসিগী থবক অদুদি ঐখোয়গী ইনাকখুল্লবা নাৎ অমসুং চৎনবীগা মরী লৈনবা গ্যাস ভারতম সর্ভেনি।

মসিগী পান্দমদি লৈবাক শীনবা থুংনা লৈরিবা খুৎই লাইরিকশিংগী মরমদা ই-পাউ খোমজিনবনি। গ্যান ভারতম এপ্পকী খুৎথাংদা সর্ভে অসিদা শরুক য়াগদবনি। করিগুম্বা অদোমগী খুৎই লাইরিক অমা লৈরবা নত্ত্রগা মদুগী মরমদা পাউ লৈরিবদি, মদুগী মমি অদু গ্যান ভারতম এপ্পতা শরুক য়াগদবনি। পীশিল্লকপা পাউ খুদিংমক মদু লৌশিন্দ্রিঙৈ মমাংদা মশক খঙদোক্কনি। হৌজিক ফাওবদা অরিবা খুৎই লাইরিক লিশিং কয়া শরুক য়ারকপদা ঐ হরাওবা ফাওই। খুদম ওইনা, অরুনাচল প্রদেসকী নামসাইদা লৈবা চাউ নানতিসিন্ধ লোকাং জিনা তাই ময়েক্কী খুৎই লাইরিকশিং পীরকখি। মসি ঐখোয়গী সিখকী চৎনবী অমসুং পঞ্জাবী লোলগা মরী লৈনবা ময়েক্নি। লুপা খরনা উনাদা ইবা খুৎই লাইরিক খর পীরকখি। রাজস্থানগী অবে জেন লাইব্রেরিনা কোরি মপাক্ত ইবা অরিবা খুৎই লাইরিকশিং পীরকখি। লাদাখতা লৈবা হেমিস মোনাষ্ট্রিনা মমল য়াম্লবা তিবেতান খুৎই লাইরিকশিংগী মরমদা ই-পাউ পীরকখি।

ঐনা মফম অসিদা খুদম খর খক পীরি। সর্ভে অসি জুন ফাওবা চৎথগনি। অদোমগী নাৎ অমসুং চৎনবীগা মরী লৈনবশিং শরুক য়ানবা ঐনা অদোমগী মফমদা হায়জরি।

ঐগী নুংশিরবা ইরৈচাশিং,

মালেমদা ভারত খ্বাইদগী নহা ওইবা লৈবাকনি। লৈবাক অসিগী নহারোলগী মপাঙ্গল লৈবাক অসি শেমগৎপদা শীজিন্নরি, মসিনা চাউনা মতেং পাংলি। লৈবাক শেমগৎপগী থৌদাং অসি মপুংফানবা মাই ভারত লুপনা অচৌবা থৌদাং অমা লৌরি। লুপ অসিনা লৈবাক অসিগী নহারোলশিং তোঙান তোঙানবা অফবা থবকশিংগা শম্নহল্লি। হন্দক মাই ভারতনা বজেত কুইজ অমা পাংথোকখ্রে। মসিগী পান্দমদি লৈবাক শীনবা থুংবগী নহারোলশিং বজেতকী থবকশিং অমসুং থৌশিল শেম্বগী মতাংদা খঙহনবনি। কুইজ অদুদা লৈবাক শীনবা থুংবগী নহারোল লাখ ১২ রোম শরুক য়াখি। কুইজ মতুংদা, চাউরাক্না নহারোল ১৬০,০০০ রোম এসে ইবা চাংদম্নবগীদমক খনখি। হায়রিবা এসেশিং অদুগী খর ঐ পারে। লৈবাক অসি চাউখৎপদা মতেং পাংনিংবগী ঐগী নহা ওইরিবা মরুপশিংগী ইখৌ লাংবা অদু মখোয়না উৎখি। সুর্য়াপেতকী কোতলা রঘুবীর রেদি, উত্তর প্রদেসকী বরাবনকিদগী সৌরভ বাইস্বার অমসুং বিহারগী গোপালগঞ্জদগী সুমিত কুমারনা লৌমীশিংগী য়াইফনবগা মরী লৈনবা হিরমশিংদা ইখি।

পঞ্জাবগী মোহালিদগী অনচাল, উরিসাগী কেন্দ্রপারাদগী ওম প্রকাসনা নুপীশিংনা লুচিংদুনা চাউখৎনবগী লম্বীশিংদা মখোয়গী ৱাখল্লোনশিং ফোঙদোকখি। হরিয়ানাগী যমুনাগরদগী প্রথাম বারারনা গ্রিন অমসুং ক্লিন ইন্দিয়া অসি নুংঙাই-য়াইফবা ভারত অমগী অমতা ঙাইরবা লম্বীনি হায়না ইখি। মখোয়না ৱাখল মপুংফানা খনবা অদু মসিনা তাক্লে। খুঙ্গংশিংদা শান্নবদা হৈথোই-শিংথোইবা মীওইশিং মশক খঙদোক্নবা অহেনবা থবকশিংগী মতাংদা দিল্লিগী সানখ গুপ্তনা পাউতাকশিং পীখি। ঐখোয়গী নহা ওইরিবা মরুপশিংনা স্কিল হেনগৎহনবা অমসুং য়াম্না লাইনা ললোন-ইতিক পাংথোক্নবা মখোয়গী অনৌবা ৱাখলশিং শরুক য়াখি। হায়রিবা অনৌবা ৱাখলশিং অসি লৈবাক অসি মাঙলোমদা পুখৎনবা য়াম্না মরুওই।

ঐগী নুংশিরবা ইরৈচাশিং,

থা অসিদা লৈবাক শীনবা থুংবগী ক্রিকেত পামজবশিং মপুংফানা হরাওরে। ভারতনা পুৱারি ওইনা তি২০ ৱার্ল্দ কপ মাইপাকপদা, লৈবাক শীনবা থুংনা হরাওবগী ইথক অমা কাখি। ঐখোয়গী তিম্না মাইপাকপদা ঐখোয় য়াম্না চাউথোকচখি। হৌখিবা থাদা, কর্নাতকাগী হুব্লিদা নুংঙাইরবা মেতচ অমা উখি। মেতচ অসি থোইদুনা, জম্মু অমসুং কাস্মিরগী ক্রিকেত তিম রঞ্জি ত্রোফি ফংলে। মসিদা খ্বাইদগী নুংঙাইরিবদি চহি ৭০ ঙাইরক্লবা মতুংদা মখোয়না অহানবা ওইনা রঞ্জি ত্রোফি ফংবা ঙমখিবা অসিনি।

মসিগী মাইপাকপা অসি শান্নরোয়শিংনা চহি কয়া লেপ্তনা হোৎনরকপগী ফলনি। তিম কেপ্তেন পারাস দোগ্রানা অঙকপা হৈথোই-শিংথোইবা উৎখি। মহাক্না লমজিংদুনা মাইপাকপা অসিদা মহাক্না অচৌবা থৌদাং অমা লৌখি। রঞ্জি ত্রোফিদা ৱিক্কেত ৬০ লৌখিবা নহা ওইরিবা কাস্মিরগী বোল্লর আকিব নবিগী থৌনা লৈবাক শীনবা থুংনা ঙাংনরি। মাইপাকপা অসিনা শান্নরোয়শিং অমসুং কোচিং ষ্টাফশিং অমসুং জম্মু অমসুং কাস্মিরগী মীয়াম হরাওহল্লে। ক্রিকেত লম্পাক্ত উৎখিবা শান্নবা অদুনা মখা তানা মফম অসিগী নহারোলশিংগী মরক্ত শান্নবা পাম্নবা হেনগৎহল্লে। তুংদা মসিনা নহারোল কয়া শান্নরোয় ওইনবা ইথিল পীগনি। জম্মু অমসুং কাস্মিরগী মীয়াম শান্নবা য়াম্না পামজৈ। হৌজিক রাজ্য অসি অচৌবা শান্নবগী থৌরমশিংগী মফম অমা ওইরকপদা ঐ হরাওই। গুলমার্গতা খেলো ইন্দিয়া ৱিন্তর গেমস পাংথোকখ্রে। রাজ্য অসিগী নহারোলশিংগী মরক্ত ফুতোবলগুম্বা মশান্নশিং য়াম্না পাম্নরি। জম্মু অমসুং কাস্মিরগী শান্নবগী মাইপাকপা অসিনা তুংদা মখা চৎথগনি হায়না ঐনা থাজৈ।

ঐগী নুংশিরবা ইরৈচাশিং,

ঐনা তোইনা হায়রি, ‘শান্নবা মীওইশিং অফবা ওইগনি’। মমাঙদা মমিং চৎলমদবা মশান্নশিংদা হৌজিক ঐখোয়গী লৈবাক্কী নহারোলশিংনা শান্নবা উবদা ঐ হরাওই।

উত্তর প্রদেসতগী শান্নরোয় গুলবির সিংহনা আসিগুম্বা মশান্না অমদা অঙকপা থবকশিং পাংথোক্লে। চয়োল অমগী মমাংদা, ন্যু য়োর্ক সিতি হাল্ফ মরাথোন্দা অহুমশুবা তাদুনা মহাক্না পুৱারি শেম্লে। পুং অমগী মখাদা হাল্ফ মরাথোন অমা চেনবা ঙম্বা ভারতকী অহানবা শান্নরোয় মহাক্না ওইরে। ইসক্বাস শান্নরোয় অনাহাত সিংহনা ইসক্বাস ওন ফয়ার ওপন্দা মালেমগী মমিং লৈরবা মিংথোল অমা ফংলে। মহাক মসি চহি ১৭ খক শুবদা মাইপাকপনি। মসিগা লোয়ননা, পি.এস.এ ৱার্ল্দ রেঙ্কিংদা মকোক ২০ দা য়াওবা খ্বাইদগী নহা ওইবা এসিয়াগী নুপী শান্নরোয় মহাক্না ওইরে। ঐনা অসমিতা এথলেতিক্স লিগকী মরমদসু তারে। মসিদা, মার্চ ৮ দা মালেমগী নুপীশিংগী নুমিৎ থৌরমদা শান্নবগী থৌরম কয়া পাংথোকখ্রে। মদুদা নুপীমচা লাখ ২ রোম শরুক য়াখি। লৈবাক অসিদা শান্নবগী অওনবা পুরকপদা ভারতকী নারী শক্তিনা অচৌবা থৌদাং অমা লৌবা উবদা হরাওই।

মরুপশিং,

অদোম হকচাং ফনা লৈনবা ঐনা মতম পুম্নমক্ত অদোমদা তকশিল্লি। মালেমগী য়োগ নুমিৎ পাংথোক্কদবা নুমিৎ ১০০ ফাদ্রে; মালেম শীনবা থুংনা য়োগ পাম্নবা হেনগৎলক্লি। অফ্রিকাগী জিবৌতিদা মহাক্কী অর্বিন্দ য়োগ সেন্তরগী খুৎথাংদা অলমিস জিনা য়োগ য়োখৎলি। মহাক্না লৈবাক অদুগী মফম কয়াদা মীয়ামদা য়োগ তম্বীখি।

অদোম্না ইন্সতাগ্রাম কন্তেন্ত ক্রিয়েতর যুবরাজ দুয়াগী পোষ্টতা কমেন্ত পীরে। মহাক্কী মপা চিনি চাবা হন্থহন্নবা মহাক্কী মপাদা হায়নবা মহাক্না ঐঙোন্দা হায়জখি। ঐনা হায়জবা অদুনা মহাক্কী মপাদা কান্নবা পীবদা ঐ হরাওই। ময়াম পুম্নমক অদোমগী চিনি চাবা হন্থহন্নবা ঐনা হায়জরি অমসুং অদোমগী থাউ চাবা চাদা ১০ হন্থহন্নবা ঐনা মমাঙদা হায়জখ্রে। হায়রিবা অপীকপা থবকশিং অসিনা অদোম নোইবা হন্থহনগনি অমসুং পুন্সি মহিংগা মরী লৈনবা লায়নাশিংদগী ঙাকথোকপা ঙমগনি।

ঐগী নুংশিরবা ইরৈচাশিং,

থায়নগী হায়নবা অমা লৈরি মদুদি ‘ ঐখোয়না হেন্না লেপ্তনা হোৎনরিবমখৈ, ঐখোয় লৌশিং হেন্না লৈগনি’। মীয়াম্না থৱায় য়াওনা শরুক য়াবা মতমদা মখোয়না মপুংফানা খঙবা ঙম্মী। বেঙ্গালুরুদা লাইরিক তম্বগা মরী লৈনবা অঙকপা থবক অমা ঐ খঙলে। কাংবু অমনা প্রয়োগ ইন্সতিতুৎ ওফ ইজুকেসন রিছার্স লিংখৎখি। কাংবু অসিনা রিছার্স প্রোজেকশিংদা পুক্নিং চঙখি। স্কুলগী থাক্ত সাইন্স ইজুকেসন পাম্নবা হেনগৎহন্নবা কাংবু অসিনা থবক পায়খৎখি। ক্লাস ৯ দগী ক্লাস ১২ ফাওবগী মহৈরোয়শিং কেমিষ্ট্রি, আর্থ সাইন্সেস অমসুং ৱেলনেসগুম্বা হিরমশিংদা অনৌবা থবক পাংথোক্নবা খুদোংচাবা পীনবা অনবেসন কৌবা চাংয়েং অমা মখোয়না হৌদোকখি।

মখোয়গী প্রোজেকশিং ফোঙদোক্নবা মফম অমা অমসুং রিছার্স তৌনবা অফবা খুদোংচাবা অমা মখোয়না মহৈরোয়শিংদা পীখি।

মসিনা ইথিল পীদুনা মখোয় সাইন্স তম্বা পামখি হায়না মহৈরোয় খরনা পরিক্ষা পে চার্চা মনুংদা হায়খি। মাইকৈ অসিদা প্রয়োগ কাংবুনা পায়খৎলিবা থবক থাগৎনিঙাইনি। সাইন্স তম্নবা অমসুং থবক ওইনা পাংথোক্নবা খুদোংচাবা থবক অসিনা মহৈরোয়শিংদা পীরে। ঐখোয়না করিগুম্বা খর অহানবা ওইনা হোৎনবদা, ইখৌ লাংবা অমসুং থৱায় য়াওবা পোকহল্লি। নহারোলশিং অসিগী মরক্তগী খর তুংদা অচৌবা সাইন্তিষ্ট অমা ওইরকপা কনানা খঙগনি।

মরুপশিং,

লাইরিক লাইশুগী খুৎথাংদা মখোয়গী তুংগী থৌরাং তৌনবা অমসুং হৌখ্রবা মতম ঙাক-শেন্নবা থবক অমা নাগা ফুরুপনা পায়খৎলি। নাগা মীয়াম্না মখোয়গী ত্রাইবেলগী চৎনবীশিং য়াম্না ইকায়খুম্নৈ। মসিনা মসিগীদমক চাউথোকচৈ অমসুং অনৌবা মওং অমদা ঙাক-শেন্দুনা থম্লি। নহারোলশিংদা মমাংঙৈগী লৌশিং, পুৱারি অমসুং হিংবদা চঙদ্রবা য়াদ্রবা লৌশিং কয়া তাকপীবগী চৎনবী অমা নাগা ত্রাইবশিংগী লৈরি। মসিদগী মোরুংগী তাকপী-তম্বীগী থবক লাকখিবনি। থবক অসিগী খুৎথাংদগী অঙাংশিংনা মেথেমেতিক্স অমসুং সাইন্সগুম্বা হিরমশিং থৱায় য়াওনবা ইথিল পীখি।

ৱারিশিং, খুনুঙ ঈশৈশিং অমসুং মহৌশাগী ওইবা মশান্নশিংগী খুৎথাংদা অহলশিংদা মখোয়দা হিংবদা চঙদ্রবা য়াদ্রবা লৌশিং কয়া তম্বীখি। মতৌ অশুম্না, রাজ্য অসিগী নাৎকী চৎনবীশিং ঙাকপগা লোয়ননা ঐখোয়গী নাগালেন্দনা অঙাংশিংগী লাইরিক-লাইশু তম্বা চাউখৎহনখি। করিগুম্বা অদোম্না অসিগুম্বা থবকশিংগী মরমদা অদোমগী লমদমশিংদা থেংনরবদি, চানবীদুনা ঐঙোন্দা শরুক য়াবীয়ু।

ঐগী নুংশিরবা ইরৈচাশিং,

লৈবাক অসিগী মফম কয়াদা কালেন হৌরে। মসিনা তাকপদি ঈশিং তুংশিন্নবা ঐখোয় অমুক হন্না থবক পায়খৎপা মতম য়ৌরে হায়বনি। হৌখিবা চহি ১১ দা, জল সঞ্চয় অভিয়ান্না মীয়াম ৱাখল তাহনখ্রে। অভিয়ান অসিগী মখাদা লৈবাক শীনবা থুংনা পুখ্রি লাখ ৫০ রোম তৌখ্রে। ঈশিংগী অৱাবা কোক্নবা হৌজিক খুঙ্গং খুদিংমক্ত মীয়াম্না থবকশিং পায়খৎপা উবদা ঐ হরাওই। মফম খরদা অরিবা পুখ্রিশিং শেংদোক্লে, মফম খরদা, ঈশিং তুংশিন্নবা থবকশিং পায়খৎলে। অমৃত সরোভর অভিয়ানগী মখাদা, লৈবাক শীনবা থুংনা অমৃত সরোভর ৭০,০০০ রোম তৌখ্রে। নোংজু থা মমাঙদা পাৎশিং শেংদোক্লে। ঙসি ঐনা অদোমগী মফমদা পুক্নিং থৌগৎনিঙাই ওইবা খুদম খর পীনিংই। মীয়াম শরুক য়াদুনা কমদৌনা ঈশিং য়োকশিনবগী থবক পায়খৎপগে হায়বা খুদমশিং অসিনা উৎলে।

মরুপশিং,

ত্রিপুরাগী জামপুই চীঙদা লৈবা ৱাংমুম খুঙ্গং ফিত ৩,০০০ ৱাংবা মফম অমদা লৈরি। খুঙ্গং অসি ঈশিং ফংদবগী অচৌবা অৱাবা অমা মায়োক্নখি। কালেন মনুংদা, ঈশিং শোক্নবা খুঞ্জাশিং য়াম্না লাপ্না চৎনখি। অরোইবদা, নোংগী ঈশিং মরিক অমা ফাওবা লৌশিন্নবা খুঞ্জাশিংনা ৱারেপ লৌখি।

ঙসিদি, ৱাংমুমগী য়ুমথোং খুদিংমক্না য়ুম মথক্ত নোংগী ঈশিং লৌশিন্নবা সিষ্টেম অমা থম্লে। মতম অমদা ঈশিংগী য়াম্না ৱাখিবা খুঙ্গং অদু হৌজিক ঈশিং তুংশিন্নবা ইথিল পীনবা খুদম অমা ওইরে।

মরুপশিং,

ছতিসগরগী কোরিয়া জিলাদা অঙকপা থয়ক অমসু উরে। মফম অদুগী লৌমীশিংনা অচম্বা অদুবু য়াম্না কান্নবা অনৌবা ৱাখল অমদা থবক পায়খৎখি। লৌবুক্ত ঈশিং তুংনবা অমসুং তপ্না তপ্না লৈনুংদা চঙখিনবা মখোয়না মখোয়গী লৌবুকশিংদা অপীকপা পুখ্রিশিং তৌখি। ঙসিদি, মফম অসিদা লৌমী ১,২০০ হেনবনা নমুনা অসি পায়খৎলে অমসুং লৈনুংগী ঈশিং শিংথাবা য়ানা হেনগৎলে।

মসিগা চপ মান্না, ঈশিংগী অৱাবা কোকহন্নবা তেলঙ্গানাগী মনচেরিয়েল জিলাদা মুধিগুন্তা খুঙ্গংদা মীয়াম পুনখি। ইমুং ৪০০ না মখোয়গী য়ুমশিং কোমশিং তৌখি অমসুং ঈশিং লোকশিন্নবা অচৌবা ইহৌ অমা শাগৎখি। মসিনা খুঙ্গংগী লৈনুংগী ঈশিংগী থাক হেনগৎহল্লে অমসুং অমোৎপা ঈশিংনা থোকহনবা লায়নাশিং শিংথাবা য়ানা হন্থরে।

ঐগী নুংশিরবা ইরৈচাশিং,

ঐখোয়গী ঙামীশিং সমুদ্রগী লান্মীশিং ওইবা খক নত্তনা, মখোয় অত্মনির্ভর ভারতকী অকনবা য়ুম্ফম অমসুনি। নোংঙান্দ্রিঙৈদগী হৌনা সমুদ্রগী অকনবা ইথকশিং মায়োক্নখি, মখোয়গী ইমুংশিং অমসুং লৈবাক্কী শেন-থুম ফগৎনবা মখোয়না থবক পায়বা হৌখি। ঙসিদি লম্বী কয়াদা থবক শুবা কনবা ঙামীশিংগী হেন্না লাইথোকহল্লে। মসি হিথাংফম চাউখৎহনবা নত্ত্রগা ঙামীশিংগী ইন্সুরেন্স ওইবা য়াই, অসিগুম্বা থবকশিংনা কান্নবা য়াম্না পীরে। সমুদ্রগী নোং-চিংগী ফিবম্না মখোয়দা অকনবা ইথিল পীরি হায়বা ঐখোয় খঙলে। মসি খঙবদগী, মখোয় তেক্নোলোজিগী খুৎথাংদা মতেং পাংলে।

অসিগুম্বা থবকশিংনা ঐখোয়গী ঙা ফাবগী থবকশিং ফগৎহনবা খক নত্তনা, মসিনা অনৌবা থবক পায়খৎনবা ইথিল পীবদা ঐ য়াম্না হরাওই। ঙসিদি, ঙা ফাবা অমসুং সিৱিদকী হিরমশিংদা অনৌবা থবকশিং পায়খৎলে অমসুং ঐখোয়গী ঙামীশিং মশা মরোমদোম লেপচবা ঙম্লে।

য়ুম্বুরেম্বী অমা ওইরিবী, উরিসাগী সম্বলপুরগী সুজাতা ভুয়ান্না করিগুম্বা অনৌবা খর পাংথোকপা অমসুং মহাক্কী ইমুং মখা তানা মতেং পাংবা পামখি। মরম অদুনা, চহি খরগী মমাঙদা মহাক্না হিরাকুদ রিজার্বরদা ঙা য়োকপা হৌখি। হৌরকপদা মহাক্কী থবকশিং অরাইবা ওইখিদে। নোং-চিংগী ফিবমশিং, ঙাগী মচীঞ্জাক থিবা অমসুং ইমুং-মনুংগী থবকশিং তৌবা য়াওনা খুদোংচাদবা কয়া মায়োক্নখি। অদুবু মহাক্কী থৌনা হনবা লৈখিদে। চহি অনি নত্ত্রগা অহুমগী মনুংদা, মহাক্না মহাক্কী থবক অদু কান্নরবা ললোন-ইতিক অমা ওন্থোকখি। ঙসিদি, মহাক্কী মাইপাকপা অদুনা নুপীশিংগী থাজবগী অনৌবা মঙাল অমা ওইরে।

মরুপশিং,

লাক্ষদ্বিপকী মিনিকোইগী হাবা গুলজরগী ৱারিনা ঐখোয়গী ইমাশিং অমসুং ইচলশিংগী অচেৎপা ফিরেপ উবা ফংলে। মহাক্না ঙা শেম-শানবা য়ুনিত অমা লিংখৎনবা হোৎনখি। অদুবু অফবা কোল্দ ষ্টোরেজ ফেসিলিতি অমা লৈরবদি হেন্না ফগনি হায়না মহাক্না খনখি। মরম অদুনা মহাক্না কোল্দ ষ্টোরেজ য়ুনিত অমা লিংখৎনবা ৱারেপ লৌখি। ঙসিদি, মসি মহাক্কী থৌনা ওইরে। হৌজিক মহাক হেন্না ফজনা থৌরাং তৌদুনা ললোন-ইতিক পাংথোকপা ঙম্লে।

মরুপশিং,

অসিগুম্বা ইথিল পীবা থবক কয়া লৈবাক অসিগী মফম খুদিংমক্ত পাংথোক্লি। বেলাগাবিগী সবলিং সতাপ্পা হুদারনা লৌ উবদগী তোঙানবা লম্বী অমা খনখি। মসিগীদমক মহাক্না পুখ্রি অমা তৌখি।

মহাক্না ললোন-ইতিক অসিগী ত্রেনিংশু ফংখি। হৌজিক মহাক ঙা য়োনদুনা শেন ফজনা তাল্লে। সিৱিদ পাম্নবা হেনগৎলকপা উবদগী, মীওই কয়া সিৱিদ থাবা হৌরে। মখোয়না মসিদগী কান্নবা য়াম্না ফংলে। ঙাগী হিরমদা থবক তৌরিবা মীওই খুদিংমক ঐনা অমুক হন্না থাগৎপা ফোঙদোকচরি। ঐখোয়গী শেন্মিৎলোন ফগৎনবা মখোয়গী থবকশিং য়াম্না থাগৎনিঙাইনি।

ঐগী নুংশিরবা ইরৈচাশিং,

খুন্নাইনা মাঙলোমদা লাকপা মতমদা, অপীকপা থবকশিং ফাওবা অচৌবা অহোংবা পুরক্নবা য়ুম্ফম ওই। অসিগুম্বা খুদম কয়া ঐখোয়গী লৈবাক্কী তোঙান তোঙানবা মফমশিংদা থোক্তুনা ঐখোয়দা তম্বীরি। হন্দক, উত্তর প্রদেসকী বারানসীদা পুক্নিং থৌগৎনিঙাই ওইরবা থবক অমা উখি। পুং অমদা উ পাম্বী ২৫১,০০০ হেন্না থাদুনা অনৌবা গিনেস ৱার্ল্দ রেকোর্দ অমা থমখি।

থবক অসিগী খ্বাইদগী শিংথানিঙাই ওইবদি মীওই লিশিং কয়া শরুক য়াখিবা অদুনি। থবক অসি ওইথোক্নবা মহৈরোয়শিং, নহারোলশিং, লুপশিং অমসুং তোঙান তোঙানবা মহৈলোয়শঙশিং শরুক য়াখি। মসিগী মীয়াম শরুক য়াবগী মওং অসি “এক পের মা কে নাম” কেম্পেন্দসু উবা ফংখি। খোঙজং অসিগী মখাদা, লৈবাক শীনবা থুংনা উ চারা করোর কয়া থাখ্রে।

মরুপশিং,

নাগালেন্দগী চিজামিদা অসিগুম্বা পুক্নিং থৌগৎপা থবক অমা পাংথোকখ্রে। চিজামিগী নুপীশিংনা মমাংঙৈগী মরু মখল ১৫০ হেন্না খোমজিন্দুনা থমখি। হায়রিবা মরুশিং অদু নুপীশিংনা চলাইবা লৈকায়গী সিদ বেঙ্ক অমনা লীদুনা থম্বনি। মদুদা ফৌ, চনান, চুজাক, হৱায়শিং, মনা-মশিং অমসুং মখল কয়াগী পাম্বীশিং য়াওরি। মসি লৌশিং অমসুং চৎনবীশিং ঙাক-শেনবা থবক অমনি অমসুং তুংগী মীরোলশিংগী অকনবা য়ুম্ফম অমা থোল্লে।

মরুপশিং,

ঙসি, মালেম অসিনা অইং-অশাগী খল হোংলকপগুম্বা অৱাবশিং মায়োক্নবা মতমদা, অসিগুম্বা থবকশিংনা ঐখোয়দা পাম্বৈশিং থাপ্না লৈবা নত্তে হায়বা তাক্লে। করিগুম্বা মতমদা, ঐখোয়গী মমাংঙৈগী লৌশিং অমসুং মীয়ামগী থবকশিংনা ঐখোয়গী মাঙলোমদা চঙশিন্নবা অফবা লম্বী তাক্লে।

ঐগী নুংশিরবা ইরৈচাশিং,

করিগুম্বা অদোম্না সহর অমদা চৎপা মতমদা, অদোম অহোংবা খর উবা ফংগনি। মশিং য়াম্লবা য়ুমশিংগী মথক্ত সোলার পেনেলশিং থম্বা অদোম উগনি। ঙসিদি, পি.এম সুর্য়া ঘর মুফ বিজলি য়োজনাগী কান্নবা লৈবাক অসিগী মফম খুদিংমক্ত উবা ফংলে। য়োজনা অসিনা গুজরাতকী সুরেন্দ্রনগর জিলাগী পায়াল মুনজাপারাগী পুন্সিদা অচৌবা অহোংবা অমা পুরক্লে।

মহাক থা মরিগী সোলার পি.ভি তেক্নিসিয়ানগী কোর্স অমা লোইশিনখ্রে। মহাক হৌজিক হৈথোই-শিংথোইরবা সোলার তেক্নিসিয়ান অমা ওইরে। পায়াল সোলার ওন্ত্রেপ্রেন্যুর অমা ওইনা মীয়াম্না খঙনরে। মহাক্না অনকপা জিলাশিংদা সোলার রুপতোপ খিনবগী থবকশিং তৌদুনা থা অমদা লুপা লিশিং কয়া তাল্লে।

মরুপশিং,

মেরুতকী অরুন কুমার হৌজিক মহাক্কী লৈকায়গী ইনর্জি পীবা অমা ওইরে। হন্দক অরুন কুমার দিল্লিদা থৌরম অমা শরুক য়াখি অমসুং মহাক্না থেংনবশিং শরুক য়াখি। মহাক্না মহাক্কী মৈগী বিল কনবা খক নত্তনা অহেনবা মৈসু য়োল্লে হায়না মহাক্না ফোঙদোকখি।

মরুপশিং,

জয়পুরগী মুরালিধার জি মসিগা চপ মান্না মাইপাক্লে। মমাঙদা মহাক্না দিজলগী পম্পতা লৌ উবদগী চহি অমদা লুপা লিশিং কয়া চাদিং তৌখি। মহাক্না সোলার পম্প শীজিন্নবদী মহাক্কী লৌ উবদা অওনবা পুরক্লে। হৌজিক মহাক থাউগী ৱাদ্রে, মতম চানা ঈশিং ফংলে অমসুং মহাক্কী চহিগী শেন্থোক হেনগৎলে। খ্বাইদগী মরুওইবদি, মহাক্কী ইমুং হৌজিক মৈখু থাংদবা ইনর্জি শীজিন্নবদগী হেন্না নুংঙাইরে।

মরুপশিং,

অৱাং নোংপোক্কী মফমশিংদসু পি.এম সুর্য়া ঘর মুফ বিজলি য়োজনাগী কান্নবা ফংলে। ত্রিপুরাদা রিয়াং ত্রাইবকী ইমুং কয়া মৈ ফংদবগী অৱাবা মায়োক্নখি। হৌজিক সোলার মিনি-গ্রিদশিংদগী মখোয়গী য়ুমশিং ঙাল্লে। অঙাংশিং নুমিদাংদা লাইরিক পাবা ফংলে। মীয়াম মখোয়গী মোবাইল ফোনশিং চার্জ তৌরে অমসুং খুঙ্গংগী পুন্সি মহিংদা অহোংবা পুরক্লে।

মরুপশিং,

লৈবাক অসিনা সোলার ইনর্জিনা অওনবা পুরকপগী মশিং থিঙমদ্রবা খুদম কয়া লৈরি। অওনবা অসিদা শরুক য়াবীবু অমসুং অতোপ্পশিং চিংশিনবীয়ু।

ঐগী নুংশিরবা ইরৈচাশিং,

মন কি বাতকীদমক থা খুদিংগী লৈবাক অসিগী মফম কয়াদগী ঐনা পাউজেল কয়া ফংখি। থৌরম অসিদা তাবদা মনুং-হুঞ্জিনবা মফমশিংগী মীওইশিং কমদৌনা হরাওবা ফোঙদোকপগে হায়বা পাউজেলশিং অসিনা তাক্লি। ঐনা অদোমগী পাউতাকশিং পাবা মতমদা, মসি থৌরম অমা নত্তে, মসি ঐখোয়গী মরক্ত ৱারি শানবা অমনি হায়না ঐনা খল্লি। অদোমগী ৱাখলশিংগা লোয়ননা… অদোমগী লৌশিং কয়ানা থৌরম অসি মখা তানা চৎথনবা ঐখোয়দা ইথিল পীরি।

অদোমগী অকোয়বদা থোকপা পুক্নিং থৌগৎনিঙাই ওইরবা ৱারিশিং শরুক য়াবীয়ু। অদোমগী অপীকপা থবকশিংনা কনাগুম্বা অমগী পুন্সিদা অচৌবা অহোংবা অমা পুরকপসু য়াই; রেদিওগী অশেংবা শক্তি অসিগা লোয়ননা মাঙলোমদা চঙশিন্নবা কনাগুম্বা অমদা করিগুম্বা অনৌবা থৌনা খর পীরসি।

মসিনা লৈবাক অসিগী মফম কয়াগী মীয়াম ৱাখল অমা, অনিংবা অমসুং পান্দম অমদা শম্নহল্লি। ঐখোয় অনৌবা মীওইশিং অমসুং অনৌবা থৌনাগা লোয়ননা মাংলোমদা চঙশিন্নবা ঐখোয়দা ইথিল পীগদবা অনৌবা থবক খরগা লোয়ননা মথংগী থাদা ঐখোয় অমুক উনগনি। মতম অদু ফাওবা, অদোম অমসুং অদোমগী ইমুং-মনুংশিং চেকশিন্না লৈবীয়ু-হকচাং ফনা লৈবীয়ু, হরাওনা লৈবীয়ু। অদোম থাগৎচরি।

***