انڈین ریلوے کے اسٹیشنوں پر مسافروں کی بھاری بھیڑ سے نمٹنے کے لیے درج ذیل فیصلے کیے گئے ہیں:

1. بھیڑ کے انتظام کے لیے 76 منتخب اسٹیشنوں پر مستقل ہولڈنگ ایریا کا قیام:

• وزارت ریلوے نے 76 اسٹیشنوں پر پلیٹ فارموں کی بھیڑ کم کرنے کے لیے مسافروں کے ہولڈنگ ایریا قائم کرنے کا منصوبہ شروع کیا ہے۔ یہ ایریا آرام دہ اور منظم جگہوں کے طور پر تیار کیے جائیں گے، جن میں بیٹھنے کی سہولت، پینے کا پانی، بیت الخلا، ٹکٹنگ کی سہولیات، معلوماتی ڈسپلے اور سیکیورٹی چیک جیسی بنیادی سہولیات فراہم کی جائیں گی تاکہ بھیڑ کے اوقات میں زیادہ مسافروں کو سنبھالا جا سکے۔ نئی دہلی ریلوے اسٹیشن پر ہولڈنگ ایریا پہلے ہی قائم کیا جا چکا ہے، جس سے بھیڑ میں کمی آئی ہے اور مسافروں کی سہولت میں اضافہ ہوا ہے۔ یہاں اضافی ٹکٹ کاؤنٹر، خودکار ٹکٹ وینڈنگ مشینیں (اے ٹی وی ایم)، پبلک ایڈریس سسٹم (پی اے ایس)، الیکٹرانک ٹرین معلوماتی بورڈ، سی سی ٹی وی نگرانی، سامان کی اسکیننگ مشینیں، ڈور فریم میٹل ڈیٹیکٹر (ڈی ایف ایم ڈی)، بلا تعطل بجلی کی فراہمی، بہتر روشنی، ایچ وی ایل ایس پنکھے، آگ بجھانے اور بجلی گرنے سے تحفظ کے نظام، آر او پینے کا پانی اور مردوں، خواتین اور معذور افراد کے لیے علیحدہ بیت الخلا جیسی سہولیات فراہم کی گئی ہیں۔
• دیگر اسٹیشنوں پر اسی نوعیت کی سہولیات مختلف مراحل میں منصوبہ بندی اور عمل درآمد کے تحت ہیں، جن کی تکمیل کا وقت مسلسل جائزے اور بہتری کے عمل کے مطابق طے کیا جائے گا۔

2. ایکسیس کنٹرول:

مکمل ایکسیس کنٹرول فراہم کیا جا رہا ہے، جس کے تحت کنفرم ریزرویشن والے مسافروں کو براہ راست پلیٹ فارم تک رسائی دی جائے گی، جبکہ بغیر ٹکٹ یا ویٹنگ لسٹ ٹکٹ رکھنے والے مسافروں کو مقررہ بیرونی انتظار گاہوں/ ہولڈنگ ایریا میں رکھا جائے گا۔

3. چوڑے فٹ اوور برج (ایف او بی):

12 میٹر (40 فٹ) اور 6 میٹر (20 فٹ) چوڑائی کے دو نئے معیاری ڈیزائن کے فٹ اوور برج تیار کیے گئے ہیں۔ یہ نئے وسیع ایف او بیز تمام اسٹیشنوں پر نصب کیے جائیں گے۔

4. سی سی ٹی وی کیمرے:

ریلوے اسٹیشنوں اور ان سے ملحقہ علاقوں میں بڑی تعداد میں مصنوعی ذہانت (AI) سے لیس سی سی ٹی وی کیمرے نصب کیے جا رہے ہیں تاکہ مؤثر نگرانی اور ہجوم کے بہتر انتظام کو یقینی بنایا جا سکے۔

5. وار روم:

بڑے اسٹیشنوں پر وار روم قائم کیے جا رہے ہیں، جہاں تمام محکموں کے افسران باہمی ہم آہنگی کے ساتھ کام کریں گے تاکہ بھیڑ کی صورتحال کو مؤثر انداز میں سنبھالا جا سکے۔

6. نئی نسل کے مواصلاتی آلات:

زیادہ بھیڑ والے اسٹیشنوں پر جدید ڈیزائن کے ڈیجیٹل مواصلاتی آلات جیسے واکی ٹاکی، اناؤنسمنٹ سسٹم اور کالنگ سسٹم نصب کیے جائیں گے۔

7. نئے ڈیزائن کے شناختی کارڈ:

تمام عملے اور سروس فراہم کرنے والے افراد کو کیو آر کوڈ پر مبنی نئے ڈیزائن کے شناختی کارڈ جاری کیے جائیں گے تاکہ اسٹیشن تک محفوظ اور کنٹرول شدہ رسائی کو یقینی بنایا جا سکے۔

8. عملے کے لیے نئی یونیفارم:

تمام عملے کو نئے ڈیزائن کی یونیفارم فراہم کی جائے گی تاکہ ہنگامی حالات میں ان کی آسانی سے شناخت کی جا سکے۔

9. اسٹیشن ڈائریکٹر کے عہدے کی اپ گریڈیشن:

تمام بڑے اسٹیشنوں پر ایک سینئر افسر کو اسٹیشن ڈائریکٹر مقرر کیا جائے گا، جسے مالی اختیارات حاصل ہوں گے تاکہ وہ موقع پر ہی اسٹیشن کی بہتری کے لیے فیصلے کر سکے۔ دیگر تمام محکمے براہِ راست اسٹیشن ڈائریکٹر کو رپورٹ کریں گے تاکہ متحدہ کمان اور مؤثر انتظام کو یقینی بنایا جا سکے۔

10. گنجائش کے مطابق ٹکٹوں کی فروخت:

اسٹیشن ڈائریکٹر کو اختیار دیا جائے گا کہ وہ اسٹیشن کی گنجائش اور دستیاب ٹرینوں کے مطابق ٹکٹوں کی فروخت کو کنٹرول کرے۔

مرکزی وزیر برائے ریلوے، اطلاعات و نشریات اور الیکٹرانکس و انفارمیشن ٹیکنالوجی جناب اشونی ویشنو نے جمعہ کے روز راجیہ سبھا میں ایک سوال کے جواب میں یہ معلومات فراہم کی۔

******

ش ح۔ ف ش ع

U: 5075