দেশত এক নিৰাপদ, দায়িত্বশীল আৰু জবাবদিহিমূলক অনলাইন গেমিং পৰিৱেশ-তন্ত্ৰ নিশ্চিত কৰাৰ ক্ষেত্ৰত চৰকাৰ দৃঢ়ভাবে প্ৰতিশ্ৰুতিবদ্ধ। এই পৰিপ্ৰেক্ষিতত, চৰকাৰে ই-স্প’ৰ্টছ আৰু অনলাইন ছ’চিয়েল গেমছত উদ্ভাৱনক প্ৰসাৰিত কৰাৰ লগতে অনলাইন মানি গেমছ নিষিদ্ধ কৰাৰ উদ্দেশ্যেৰে অনলাইন গেমিঙৰ প্ৰচাৰ আৰু নিয়ন্ত্ৰণ আইন, ২০২৫ (“গেমিং এক্ট”) প্ৰণয়ন কৰিছে।

গেমিং আইনখনে অনলাইন মানি গেমৰ সকলো ধৰণৰ ওপৰত বিস্তৃত নিষেধাজ্ঞা আৰোপ কৰিছে, সেয়া সুযোগভিত্তিক গেম হওক, দক্ষতাভিত্তিক গেম হওক বা ইয়াৰ যিকোনো সংমিশ্ৰণৰ সৈতে সম্পৃক্ত হওক। ইয়াৰ উপৰিও, এনে খেলসমূহৰ বিজ্ঞাপন, প্ৰচাৰ আৰু সুবিধা প্ৰদান কৰাৰ লগতে বেংক বা পেমেণ্ট ব্যৱস্থাৰ জৰিয়তে সম্পৰ্কিত বিত্তীয় লেনদেন প্ৰক্ৰিয়াকৰণো নিষিদ্ধ কৰা হৈছে। এই আইনখনে তথ্য প্ৰযুক্তি আইন, ২০০০ৰ বিধানসমূহৰ অধীনত অবৈধ প্লেটফৰ্মসমূহত প্ৰৱেশ বন্ধ কৰাৰ বাবে কৰ্তৃপক্ষক অধিক ক্ষমতা প্ৰদান কৰে।

গেমিং আইনত উলংঘনৰ ক্ষেত্ৰত কঠোৰ শাস্তিৰ ব্যৱস্থাও নিৰ্ধাৰণ কৰা হৈছে। এনে অনলাইন মানি গেম আগবঢ়োৱা বা বিত্তীয় লেনদেনৰ সুবিধা প্ৰদান কৰাৰ ক্ষেত্ৰত তিনিবছৰ পৰ্যন্ত কাৰাদণ্ড অথবা এক কোটি টকা পৰ্যন্ত জৰিমনা অথবা দুয়োটাৰে শাস্তি আৰোপিত হ’ব পাৰে। অনলাইন মানি গেমৰ প্ৰস্তাৱ বা সুবিধা প্ৰদান কৰাৰ ক্ষেত্ৰত দ্বিতীয় বা পৰৱৰ্তী দোষী সাব্যস্ত হ’লে নূন্যতম ৩ বছৰৰ কাৰাদণ্ড, যি ৫ বছৰলৈকে বৃদ্ধি পাব পাৰে, আৰু নূন্যতম এক কোটি টকাৰ জৰিমনা, যি দুই কোটি টকালৈকে বৃদ্ধি পাব পাৰে, আৰোপিত হ’ব পাৰে। এনে অনলাইন মানি গেমৰ বিজ্ঞাপন প্ৰচাৰৰ ক্ষেত্ৰত দুবছৰ পৰ্যন্ত কাৰাদণ্ড অথবা পঞ্চাশ লাখ টকা পৰ্যন্ত জৰিমনা অথবা দুয়োটাৰে শাস্তিৰ ব্যৱস্থা আছে। দ্বিতীয় বা পৰৱৰ্তী সময়ত এনে বিজ্ঞাপন দিয়াৰ ক্ষেত্ৰত দোষী সাব্যস্ত হ’লে নূন্যতম ২ বছৰৰ কাৰাদণ্ড, যি ৩ বছৰলৈকে বৃদ্ধি পাব পাৰে, আৰু নূন্যতম পঞ্চাশ লাখ টকাৰ জৰিমনা, যি এক কোটি টকালৈকে বৃদ্ধি পাব পাৰে, আৰোপিত হ’ব পাৰে।

ওপৰত উল্লেখিত বিষয়সমূহৰ উপৰিও, ই-স্প’ৰ্টছ আৰু অনলাইন ছ’চিয়েল গেমছৰ স্বীকৃতি আৰু প্ৰসাৰ, অনলাইন গেমিং অথৰিটি অৱ ইণ্ডিয়া প্ৰতিষ্ঠা, অনলাইন গেমসমূহৰ বাবে স্বচ্ছ পঞ্জীয়ন ব্যৱস্থা প্ৰৱৰ্তন, ব্যৱহাৰকাৰীৰ বাবে কাৰ্যকৰী অভিযোগ-নিকাৰণ ব্যৱস্থা স্থাপন, আৰু নিষিদ্ধ অনলাইন মানি গেম আৰু ইয়াৰ সৈতে সম্পৃক্ত ক্ষতিৰ বিৰুদ্ধে সুৰক্ষামূলক ব্যৱস্থাসমূহো গেমিং আইনত সন্নিৱিষ্ট কৰা হৈছে।

ৰাষ্ট্ৰীয় পৰ্যায়ৰ অনলাইন গেমিং কৰ্তৃপক্ষই অনুমোদিত গেমসমূহৰ শ্ৰেণীবিভাজন আৰু পঞ্জীয়ন, কোনো গেমত ধনৰ গেমৰ অন্তৰ্গত নে নহয় সেইটো নিৰ্ধাৰণ, আচৰণবিধি জাৰি কৰা, আৰু জনসাধাৰণৰ অভিযোগসমূহৰ সমাধানৰ দায়িত্ব গ্ৰহণ কৰিব। এটা কেন্দ্ৰীয় নিয়ন্ত্ৰণমূলক কৰ্তৃপক্ষক ক্ষমতা প্ৰদানৰ জৰিয়তে এই আইনখনৰ লক্ষ্য হৈছে সমন্বিত নীতিগত সমৰ্থন প্ৰদান কৰা, ফলপ্ৰসূ তদাৰকী নিশ্চিত কৰা, আৰু ভাৰতক অনলাইন গেমিং ক্ষেত্ৰত বিশ্বব্যাপী আগশাৰীৰ ৰূপে প্ৰতিষ্ঠা কৰা, লগতে প্ৰযুক্তিগত বিকাশ যাতে ৰাষ্ট্ৰীয় স্বাৰ্থ আৰু গ্ৰাহক সুৰক্ষাৰ নীতিৰ সৈতে সামঞ্জস্য ৰাখে সেয়াও নিশ্চিত কৰা।

আজি লোকসভাত এই তথ্য দাখিল কৰে শ্ৰী ৰাও ৰাজেন্দ্ৰ সিঙৰ প্ৰশ্নৰ লিখিত উত্তৰত তথ্য আৰু সম্প্ৰচাৰ আৰু সংসদীয় পৰিক্ৰমা ৰাজ্যিক মন্ত্ৰী ড° এল মুৰুগানে।

*****

Mahesh Kumar/Aparajita Priyadarshini/AA