ভারতনা মালেমগী অহুমশুবা খ্বায়দগী চাউবা দোমেষ্টিক এভিয়েশন মার্কেত ওইরক্লি, অমসুং উরান (UDAN) স্কিমগী মখাদা এয়র ত্রাভেল অসি মীয়াম পুম্নমক্না চৎপা য়াবা অমসুং কান্নবা ফংবা ঙমহল্লে। ভারতকী এয়রপোর্তশিংনা ঙসি নোংমদা পেসেঞ্জর লাখ মঙা হেন্না পানরি, মসিনা সেক্তর অসিদা খোঙলৈ থুনা চাউখৎলকপগী মশক অদু উৎলি।

পেসেঞ্জর ফেসিলিতেসন অসি মিনিষ্ট্রী অফ সিভিল এভিয়েশনগী খ্বায়দগী মরুওইবা থবকনি। মসিগী ফিরেপ অসিগী পরিংদা, মিনিষ্ট্রী অসিনা খোঙচৎ কোমহন্নবগীদমক পেসেঞ্জরশিংদা য়ুম্ফম ওইবা থৌরাং কয়া পায়খৎলে, মসিদা অহোঙবা মমলদা চান-থক্নবা ফংহনবা উরান যাত্রী কেফে, লাইরিকশিং লেম্না পাবা ফংহনগদবা ফ্লাইব্রেরী অমসুং এয়রপোর্তশিংদা লেম্না ৱাই-ফাই ফংহনবা য়াওরি।

পেসেঞ্জরশিংগী খুদোংচাবা, অরোন অথুপ লৈতবা অমসুং এয়রলাইন পুম্নমক্তা মান্নবা চৎন-পথাপ লৈহন্নবগীদমক, মিনিষ্ট্রী অসিনা দাইরেক্তোরেত জেনরেল ওফ সিভিল এভিয়েশন (DGCA) গী খত্থাঙদা মখাদা পীরিবা লমজিং-লমতাকশিং অসি থোকখ্রে:

অচুম্বা মওংদা ফংহন্নবগীদমক ফ্লাইত অমা হেক্তদা য়ামদ্রবদা ৬০% সীৎশিং চার্জ লৌদনা পীগদবনি

পি.এন.আর. অমখক্তদা খোঙচৎ চৎমিন্নরিবা পেসেঞ্জরশিং অদু পুন্না ফমমিন্নহনগদবনি, মরুওইনা থংনবা সীতশিংদা ফমহনগদবনি

শান্ন-খোৎনবগী খুৎলায়শিং অমসুং ঈশৈ-নোংমাইগী পোৎলমশিং পুবা অসি অরোন অথুপ লৈতনা অমসুং পেসেঞ্জরশিংদা খুদোংচাগদবা মওংদা, চৎনরিবা সেফ্তী অমসুং ওপরেসনগী চৎন-পথাপশিংগী মখাদা পোন্না ফংহনগদবনি

এয়রলাইনশিংনা হুই-হৌদোংগুম্বা ঙাশিং পুবাগা মরী লৈননা ময়েক শেংবা খুজিল থৌরাংশিং পুথোক্কদবনি

পেসেঞ্জরশিংগী হকশিংগী ফ্রেমৱর্ক নীংথিনা ইনগদবনি, মরুওইনা ফ্লাইত থিন্থবা, কেনসেল তৌবা অমসুং বোর্দিং তৌবা থিংবগী মতাংদা

এয়রলাইনগী ৱেবসাইতশিং, মোবাইল এপ্লিকেসনশিং, বুকিং প্লেতফোর্মশিং অমসুং এয়রপোর্তকী কাউন্তরশিংদা পেসেঞ্জরশিংগী হকশিং ময়েক শেংনা উৎকদবনি

মীয়ামদা হেন্না খঙহন্নবা অমসুং খুদোংচাহন্নবগীদমক পেসেঞ্জরশিংগী ফংফম থোকপশিং অদু লম-লমগী লোনশিংদা ময়েক শেংনা পাউ ফাওহনগদবনি

মিনিষ্ট্রী ওফ সিভিল এভিয়েশন্না পেসেঞ্জরশিংগী এক্সপিরিয়েন্স ফগৎহন্নবা, অরোন অথুপ লৈতনা থবক তৌনবা, ৱাকৎ হন্থহন্নবা অমসুং এভিয়েশন ইকোসিস্তেম পুম্বদা সেফ্তীগী খ্বায়দগী ৱাংবা থাক অদু চৎনহন্নবা ফিরেপ চেৎনা লৈরি।

***