ذرا تصور کریں کہ آپ ہندوستان کی مصروف قومی شاہراہوں میں سے کسی ایک کے کنارے فیول اسٹیشن، ریستوراں یا آرام گاہ قائم کرنے کی منصوبہ بندی کر رہے ہیں۔ کچھ عرصہ پہلے تک اس کے لیے ضروری رسائی کی اجازت حاصل کرنے کا عمل متعدد دفاتر کے چکر لگانے، کاغذی کارروائی اور طویل انتظار پر مشتمل ہوتا تھا۔آج یہ سفر کہیں زیادہ آسان ہو گیا ہے۔ جدید اور اپ گریڈ شدہ راج مارگ پرویش آن لائن پورٹل کے ذریعے قومی شاہراہوں کے کنارے تعمیرات کے لیے اجازت حاصل کرنا اب پہلے سے زیادہ تیز، شفاف اور سہل بننے جا رہا ہے۔

یہ پلیٹ فارم اس مقصد سے تیار کیا گیا ہے کہ قومی شاہراہوں تک رسائی حاصل کرنے کے خواہاں فیول اسٹیشنز،راستے کے کنارے کی سہولتیں، رہائشی جائیدادوں، آرام گاہ کمپلیکس اور رابطہ سڑکوں کے لیے نو آبجیکشن سرٹیفکیٹ(این او سی) حاصل کرنے کے عمل کو ہموار بنایا جا سکے۔حال ہی میں سڑک ٹرانسپورٹ اور قومی شاہراہوں کے مرکزی وزیرجناب نتن گڈکری کی جانب سے اس پورٹل کا آغاز کیا گیا، جو ٹیکنالوجی کے ذریعے مؤثر اور شفاف طرز حکمرانی کو فروغ دینے کی حکومت کی کوششوں میں ایک اور اہم قدم ہے۔

ایک ہی ڈیجیٹل پلیٹ فارم پر متعدد منظوریاں لا کر ، اپ گریڈ شدہ راج مارگ پرویش کا مقصد کاروباروں ، تنظیموں اور شہریوں کے لیے ہندوستان کے توسیع پذیر ہائی وے نیٹ ورک کی حمایت کرنے والے بنیادی ڈھانچے کو تیار کرنا آسان بنانا ہے ۔ وہ نجی جائیدادوں ، صنعتوں اور سڑک کے کنارے کی سہولیات کے لیے صرف چند کلکس میں شاہراہوں سے رسائی سے متعلق اجازت نامے کے لیے آن لائن درخواست دے سکتے ہیں ۔

یہی قومی پلیٹ فارم حکومت اور نجی دونوں فریقین کو یہ سہولت بھی فراہم کرتا ہے کہ وہ قومی شاہراہوں کے کنارے یا ان کے  آرپار پانی اور گیس کی پائپ لائنز، آپٹیکل فائبر کیبلز اور بجلی کی لائنیں جیسی اہم سہولیات بچھانے کی منظوری حاصل کر سکیں۔

درخواست کے نظام کو ڈیجیٹل بنانے کے ساتھ  ایم او آر ٹی ایچ کا مقصد اس عمل کو وقت  کے زیادہ پابند اور موثر بنانا ہے ، جس میں بنیادی طور پر جواب دہی  اہم ہو۔ توقع ہے کہ آن لائن پورٹل سے کاغذی کارروائی میں نمایاں کمی آئے گی ، درخواست پر نظر رکھنے اور تاخیر کو کم کرنے میں مدد ملے گی ، جس سے اسٹیک ہولڈرز کے لیے قیمتی وقت اور آپریشنل اخراجات کی بچت ہوگی ۔ امید ہے کہ اپ گریڈ شدہ راج مارگ پرویش پورٹل شاہراہوں کے شعبے میں ڈیجیٹل گورننس کو مزید مضبوط کرے گا ،جبکہ بروقت نگرانی کے ذریعے حکام اور درخواست دہندگان کے درمیان ہم آہنگی کو بہتر بنائے گا اور اس عمل کو مزید پریشانی سے پاک بنائے گا ۔

اجازتوں اور این او سی کے لیے ون اسٹاپ حل کے طور پر راج مارگ پرویش

راج مارگ پرویش: اجازت ناموں اور  این او سی کے لیے ایک جامع حل

جب ہندوستان کے قومی شاہراہ کا نیٹ ورک 1.46 لاکھ کلومیٹر سے تجاوز کر رہا ہے، تو یہ سڑکیں صرف مقامات کو جوڑنے کا کام ہی نہیں کر رہی ہیں۔ یہ نئے کاروبار، بہتر خدمات اور مضبوط بنیادی ڈھانچے کے لیے امکانات کو روشن کر رہی ہیں۔ ان سہولیات کی تعمیر اور رسائی کو آسان بنانے کے لیے’راج مارگ پرویش‘ قومی شاہراہوں سے متعلق رسائی کی اجازت، رائٹ آف وے(اپنی ضروریات کے مطابق کام کرنے کا قانونی حق) کی اجازت اور این او سی کے لیے ایک جامع ڈیجیٹل پلیٹ فارم کے طور پر کام کرتا ہے۔

راج مارگ پرویش درج ذیل درخواستوں کی سہولت فراہم کرتا ہے:

• تجارتی مراکز –قومی شاہراہوں کے کنارے پیٹرول پمپس، ریستوراں، دھابے اور آرام گاہیں قائم کرنے کا منصوبہ بنا رہے کاروباری ادارے  پورٹل کے ذریعے ضروری اجازت ناموں کے لیے درخواست دے سکتے ہیں۔

• بنیادی ڈھانچے تک رسائی – صنعتی ادارے، رہائشی علاقے اور نجی زمین کے مالکان ان سڑکوں کے لیے منظوری حاصل کر سکتے ہیں جو ان کی جائیدادوں کو قریب کی قومی شاہراہوں سے جوڑتی ہیں۔

• راستے کے کنارے سہولیات – یہ پلیٹ فارم آرام گاہیں اور خصوصی لاجسٹک سہولیات تیار کرنے کی درخواستوں کی حمایت کرتا ہے، جو مسافروں اور مال برداری کی سہولت میں اضافہ کرتی ہیں۔

• اہم سہولیات کی تنصیب – قومی شاہراہوں کے کنارے زیر زمین پانی اور گیس کی پائپ لائنز، آپٹیکل فائبر کیبلز اور بجلی کی لائنیں بچھانے کے لیے بھی اجازت حاصل کی جا سکتی ہے۔

پہلے اور اب: عمل کیسے تبدیل ہوا ہے:

اس سے پہلے، درخواست دہندگان کو اکثر متعدد فیلڈ دفاتر کا دورہ کرنا پڑتا، کاغذی کارروائی کو سمجھنا پڑتا اور طویل پراسیسنگ کے دوران انتظار کرنا پڑتا۔ اس عمل میں عام طور پر شامل تھا:

• دستی کاغذی کارروائی اور فائلوں کی فزیکل منتقلی

• درخواستوں کی صورتحال جاننے کے لیے محدود نگرانی کا نظام، جس سے اکثر تاخیر ہوتی تھی۔

• متفرق دائرہ اختیار کی ہینڈلنگ، جہاں صحیح اتھارٹی کی شناخت کے لیے دوبارہ کام کرنا پڑتا اور پراسیسنگ کا وقت بڑھ جاتا تھا۔

یہ عمل وقت طلب اور کم شفاف تھا۔

نئے ڈیجیٹل پلیٹ فارم کے اہم فوائد:

• حقیقی وقت کی ٹریکنگ – درخواست دہندگان ہفتے کے ساتوں دن اور چوبیسوں گھنٹے( 24×7 )آن لائن موجودہ صورتحال دیکھ سکتے ہیں

• مقررہ مدت میں جوابدہی – منظوری یا فیڈبیک ایک مقررہ مدت میں فراہم کیا جاتا ہے، غیر ضروری تاخیر کم ہوتی ہے۔

• کاغذ کے بغیر جمع – دستاویزات ڈیجیٹل طور پر اپلوڈ کی جا سکتی ہیں اور پراسیسنگ فیس محفوظ طریقے سے ڈیجیٹل پیمنٹ گیٹ ویز کے ذریعے ادا کی جا سکتی ہے۔

• مکمل آڈٹ ٹریل – ہر کارروائی اور دستاویز کے لیے مکمل آڈٹ ٹریل تاکہ جوابدہی یقینی بنے اور تنازعات کا حل تیز ہو۔

• جی آئی ایس سے لیس خودکار شناخت – درست چینج اور اتھارٹی دائرہ اختیار کی شناخت، ڈیٹا پر مبنی فیصلے کی حمایت اور دستی غلطیوں کے امکانات کم کرنا۔

اپنے فوائد کے ساتھ، اپ گریڈ شدہ راج مارگ پرویش آن لائن پورٹل اب ہندوستان کے شاہراہوں کے کنارے تعمیرات کے خواہشمند افراد کے لیے خیال سے منظوری تک کے عمل کو ہر ایک کے لیے زیادہ آسان بنانے کے لیے تیار ہے۔

*****

ش ح ۔ م ع ن۔

U. No.3863