وزیرِ اعظم نریندر مودی نے آج تاریخی شہر تریچی کا دورہ کیا جہاں انہوں نے تمل ناڈو کے بنیادی ڈھانچے اور معیشت کو مضبوط بنانے کے مقصد سے متعدد اہم ترقیاتی منصوبوں کا آغاز کیا۔ تقریباً پانچ ہزار چھ سو کروڑ روپے کی لاگت سے شروع کیے جانے والے ان منصوبوں میں صاف توانائی، پیٹرولیم سے متعلقہ صنعت اور شاہراہوں، ریلوے اور دیہی سڑکوں کے ذریعہ  بہتر کردہ کثیر جہتی رابطہ نظام کو فروغ دینے کے منصوبے شامل ہیں۔ اس موقع پر عوامی اجتماع سے خطاب کرتے ہوئے وزیرِ اعظم نریندر مودی نے کہا کہ “ان منصوبوں سے توانائی تک رسائی اور رابطے بہتر ہوں گے اور تمل ناڈو کے نوجوانوں کے لیے ہزاروں روزگار کے مواقع پیدا ہوں گے۔”

پائیدار توانائی پر توجہ دیتے ہوئے وزیرِ اعظم نریندر مودی نے بھارت پٹرولیم کے سٹی گیس ڈسٹری بیوشن نیٹ ورک کا سنگِ بنیاد رکھا۔ تقریباً ۳۷۰۰ کروڑ روپے کے اس منصوبے سے نیلگیری اور ایروڈ اضلاع میں بڑی تبدیلی متوقع ہے، جہاں تقریباً نو لاکھ خاندانوں اور متعدد کاروباری اداروں کو پائپ کے ذریعے قدرتی گیس فراہم کی جائے گی۔ ماحولیاتی فوائد کا ذکر کرتے ہوئے جناب نریندر مودی نے کہا کہ “صرف آٹھ برسوں میں اس منصوبے کا مثبت ماحولیاتی اثر چار کروڑ درخت لگانے کے برابر ہوگا۔”

وزیرِ اعظم نے کہا کہ چنئی میں انڈین آئل کارپوریشن کے لیوب بلینڈنگ پلانٹ کو ملک کے نام وقف کرنا میک اِن انڈیا مہم کو مضبوط بنانے کی سمت میں اہم قدم ہے۔ وزیرِ اعظم نریندر مودی نے بتایا کہ اپنی نوعیت کی عالمی سطح کی بڑی تنصیبات میں شمار ہونے والا یہ پلانٹ اس طرح تیار کیا گیا ہے کہ اس سے ریاست کے اندر اور باہر مختلف صنعتوں کی بڑھتی ہوئی ضروریات کو پورا کیا جا سکے۔ انہوں نے کہا، “لبریکینٹس کی مقامی پیداوار میں اضافہ ہونے سے درآمدات کم ہوں گی اور ملک کے وسائل کی بچت میں مدد ملے گی۔”

وزیرِ اعظم نے دیہی رابطہ کے نظام کی اہمیت پر بھی زور دیتے ہوئے پردھان منتری گرام سڑک یوجنا کے تحت تعمیر کی جانے والی ۳۷۰ کلو میٹر دیہی سڑکوں کا افتتاح کیا۔ توقع ہے کہ ان سڑکوں کے ذریعے دیہی علاقوں کے لوگوں کو صحت، تعلیم اور بازاروں تک بہتر رسائی حاصل ہوگی، جس سے دیہی معیشت کو مرکزی دھارے سے جوڑنے میں مدد ملے گی۔ اس موقع پر وزیرِ اعظم نریندر مودی نے کہا، “ہر سڑک دیہی معیشت کو مضبوط بناتی ہے اور لوگوں کی زندگی کو زیادہ آسان بناتی ہے۔”

وزیرِ اعظم نریندر مودی نے علاقے کی ثقافتی وراثت کا ذکر کرتے ہوئے گنگائیکونڈا چولاپورم میں نئی شاہراہ بائی پاس کے منصوبے کا اعلان کیا۔ اس منصوبے کا مقصد شہنشاہ راجندر چول کے ذریعہ تعمیر کردہ عظیم مندر، جسے اقوامِ متحدہ کے ثقافتی ادارے کی جانب سے عالمی وراثت کا درجہ حاصل ہے، اس کو محفوظ بنانا ہے۔ اس بائی پاس کے ذریعے بھاری ٹریفک کو مذہبی مقام سے دور منتقل کیا جائے گا تاکہ یادگار اور اس کے زائرین دونوں کی حفاظت یقینی بنائی جا سکے۔ نئی بنیادی سہولتوں کے بارے میں وزیرِ اعظم نریندر مودی نے کہا، “اس کا مطلب ہے کہ ہر ایک کے لیے بہتر حفاظت ممکن ہوگی۔”

وزیرِ اعظم نریندر مودی نے اپنے خطاب کے اختتام پر ریاستی ٹرانسپورٹ کے نظام کی تیز رفتار جدیدکاری کو بھی اجاگر کرتے ہوئے بتایا کہ حال ہی میں امرت بھارت پروگرام کے تحت آٹھ ریلوے اسٹیشنوں کی جدید کاری اور از سرِ نو ترقی کا کام مکمل کیا گیا ہے۔ آج نئی ریل خدمات کا بھی آغاز کیا گیا جو ناگرکوئل، کوئمبٹور، رامیشورم، ترونیلویلی، مئیلادوتھرئی اور کارائیکوڈی جیسے اہم مقامات کو دیگر علاقوں سے جوڑیں گی، جس سے سیاحت اور مقامی تجارت کو فروغ ملے گا۔ ریاست کے روشن مستقبل کے تئیں اپنے وژن کا اعادہ کرتے ہوئے جناب نریندر مودی نے کہا، “ہم ریاست کی ترقی کے لیے دن رات کام کر رہے ہیں اور آئندہ بھی اسی طرح کام کرتے رہیں گے۔”

******

(ش ح۔ م ش ع۔ م ا)

Urdu No-3738