পুম্নমকপু তরাম্না ওকচরি!

বজেৎ ৱেবিনার সেরিজকী অহুমশুবা ৱেবিনার অসিদা, ঐহাক্না ময়াম পুম্নমকপু তরাম্না ওকচরি। মমাংদা, তেক্নোলোজী, রিফোর্মস অমসুং ইকোনোমিক গ্রোথকুম্বা মরুওইবা হীরমশিংদা ৱেবিনার অনি পাংথোকখি। ঙসিদি, খন্ন-নৈনবা অসি রুরেল ইকোনোমী অমসুং এগ্রিকলচরগুম্বা মরুওইবা সেক্তরশিংদা মীৎয়েং থম্লি। ময়াম পুম্নমক্না অদোমগী মমল য়াম্লবা সজেসনশিংগা লোইননা বজেৎ শেম্বগী থৌওং অসিদা চাউনা মতেং পাংবীখি, অমসুং অদোম্না অদোমগী ইনপুতশিং অদু বজেৎ অসিদা ময়েক শেংনা উবা ফংলে অমসুং মখোয়শিং অসিনা য়াম্না কান্নবা পুরকখি। অদুবু হৌজিক বজেৎ অসি পুথোকখ্রবা মতুংদা, লৈবাক অসিনা মসিগী অপুনবা শক্তি অসি ফুদোকহনবা হায়বসিসু চপ মান্ননা মরু ওই। অদোমগী এক্সপরিয়েন্স, অদোমগী সজেসনশিং, অমসুং মীওই মশিং য়াম্না বজেৎকী কান্নবশিং মপুং ফানা ফংহন্নবগী অচম্বা পাম্বৈশিং অসি য়াম্না মরু ওই। মতৌ করম্না বজেত্তা থাদোকপা শেনফম খুদিংমক মপুং ফানা অমসুং থুনা শিজিন্নবা ঙমগনি? ৱেবিনার অসিদ অদোমগী সজেসনশিং অসি য়াম্না মরু ওই।

মরুপশিং,

লৌউ-শিংউ, ফার্মিং অমসুং খুৎ-শা হৈবগী থবকশিং অসি ঐখোয়গী শেন্মিৎলোনগী মরুওইবা য়ুম্বীশিংনি হায়বসি অদোম্না খংই। লৌউ-শিংউ অসিসু ভারতকী অশাংবা মতমগী চাউখৎ থৌরাংগী খোংচৎকী স্ত্রেতেজিক ওইবা য়ুম্বী অমনি। মসিগী মিৎয়েং অসিগা লোইননা, ঐখোয়গী সরকারনা লৌউ-শিংউগী সেক্তর অসিবু লেপ্তনা মপাঙ্গল কনখৎহল্লি। পি.এম. কিসান সম্মান নিধিগী মখাদা চাউরাক্না লৌমী মিলিয়ন ১০০না লুপা করোর লাখ ৪ হেন্না ফংখ্রে। এম.এস.পি.দা শেমদোক-শাদোকপা অসিনা লৌমীশিংনা শরুক অমা অমসুং মঙাগী রিফন্দ ফংহনখ্রে। ইন্সতিত্যুস্নেল ক্রেদিৎ কভরেজ অসি চাদা ৭৫ হেনখ্রে। পি.এম. ক্রোপ ইন্সুরেন্স স্কিমগী মখাদা লুপা করোর লাখ ২রোমগী ক্লেমশিং সিৎল তৌখ্রে। মসিগী হোৎনবা অসিনা লৌমীশিংগী খুদোংচাদবশিং অসি য়াম্না হন্থহল্লি অমসুং মখোয়দা তঙাইফদবা শেন্মিৎলোনগী সেক্যুরিতী ফংহল্লি। মসিনা লৌউ-শিংউগী সেক্তরদা থাজবা হেনগৎহল্লে। ঙসিদি, চিঞ্জাক্কী মহৈ-মরোংশিং অমসুং পোলসশিংদগী হৌরগা ওইল সীদ ফাওবদা লৈবাক অসিনা রেকোর্দ ওইনা পুথোকপা ঙম্লে। অদুবু হৌজিক ২১শুবা চহি-চাগী অনিশুবা ক্বার্তর হৌরকপদা, চহি ২৫গী মতুংদা, লৌউ-শিংউবদা অনৌবা ইনর্জী থাদোকপা অসিসু চপ মান্ননা মথৌ তাই। চহি অসিগী বজেৎ অসিনা মসিগী মাইকৈ অসিদা অনৌবা খোংথাংশিং লৌখৎলি। ঐহাক্না থাজবা থম্লি মদুদি ৱেবিনার অসিদগী ফংবা খন্ন-নৈনবশিং অমসুং ফোংদোকপশিং অসিনা লমদম অসিদা বজেৎকী প্রোভিজনশিং অথুবা মতমদা ইমপ্লিমেন্ত তৌবদা মতেং পাংগনি।

মরুপশিং,

ঙসিদি মালেমগী কৈথেলশিং হাংলি, অমসুং মালেমগী দিমান্দ হোংলক্লি। ৱেবিনার অসিদা, ঐখোয়গী লৌউ-শিংউবু মতৌ করম্না এক্সপোর্ত ওরিয়েন্তেদ ওইহনগদগে হায়বদু খন্ন-নৈনবগী তঙাইফদবা অদু লৈ। ঐখোয়না তোঙান তোঙানবা ক্লাইমেৎশিং লৈ, অমসুং ঐখোয়না মখোয়শিং অসি মপুং ফানা শীজিন্নগদবনি। ঐখোয়না এগ্রো-ক্লাইমেতিক জোনশিংদা য়াম্না মরাং কায়না লৈ। চহি অসিগী বজেৎ অসিনা মসিগী মতাংদা অনৌবা খুদোংচাবা কয়া অমা পীরি। মসিনা প্রদক্তিবিতী হেনগৎহন্নবা অমসুং এক্সপোর্ত শক্তি হেনগৎহন্নবা মাইকৈ অমা লেপ্লি। বজেৎ অসিনা অৱাংবা ভেল্যু লৈবা লৌউ-শিংউদা মীৎয়েং থম্লি। কোকোস, কেজু, কোকো, অমসুং সেন্দলৱুদকুম্বা পোত্থোকশিংগীদমক রিজনেল-স্পিসিফিক প্রমোসনগী ৱাফম থমখ্রে। ঐখোয়গী খা থংবা রাজ্যশিং, মরু ওইনা কেরলা অমসুং তামিল নাদুদা, নোকোস য়াম্না পুথোকই হায়বসি অদোম্না খঙই। অদুবু হৌজিক্তি, হায়রিবা উশিং অসি চহি য়ামখ্রে অমসুং মখোয়গী পোত্থোক পুথোকপা ঙমদ্রে। কেরলা অমসুং তামিল নাদুগী লৌমীশিংদা অহেনবা কান্নবা ফংহন্নবগীদমক, লাক্কদৌরিবা নুমিৎশিংদা লৌমীশিংদা কান্নবা ফংহন্নবগীদমক্তা, কোকোসতা অখন্নবা মীৎয়েং থম্লি।

মরুপশিং,

অৱাং-নোংপোক্কী মায়কৈদা য়েংলুরবদি, অগর্বতি হায়বা ৱাহৈ অসি অগরৱুদতগী লাকপনি হায়বসি মীওই খরখক্তনা খঙই। হিমালয়গী রাজ্যশিংদা, বজেৎ অসিদা অইং-অশাগী মহৈ-মরোংশিং থাবদা মতেং পাংলি। এক্সপোর্ত ওরিয়েন্তেদ প্রদক্সন হেনগৎলকপা মতমদা, খুঙ্গংগী লমশিং অসিদা প্রোসেসিং অমসুং ভেল্যু এদিসনগী খুত্থাংদা থবক ফংহল্লগনি। মসিগী মাইকৈ অসিদা কোওর্দিনেৎ এক্সন লৌখৎপা হায়বসি তঙাইফদে, অমসুং স্তেকহোল্দর পুম্নমক্না পুন্না খন্ন-নৈনগদবনি। করিগুম্বা ঐখোয়না অপুনবা ওইনা অৱাংবা ভেল্যু লৈবা লৌউ-শিংউবু চাওখৎহনবা ঙম্লবদি, মসিনা লৌউ-শিংউবু মালেমগী থাক্তা চাংদম্নবা ঙম্বা সেক্তর অমদা ওন্থোকপা ঙমগনি। লৌউ-শিংউগী এক্সপর্তশিং, ইন্দস্ত্রী অমসুং লৌমীশিংনা মতৌ করম্না পুনশিনবা ঙমগনি? লৌমীশিংবু মালেমগী কৈথেলগা করম্না শম্নহনগনি? ক্বালিতী, ব্রান্দিং অমসুং স্তেন্দর্দশিংগীদমক করম্না পান্দম থমগনি? হীরমশিং অসি খুমাং চাউশিলহনবা অসিনা ৱেবিনার অসিগী মরুওইবা হেনগৎহনগনি। ঐহাক্না অতোপ্পা ৱাফম অমদসু পুক্নিং চিংশিনবা পাম্মি। ঙসিদি, মালেম অসিনা হকশেলগী মতাংদা হেন্না খঙহল্লি। হোলিস্তিক হেল্থকেয়র, ওর্গানিক দাইতশিং অমসুং ওর্গানিক ফুদশিংনা পুক্নিং চিংশিল্লি। ভারত্তা, ঐখোয়না কেমিকেল ফ্রি ফার্মিং অমসুং নেচরেল ফার্মিংদা মরুওইবা পীগদবনি। নেচরেল ফার্মিং অমসুং কেমিকেল য়াওদবা পোত্থোকশিং অসি মালেমগী কৈথেলশিংদা য়ৌহন্নবগী হাইৱে অমা ওইরকপা য়াই। মসিগীদমক সরকারনা সর্টিফিকেসন অমসুং লেবোরেতরীগী খুদোংচাবশিং শেমগৎনবা থৌরাং তৌরি। অদুম ওইনমক, অদোম্না মসিগী মতাংদা অদোমগী ৱাখল্লোনশিংসু শেয়র তৌগদবনি।

মরুপশিং,

এক্সপোর্তশিং হেনগৎহনবদা মরু ওইবা মরম অমা হায়রগদি ঙা-ফাবগী সেক্তরগী পোতেন্সিএলনি। ভারত অসি মালেমগী অনিশুবা খ্বাইদগী চাউবা ঙা পুথোকপা লৈবাকনি। ঙসিদি, ঐখোয়গী রিজর্বয়রশিং, পন্দশিং অমসুং ঈশিং লৈফমশিংনা পুন্না ঙা তোন লাখ ৪ পুথোক্লি। অদুবু অহেনবা তন লাখ ২০ পুথোকপগী ওইথোকপা লৈ। ঐখোয়না হৌজিক লৈরিবা তন লাখ ৪ অসিদা তন লাখ ২০ হাপচিল্লবদি ঐখোয়গী লাইরবা ঙামীশিংগী পুন্সিদা করি অহোংবা লাক্কদৌরি হায়বদু খল্লু। ঐখোয়না খুঙ্গংগী ইনকম মখল-মখা কয়া থোকহন্নবগী খুদোংচাবা লৈ। মালেমগী দিমান্দ লৈবনা মরম ওইদুনা ফিসরিজ অসি এক্সপোর্ত গ্রোথকী মরুওইবা প্লেতফোর্ম অমা ওইরকপা য়াই। ৱেবিনার অসিদগী রিজর্বৱার পোতেন্সিএল, ক্লস্তর প্লান্নিং, অমসুং ফিসরিজ দিপার্তমেন্তশিং অমসুং লোকেল কম্ম্যুনিতীশিংগী মরক্তা মপাঙ্গল কনবা কোওর্দিনেসনগুম্বা প্রেক্তিকেল ওইবা সজেসনশিং অসি থোক্লবদি, মসি য়াম্না ফগনি। ইক্বুইচর, ফীদ, প্রোসেসিং, ব্রান্দিং, এক্সপোর্ত, অমসুং তঙাইফদবা লোজিস্তিক্স পুম্নমক অসি অনৌবা বিজিনেস মোদেলশিং মথৌ তাই। মসি লৌউ-শিংউবু খুঙ্গংগী চাউখৎ-থৌরাংগীদমক মমল য়াম্লবা, ইম্পেক্ত য়াম্না লৈবা সেক্তর অমদা ওন্থোক্নবা খুদোংচাবা অমনি, অমসুং ঐখোয়না মসিগী মাইকৈ অসিদা পুন্না থবক তৌমিন্নবা তাই।

মরুপশিং,

শা-ষন য়োকপা অসি খুঙ্গংগী শেন্মিৎলোনগী চাউখৎপা য়াবা য়ুম্বী অমনি। ভারত অসি মালেমগী খ্বাইদগী চাউবা মহি-মনাই পুথোকপা লৈবাক অমনি অমসুং য়েরুম পুথোকপদা অনিশুবদা লৈ। মসিবু মখা তানা পুরক্নবগীদমক, ঐখোয়না ব্রীদিং ক্বালিতী, লায়না ঙাকথোকপা অমসুং সাইন্তিফিক মেনেজমেন্ততা মীৎয়েং থমগদবনি। অতোপ্পা মরু ওইবা হীরম অমা হায়রগদি শা-ষনগী হকশেলনি। ঐহাক্না ৱান আর্থ ৱান হেল্থকী মতাংদা হায়রকপা মতমদা, মসিদা পাম্বীশিং অমসুং শা-ঙাশিংগী হকশেল য়াওরি। ভারত অসি হৌজিক ভেক্সিন পুথোকপদা মশা-মরোমদোম লেপচবা ঙম্লে। শাশিংবু ফুত এন্দ মাউথ দিজিদগী ঙাকথোক্নবা দোজ করোর ১২৫ হেন্না কাপখ্রে। নেস্নেল গোকুল মিসনগী মখাদা, তেক্নোলোজী অসি পাকথোক চাউথোকহনখ্রে। শা-ষন য়োকপগী থবক তৌরিবা লৌমীশিংনা হৌজিক্তি কিসান ক্রেদিৎ কার্দকী কান্নবা ফংলি। প্রাইবেৎ ইনবেস্তমেন্ত পুক্নিং থৌগৎনবা, এনিমেল হজবেন্দরী ইনফ্রাস্ত্রকচর দিবেলপমেন্ত ফন্দ হৌদোক্লে। গোবর্ধন স্কিম অসি ঐখোয়না পায়খৎলি হায়বসিসু অদোম্না খঙই। খুঙ্গংশিং অসি শেংনা থম্নবগীদমক্তা স্কিম অসিগী মখাদা শা-ষন অমসুং খুঙ্গংশিংগী মহৈ-মরোংশিং শীজিন্নবা য়াই। শঙ্গোম্না শেল-থুমগী পোত্থোক অমা ওইবগুম্না, গোবর (শন্থী) না শেল-থুমগী পোত্থোক অমা ওইবসু য়াই। গ্যাস সপ্লাইগী খুত্থাংদা গোবর্ধন্না ইনর্জী সিক্যুরিতীদা য়াম্না চাউনা মতেং পাংবা ঙমগনি। মসিনা খুঙ্গংশিংদা য়াম্না খুদোংচাবা অমসুং মখল কয়াগী কান্নবা ফংহল্লি। ঐহাক্না রাজ্য সরকার পুম্নমকপু মসিগী স্কিম অসি মরুওইনা লৌনবা অমসুং প্রমোৎ তৌনবা হায়জরি।

মরুপশিং,

মমাংগী এক্সপিরিয়েন্সশিংদগী ঐখোয়না খঙলে মদুদি মহৈ-মরোং অমখক্তদা থাজবা থম্বা অসি লৌমীশিংগীদমক রিস্ক ওই। মসিনা ইনকমগী অপাম্বা হন্থহল্লি। মরম অদুনা, ঐখোয়না মহৈ-মরোংশিং মখল-মখা কয়া থোকহনবদা মীৎয়েং থম্লি। মসিগী মথক্তা, নেস্নেল মিসন ওন ইদিবল ওইলস এন্দ পোলস অমসুং নেস্নেল মিসন ওন নেচরেল ফার্মিংনা লৌউ-শিংউগী সেক্তর মপাঙ্গল কনখৎহল্লি।

মরুপশিং,

লৌউ-শিংউ অসি স্তেতকী হীরম অমনি অমসুং স্তেতশিংদা লৌউ-শিংউগীদমক চাউনা শেন থাদৈ হায়বসিসু অদোম্না খঙই। ঐখোয়না স্তেতশিংদা মখোয়গী থৌদাংশিং অদু পাংথোক্নবা লেপ্পা লৈতনা পুক্নিং থৌগৎকদবনি। ঐখোয়না মখোয়বু মতৌ করম্না মতেং পাংগদগে? ঐখোয়গী সজেসনশিং অসিনা মখোয়দা করি কান্নবা পীবা ঙমগনি? খুঙ্গংশিং অমসুং লৌমীশিংগীদমক পীরিবা লুপা খুদিংমক মতিক চাবা মওংদা শিজিন্নগদবনি। ঐখোয়না দিস্ত্রিক্তকী থাক ফাওবদা বজেৎকী প্রোভিজনশিং মপাঙ্গল কনখৎহনগদবনি। মতৌ অসুম্না খক্তনি অনৌবা পোলিসীশিংনা খ্বাইদগী য়াম্লবা মীওইশিংবু কান্নহল্লকপা ঙমগনি।

মরুপশিং,

মসি তেক্নোলোজীগী চহিচানি, অমসুং সরকারনা লৌউ-শিংউদা তেক্নোলোজীগী চৎনবী অমা পুরকপদা মরুওইবা পীরি। ই-নামগী খুত্থাংদা, কৈথেলগী এক্সেস অসি দেমোক্রেতাইজ তৌখ্রে। সরকারনা এগ্রিস্তেককী খুত্থাংদা লৌউ-শিংউগীদমক দিজিতেল পব্লিক ইনফ্রাস্ত্রকচর শেমগৎলি। মসিগী মখাদা, দিজিতেল আইদেন্তিতীশিং, হায়বদি, লৌমীগী আই.দি.শিং শেমগৎলি। হৌজিক ফাওবদা, লৌমী আই.দি. কোতি ৯ রোম পুথোকখ্রে, অমসুং লম কোতি ৩০ রোম দিজিতেল ওইনা সর্ভে তৌখ্রে। ভারত-ভিস্তারগুম্বা এ.আই.দা য়ুম্ফম ওইবা প্লেৎফোর্মশিংনা রিসর্স ইন্সতিত্যুসনশিং অমসুং লৌমীশিংগী মরক্তা লৈরিবা খেন্নবা অদু কোকহল্লি।

অদুবু মরুপশিং,

তেক্নোলোজীনা মহৈ-মশিং ফংহনবদা সিস্তেমশিংনা মদু শিজিন্নবা, ইন্সতিত্যুসনশিংনা মদু পুন্সিনবা অমসুং ইন্ত্রপ্রিনরশিংনা মদুদা ইনোবেসনশিং শেমগৎপদা মতেং পাংই। ৱেবিনার অসিদা, অদোম্না মসিগা মরী লৈনবা মপাঙ্গল লৈরবা সজেসনশিং পুথোক্কদবনি। মতৌ করম্না ঐখোয়না তেক্নোলোজীবু ইফেক্তিব ওইনা পুন্সিনবা ঙমগনি? ৱেবিনার অসিদগী ফংবা সজেসনশিং অসিনা মসিগী মাইকৈ অসিদা অচৌবা থৌদাং অমা লৌগনি।

মরুপশিং,

ঐখোয়গী সরকারনা খুঙ্গংগী চাউখৎ-থৌরাং শেমগৎপদা অচেৎপা ৱাফম থম্লি। প্রধান মন্ত্রী অৱাস য়োজনা, স্বামিৎৱা য়োজনা, পি.এম. রুরেল রোদ স্কিম, অমসুং সেল্ফ হেল্প গ্রুপশিংদা শেলগী তেংবাং পীবা অসিগুম্বা স্কিমশিংনা খুঙ্গংগী শেন্মিৎলোনবু লেপ্তনা মপাঙ্গল কনখৎহল্লি। ঐখোয়না লক্ষপতি দিদি কেম্পেনগী মাই পাকপা অসিসু অনৌবা অৱাংবা থাক্তা পুখৎকদবনি। হৌজিক ফাওবদা, ঐখোয়না খুঙ্গংশিংদা নুপী কোতি অহুম লাক্ষপতি দিদিস ওইহনবদা মাই পাক্লে। ২০২৯ ফাওবগী মনুংদা, ঐখোয়না অহেনবা কোতি ৩ হাপচিন্নবা পান্দম থম্লি। মসিনা অপুনবা লাখপতি দিদী কোতি ৬ ওইহল্লগনি। মতৌ করম্না পান্দম অসি হেন্না থুনা ফংবা ঙমগনি? অদোমগী সজেসনশিং অসি য়াম্না মরু ওইগনি।

মরুপশিং,

লৈবাক অসিদা স্তোরেজগীদমক অচৌবা কেম্পেন অমা চত্থরি। স্তোরেজ মিলিয়ন কয়া শাখ্রে। স্তোরেজগী মথক্তা, এগ্রিকলচর ওন্ত্রপ্রিন্যুরশিংনা প্রোসেসিং, সপ্লাই চেনশিং, এগ্রিকলচর-তেক, এগ্রিকলচর-ফিনতেক, অমসুং এক্সপোর্তশিংদা ইনোভেসন অমসুং ইনবেস্তমেন্ত হেনগৎহনগদবনি। ঙসিগী খন্ন-নৈনবা অসিনা খুঙ্গংগী শেন্মিৎলোনদা অনৌবা শক্তি পীরগনি হায়না ঐহাক্না থাজবা থম্লি। ৱেবিনার অসিগীদমক্তা ঐহাক্না ময়াম পুম্নমকপু য়াইফ-পাউজেল পীজরি। অমসুং ঐহাক্না থাজবা থম্লি মদুদি গ্রাসরুৎকী ৱাখল্লোনশিং অসিনা বজেৎ অসি মাই পাকহনবদা অমসুং খুঙ্গং খুদিংদা য়ৌহনবদা মরুওইবা থৌদাং অমা লৌগনি। ময়াম পুম্নমকপু য়াইফ-পাউজেল পীজরি।

অদোমবু য়াম্না থাগৎচরি। নমস্কার!

***