سائنس و ٹیکنالوجی، ارضیاتی سائنسز اور وزیر مملکت وزیراعظم آفس، عملہ، عوامی شکایات، پنشن، ایٹمی توانائی اور خلاءکے مرکزی وزیر مملکت (آزادانہ چارج) ڈاکٹر جتیندر سنگھ نے آج ملک بھر سے 26 نوجوان طبی پیشہ ور افراد کو ایوارڈز پیش کیے۔ ان ڈاکٹروں نے آنکولوجی، پیڈیاٹرکس، اینڈو کرائنولوجی، آرتھوپیڈکس، ایمرجنسی میڈیسن جیسے مختلف شعبوں میں نمایاں کارکردگی پیش کی ہے۔

اس تقریب کا انعقاد کرنے والے میڈیا ہاؤس کو مبارکباد دیتے ہوئے، ڈاکٹر جتیندر سنگھ نے ان ڈاکٹروں کو ایوارڈ دینے کے فیصلے کی تعریف کی جو اپنے کیریئر کے عروج کے ابتدائی دور میں ہیں۔ انہوں نے کہا کہ کیریئر کے آخری مرحلے میں ملنے والے ایوارڈ کے مقابلے میں، اس وقت ملنے والا اعزاز ان کے لیے ایک بڑی پہچان اور زبردست حوصلہ افزائی کا باعث ہے۔

وزیر موصوف نے کہا کہ ملک میں حفظان صحت کی خدمات کے مستقبل کو مضبوط بنانے کے لیے نوجوان ڈاکٹروں  کی خدمات کو ان کے کیریئر کے ابتدائی مرحلے میں تسلیم کرنا انتہائی اہم ہے۔ انہوں نے کہا کہ طبی پیشہ ور افراد کی ان کے تربیتی اور ابتدائی برسوں میں حوصلہ افزائی کرنا انہیں تیزی سے بدلتے ہوئے طبی منظر نامے میں مہارت حاصل کرنے اور اپنے علم کو مسلسل اپ ڈیٹ کرنے کی ترغیب دیتا ہے۔

کنکلیو سے خطاب کرتے ہوئے ڈاکٹر جتیندر سنگھ نے اس بات پر اطمینان کا اظہار کیا کہ اس تقریب میں بہت سے اعزازات صرف ریٹائرمنٹ کے قریب پہنچنے والے سینئر پیشہ ور افراد کے بجائے نوجوان ڈاکٹروں کو دیے گئے ہیں۔ ایوارڈز کا حوالہ دیتے ہوئے وزیر موصوف نے کہا کہ ٹیلنٹ کی جلد شناخت نہ صرف خود اعتمادی کو بڑھاتی ہے بلکہ نوجوان طبی ماہرین کو مزید عزم کے ساتھ معاشرے کی خدمت جاری رکھنے کی تحریک بھی دیتی ہے۔

ڈاکٹر جتیندر سنگھ نے طبی پریکٹس کی بدلتی ہوئی نوعیت کے بارے میں بات کرتے ہوئے کہا کہ نئی ٹیکنالوجیز اور مصنوعی ذہانت(اے آئی) کی آمد کے ساتھ حفظان صحت کا شعبہ ایک انقلابی تبدیلی سے گزر رہا ہے۔ انہوں نے کہا کہ اگرچہ ٹیکنالوجی نے تشخیص اور علاج میں نمایاں بہتری لائی ہے، لیکن ڈاکٹر کا کردار ناگزیر ہے کیونکہ تجربہ اور طبی بصیرت  مریضوں کی دیکھ بھال میں اب بھی کلیدی کردار ادا کرتے ہیں۔

طبی سائنس میں ہونے والی دہائیوں پر محیط پیش رفت کے حوالے سے اپنا نقطۂ نظر پیش کرتے ہوئے ڈاکٹر جتیندر سنگھ نے یاد دلایا کہ کس طرح پہلے طبی تعلیم چند مخصوص بیماریوں جیسے کہ آتشک (سفلس) یا ذیابیطس کے گہرے مطالعہ پر مرکوز تھی تاکہ طب کے پورے شعبے کو سمجھا جا سکے۔ انہوں نے کہا کہ آج طب کا دائرہ کار متعدد مہارتوں اور علاج کے نئے طریقوں کے ابھرنے سے بہت وسیع ہو چکا ہے اور ساتھ ہی مصنوعی ذہانت روایتی سیکھنے کے عمل کی جگہ لینے کی طرف مائل ہے۔

وزیر موصوف نے کہا کہ ٹیکنالوجی کی ترقی، نئی ابھرتی ہوئی بیماریوں اور صحت کی دیکھ بھال کی بدلتی ہوئی ضروریات کے امتزاج نے اس شعبے کو پہلے سے کہیں زیادہ پیچیدہ بنا دیا ہے۔ ایسے منظر نامے میں، جہاں متبادل اور ٹیکنالوجیز تیزی سے سامنے آ رہی ہیں، ہر نوجوان طبیب کو طبی مہارت کے ایک مخصوص شعبے پر توجہ مرکوز کرنی چاہیے اور خود کو باقاعدگی سے اپ ڈیٹ رکھنا چاہیے۔ انہوں نے نوجوان ڈاکٹروں کو مشورہ دیا کہ وہ اپنی توجہ مخصوص طبی مہارت پر مرکوز رکھیں کیونکہ طبی میدان میں علم بہت تیزی سے ترقی کر رہا ہے۔

ڈاکٹر جتیندر سنگھ نے کووڈ کے بعد کے ہیلتھ کیئر ماحول کا بھی حوالہ دیا، جہاں متعدی بیماریاں اور طرزِ زندگی سے متعلق بیماریاں  اب بھی حفظانِ صحت کے لیے چیلنج بنی ہوئی ہیں۔ انہوں نے کہا کہ اس صورتحال نے طبی پیشہ ور افراد کے لیے مخصوص علم اور مسلسل سیکھنے کی اہمیت کو مزید بڑھا دیا ہے۔

کنکلیو میں اعزاز پانے والے نوجوان ڈاکٹروں پر اعتماد کا اظہار کرتے ہوئے ڈاکٹر جتیندر سنگھ نے کہا کہ ان میں سے بہت سے ڈاکٹر اپنے کیریئر میں بڑے سنگ میل عبور کریں گے اور ایک دن طبی پیشے میں اپنی خدمات کے بدلے ’لائف ٹائم اچیومنٹ‘ اعزازات حاصل کرنے کے لیے واپس آئیں گے۔

********

ش ح۔ک ح۔ ن ع

U. No. 3388