প্ৰধানমন্ত্ৰী শ্ৰী নৰেন্দ্ৰ মোদীয়ে আজি "বহনক্ষম আৰু শক্তিশালী অৰ্থনৈতিক বিকাশ"শীৰ্ষক বাজেটোত্তৰ ৱেবিনাৰ শৃংখলাৰ দ্বিতীয় সত্ৰত ভাষণ প্ৰদান কৰে। প্ৰধানমন্ত্ৰীয়ে বিগত সপ্তাহৰ অগ্ৰগতিৰ বিষয়ে উল্লেখ কৰি কয় যে প্ৰথমখন ৱেবিনাৰ অত্যন্ত সফল হয় আৰু বাজেটৰ প্ৰস্তাৱসমূহ ৰূপায়ণৰ ক্ষেত্ৰত উৎকৃষ্ট পৰামৰ্শ লাভ কৰা হৈছিল।

প্ৰধানমন্ত্ৰীয়ে এই কথাত গুৰুত্ব আৰোপ কৰে যে আজিৰ ৱেবিনাৰখন দেশৰ অৰ্থনৈতিক বিকাশক নিৰন্তৰ শক্তি প্ৰদানৰ সৈতে অন্তৰ্নিহিতভাৱে জড়িত।প্ৰধানমন্ত্ৰীয়ে উল্লেখ কৰে যে বিশ্বৰ যোগান শৃংখল পুনৰ গঢ় দিয়াৰ লগে লগে ভাৰতৰ শক্তিশালী অৰ্থনীতি বিশ্বৰ বাবে আশাৰ ৰেঙণিত পৰিণত হৈছে। "এখন 'বিকশিত ভাৰত'ৰ বাবে এক বৃহৎ ভেটি হৈছে অৰ্থনীতিৰ দ্ৰুত অগ্ৰগতি", শ্ৰী মোদীয়ে কয়।

প্ৰধানমন্ত্ৰীয়ে চৰকাৰৰ স্পষ্ট দৃষ্টিভংগী আৰু সংকল্পক পুনৰ দৃঢ়তাৰে কয়, "অধিক নিৰ্মাণ কৰক, অধিক উৎপাদন কৰক, অধিক সংযোগ কৰক আৰু অধিক ৰপ্তানি কৰক"ৰ মূল মন্ত্ৰসমূহ দোঁহাৰে। প্ৰধানমন্ত্ৰীয়ে কয় যে নিশ্চিতভাৱে আজি আপোনালোকৰ মাজত যি আলোচনা আৰু ইয়াৰ পৰা ওলোৱা পৰামৰ্শই গুৰুত্বপূৰ্ণ ভূমিকা পালন কৰিব।

বিভিন্ন খণ্ডৰ মাজৰ সমন্বয়ৰ বিষয়ে উল্লেখ কৰি প্ৰধানমন্ত্ৰীয়ে কয় যে নিৰ্মাণ, লজিষ্টিক, এমএছএমই আৰু নগৰীয়া কেন্দ্ৰসমূহ পৃথক খণ্ড নহয়, বৰঞ্চ ই এক অৰ্থনৈতিক গাঁথনিৰ আন্তঃসংযোগী স্তম্ভ। তেওঁ বিৱৰি কয় যে কেনেকৈ নিৰ্মাণ খণ্ডই ৰপ্তানিৰ ক্ষেত্ৰত সহায় কৰে আৰু প্ৰতিযোগিতামূলক এমএছএমইসমূহে নমনীয়তা আৰু উদ্ভাৱনক প্ৰোৎসাহিত কৰে। শ্ৰী মোদীয়ে কয়, "এই বছৰৰ বাজেটে এই সকলো স্তম্ভক যথেষ্ট শক্তি প্ৰদান কৰিছে"।

প্ৰধানমন্ত্ৰীয়ে সকীয়াই দিয়ে যে উদ্যোগ, বিত্তীয় প্ৰতিষ্ঠান, ৰাজ্য চৰকাৰৰ সক্ৰিয় অংশগ্ৰহণ অবিহনে কেৱল নীতি নিৰ্দেশনাই ফলাফল নিদিয়ে। তেওঁ অংশীদাৰসকলক সামগ্ৰী নিৰ্মাণ, উৎপাদন বৃদ্ধি আৰু খৰচৰ গাঁথনি অধিক প্ৰতিযোগিতামূলক কৰাৰ আলোচনাক অগ্ৰাধিকাৰ দিবলৈ আহ্বান জনায়। “এই দিশবোৰত আপোনালোকৰ পৰামৰ্শই উন্নয়নক দেশৰ প্ৰতিটো চুকলৈ যোৱাত গুৰুত্বপূৰ্ণ হিচাপে বিবেচিত হ’ব” শ্ৰী মোদীয়ে কয়।

প্ৰধানমন্ত্ৰীয়ে মূল সামৰ্থ্যসমূহ শক্তিশালী কৰাৰ লগতে উৎপাদন খণ্ডত বৰ্তমানৰ অসুবিধাসমূহ দূৰ কৰাৰ বাবে চৰকাৰৰ প্ৰচেষ্টাৰ ওপৰত আলোকপাত কৰে। মোদীয়ে দৃঢ়তাৰে কয় যে ৰেয়াৰ আৰ্থ কৰিডৰ আৰু আপুৰুগীয়া মাটিৰ খনিজ পদাৰ্থৰ প্ৰতি উৎসৰ্গিত কণ্টেইনাৰ নিৰ্মাণৰ দৰে খণ্ডৰ ওপৰত গুৰুত্ব দিয়াৰ লক্ষ্য হৈছে বাণিজ্য অনুকূল পৰিৱেশ শক্তিশালী কৰা।

প্ৰধানমন্ত্ৰীয়ে বাজেটত ঘোষণা কৰা ‘বায়’ফাৰ্মা শক্তি অভিযান’ৰ কথাও উল্লেখ কৰে, যাৰ লক্ষ্য ভাৰতক জৈৱিক ঔষধ আৰু পৰৱৰ্তী প্ৰজন্মৰ চিকিৎসা বিজ্ঞানৰ বিশ্বব্যাপী কেন্দ্ৰ হিচাপে প্ৰতিষ্ঠা কৰা। মোদীয়ে কয় যে আমি উন্নত বায়’ফাৰ্মা গৱেষণা আৰু উৎপাদনৰ ক্ষেত্ৰত নেতৃত্বৰ দিশত আগবাঢ়িব বিচাৰো।

পৰিৱৰ্তিত গতিশীল বিশ্বৰ প্ৰেক্ষাপটত প্ৰধানমন্ত্ৰীয়ে কয় যে বিশ্বই সক্ৰিয়ভাৱে নিৰ্ভৰযোগ্য আৰু নমনীয় উৎপাদন অংশীদাৰৰ সন্ধানত আছে। তেওঁ অংশীদাৰসকলক আত্মবিশ্বাসেৰে বিনিয়োগ কৰিবলৈ, অত্যাধুনিক প্ৰযুক্তি গ্ৰহণ কৰিবলৈ, গৱেষণাত উল্লেখযোগ্য বিনিয়োগ কৰিবলৈ আৰু বিশ্বমানৰ গুণ বজাই ৰাখিবলৈ আহ্বান জনায়। প্ৰধানমন্ত্ৰীয়ে দৃঢ়তাৰে কয়, "এই ভূমিকা শক্তিশালীভাৱে পালন কৰাৰ সুযোগ আছে ভাৰতৰ।"

মুক্ত বাণিজ্য চুক্তি (এফটিএ)ৰ কথা উল্লেখ কৰি প্ৰধানমন্ত্ৰীয়ে কয় যে এই চুক্তিসমূহে সুযোগৰ বিশাল পথ মুকলি কৰিছে, যাৰ ফলত ভাৰতীয় উদ্যোগক গুণগত মানৰ ওপৰত গুৰুত্ব দিয়াৰ এক নতুন দায়িত্ব দিয়া হৈছে। “ব্যৱহাৰকাৰী-অনুকূল সামগ্ৰী সৃষ্টি কৰিবলৈ আন্তঃৰাষ্ট্ৰীয় গ্ৰাহকৰ পছন্দ আৰু আৰামৰ স্তৰৰ ক্ষেত্ৰত গৱেষণা কৰাৰ প্ৰয়োজনীয়তাৰ ওপৰত গুৰুত্ব আৰোপ কৰে। তেতিয়াহে আমি মুক্ত বাণিজ্য চুক্তিৰ দ্বাৰা সৃষ্টি হোৱা সুযোগৰ সুবিধা ল’ব পাৰিম”, প্ৰধানমন্ত্ৰীয়ে সজোৰে কয়।

প্ৰধানমন্ত্ৰীয়ে আন্তঃগাঁথনি আৰু লজিষ্টিক খণ্ডক ৰাষ্ট্ৰীয় উন্নয়ন কৌশলৰ মূল স্তম্ভ হিচাপে অভিহিত কৰে, যিটো এই বছৰৰ বাজেটত অভিলেখ সৃষ্টিকাৰী মূলধনী ব্যয়ৰ দ্বাৰা সমৰ্থিত। তেওঁ দ্ৰুতবেগী ৰে’ল, বহু-মডাল সংযোগ আৰু জাহাজ মেৰামতিৰ সুবিধা সম্প্ৰসাৰণক দক্ষতাৰ বাবে অপৰিহাৰ্য পদক্ষেপ হিচাপে বৰ্ণনা কৰে। তেওঁ কয় যে এই আন্তঃগাঁথনিৰ প্ৰকৃত সুবিধা তেতিয়াহে উপলব্ধি হ’ব যেতিয়া উদ্যোগ আৰু বিনিয়োগকাৰীয়ে সেই অনুসৰি নিজৰ কৌশলসমূহ একেলগ হ’ব।’

নগৰীয়াকৰণৰ সন্দৰ্ভত প্ৰধানমন্ত্ৰীয়ে কয় যে ভাৰতৰ ভৱিষ্যতৰ বৃদ্ধি ইয়াৰ নগৰসমূহৰ ফলপ্ৰসূ পৰিকল্পনা আৰু ব্যৱস্থাপনাৰ সৈতে জড়িত। তেওঁ দ্বিতীয় আৰু তৃতীয় স্তৰৰ চহৰসমূহে কেনেকৈ বিকাশৰ নতুন আঁত ধৰি কাম কৰিব পাৰে সেই সম্পৰ্কে পৰামৰ্শ বিচাৰিছিল। এই সন্দৰ্ভত পৰামৰ্শ আগবঢ়োৱাটো গুৰুত্বপূৰ্ণ হ’ব বুলি প্ৰধানমন্ত্ৰী মোদীয়ে জোৰ দিয়ে।

বহনক্ষমতাৰ দিশত গোলকীয় পৰিৱৰ্তন সন্দৰ্ভত প্ৰধানমন্ত্ৰীয়ে কয় যে বজাৰসমূহে এতিয়া খৰচৰ ঊৰ্ধ্বত পৰিৱেশৰ প্ৰভাৱৰ দিশটো চায়। তেওঁ কাৰ্বন কেপচাৰ, ব্যৱহাৰ আৰু মজুতকৰণ মিছনক এক উল্লেখযোগ্য পদক্ষেপ হিচাপে উল্লেখ কৰি ব্যৱসায়ীসকলক তেওঁলোকৰ মূল ব্যৱসায়িক কৌশলত স্বচ্ছ প্ৰযুক্তিক একত্ৰিত কৰিবলৈ আহ্বান জনায়। প্ৰধানমন্ত্ৰীয়ে কয় যে সময়মতে স্বচ্ছ প্ৰযুক্তিত বিনিয়োগ কৰা উদ্যোগসমূহে অনাগত বছৰবোৰত নতুন বজাৰত অধিক সুবিধা লাভ কৰিব।

প্ৰধানমন্ত্ৰীয়ে ‘উন্নয়নশীল ভাৰত’ৰ লক্ষ্যত উপনীত হ’বলৈ সামূহিক মালিকীস্বত্বৰ আহ্বান জনায়। তেওঁ অংশগ্ৰহণকাৰীসকলক আলোচনাৰ ঊৰ্ধ্বত থাকি চৰকাৰী আন্তঃগাঁথনিৰ সৈতে অংশীদাৰিত্বৰে গতি গঢ়ি তুলিবলৈ আহ্বান জনায়। প্ৰধানমন্ত্ৰীয়ে কয় যে আপোনালোকৰ প্ৰতিটো পৰামৰ্শ আৰু আপোনালোকৰ প্ৰতিটো অভিজ্ঞতাই তৃণমূলক পৰ্যায়ত উৎকৃষ্ট ফলাফল দিয়াৰ সম্ভাৱনা আছে।

Addressing a post-budget webinar, highlighting how this year’s Union Budget reinforces our commitment to sustaining and strengthening economic growth. https://t.co/ddRJ2gS9vq

— Narendra Modi (@narendramodi) March 3, 2026

*****

MJPS/PRK/DB