প্রধান মন্ত্রী শ্রী নরেন্দ্র মোদীনা তামিল নাদুগী মদুরাইদা লুপা করোর ৪৪০০ হেনবগী ইনফ্রাষ্ট্রকচর প্রোজেকশিং শঙ্গাখ্রে, মীয়ামদা কৎথোকখ্রে অমসুং উরেপ-উয়ুং তমখ্রে। থৌরম অদুদা মীয়ামদা ৱা ঙাংবদা, প্রধান মন্ত্রীনা হায়খি মদুদি ঙসি অসি তামিল নাদুগী চাউখৎপগী খোঙচত্ত চাউথোকচবা তাঙ্কক অমনি। প্রোজেকশিং অসিনা লম্বী-থোঙগী অওনবা পুরক্নবা, শেন-থুম চাউখৎনবা অমসুং নহারোলশিংগী থবকশিং পীনবা অমসুং রাজ্যগী মীওই লাখ কয়াগী পুন্সি অহোংবা পুরক্নবা পান্দম থম্লি। অফবা ইনফ্রাষ্ট্রকচর শেমগৎপা হায়বসি মীয়ামগী ফিবম ফগৎহনবনি। চাউখৎ-থৌরাংগী থবকশিং অসিনা তাক্লিবদি কৈথেলশিং য়ৌনবা লৌমীশিংদা অফবা লম্বীশিং ফংহনবা, লাইখুরুম্বা লাকপা অমসুং লমকোয়বা লাকপা মীওইশিং চৎথোক-চৎশিন নুংঙাইহনবা অমসুং ললোন-ইতিকশিংগী পোৎ-চৈ পুথোক-পুশিন য়াংখৎহনবনি।

প্রধান মন্ত্রীনা হায়খি মদুদি হৌখিবা চহি ১২ দা, ভারত সরকারনা তামিল নাদুগী হায়ৱে নেতৱার্কতা য়াম্লবা শেনফমশিং থাদখ্রে, ২০১৪ দগী কিমি লিশিং ৪ হেনবগী হায়ৱেশিং শেমগৎখ্রে। মরুওইবা নেসনেল হায়ৱে প্রোজেক অনিগী উরেপ-উয়ুং তম্লে, মরাক্কানম-পুদুচেরি সেক্সন লেন মরি ওইহনবা থবক পায়খৎলে, সমুদ্র মপানগী তুরিজম অমসুং ললোন-ইতিক চাউখৎনবা লুপা করোর ২১০০ হেনবগী শেনফম অমা থাদরে অমসুং পরামাকুদি-রামানথাপুরম পরিং লেন মরিদা ওনগৎলে। লুপা করোর ১৮০০ রোম থাদদুনা প্রোজেকশিং অসিনা রামেশ্বরম অমসুং ধানুসকোদিগুম্বা মফমশিং লাইনা য়ৌহনগনি, লৌউ-শিংউগী পোৎথোকশিং অমসুং সমুদ্রগী পোৎথোকশিং পুথোক-পুশিন নুংঙাইহল্লে। 

প্রধান মন্ত্রীনা হায়খি মদুদি হৌখিবা চহি ১০ দা, ভারত রেলৱেজনা পুৱারি ওইরবা অওনবা অমা পুরক্লে, মতমগা চুনবা, মতিক চাবা অমসুং মীয়ামগী খনবা ত্রান্সপোর্ত সিষ্টেম অমা ওইরে অমসুং মরুওইনা তামিল নাদুদা উবা ফংলে। হৌজিক পাল্লিবা সরকার অসিনা ওফিস পায়রকপদগী রাজ্য অসিগী রেলৱেগী বজেত শরুক ৯ রোম হেনগৎলে। ২০০৯ অমসুং ১০২৪ গী মরক্ত চাংচৎ অমদা চহিগী বজেত লুপা করোর ৮৮০ ওইখি, মসি ২০২৬-২৭ দা লুপা করোর ৭,৬০০ দা হেনগৎলে। রাজ্য অসিদা কিমি ১৩০০ হেনবগী অনৌবা ত্রেকশিং শেমগৎলে, চাদা ৯৭ ইলেক্ত্রিক ফংহল্লে অমসুং অশোই-অঙাম থোক্তবা অমসুং থবক ফজনা পাংথোকপা হেনগৎহন্নবা লৈকংথোঙ অমসুং অন্দরপাস চা কয়া শেমগৎলে। হৌখিবা চহিদা ভারতকী অহানবা ভর্তিকেল ওইবা অনৌবা পাম্বান ব্রিজ মহাক্না শঙ্গাখ্রে।

প্রধান মন্ত্রীনা হায়খি মদুদি হৌজিক বন্দে ভারত ত্রেন ৯ অমসুং অমৃত ভারত ত্রেন ৯ না তামিল নাদু মীয়ামগী সেবা তৌরি, ত্রেনশিং অসিগী কোচশিং চেন্নাইদা লৈবা ইন্তরগ্রেল কোচ ফেক্তরিদা শাবনি। ‘মেক ইন ইন্দিয়া’ না অত্মনির্ভর মপাঙ্গল কনখৎহন্নবা অমসুং ঐখোয়গী নহারোলশিং থবক পীনবা ঐখোয়গী পান্দম অসি চাউথোকচনবা মচাক অমনি। অমৃত ভারত ষ্টেসন স্কিমগী মখাদা, রাজ্য অসিদা রেলৱে ষ্টেসন ৭৭ শেমগৎলে, ঙসি নৌনা শেমগৎলবা ষ্টেসন ৮ শঙ্গারে। চেন্নাই বিচ-চেন্নাই ইগমোর মরিশুবা লাইন শঙ্গাবা অসিনা নুমিৎ খুদিংগী চৎলিবা মীওই লিশিং কয়াদা কান্নবা পীরগনি। প্রধান মন্ত্রীনা কুমবাকোনম, য়েরকাউদ অমসুং ভেল্লোরদা অকাসবানিগী অনৌবা এফ.এম রিলে ত্রান্সমিত্তরশিংসু শঙ্গাখ্রে, রেদিও ষ্টেসনশিং মীয়ামদা কৎথোকপা অসিনা মীয়ামগী সেবা তৌগনি।

প্রধান মন্ত্রীনা হায়খি হৌখিবা চহি ১০ গা চাংদম্নবদা, তামিল নাদুগী ইনফ্রাষ্ট্রকচরগী শেন থাদবা অসি শরুক অহুম হেনগৎলে, ২০২৬ গী কেন্দ্রগী বজেত্ত রাজ্য অসিদা অকনবা মীৎয়েং থমখি। বেঙ্গালুরু-চেন্নাই অমসুং চেন্নাই-হায়দ্রবাদ বুল্লেত ত্রেন কোরিদোরশিং পায়খৎকদৌরিবা অসিনা লমদম অসিগী শেন্মিৎলোন্দা অওনবা পুরক্কনি। কেন্দ্রগী বজেতনা তামিল নাদু রিয়ার আর্থ কোরিদোরগী শরুক অমা ওইনা ওইহল্লে, অৱাংবা থাক্কী মেনুফেকচরিং, থিজিনবা অমসুং তেক্নোলোজি চাউখৎপা পুক্নিং থৌগৎলে।

প্রধান মন্ত্রীনা তামিল নাদুগী ইনাকখুল্লবা পুৱারি অমসুং হেরিতেচ অমা লৈরি, অদিচানাল্লুরগুম্বা পুৱারি ওইরবা মফমশিং মালেমগী হেরিতেচগী মফম ওইনা শেমগৎকনি। পুলিকাত পাৎ অমসুং পোধিগাই মালাইগী অকোয়বদা ইকোতুরিজমগী থবকশিং পায়খৎপনা মহৌশাগী অকোয়গী ফিবমশিং ঙাক-শেনবগা লোয়ননা অনৌবা থবকশিং ফংনবা খুদোংচাবশিং পীগনি। মেনুফেকচরিং চাউখৎনবা ইন্দষ্ট্রিয়েল ক্লষ্টর ২০০ রোম মশক খঙদোক্কনি অমসুং শৌগৎকনি। তামিল নাদুদা উদ্যোগ কয়া লৈরি, স্কিম অসিনা মফম অসিগী নহারোলশিংদা কান্নবা পীগনি।

প্রধান মন্ত্রীনা হায়খি মদুদি ২০৪৭ দা বিকসিত ভারত অমা শেমগৎপা ভারতমচা খুদিংমক্কী অপাম্বনি। লৈবাক অসিগী পান্দম ফংবদা তামিল নাদুনা মরুওইবা থৌদাং অমা লৌগনি। চাউখৎপদা কাংলুপ খুদিংমক কোনশিন্নবা অমসুং রাজ্য অসি চাউখৎনবা কেন্দ্রনা থবক পায়খৎলি। বিকসিত ভারতগীদমক বিকসিত তামিল নাদু অমা শেমগৎপা হায়বসি ঐখোয়গী অপুনবা পান্দমনি।

Speaking at the launch of various infrastructure works in Madurai. These will improve connectivity and significantly benefit the people across Tamil Nadu.
https://t.co/BtyKdVaZWM

— Narendra Modi (@narendramodi) March 1, 2026

***