ہندوستان کو وسیع اور متنوع بحری وسائل سے مالا مال کیا گیا ہے، جس کی پشت پناہی تقریباً 11,099 کلو میٹر طویل ساحلی پٹی اور لگ بھگ 24 لاکھ مربع کلو میٹر پر محیط خصوصی معاشی زون سے ہوتی ہے۔ اس وقت ہندوستان میں زیادہ تر ماہی گیری کی سرگرمیاں ساحل سے 40 تا 50 بحری میل تک محدود ہیں، جب کہ 12 سے 200 بحری میل تک پھیلا ہوا وسیع خصوصی معاشی زون خاطر خواہ حد تک استعمال میں نہیں لایا جا سکا ہے، حالاںکہ سائنسی جائزوں سے معلوم ہوتا ہے کہ سمندر میں اعلیٰ قدر کے وسائل، خصوصاً ٹونا اور ٹونا جیسی اقسام میں نمایاں صلاحیت موجود ہے۔

اس موقع کو پیشِ نظر رکھتے ہوئے حکومتِ ہند نے مرکزی بجٹ 2025–26 میں خصوصی معاشی زون اور آزاد سمندری علاقوں میں ماہی گیری کے وسائل کے پائیدار استعمال کے لیے ایک سہل ساز فریم ورک کا اعلان کیا، جس میں انڈمان و نکوبار جزائر اور لکشدیپ پر خصوصی توجہ دی گئی، جو مجموعی طور پر ہندوستان کے خصوصی معاشی زون کا 49 فیصد حصہ رکھتے ہیں اور جہاں سمندری ماہی گیری کی متوقع صلاحیت 2.48 لاکھ ٹن ہے۔

بجٹ اعلان پر عمل درآمد اور خصوصی معاشی زون میں ماہی گیری کے لیے مضبوط قانونی و ادارہ جاتی ڈھانچہ فراہم کرنے کی غرض سے، حکومتِ ہند نے 4 نومبر 2025 کو ’’خصوصی معاشی زون میں ماہی گیری کے وسائل کے پائیدار استعمال کے قواعد، 2025‘‘ کو، علاقائی سمندر، براعظمی شیلف، خصوصی معاشی زون اور دیگر بحری علاقوں کے قانون 1976 (80 از 1976) کے تحت نافذ کیا۔ یہ قواعد ایک اہم پالیسی اقدام کی حیثیت رکھتے ہیں، جن کا مقصد خصوصی معاشی زون میں سمندری ماہی گیری کے وسائل کے ذمہ دارانہ اور پائیدار استعمال کو فروغ دینا، بحری ماحولیاتی نظام کے تحفظ کو یقینی بنانا، بین الاقوامی ذمہ داریوں کی پاسداری کرنا اور ماہی گیروں کی معاشی حالت کو بہتر بنانا ہے۔

خصوصی معاشی زون کے قواعد کے تحت رسائی اجازت نامہ

رسائی اجازت نامہ ان قواعد کے تحت ایک کلیدی ذریعہ ہے، جس کا مقصد ہندوستانی ماہی گیروں کو اعلیٰ قدر کے سمندری وسائل کے پائیدار حصول کے لیے بااختیار بنانا ہے۔ اس کا ہدف یہ ہے کہ:

• ساحلی ماہی گیری سے گہرے سمندر کی ماہی گیری کی طرف منتقلی میں معاونت کی جائے،
• ماہی گیروں کو تعاونی تنظیموں اور ماہی پرور پیداوار کنندہ تنظیموں میں منظم کیا جائے،
• زیادہ شکار، بہتر قیمتوں اور برآمدی معیار کے مطابق طریقوں، مثلاً قابلِ سراغی نظام اور تصدیقی عمل کے ذریعے آمدنی میں اضافہ کیا جائے۔

بحری شعبے کو مزید فروغ دینے اور خصوصی معاشی زون کے پائیدار استعمال کو یقینی بنانے کے لیے، معزز مرکزی وزیر برائے ماہی پروری، مویشی پروری و ڈیری اور پنچایتی راج، جناب راجیو رنجن سنگھ نے 20 فروری 2026 کو گجرات کے شہر ویراول میں واقع کے سی سی میدان سے ہندوستان کے تمام 13 ساحلی ریاستوں اور مرکز کے زیرِ انتظام علاقوں کے لیے خصوصی معاشی زون میں ماہی گیری کے رسائی اجازت نامے کا اجرا کیا۔ اس موقع پر معزز وزیر موصوف نے 37 ماہی گیروں کو، جو ملک کی تمام ساحلی ریاستوں اور مرکز کے زیرِ انتظام علاقوں کی 24 ماہی پروری تعاونی تنظیموں کی نمائندگی کر رہے تھے، رسائی اجازت نامے فراہم کیے۔

گزشتہ روز ویراول میں منعقدہ قومی سطح کی تقریب میں معزز مرکزی وزیر نے 13 ساحلی ریاستوں اور مرکز کے زیرِ انتظام علاقوں سے منتخب ماہی گیروں کو اجازت نامے عطا کیے۔ مستفید ہونے والوں میں اڈیشہ سے چندر شیکھر مہانتی اور اوم پرکاش سوین شامل تھے، جو اُتکل میرین پرائمری فِش پروڈکشن اینڈ مارکیٹنگ کوآپریٹو سوسائٹی لمیٹڈ سے وابستہ ہیں، آندھرا پردیش سے بومیدی راماکرشنا اور میلاپلی لکشمن راؤ، جو درگاہ سینٹر فشریز کوآپریٹو سوسائٹی اور اے پی میکانائزڈ فِشنگ بوٹ آپریٹرز ایسوسی ایشن، وشاکھاپٹنم کی نمائندگی کرتے ہیں، مہاراشٹر سے اگنیل ساواروک مانکر اور سپروہا پشکر بھوٹے، جو وسئی مچھیمار سروودیہ سنستھا اور رتناگیری تعلقہ پرس سین ایسوسی ایشن سے منسلک ہیں، کرناٹک سے سدانندا شینا میبن اور دیوراج کارکیرا، جو مالپے کی الا سمُدرا مینوگرارا پراتھمیکا سیوا سہاکاری سنگھا سے تعلق رکھتے ہیں، پڈوچیری سے جیامتی اور گنابالن، جو کیلنجلمیڈو سی فشرمین کوآپریٹو سوسائٹی سے وابستہ ہیں، تمل ناڈو سے انٹونی جیابالن اور این پوگل سیلوا مَنی، جو تھارووائیکولم فشرمین کوآپریٹو سوسائٹی کی نمائندگی کرتے ہیں، کیرالہ سے سنجیب بابو، جو کولم بوٹ اونرز ایسوسی ایشن سے وابستہ ہیں، گوا سے سدھارتھا ڈی سوزا اور آئیور ڈومنک ڈی سوزا، جو منڈوی فشرمین مارکیٹنگ کوآپریٹو سوسائٹی لمیٹڈ سے تعلق رکھتے ہیں، دمن و دیو سے جگدیش ناتھو چرانیا اور سیجل ورجنگیو، جو جناب مہاساگر فشریز کوآپریٹو سوسائٹی، وناکبارا اور جناب مہاکالیشور فشریز کوآپریٹو سوسائٹی، سعودواڑی سے وابستہ ہیں، مغربی بنگال سے سبودھ کنڈر اور رادھا کرشن منا، لکشدیپ سے عمر فاروق ای پی، انڈمان و نکوبار جزائر سے درئی سیلوا م اور ٹی دیوراجو، جو انڈمان میکانائزڈ ویسلز ویلفیئر ایسوسی ایشن اور جناب سائی جیوتی فشریز کوآپریٹو یوتھ سوسائٹی لمیٹڈ کی نمائندگی کرتے ہیں، اور گجرات سے مکیش پریم جی پنجاری سمیت دیگر ماہی گیر، جو پوربندر مچھیمار بوٹ ایسوسی ایشن، جناب رامیشور متسیہ ادیوگ سہاکاری منڈلی لمیٹڈ اور جناب ویراول سمست کھروا سماج وغیرہ سے وابستہ ہیں۔

وزیر موصوف نے زور دے کر کہا کہ یہ اقدام پورے ملک میں بحری ماہی گیری کی سرگرمیوں کو زیادہ محفوظ، شفاف اور بہتر ضابطہ بند بنانے کی سمت ایک اہم قدم ہے۔

خصوصی معاشی زون کے قواعد کے تحت میکانائزڈ اور بڑی جسامت کی موٹرائزڈ کشتیوں کے لیے رسائی اجازت نامہ حاصل کرنا لازمی ہے، جو بغیر کسی فیس کے آن لائن رجسٹریشن و لائسنسنگ آف فشنگ کرافٹ پورٹل کے ذریعے حاصل کیا جا سکتا ہے۔ یہ قومی آن لائن پلیٹ فارم قومی اطلاعاتی مرکز اور محکمہ ماہی پروری کی جانب سے تیار کیا گیا ہے، جو سمندری ماہی گیروں اور ساحلی ریاستوں و مرکز کے زیرِ انتظام علاقوں کو کشتیوں کی رجسٹریشن، لائسنس کے اجرا، ملکیت کی منتقلی اور متعلقہ امور کے لیے ویب پر مبنی عوام دوست خدمات فراہم کرتا ہے، جس سے کاروباری سہولت میں اضافہ ہوتا ہے۔

یہ پورٹل بحری مصنوعات کی برآمدی ترقیاتی اتھارٹی اور برآمدی معائنہ کونسل کے ساتھ بھی مربوط ہے، جس کے ذریعے مچھلی کے شکار اور صحت کے سرٹیفکیٹ جاری کیے جاتے ہیں، جو اعلیٰ بین الاقوامی منڈیوں میں سمندری غذائی اشیا کی برآمد کے لیے لازمی تقاضے ہیں۔ یہ مربوط ڈیجیٹل نظام آغاز سے اختتام تک قابلِ سراغی، صحت و صفائی کے تقاضوں کی تکمیل اور ماحول دوست لیبلنگ کو یقینی بناتا ہے، جس سے ہندوستانی بحری مصنوعات کی عالمی مسابقت میں اضافہ ہوتا ہے۔

مزید برآں، محکمۂ ماہی پروری نے منصوبہ بنایا ہے کہ گہرے سمندر میں ماہی گیری کی مہارت، حفاظتی آگاہی اور برآمدی معیار کے مطابق مچھلی سنبھالنے کے طریقوں سے ماہی گیروں کو آراستہ کرنے کے لیے باقاعدہ تربیتی اور صلاحیت سازی پروگرام شروع کیے جائیں۔ یہ پروگرام قومی ماہی گیری تربیتی و تحقیقی ادارے، ماہی گیری سروے ادارہ اور ساحلی ریاستوں و مرکز کے زیرِ انتظام علاقوں کے اشتراک سے نافذ کیے جائیں گے۔

اسی طرح محکمۂ ماہی پروری اور وزارتِ تعاون کے درمیان ایک مشترکہ ورکنگ گروپ بھی قائم کیا گیا ہے، جس کا مقصد چھوٹے پیمانے کے ماہی گیروں کی فعال شرکت کو فروغ دینا اور گہرے سمندر کی ماہی گیری، بعد از شکار انتظام، پراسیسنگ اور برآمدی قدر کی زنجیروں میں ماہی پروری کی تعاونی تنظیموں کو مضبوط بنانا ہے۔

رسائی اجازت نامے کی نمایاں خصوصیات

1۔ چھوٹے اور روایتی ماہی گیروں کا تحفظ

روایتی غیر موٹرائزڈ کشتیوں کو رسائی اجازت نامے کی شرط سے مستثنیٰ رکھا گیا ہے۔ صرف میکانائزڈ ماہی گیری کشتیوں (تقریباً 64,000) اور 24 میٹر سے زائد لمبائی والی بڑی موٹرائزڈ کشتیوں کے لیے اجازت نامہ حاصل کرنا لازمی ہے۔ اس سے چھوٹے اور روایتی ماہی گیروں کے مفادات اور روزگار کا تحفظ یقینی بنایا گیا ہے۔

2۔ جدید اور بہتر بنایا گیا ڈیجیٹل پلیٹ فارم

ریئل کرافٹ پلیٹ فارم کو اس انداز میں جدید بنایا گیا ہے کہ رسائی اجازت نامہ حاصل کرنے کا عمل ہموار اور صارف دوست ہو۔ یہ پلیٹ فارم پہلے ہی ریاستوں، مرکز کے زیرِ انتظام علاقوں اور ماہی گیروں کی جانب سے کشتیوں کی رجسٹریشن اور لائسنس کے لیے وسیع پیمانے پر استعمال ہو رہا ہے۔

3۔ بغیر فیس، مکمل طور پر آن لائن اجازت نامہ

رسائی اجازت نامہ بلا معاوضہ جاری کیا جاتا ہے اور مکمل طور پر ریئل کرافٹ پورٹل کے ذریعے مقررہ مدت کے اندر شفاف طریقے سے فراہم کیا جاتا ہے۔ منظوری کے بعد اجازت نامہ ماہی گیر کے رجسٹرڈ موبائل نمبر یا ای میل پر ڈیجیٹل صورت میں بھیج دیا جاتا ہے، جس سے شفافیت اور آسان رسائی یقینی بنتی ہے۔

4۔ عالمی برآمدات کے لیے یکساں کھڑکی نظام

ریئل کرافٹ پورٹل کو بحری مصنوعات کی برآمدی ترقیاتی اتھارٹی کے کیچ سرٹیفکیٹ نظام اور برآمدی معائنہ کونسل کے صحت سرٹیفکیٹ نظام کے ساتھ مربوط کیا گیا ہے، جس سے ایک متحدہ ڈیجیٹل نظام قائم ہوا ہے۔ اس انضمام سے قابلِ سراغی بہتر ہوتی ہے، طریقہ کار میں تاخیر کم ہوتی ہے اور اعلیٰ بین الاقوامی منڈیوں تک رسائی آسان ہوتی ہے۔

پس منظر: ماہی گیروں کی فلاح و سلامتی کے اقدامات

محکمۂ ماہی پروری ماہی گیر برادری کی خوشحالی اور تحفظ کے لیے متعدد اقدامات نافذ کر رہا ہے۔ سمندر میں سلامتی کو بہتر بنانے کے لیے حکومتِ ہند ملک بھر کی ماہی گیری کشتیوں پر ایک لاکھ ٹرانسپونڈر بلا معاوضہ نصب کر رہی ہے۔ اب تک 50,000 سے زائد ٹرانسپونڈر نصب کیے جا چکے ہیں، جن کے ذریعے بروقت کشتیوں کی نگرانی، دو طرفہ رابطہ، ہنگامی پیغامات اور موسمی انتباہات ممکن ہوتے ہیں، حتیٰ کہ موبائل نیٹ ورک کی حدود سے باہر بھی۔

کشتیوں کو بھارتی ساحلی محافظ دستے جیسے اداروں سے مربوط کر کے یہ اقدام خراب موسم اور ہنگامی حالات میں ماہی گیروں کی سلامتی کو نمایاں طور پر مضبوط بناتا ہے۔ مزید برآں، تقریباً 6 لاکھ ماہی گیر خاندانوں کو ماہی گیری پر پابندی اور کمزور سیزن کے دوران سالانہ روزگار معاونت فراہم کی جاتی ہے، جبکہ حادثاتی بیمہ کی رقم بڑھا کر 5 لاکھ روپے کر دی گئی ہے، جس سے ملک بھر کے 33 لاکھ سے زائد ماہی گیر مستفید ہو رہے ہیں۔

******

ش ح۔ ش ا ر۔ ول

Uno-2848