Google અને Alphabet ના CEO શ્રી સુંદર પિચાઈએ 'ઈન્ડિયા AI ઈમ્પેક્ટ સમિટ 2026' દરમિયાન ડિપાર્ટમેન્ટ ફોર પ્રમોશન ઓફ ઇન્ડસ્ટ્રી એન્ડ ઇન્ટરનલ ટ્રેડ (DPIIT) દ્વારા આયોજિત 'ભારત GI કોફી લાઉન્જ' ની મુલાકાત લીધી હતી. શ્રી પિચાઈએ 'મલબાર અરેબિકા' કોફીનો સ્વાદ માણ્યો હતો અને બરિસ્ટા (કોફી બનાવનાર) સાથે વાતચીત કરીને ભારતની પ્રીમિયમ GI-ટેગ ધરાવતી કોફીનો આસ્વાદ માણ્યો હતો.

ફિનલેન્ડ, ફ્રાન્સ, જાપાન, નાઈજીરિયા, બોત્સ્વાના, લિથુઆનિયા, કઝાકિસ્તાન, પોલેન્ડ અને જર્મની સહિતના ઘણા દેશોના પ્રતિનિધિઓએ પણ કોફી એક્સપિરિયન્સ સેન્ટરની મુલાકાત લીધી હતી અને ભારતની GI કોફી વિરાસતમાં ઊંડો રસ દાખવ્યો હતો. ફિનલેન્ડના પ્રતિનિધિએ ખાસ કરીને 'મોન્સૂન્ડ મલબાર અરેબિકા' (Monsooned Malabar Arabica) ના નરમ અને સ્મૂધ ફ્લેવરની પ્રશંસા કરી હતી અને તેની અનન્ય પ્રક્રિયા પરંપરાને બિરદાવી હતી, જે તેને વૈશ્વિક સ્તરે અલગ પાડે છે.

કેન્દ્રીય વાણિજ્ય અને ઉદ્યોગ મંત્રી શ્રી પિયુષ ગોયલે X (અગાઉનું ટ્વિટર) પર આ ક્ષણને શેર કરતા લખ્યું: “જ્યારે @SundarPichai એક ઘૂંટડો પીવા માટે પધારે, ત્યારે તમે સમજી શકો છો કે તે ખરેખર મૂલ્યવાન છે! વિશ્વ #IndiaAIImpactSummit2026 માં ભારત GI કોફીનો કપ ઉઠાવી રહ્યું છે. ભારત GI કોફી લાઉન્જ, ભારત મંડપમ (હોલ 14, પ્રથમ માળ) 17-20 ફેબ્રુઆરી.”

વાણિજ્ય અને ઉદ્યોગ રાજ્ય મંત્રી શ્રી જિતિન પ્રસાદે સમિટના બીજા દિવસે મુલાકાત લઈને ભારતની GI-નોંધાયેલ કોફીની સમૃદ્ધિની ઉજવણી કરી હતી. તેમણે હાઈલાઈટ કર્યું હતું કે કેવી રીતે ભૌગોલિક સંકેતો (Geographical Indications) પ્રમાણિકતા જાળવી રાખે છે, સ્થાનિક સમુદાયોને સશક્ત બનાવે છે અને ભારતની વિવિધ કોફીને વૈશ્વિક માન્યતા અપાવે છે.

AI ઈમ્પેક્ટ સમિટ 2026 માં, ભારતની વિશિષ્ટ GI પ્રોડક્ટ્સની ઉજવણી કરતા વિશેષ પ્રદર્શન દ્વારા 'ભારત GI કોફી' વૈશ્વિક ધ્યાન ખેંચી રહી છે. નવી દિલ્હીમાં 16-20 ફેબ્રુઆરી દરમિયાન યોજાઈ રહેલી આ સૌથી મોટી AI ઈવેન્ટ 'ભારત GI' નામની નવી રાષ્ટ્રીય પહેલનો ભાગ બની છે.

DPIIT એ 'ભારત GI' ને એકીકૃત રાષ્ટ્રીય બૌદ્ધિક સંપત્તિ (Intellectual Property) બ્રાન્ડ તરીકે રજૂ કરી છે. તેનું વિઝન ભારતની અનોખી GI પ્રોડક્ટ્સને વિશ્વ સમક્ષ પ્રદર્શિત કરવાનું છે, જેની ટેગલાઇન “A World Exclusive” (એક વિશ્વ વિશિષ્ટ) છે. DPIIT અને કોફી બોર્ડ સાથે મળીને મુલાકાતીઓને ભારતીય કોફીના સમૃદ્ધ વારસા અને વિવિધ સ્વાદનો અનુભવ કરાવી રહ્યા છે.

હોલ નંબર 14 ના પ્રથમ માળે સ્થિત કોફી એક્સપિરિયન્સ સેન્ટરે ઘણા જિજ્ઞાસુ મુલાકાતીઓને આકર્ષ્યા છે. ઘણા આંતરરાષ્ટ્રીય પ્રતિનિધિઓ  પરંપરાગત ટકાઉ રીતે છાયામાં ઉગાડવામાં આવેલી (Shade Grown), હાથથી પસંદ કરાયેલી (Hand Picked) અને કુદરતી રીતે સૂર્યના તાપમાં સૂકવવામાં આવેલી 'ભારત GI' કોફીનો સ્વાદ માણવા માટે આવી રહ્યા છે.

SM/DK/GP/JD