న్యూఢిల్లీలోని జాతీయ మీడియా సెంటర్లో అత్యున్నత స్థాయి కన్సల్టేషన్ వర్క్‌షాపును సమాచార, ప్రసార (ఐ అండ్ బీ) మంత్రిత్వ శాఖ ఈ రోజు నిర్వహించింది. దేశ వ్యాప్తంగా 15,000 పాఠశాలలు, 500 కళాశాలల్లో ఇండియన్ ఇనిస్టిట్యూట్ ఆఫ్ క్రియేటివ్ టెక్నాలజీస్ (ఐఐసీటీ) ద్వారా కంటెంట్ క్రియేషన్ ప్రయోగశాలల్ని ఏర్పాటు చేయడానికి దీనిని నిర్వహించింది. భారతదేశాన్ని యానిమేషన్, విజువల్ ఎఫెక్ట్స్, గేమింగ్, కామిక్స్ (ఏవీజీసీ) రంగానికి అంతర్జాతీయ కేంద్రంగా ఉంచడమే సృజనాధారిత దార్శనికతకు ప్రధానాధారమైన ఈ కార్యక్రమ లక్ష్యం.

ఈ కార్యక్రమంలో సమాచార, ప్రసార మంత్రిత్వ శాఖ కార్యదర్శి శ్రీ సంజయ్ జాజు మాట్లాడుతూ, గతేడాది కేంద్ర మంత్రివర్గం ఆమోదించిన ఇండియన్ ఇనిస్టిట్యూట్ ఆఫ్ క్రియేటివ్ టెక్నాలజీ (ఐఐసీటీ) కార్యకలాపాలు ఇప్పుడు ఎన్ఎఫ్‌డీసీ క్యాంపస్‌లో కొనసాగుతున్నాయని తెలియజేశారు. ఈ కార్యక్రమానికి సమన్వయ సంస్థగా పనిచేస్తుందని అన్నారు. ఐఐసీటీకి అవసరమైన ప్రతిభావంతులను అందించే వ్యవస్థలుగా ఈ ప్రతిపాదిత ప్రయోగశాలలు పనిచేస్తాయన్నారు. ఈ ప్రయోగశాలల నమూనా, అవసరమైన హార్డ్‌వేర్, సాఫ్ట్‌వేర్ మౌలిక సదుపాయాలు, వైవిధ్య విధానాలను అనుమతించే ఉమ్మడి వ్యవస్థ నిర్వహణకున్న అవకాశంపై కూడా సంప్రదింపులు నిర్వహించే అవకాశంపై ఇప్పటికే వివరణాత్మక సంప్రదింపులు పూర్తయ్యాయని ఆయన చెప్పారు.

నీతి ఆయోగ్, విద్యా మంత్రిత్వ శాఖ, నైపుణ్యాభివృద్ధి, ఔత్సాహిక పారిశ్రామిక మంత్రిత్వ శాఖ అధికారులు, బోర్డు/గవర్నింగ్ కౌన్సిల్స్/అకడమిక్ కౌన్సిల్/ఆర్ అండ్ డీ కౌన్సిల్/స్కిల్ కౌన్సిల్, ఐఐసీటీ పారిశ్రామిక అభివృద్ధి కౌన్సిల్ సభ్యులు, రాష్ట్రాలు, పారిశ్రామిక సంఘాలు, విద్యాసంస్థల ప్రతినిధులు ఈ కార్యక్రమంలో పాల్గొన్నారు.

వర్కుషాపులో ప్రధానాంశాలు:

1. అధునాతన క్రియేటివ్ స్టూడియోలుగా ప్రతిపాదిత ప్రయోగశాలలు పనిచేస్తాయి. పరిశ్రమ-ప్రామాణికమైన సాఫ్ట్‌వేర్, హార్డ్‌వేర్‌లను ఉపయోగించి వృత్తిపరమైన నిర్మాణ ప్రక్రియలకు సంబంధించిన ప్రత్యక్ష అనుభవాన్ని విద్యార్థులకు అందిస్తుంది.

2. సృజనాత్మక రంగాల్లో విద్యార్థులకు ప్రాథమిక అవగాహన కల్పించడం, ప్రత్యేక శిక్షణ అందించేలా ల్యాబ్ కార్యకలాపాలను జాతీయ విద్యా విధానం (ఎన్ఈపీ)తో అనుసంధానించడం గురించి చర్చల్లో దృష్టి సారించారు.

3. అంతర్జాతీయ స్థాయిలో ఉపాధి అవకాశాలను పెంపొందించడానికి, సృజనాత్మక వ్యాపార వ్యవస్థను ప్రోత్సహించడానికి ఈ ల్యాబ్‌ల్లో మెంటార్‌షిప్ కార్యక్రమాలు, సొంత మేధో సంపత్తి (ఐపీ) సృష్టి అవసరమని స్పష్టం చేసింది.

4. దేశవ్యాప్తంగా ఈ కార్యక్రమాన్ని సమర్థవంతంగా విస్తరించడానికి జాతీయ కార్యక్రమాలు, రాష్ట్ర విద్యా శాఖల మధ్య సమన్వయం ఉండటం చాలా ముఖ్యమని ఈ కార్యక్రమంలో పాల్గొన్న ప్రతినిధులు అభిప్రాయ పడ్డారు.

విద్య, పరిశ్రమ అవసరాల మధ్య ఉన్న అంతరాన్ని తగ్గించి, ప్రపంచ సృజనాధారిత ఆర్థిక వ్యవస్థకు భారతీయ యువత నాయకత్వం వహించేలా తీర్చిదిద్దాలనే సంకల్పంతో ఈ వర్కుషాపు ముగిసింది. చిన్ననాటి నుంచే సృజనాత్మక ఆలోచనలను, పరిష్కార నైపుణ్యాలను ఈ ల్యాబులు పెంపొందిస్తాయి. తద్వారా సాంకేతిక ఆధారిత సృజనాత్మక రంగాల్లో భవిష్యత్తులో వచ్చే కొత్త ఉద్యోగాలకు విద్యార్థులను సిద్ధం చేస్తాయి.

***