ఆయుర్వేదాన్ని ప్రధాన ఆరోగ్య బీమా వ్యవస్థతో అనుసంధానించటంలో కీలక పరిణామం చోటుచేసుకుంది. కేంద్ర ఆయుష్ మంత్రిత్వ శాఖ పరిధిలోని స్వయంప్రతిపత్తి సంస్థ ఆల్ ఇండియా ఇనిస్టిట్యూట్ ఆఫ్ ఆయూర్వేద (ఏఐఐఏ), జనరల్ ఇన్సూరెన్స్ కౌన్సిల్‌ (జీఐసీ) మధ్య ఉమ్మడి జాబితా నమోదుపై న్యూఢిల్లీలో 10 ఫిబ్రవరి 2026న అవగాహనా ఒప్పందం (ఏంఓయూ) కుదిరింది.

ఈ ఒప్పందం ద్వారా జనరల్ ఇన్సూరెన్స్ కౌన్సిల్ పరిధిలోని మొత్తం 32 సాధారణ బీమా సంస్థలతో ఏఐఐఏ అనుసంధానమవటంతో అర్హత గల ఆయుర్వేద సేవలకు రోగులు నగదు రహిత చికిత్స సౌకర్యాన్ని పొందవచ్చు.

ఆయుష్ హెల్త్ ఇన్సూరెన్స్ నిపుణుల బృందం ఛైర్మన్ ప్రొఫెసర్ బెజోన్ కుమార్ మిశ్రా సమక్షంలో ఏఐఐఏ డైరెక్టర్ ప్రొఫెసర్ (వైద్య) పి.కె. ప్రజాపతి, జనరల్ ఇన్సూరెన్స్ కౌన్సిల్ డైరెక్టర్ (ఆరోగ్యం) శ్రీ సెగర్ సంపత్ కుమార్ ఈ ఒప్పందంపై సంతకాలు చేశారు.

ఈ కార్యక్రమానికి ఏఐఐఏ డీన్ (పీహెచ్‌డీ) ప్రొఫెసర్ (డాక్టర్) మహేశ్ వ్యాస్, డీన్ (పీజీ) ప్రొఫెసర్ (డాక్టర్) ఆర్.కె. యాదవ్, మెడికల్ సర్వీసెస్ డైరెక్టర్ (డీఎంఎస్) డాక్టర్ అల్కా కపూర్, ఇతర సీనియర్ అధ్యాపకులు హాజరయ్యారు.

ఈ సందర్భంగా ఏఐఐఏ డైరెక్టర్ ప్రొఫెసర్ (వైద్య) పి.కె. ప్రజాపతి మాట్లాడుతూ.. ఈ ఒప్పందంతో జనరల్ ఇన్సూరెన్స్ కౌన్సిల్‌తో అనుబంధమున్న 32 బీమా కంపెనీల ద్వారా ఏఐఐఏలో నగదు రహిత చికిత్సను అందించవచ్చని తెలిపారు. ఆయుష్ మంత్రిత్వ శాఖకు, ఏఐఐఏ బృందానికి ఆయన కృతజ్ఞతలు తెలిపారు. ఈ ఒప్పందం వల్ల రోగులకు ఆయుర్వేద వైద్యానికి సంబంధించి సౌలభ్యం మెరుగుపడటంతో పాటు ఆర్థిక వెసులుబాటు, విశ్వాసం పెరుగుతాయని తద్వారా ఎంతో ప్రయోజకరమన్నారు.

ఆయుష్ హెల్త్ ఇన్సూరెన్స్ నిపుణుల కమిటీ ఛైర్మన్ ప్రొఫెసర్ బెజోన్ కుమార్ మిశ్రా మాట్లాడుతూ.. ఏఐఐఏ బృందాన్ని అభినందించారు. ఒక ఆయుష్ సంస్థ, జనరల్ ఇన్సూరెన్స్ కౌన్సిల్‌తో అధికారిక ఒప్పందం కుదుర్చుకోవటం దేశంలోనే తొలిసారని వెల్లడించారు. ఏఐఐఏలో అందుబాటులోకి వచ్చిన నగదు రహిత చికిత్స సౌకర్యం వల్ల రోగుల్లో నమ్మకం పెరుగుతుందని, ఎక్కువ మందికి సేవలు అందుతాయని ఆశాభావం వ్యక్తం చేశారు. ఇది సంస్థపై విశ్వసనీయతను బలపరచటమే కాక, ఆయుష్ ఆరోగ్య సేవల స్థిరమైన వృద్ధికి దోహదపడుతుందన్నారు

ఈ సందర్భంగా ఆయుర్వేద చికిత్సలకు సంబంధించి బీమా మద్దతును సులభతరం చేసేందుకు ఆయుష్ మంత్రిత్వ శాఖ చేపట్టిన కీలక కార్యక్రమం గురించి ప్రొఫెసర్ మిశ్రా తెలిపారు. లబ్ధిదారులు బీమా సంబంధిత సందేహాలను తీర్చుకోవటానికి, ఆయుష్ ఇన్సూరెన్స్ కవరేజీపై అవగాహన పెంచటానికి ఆయుష్ మంత్రిత్వ శాఖ మొదటిసారిగా ప్రత్యేక ఆయుష్ హెల్త్ ఇన్సూరెన్స్ హెల్ప్‌లైన్‌ను ప్రారంభించింది.

ఆయుష్ హెల్త్ ఇన్సూరెన్స్ హెల్ప్‌లైన్‌ వివరాలు:

హెల్ప్‌లైన్‌ నంబర్: 1800-11-0008

పనివేళలు: అన్ని పనిదినాల్లో ఉదయం 9:30 నుంచి సాయంత్రం 5:00 గంటల వరకు

బీమా ప్రయోజనాలను పొందటంలో ఎదురయ్యే సమస్యలను తొలగించి, ఆయుష్ ఆరోగ్య సేవలను సులభంగా వినియోగించుకునేలా ప్రోత్సహించటమే ఈ హెల్ప్‌లైన్‌ ముఖ్య ఉద్దేశం.

ఆల్ ఇండియా ఇనిస్టిట్యూట్ ఆఫ్ ఆయుర్వేద (ఏఐఐఏ) గురించి

భారత ప్రభుత్వ ఆయుష్ మంత్రిత్వ శాఖ ఆధ్వర్యంలో ఏర్పాటు చేసిన ఆల్ ఇండియా ఇనిస్టిట్యూట్ ఆఫ్ ఆయుర్వేద (ఏఐఐఏ) సంస్థ, ఆయుర్వేద రంగంలో అత్యన్నత సంస్థగా గుర్తింపు పొందింది. సంప్రదాయ ఆయుర్వేద విజ్ఞానాన్ని, ఆధునిక శాస్త్రీయ పురోగతితో అనుసంధానించటమే దీని ఉద్దేశం. వివిధ విభాగాల్లో పోస్టు గ్రాడ్యుయేట్, డాక్టోరల్ కోర్సులను ఈ సంస్థ అందించటమే కాక, పరిశోధన, ఔషధాల అభివృద్ధి, ప్రామాణీకరణ, నాణ్యత, నియంత్రణ, ఔషధాల భద్రత, ఆయుర్వేద ఔషధాల శాస్త్రీయ ధ్రువీకరణ వంటి రంగాల్లో క్రీయాశీలకంగా పాల్గొంటుంది.

ఏఐఐఏలో అధునాతన రోగనిర్ధారణ సౌకర్యాలతో 200 పడకల రిఫరల్ ఆసుపత్రితో పాటు, 25 ప్రత్యేక విభాగాలు, 12 క్లినికల్ యూనిట్లు, 8 ఇంటర్ డిసిప్లినరీ పరిశోధనా ప్రయోగశాలలు ఉన్నాయి. ఇవి రోగులకు మెరుగైన వైద్య సేవలు అందించేందుకు, బోధన, పరిశోధనలకు మద్దతిస్తాయి. ప్రపంచవ్యాప్తంగా ఆయుర్వేదానికి ప్రచారం కల్పించేందుకు, పరిశోధనలను ప్రోత్సహించటానికి అంతర్జాతీయ సహకార కేంద్రాన్ని కూడా ఈ సంస్థ నిర్వహిస్తుంది.

జనరల్ ఇన్సూరెన్స్ కౌన్సిల్ (జీఐసీ) గురించి

ఇన్సూరెన్స్ చట్టం-1938లోని సెక్షన్ 64c ప్రకారం ఏర్పాటైన చట్టబద్ధమైన సంస్థ జనరల్ ఇన్సూరెన్స్ కౌన్సిల్.. 2001 నుంచి ఇన్సూరెన్స్ రెగ్యులేటరీ, డెవలప్‌మెంట్ అథారిటీ ఆఫ్ ఇండియా (ఐఆర్‌డీఏఐ) ఆధ్వర్యంలో పనిచేస్తోంది. బీమా రంగంలో వేగంగా మారుతున్న ప్రభుత్వ నిబంధనలకు అనుగుణంగా పారిశ్రామిక విధానాలను సమన్వయం చేయటంలో, ప్రజా ప్రయోజనాలను కాపాడటంలో ఈ కౌన్సిల్ కీలక పాత్ర పోషిస్తుంది.

ఈ అవగాహనా ఒప్పందం.. భారతదేశంలో సమ్మిళిత, సమగ్ర, బీమా మద్దతులో ఆయుర్వేద ఆరోగ్య సంరక్షణను ప్రోత్సహించటంలో విప్లవాత్మక ముందడును సూచిస్తుంది. జాతీయ ఆరోగ్య సంరక్షణ వ్యవస్థలో ఆయుష్ విధానాలను బలోపేతం చేయటానికి ప్రభుత్వం ఇస్తున్న ప్రాధాన్యతను ఇది స్పష్టం చేస్తుంది.

***