రాజ్యాంగంలోని 309వ అధికరణ ప్రకారం మాజీ సైనికోద్యోగులు (కేంద్ర సివిల్ సర్వీసులు, పోస్టుల్లో పునర్నియామకం) సవరణ నిబంధనలు-2026ను ప్రభుత్వం ప్రకటించింది. ఆర్మీ, నౌకా దళం, వాయుసేనలో పోరాట లేదా పోరాటేతర విభాగాల్లో ఏ ర్యాంకులో పని చేసిన వారైనా కేంద్ర సివిల్ సర్వీసుల్లో పనిచేసేందుకు మాజీ సైనికులను పునర్నియామకం నిర్వచన పరిధిలోకి వచ్చేలా 2(సీ)(i) నియమాన్ని సవరించారు. అలాగే మిలటరీ నర్సింగ్ సేవలు (ఎంఎన్ఎస్) సిబ్బందిని కూడా దీని పరిధిలోకి తీసుకువచ్చారు.

కమిషన్డ్ ఆఫీసర్లుగా ఉన్న ఎంఎన్ఎస్ అధికారులకు ఇతర మాజీ సైనికుల మాదిరిగానే పునర్నియామక ప్రయోజనాలు లభిస్తాయా లేదా అనే విషయంలో గతంలో ఉన్న అస్పష్టతను ఈ సవరణ తొలగించింది. దీని ద్వారా పునర్నియామక నిబంధనల పరిధిలో ఎంఎన్ఎస్ సిబ్బందిని అధికారికంగా గుర్తించడమే కాకుండా, మాజీ రక్షణ సిబ్బందిలో మరింత ఎక్కువ మందికి పునరావాసం, ప్రత్యామ్నాయ ఉద్యోగ అవకాశాలను బలోపేతం చేస్తుంది.

2వ నియమంలోని, క్లాజ్ (సి) సవరణ ప్రకారం, 'మాజీ సైనికుల' నిర్వచనంలో ఇప్పుడు ఆర్మీ, నౌకా దళం, వాయుసేనతో పాటు 'భారత యూనియన్ మిలిటరీ నర్సింగ్ సర్వీస్' (ఎంఎన్ఎస్)ను కూడా స్పష్టంగా చేర్చారు. పోరాట లేదా పోరాటేతర విభాగాల్లో ఏ ర్యాంకులో పనిచేసిన వారికైనా ఈ నిబంధన వర్తిస్తుంది. ఈ సవరణ ఫిబ్రవరి 09, 2026న ప్రచురితమైన వెంటనే అమలులోకి వచ్చింది.

ఎంఎన్ఎస్ సిబ్బందికి ఈ సవరణ అధికారికంగా కల్పించే ప్రయోజనాలు:

• రిజర్వేషన్ కోటాలు: కేంద్ర ప్రభుత్వ పోస్టుల్లో గ్రూప్ సిలో 10 శాతం, గ్రూప్ డీలో 20 శాతం.

• వయో పరిమితి సడలింపు: సివిల్ ఉద్యోగ అర్హత కోసం అభ్యర్థి వాస్తవ వయసు నుంచి వారు మిలటరీ సర్వీసులో ఉన్న సంవత్సరాలతో పాటు.. అదనంగా మరో మూడేళ్లను తగ్గించుకొనేలా వెసులుబాటు.

• ఉద్యోగ ప్రాధాన్యం: యూనియన్ పబ్లిక్ సర్వీస్ కమిషన్, స్టాఫ్ సెలక్షన్ కమిషన్ ముందు ఇతర మాజీ సైనికులతో సమాన హోదా

***