પોસ્ટેડ ઓન:
08 FEB 2026 7:51PM by PIB Ahmedabad
કેન્દ્રીય ગૃહ મંત્રી અને સહકારિતા મંત્રી શ્રી અમિત શાહે આજે છત્તીસગઢના રાયપુરમાં ડાબેરી ઉગ્રવાદ (LWE) પર સુરક્ષા સમીક્ષા બેઠકની અધ્યક્ષતા કરી હતી. ગૃહ મંત્રીએ છત્તીસગઢમાં વિવિધ વિકાસ કાર્યો અંગે સમીક્ષા બેઠક પણ યોજી હતી. આ બેઠકોમાં છત્તીસગઢના મુખ્યમંત્રી શ્રી વિષ્ણુ દેવ સાય, નાયબ મુખ્યમંત્રી શ્રી વિજય શર્મા, કેન્દ્રીય ગૃહ સચિવ, ઇન્ટેલિજન્સ બ્યુરો (IB) ના ડાયરેક્ટર, ગૃહ મંત્રાલયના વિશેષ સચિવ (આંતરિક સુરક્ષા), છત્તીસગઢના મુખ્ય સચિવ, સેન્ટ્રલ રિઝર્વ પોલીસ ફોર્સ (CRPF), નેશનલ ઇન્વેસ્ટિગેશન એજન્સી (NIA), બોર્ડર સિક્યુરિટી ફોર્સ (BSF), ઇન્ડો-તિબેટ બોર્ડર પોલીસ (ITBP) ના ડાયરેક્ટર જનરલ્સ તેમજ છત્તીસગઢ, તેલંગાણા, ઝારખંડ, ઓડિશા અને મહારાષ્ટ્રના ગૃહ સચિવો અને પોલીસ ડાયરેક્ટર જનરલ્સ (DGsP) હાજર રહ્યા હતા.

બેઠકને સંબોધતા કેન્દ્રીય ગૃહ મંત્રી શ્રી અમિત શાહે જણાવ્યું હતું કે કેન્દ્ર અને છત્તીસગઢ સરકારની સુરક્ષા-કેન્દ્રિત વ્યૂહરચના, ઇન્ફ્રાસ્ટ્રક્ચરની સાથે, નક્સલી નાણાકીય નેટવર્ક પર પ્રહાર અને આત્મસમર્પણ નીતિના સકારાત્મક પરિણામો મળ્યા છે. તેમણે વિશ્વાસ વ્યક્ત કર્યો હતો કે આગામી 31 માર્ચ પહેલા નક્સલવાદ સંપૂર્ણપણે નાબૂદ થઈ જશે.
કેન્દ્રીય ગૃહ મંત્રી શ્રી અમિત શાહે કહ્યું કે છત્તીસગઢ એક સમયે નક્સલી હિંસાનો ગઢ હતો, પરંતુ પ્રધાનમંત્રી શ્રી નરેન્દ્ર મોદીના નેતૃત્વમાં ચાલી રહેલી ડબલ એન્જિન સરકારમાં તે હવે વિકાસનું પ્રતીક બની ગયું છે. તેમણે કહ્યું કે છત્તીસગઢના યુવાનો રમતગમત, ફોરેન્સિક સાયન્સ અને ટેકનિકલ શિક્ષણમાં પ્રગતિને વેગ આપી રહ્યા છે અને સાથે સાથે તેમની સંસ્કૃતિ અને પરંપરાઓને પણ જાળવી રહ્યા છે.

શ્રી અમિત શાહે કહ્યું કે ડબલ એન્જિન સરકાર દેશમાંથી નક્સલવાદના જોખમને સંપૂર્ણપણે નાબૂદ કરવામાં કોઈ કસર છોડી રહી નથી. તેમણે કહ્યું કે મોદી સરકાર હેઠળ નક્સલવાદ તેના અંતના આરે પહોંચી ગયો છે અને દેશ 31 માર્ચ 2026 પહેલા સંપૂર્ણપણે નક્સલમુક્ત બની જશે. ગૃહ મંત્રીએ કહ્યું કે દેશ ટૂંક સમયમાં નક્સલવાદથી મુક્ત થશે, જેણે ઘણી પેઢીઓને ગરીબી અને નિરક્ષરતાના અંધકારમાં ધકેલી દીધી છે. શ્રી શાહે કહ્યું કે નક્સલીઓ સામે ચાલી રહેલી લડાઈ વેરવિખેર હોવી જોઈએ નહીં. વિવિધ રાજ્યો અને કેન્દ્રીય એજન્સીઓ વચ્ચે સુમેળભર્યા સંકલનની જરૂરિયાત પર ભાર મૂકતા તેમણે કહ્યું કે બાકી રહેલા નક્સલીઓને અન્ય રાજ્યોમાં ભાગી જવા દેવા જોઈએ નહીં.
કેન્દ્રીય ગૃહ મંત્રીએ કહ્યું કે છત્તીસગઢે સુરક્ષા અને વિકાસ બંને મોરચે નોંધપાત્ર પ્રગતિ કરી છે. તેમણે કહ્યું કે નક્સલ પ્રભાવિત વિસ્તારોના લોકોને વિકાસની સમાન તકો મળે તે સુનિશ્ચિત કરવું જોઈએ.
SM/BS/GP/JD