મહામહિમ, પ્રધાનમંત્રી અનવર ઇબ્રાહિમ,

મારા પ્રિય મિત્રો, ભાઈઓ અને બહેનો,

સલામત પતાંગ!

વણક્કમ્!

સુખમાણો?

સત શ્રી અકાલ!

બાગુન્નારા?

કેમ-છો?

તમારા અભિવાદનની ઉષ્મા આપણી સહિયારી સંસ્કૃતિની સુંદર વિવિધતાને પ્રતિબિંબિત કરે છે.

સૌ પ્રથમ, હું મારા પ્રિય મિત્ર, પ્રધાનમંત્રી અનવર ઇબ્રાહિમનો આ સામુદાયિક ઉજવણીમાં જોડાવા બદલ આભાર માનું છું. ભારત-મલેશિયા મિત્રતાના વ્યાપ અને ભાવિ ક્ષમતા પર હમણાં જ તેમના ભાષણમાં આપેલા ખૂબ જ માયાળુ શબ્દો માટે પણ હું તેમનો આભાર માનું છું.

માત્ર એટલું જ નહીં, પ્રધાનમંત્રી મારું સ્વાગત કરવા એરપોર્ટ પર આવ્યા હતા અને તેઓ મને તેમની કારમાં અહીં લાવ્યા હતા. માત્ર તેમની કાર જ નહીં, પણ તેમની બેઠક (સીટ) પણ. આ વિશેષ ભાવનાઓ ભારત માટે અને તમારા બધા માટે તેમનો પ્રેમ અને આદર દર્શાવે છે.

તમારા ઉષ્માભર્યા શબ્દો, આતિથ્ય અને મિત્રતા માટે હું આભારી છું.

મિત્રો,

આપણે હમણાં જ રેકોર્ડ સ્થાપિત કરતું સાંસ્કૃતિક પ્રદર્શન જોયું છે. સંપૂર્ણ તાલમેલ ધરાવતા 800 થી વધુ નર્તકો. આ પ્રદર્શન આપણા લોકો દ્વારા આવનારા વર્ષો સુધી યાદ રાખવામાં આવશે. હું તમને અભિનંદન આપું છું. હું તમામ કલાકારોને અભિનંદન આપું છું.

મિત્રો,

પ્રધાનમંત્રી અનવર ઇબ્રાહિમ અને હું તેઓ પ્રધાનમંત્રી બન્યા તે પહેલાથી જ મિત્રો છીએ. હું સુધારા પરના તેમના ધ્યાન, તેમની મહાન બુદ્ધિમતા અને 2025 માં આસિયાન (ASEAN) ના તેમના કુશળ અધ્યક્ષપદની પ્રશંસા કરું છું.

ગયા વર્ષે, હું આસિયાન સમિટ માટે મલેશિયાની મુલાકાત લઈ શક્યો ન હતો. પરંતુ મેં મારા મિત્રને વચન આપ્યું હતું કે હું જલ્દી મલેશિયા આવીશ. અને વચન મુજબ, હું અહીં છું.

2026માં આ મારી પ્રથમ વિદેશ મુલાકાત છે. આ તહેવારોના સમયે તમારી સાથે રહીને મને આનંદ થાય છે. મને આશા છે કે દરેકે સંક્રાંતિ, પોંગલ અને તઈ-પૂસમ (Thaipusam) ખૂબ જ આનંદ સાથે ઉજવ્યા હશે. જલ્દી જ શિવરાત્રીનો તહેવાર આવી રહ્યો છે. થોડા દિવસોમાં રમઝાન શરૂ થશે અને પછી હરિ રાયા (Hari Raya) ખૂબ જ ભક્તિ સાથે ઉજવવામાં આવશે. હું દરેકને સુખ અને સારા સ્વાસ્થ્યની શુભેચ્છા પાઠવું છું.

મિત્રો,

મલેશિયામાં વિશ્વનો બીજો સૌથી મોટો ભારતીય મૂળનો સમુદાય છે. ભારત અને મલેશિયાના હૃદયને જોડે એવું ઘણું બધું છે. પ્રધાનમંત્રી અનવર ઇબ્રાહિમ અને મેં થોડી વાર પહેલા જે પ્રદર્શન જોયું, તે આ જોડાણોને સુંદર રીતે દર્શાવે છે. તમે એક જીવંત સેતુ છો જે આપણને જોડે છે.

તમે 'રોટી ચનાઈ' ને 'મલાબાર પરોઠા' સાથે જોડ્યા છે.

નાળિયેર, મસાલા અને ચોક્કસપણે 'તેહ તારિક' (Teh Tarik)…

સ્વાદો ખૂબ જ પરિચિત લાગે છે, પછી તે કુઆલાલમ્પુર હોય કે કોચી. આપણે એકબીજાને ખૂબ સારી રીતે સમજીએ છીએ. તે ચોક્કસપણે આપણી ભાષાઓ અને 'મલય' વચ્ચેના મોટી સંખ્યામાં સમાન શબ્દોને કારણે હોવું જોઈએ.

મેં સાંભળ્યું છે કે મલેશિયામાં ભારતીય ફિલ્મો અને સંગીત લોકપ્રિય છે. તમે બધા જાણો છો કે પ્રધાનમંત્રી અનવર ઇબ્રાહિમ ખૂબ સારું ગાય છે. પરંતુ ભારતમાં ઘણા લોકો આ જાણતા ન હતા. તેમની છેલ્લી મુલાકાત દરમિયાન, તેઓ આનંદદાયક રીતે આશ્ચર્યચકિત થયા હતા. ભારતમાં જૂનું હિન્દી ગીત ગાતા તેમના વીડિયો વાયરલ થયા હતા! તે અદ્ભુત છે કે તેઓ સુપ્રસિદ્ધ MGR ના તમિલ ગીતોને પણ પસંદ કરે છે.

મિત્રો,

હું જાણું છું કે તમારા હૃદયમાં ભારતનું વિશેષ સ્થાન છે. મને 2001 નો એક પ્રસંગ સ્પષ્ટ રીતે યાદ છે. જ્યારે મારા ગૃહ રાજ્ય ગુજરાતમાં ભૂકંપ આવ્યો હતો, ત્યારે તમારામાંથી ઘણા લોકો મદદ માટે સાથે આવ્યા હતા. હું આપ સૌનો આભાર માનું છું.

અને તેના ઘણા સમય પહેલા પણ, ભારતને આઝાદ દેશ બનાવવા માટે તમારા હજારો પૂર્વજોએ મહાન બલિદાન આપ્યા હતા. તેમનામાંથી ઘણાએ ક્યારેય ભારત જોયું ન હતું. પરંતુ તેઓ નેતાજી સુભાષ ચંદ્ર બોઝની આઝાદ હિંદ ફોજમાં જોડાનારા પ્રથમ લોકોમાં હતા.

તેમના સન્માનમાં અમે મલેશિયામાં ભારતીય સાંસ્કૃતિક કેન્દ્રનું નામ બદલીને નેતાજી સુભાષ ચંદ્ર બોઝના નામ પરથી રાખ્યું છે. હું મલેશિયામાં નેતાજી સર્વિસ સેન્ટર અને નેતાજી વેલ્ફેર ફાઉન્ડેશનના પ્રયાસોને પણ આ ક્ષણે સલામ કરું છું.

મિત્રો,

તમે સદીઓથી પરંપરાઓને જે રીતે સાચવી રાખી છે તે નોંધપાત્ર છે. તાજેતરમાં, મેં મારા માસિક રેડિયો સંવાદ 'મન કી બાત' માં તમારા વિશે વાત કરી હતી. મેં 1.4 અબજ ભારતીયો સાથે શેર કર્યું કે મલેશિયામાં 500 થી વધુ શાળાઓ બાળકોને ભારતીય ભાષાઓમાં કેવી રીતે શીખવે છે.

તિરુવલ્લુવર અને સ્વામી વિવેકાનંદ જેવા મહાન સંતોનો પ્રભાવ પણ અહીં અનુભવી શકાય છે. ગયા અઠવાડિયે બતુ ગુફાઓમાં તઈ-પૂસમની ઉજવણી એટલી દૈવી હતી કે તે પલની (Palani) ની ઉજવણી જેવી જ લાગતી હતી. બાગાન દાતોહ (Bagan Datuk) ના શ્રી વેંકટેશ્વર મંદિરના સાંસ્કૃતિક ઉત્સવો પણ એટલા જ ભવ્ય છે.

મને કહેવામાં આવ્યું છે કે ગરબા અહીં ખૂબ લોકપ્રિય છે. આપણે અહીં રહેતા આપણા શીખ ભાઈઓ સાથેના સાંસ્કૃતિક સંબંધોને પણ ખૂબ જ માન આપીએ છીએ. તમે 'નામ જપો, કિરત કરો, વંડ છકો' ને પ્રોત્સાહન આપીને શ્રી ગુરુ નાનક દેવ જીની શિક્ષાઓને આજ સુધી આગળ ધપાવી છે.

મિત્રો,

અહીં ભારતના તમામ ભાગોના લોકો છે. સાંસ્કૃતિક એકતાના તાંતણા આપણને મજબૂત રીતે બાંધે છે. આપણી શક્તિ એ છે કે આપણે વિવિધતામાં એકતા સમજીએ છીએ.

મિત્રો,

તમિલ એ વિશ્વને ભારતની ભેટ છે. તમિલ સાહિત્ય શાશ્વત છે અને તમિલ સંસ્કૃતિ વૈશ્વિક છે. એ જ રીતે, તમિલ લોકોએ પણ તેમની પ્રતિભાથી માનવતાની સેવા કરી છે. અને હું ગર્વ સાથે કહું છું કે, ભારતના ઉપરાષ્ટ્રપતિ, થિરુ સી.પી. રાધાકૃષ્ણન જી, આપણા વિદેશ મંત્રી જયશંકર જી જેઓ આજે આપણી સાથે છે, નાણામંત્રી નિર્મલા સીતારમણ જી, જેમણે નવ વખત આપણું બજેટ રજૂ કર્યું છે, ડૉ. મુરુગન, આપણા માહિતી અને પ્રસારણ રાજ્ય મંત્રી, આ તમામ તમિલનાડુથી છે.

તે જ રીતે, મલેશિયામાં રહેલા તમિલ ડાયસ્પોરાના સભ્યો વિવિધ ક્ષેત્રોમાં સમાજની સેવા કરી રહ્યા છે. હકીકતમાં, તમિલ ડાયસ્પોરા અહીં ઘણી સદીઓથી છે. આ ઇતિહાસથી પ્રેરિત થઈને, અમને મલાયા યુનિવર્સિટીમાં તિરુવલ્લુવર ચેરની સ્થાપના કરવાનો ગર્વ છે. અમે હવે આપણી સહિયારી વિરાસતને વધુ મજબૂત કરવા માટે તિરુવલ્લુવર સેન્ટર સ્થાપીશું.

મિત્રો,

મલેશિયા સાથેના આપણા સંબંધો દર વર્ષે નવી ઊંચાઈઓ સર કરી રહ્યા છે. 2024 માં, પ્રધાનમંત્રી અનવર ઇબ્રાહિમની નવી દિલ્હી મુલાકાત દરમિયાન, અમે અમારા સંબંધોને વ્યાપક વ્યૂહાત્મક ભાગીદારીમાં (Comprehensive Strategic Partnership) ઉન્નત કર્યા હતા.

આજે, આપણે પ્રગતિ અને સમૃદ્ધિ તરફ ભાગીદાર તરીકે સાથે ચાલીએ છીએ. આપણે એકબીજાની સફળતાને આપણી પોતાની જેમ ઉજવીએ છીએ. ચંદ્રયાન-3 ની ઐતિહાસિક સફળતા પર પ્રધાનમંત્રી અનવર ઇબ્રાહિમની શુભેચ્છાઓથી હું અભિભૂત થયો હતો. હું તમારી સાથે સંમત છું, મારા પ્રિય મિત્ર. ભારતની સફળતા એ મલેશિયાની સફળતા છે, તે એશિયાની સફળતા છે.

એટલા માટે, હું કહું છું કે આપણા સંબંધોનો માર્ગદર્શક શબ્દ 'ઈમ્પેક્ટ' (IMPACT) છે. ઈમ્પેક્ટ એટલે 'ઇન્ડિયા મલેશિયા પાર્ટનરશિપ ફોર એડવાન્સિંગ કલેક્ટિવ ટ્રાન્સફોર્મેશન' (India Malaysia Partnership for Advancing Collective Transformation).

આપણા સંબંધોની ગતિ પર ઈમ્પેક્ટ

આપણી મહત્વાકાંક્ષાઓના વ્યાપ પર ઈમ્પેક્ટ

આપણા લોકોના લાભ માટે ઈમ્પેક્ટ

સાથે મળીને, આપણે સમગ્ર માનવતાને લાભ પહોંચાડી શકીએ છીએ!

મિત્રો,

ભારતીય કંપનીઓ મલેશિયા સાથે કામ કરવા માટે હંમેશા ઉત્સુક રહી છે. તે એક લહાવો છે કે અમે મલેશિયાની પ્રથમ અને એશિયાની સૌથી મોટી ઇન્સ્યુલિન ઉત્પાદન સુવિધા બનાવવામાં ભૂમિકા ભજવી.

મલેશિયામાં 100 થી વધુ ભારતીય IT કંપનીઓ કાર્યરત છે, જે હજારો રોજગારી પેદા કરે છે. મલેશિયા-ઇન્ડિયા ડિજિટલ કાઉન્સિલ અમારા ડિજિટલ સહયોગ માટે નવા રસ્તાઓ મોકળા કરી રહી છે. મને તમારી સાથે શેર કરતા આનંદ થાય છે કે ભારતનું UPI જલ્દી જ મલેશિયામાં આવશે.

મિત્રો,

આપણે હિંદ મહાસાગરના સમાન વાદળી પાણી વહેંચીએ છીએ. મહાસાગરની પેલે પાર, આપણે એકબીજાની મુલાકાત લેવાનું પસંદ કરીએ છીએ. હું આપ સૌને ભારતના વિવિધ ભાગોની મુલાકાત લેવા આમંત્રણ આપું છું.

છેલ્લા કેટલાક વર્ષોમાં, ભારતે ઇન્ફ્રાસ્ટ્રક્ચર અને કનેક્ટિવિટીમાં અભૂતપૂર્વ વૃદ્ધિ જોઈ છે. દાયકામાં આપણા એરપોર્ટની સંખ્યા બમણી થઈ ગઈ છે. રેકોર્ડ ગતિએ હાઈવે બનાવવામાં આવી રહ્યા છે. વંદે ભારત જેવી આધુનિક ટ્રેનો આંતરરાષ્ટ્રીય સ્તરે પ્રશંસા મેળવી રહી છે. હું તમારામાંથી વધુને વધુ લોકોને મુસાફરી કરવા અને અદભૂત ભારત (Incredible India) નો અનુભવ કરવા પ્રોત્સાહિત કરું છું.

તમારે તમારા મલય મિત્રોને પણ તમારી સાથે લાવવા જોઈએ. એકલા ન આવો. કારણ કે લોકો વચ્ચેનું જોડાણ એ આપણી મિત્રતાનો પાયાનો પથ્થર છે.

મિત્રો,

જ્યારે આપણે 2015 માં મળ્યા હતા, ત્યારે મેં તમારી સાથે ભારતની ક્ષમતા (Potential) વિશે વાત કરી હતી. હવે, હું તમારી સાથે ભારતના પ્રદર્શન (Performance) વિશે વાત કરું છું. એક દાયકામાં, ભારતે મોટું પરિવર્તન જોયું છે.

ત્યારે, આપણે વિશ્વની 11 મી સૌથી મોટી અર્થવ્યવસ્થા હતા. હવે, આપણે ટોચના 3 અર્થવ્યવસ્થા ની નજીક પહોંચી રહ્યા છીએ. આપણે વિશ્વની સૌથી ઝડપથી વિકસતી મુખ્ય અર્થવ્યવસ્થા પણ છીએ.

ત્યારે, 'મેક ઇન ઇન્ડિયા' એક નાનો છોડ હતો જે હમણાં જ રોપવામાં આવ્યો હતો. હવે, ભારત વિશ્વનું બીજું સૌથી મોટું મોબાઈલ ઉત્પાદક છે. આપણી સંરક્ષણ નિકાસ 2014 થી લગભગ 30 ગણી વધી ગઈ છે. ભારત વિશ્વનું ત્રીજું સૌથી મોટું સ્ટાર્ટઅપ હબ પણ બની ગયું છે.

આપણે વિશ્વનું સૌથી મોટું ડિજિટલ પબ્લિક ઇન્ફ્રાસ્ટ્રક્ચર અને વિશ્વનું સૌથી મોટું ફિનટેક ઇકોસિસ્ટમ બનાવ્યું છે. વિશ્વના લગભગ અડધા રિયલ-ટાઇમ ડિજિટલ વ્યવહારો ભારતમાં થાય છે, જેનો શ્રેય આપણા UPI પ્લેટફોર્મને જાય છે.

ઝડપથી વૃદ્ધિ પામવાની સાથે, અમે એ પણ સુનિશ્ચિત કર્યું કે અમારી વૃદ્ધિ સ્વચ્છ અને હરિયાળી હોય. ઉદાહરણ તરીકે, એક દાયકામાં, આપણી સૌર ઊર્જા માં લગભગ 40 ગણો વધારો થયો છે.

મિત્રો,

અગાઉ, ભારતને માત્ર એક વિશાળ બજાર તરીકે જોવામાં આવતું હતું. હવે, આપણે રોકાણ અને વેપારનું હબ છીએ. ભારતને વિકાસ માટે વિશ્વસનીય ભાગીદાર તરીકે જોવામાં આવે છે. પછી તે યુકે, યુએઈ, ઓસ્ટ્રેલિયા, ન્યુઝીલેન્ડ, ઓમાન, ઈયુ કે યુએસએ હોય, દેશો ભારત સાથે વેપાર કરારો કરી રહ્યા છે. વિશ્વાસ એ ભારતનું સૌથી મજબૂત ચલણ બની ગયું છે.

મિત્રો,

ભારત હંમેશા ખુલ્લા હાથે તમને આવકારશે. તેથી જ અમે થોડા મહિના પહેલા એક ઐતિહાસિક નિર્ણય લીધો હતો. અમે ભારતીય મૂળના મલેશિયન નાગરિકો માટે 6 ઠ્ઠી પેઢી સુધી OCI કાર્ડની પાત્રતા વધારી છે.

અમે ઈન્ડિયન સ્કોલરશિપ ટ્રસ્ટ ફંડને ટેકો આપી રહ્યા છીએ. હવે, અમે વિદ્યાર્થીઓને ભારતમાં અભ્યાસ કરવા માટે તિરુવલ્લુવર શિષ્યવૃત્તિ પણ આપવા જઈ રહ્યા છીએ. અને અમે તમને 'નો ઇન્ડિયા પ્રોગ્રામ' (Know India Program) માં જોવાની રાહ જોઈ રહ્યા છીએ.

તમને જાણીને આનંદ થશે કે અમે ટૂંક સમયમાં મલેશિયામાં ભારતનું નવું કોન્સ્યુલેટ ખોલીશું. આ આપણને વધુ નજીક લાવશે.

મિત્રો,

1.4 અબજ ભારતીયો 2047 સુધીમાં વિકસિત ભારત બનાવવા માંગે છે.

વિકસિત ભારત બનાવવું છે ને?

વિકસિત ભારત બનાવીને રહીશું કે નહીં રહીશું?

આપણે આપણા સપના સાકાર કરીશું કે નહીં કરીશું?

આપણે સપનાને સંકલ્પમાં બદલીશું કે નહીં બદલીશું?

આપણે સંકલ્પને સિદ્ધ કરીને રહીશું કે નહીં રહીશું?

આ પ્રવાસમાં, આપણા પ્રવાસી ભારતીયો, ભારતીય ડાયસ્પોરા, એક મૂલ્યવાન ભાગીદાર છે. પછી ભલે તમારો જન્મ કુઆલાલમ્પુર કે કોલકાતામાં થયો હોય, ભારત તમારા હૃદયમાં વસે છે. તમે મલેશિયાની અને ભારતની પ્રગતિનો સક્રિય ભાગ છો. તમે સમૃદ્ધ મલેશિયા અને વિકસિત ભારતના વિઝનને સાકાર કરવામાં મદદ કરશો.

જય હિંદ!

જુમ્પા લાગી!

મિક્કા નન્ડ્રી!

SM/DK/GP/JD