തണ്ണീർത്തട സംരക്ഷണത്തിൽ സമൂഹങ്ങൾക്കും സംസ്‌കാരത്തിനും ഇന്ത്യ മുൻഗണന നൽകുന്നുണ്ടെന്ന് അദ്ദേഹം പറഞ്ഞു. പ്രധാനമന്ത്രി  നരേന്ദ്ര മോദിയുടെ  നേതൃത്വത്തിന് കീഴിൽ, രാജ്യത്തെ  റാംസർ ശൃംഖല 2014-ൽ  26-ആയിരുന്നത്   98 ആയി  വികസിച്ചതായി അദ്ദേഹം ചൂണ്ടിക്കാട്ടി.

'സാംസ്‌കാരിക പൈതൃകം ആഘോഷിക്കുന്നു' എന്ന പ്രമേയത്തിൽ മന്ത്രാലയം അസോല ഭാട്ടി വന്യജീവി സങ്കേതത്തിൽ സംഘടിപ്പിച്ച ചടങ്ങോടെയാണ് ഈ വർഷത്തെ തണ്ണീർത്തട ദിനം ആഘോഷിച്ചത്. തണ്ണീർത്തടങ്ങളുടെ പ്രാധാന്യവും അവയുടെ സംരക്ഷണത്തിൽ പരമ്പരാഗത അറിവുകൾക്കും സമൂഹങ്ങൾക്കുമുള്ള പങ്കും ചർച്ച ചെയ്യുന്നതായിരുന്നു  പരിപാടി.

ചടങ്ങിൽ സംസാരിച്ച പരിസ്ഥിതി, വനം, കാലാവസ്ഥാ വ്യതിയാന സഹമന്ത്രി  കീർത്തി വർധൻ സിംഗ്, തണ്ണീർത്തടങ്ങൾ വെറും ജലസ്രോതസ്സുകൾ മാത്രമല്ലെന്നും ജനങ്ങളുടെ ദൈനംദിന സാമൂഹിക ജീവിതത്തിൽ നിർണായക പങ്ക് വഹിക്കുന്നുണ്ടെന്നും പറഞ്ഞു. തണ്ണീർത്തടങ്ങൾ സംസ്‌കാരം, ഉത്സവങ്ങൾ, മതപരമായ വികാരങ്ങൾ എന്നിവയുമായി ആഴത്തിൽ ബന്ധപ്പെട്ടിരിക്കുന്നുവെന്നും കുട്ടികളടക്കമുള്ളവർ ഒത്തുചേരുകയും സംവദിക്കുകയും ചെയ്തിരുന്ന പരമ്പരാഗത ഇടങ്ങളായിരുന്നു ഇവയെന്നും അദ്ദേഹം ഓർമ്മിപ്പിച്ചു.

തണ്ണീർത്തട സംരക്ഷണത്തിൽ യുവതലമുറയുടെ വർദ്ധിച്ചുവരുന്ന പങ്കാളിത്തത്തിൽ മന്ത്രി സന്തോഷം പ്രകടിപ്പിച്ചു. നിയമങ്ങളിലൂടെയും നിയന്ത്രണങ്ങളിലൂടെയും മാത്രം പരിസ്ഥിതിയെ സംരക്ഷിക്കാനാവില്ലെന്നും സംരക്ഷണം ഒരു ജനകീയ പ്രസ്ഥാനമായി മാറണമെന്നും അദ്ദേഹം പറഞ്ഞു.

നേരത്തെ 'X'-ൽ കുറിച്ച പോസ്റ്റിൽ, ഉത്തർപ്രദേശിലെ ഗോണ്ടയിലുള്ള പാർവതി അർഗ പക്ഷി സങ്കേതത്തിന്റെ പാരിസ്ഥിതികവും സാംസ്‌കാരികവുമായ പ്രാധാന്യത്തെക്കുറിച്ച് അദ്ദേഹം  എടുത്തുപറഞ്ഞിരുന്നു. അന്താരാഷ്ട്ര പ്രാധാന്യമുള്ള ഇന്ത്യയിലെ 98 റാംസർ സൈറ്റുകളിൽ ഒന്നാണിത്. എണ്ണമറ്റ പ്രാദേശിക-ദേശാടന പക്ഷികൾക്ക് ആവാസവ്യവസ്ഥയൊരുക്കുന്ന ഈ തണ്ണീർത്തടം പ്രാദേശിക സമൂഹങ്ങളുടെ  സംസ്‌കാരത്തെയും  സ്വാധീനിക്കുന്നുവെന്ന്  അദ്ദേഹം പറഞ്ഞു. പരിപാടിയിൽ പാർവതി അർഗ പക്ഷി സങ്കേതത്തെക്കുറിച്ചുള്ള വീഡിയോ ടീസറും പുറത്തിറക്കി.


തണ്ണീർത്തടങ്ങളുമായി ബന്ധപ്പെട്ട സാംസ്‌കാരിക പ്രാധാന്യവും പൈതൃകവും വ്യക്തമാക്കുന്ന 'കൾച്ചറൽ വണ്ടേഴ്സ് ഓഫ് റാംസർ സൈറ്റ്സ്' (Cultural Wonders of Ramsar Sites) എന്ന രേഖയും മന്ത്രാലയം പുറത്തിറക്കി. കൂടാതെ, സ്വച്ഛത പഖ്‌വാഡ 2025 പുരസ്‌കാരങ്ങളും ചടങ്ങിൽ വിതരണം ചെയ്തു. 'ഏക് പെഡ് മാ കേ നാം' (Ek Ped Maa Ke Naam) എന്ന പദ്ധതിയുടെ ഭാഗമായി മരങ്ങൾ നട്ടുകൊണ്ടാണ് പരിപാടി സമാപിച്ചത്.

എല്ലാ വർഷവും ഫെബ്രുവരി 2ന് ലോക തണ്ണീർത്തട ദിനം ആചരിക്കുന്നു. 1971 ഫെബ്രുവരി 2 ന് ഇറാനിലെ റാംസറിൽ വെച്ച് തണ്ണീർത്തടങ്ങളെക്കുറിച്ചുള്ള കൺവെൻഷൻ അല്ലെങ്കിൽ റാംസർ കൺവെൻഷൻ അംഗീകരിച്ചതിന്റെ അടയാളമാണിത്. 1982 ഫെബ്രുവരി 1 ന് ഇന്ത്യ കൺവെൻഷനിൽ ഒപ്പുവച്ചു. അന്താരാഷ്ട്ര പ്രാധാന്യമുള്ള 98 തണ്ണീർത്തടങ്ങളുള്ള റാംസർ സൈറ്റുകളുടെ എണ്ണത്തിൽ രാജ്യം ഇപ്പോൾ ഏഷ്യയെക്കാൾ മുന്നിലാണ്.

SKY