প্রধানমন্ত্রীগী লোইশঙ
প্রধান মন্ত্রী শ্রী নরেন্দ্র মোদীনা হুগ্লি জিলাগী শিঙ্গুরদা লুপা করোর ৮৩০ হেনবগী তোঙান তোঙানবা চাউখৎ-থৌরাংগী প্রোজেকশিং শঙ্গাখ্রে, উরেপ-উয়ুং তমখ্রে অমসুং লমথাখ্রে
বিকসিত ভারত অমগী মঙলানা অমগীদমক, নোংপোক থংবা ভারত চাউখৎহনবা মরুওইবা অমনি অমসুং মসিগী পান্দম অসিগা লোয়ননা, কেন্দ্র সরকারনা মখা তানা থবক পায়খৎলি: প্রধান মন্ত্রী
ঙরাং, নোংচুপ বেঙ্গলদগী লৈবাক অসিগী অহানবা বন্দে ভারত শ্লিপ্পর ত্রেন লমথাখ্রে; রাজ্য অসিসু অনৌবা অমৃত ভারত এক্সপ্রেস ত্রেন তরুক রোম ফংলে; অমসুং ঙসিদগী অহেনবা অমৃত ভারত এক্সপ্রেস ত্রেনশিং চেনবা হৌরে: প্রধান মন্ত্রী
বালাগরদা শাগদৌরিবা এক্সতেন্দেদ পোর্ত গেত সিষ্টেমনা হুগ্লি অমসুং অকোয়বগী মফমশিংগীদমক অনৌবা খুদোংচাবশিংগী থোঙশিং হাংদোক্লগনি: প্রধান মন্ত্রী
ঙসি, ভারতনা মল্তি-মোদাল কন্নেক্তিবিতি অমসুং গ্রিন মোবিলিতিদা অকনবা মীৎয়েং চঙলে; অপনবা লৈতনা চৎথোক-চৎশিন য়ানবা, হিথাংফমশিং, তুরেলগী ঈশিং লম্বীশিং, হায়ৱেশিং অমসুং এয়রপোর্তশিং অমগা অমগা শম্নরে: প্রধান মন্ত্রী
प्रविष्टि तिथि:
18 JAN 2026 3:53PM by PIB Imphal
ঙসি প্রধান মন্ত্রী শ্রী নরেন্দ্র মোদীনা হুগ্লি জিলাগী শিঙ্গুরদা লুপা করোর ৮৩০ হেনবগী তোঙান তোঙানবা চাউখৎ-থৌরাংগী প্রোজেকশিং শঙ্গাখ্রে, উরেপ-উয়ুং তমখ্রে অমসুং লমথাখ্রে। থৌরম অদুদা তিনখিবা মীয়ামদা ৱা ঙাংবদা, প্রধান মন্ত্রীনা হায়খি মদুদি ঙরাং মহাক মালদাদা লৈখি অমসুং ঙসিনা মহাক হুগ্লিদা মীয়ামগী মরক্ত শরুক য়াবগী খুদোংচাবা ফংলে। বিকসিত ভারত অমগী মঙলানা অমগীদমক, নোংপোক থংবা ভারত চাউখৎহনবা মরুওইবা অমনি অমসুং মসিগী পান্দম অসিগা লোয়ননা, কেন্দ্র সরকারনা মখা তানা থবক পায়খৎলি। ঙরাং অমসুং ঙসিগী থৌরমশিংনা ৱাশক অসি হেন্না মপাঙ্গল কনখৎহল্লে। মতম অসিগী মনুংদা নোংচুপ বেঙ্গলগী চাউখৎ-থৌরাংগা মরী লৈনবা লুপা করোর চা কয়াগী প্রোজেকশিং উরেপ-উয়ুং তম্বা অমসুং শঙ্গাবগী খুদোংচাবা মহাক্না ফংলে।
প্রধান মন্ত্রীনা হায়খি ঙরাং, নোংচুপ বেঙ্গলদগী লৈবাক অসিগী অহানবা বন্দে ভারত শ্লিপ্পর ত্রেন লমথাখ্রে; রাজ্য অসিসু অনৌবা অমৃত ভারত এক্সপ্রেস ত্রেন তরুক রোম ফংলে; অমসুং ঙসিদগী অহেনবা অমৃত ভারত এক্সপ্রেস ত্রেনশিং চেনবা হৌরে। ত্রেনশিং অসিগী মনুংদা অমনা মহাক্কী সংসদকী কেন্দ্র বারানাসী অমসুং বেঙ্গলগী মরক্ত মখা তানা চৎথোক-চৎশিন ফগৎহনগনি। দিল্লি অমসুং তামিল নাদুদগীসু হায়রিবা অমৃত ভারত এক্সপ্রেস ত্রেনশিং চেনবা হৌখ্রে। হৌখিবা পুং ২৪ অসি মমাঙদা অমুক্ত ওইখিদ্রিবা মওংদা নোংচুপ বেঙ্গলগী রেলগী থবক হৌদোক্লে।
প্রধান মন্ত্রীনা হায়খি মদুদি বেঙ্গলগী ঈশিং লম্বীশিংগী খুদোংচাবা মরাংকাইনা লৈরি অমসুং হিরম অসিদা কেন্দ্র সরকারনা থবক পায়খৎলি। হিথাংফম্না লমজিংদুনা চাউখৎপা পুরক্নবা দরকার ওইবা ইনফ্রাষ্ট্রকচর শেমগৎলি। ঙাইহাক্কী মমাঙদা, হিথাংফমশিং অমসুং তুরেলগী ঈশিং লম্বীশিংগা মরী লৈনবা প্রোজেকশিং শঙ্গাখ্রে অমসুং উরেপ-উয়ুং তমখ্রে। মখোয় নোংচুপ বেঙ্গল অমসুং ভারতকী য়াম্না মরুওইবনি। মখোয় নোংচুপ বেঙ্গল মেনুফেকচরিং, ললোন-ইতিক অমসুং লোজিষ্টিক্সকী মরুওইবা মফম অমা ওইনবা শেমগৎনবা য়ুম্বীশিংনি। হায়রিবা প্রোজেকশিং অসিগীদমক প্রধান মন্ত্রীনা মীয়ামদা হরাওবা ফোঙদোকখি।
প্রধান মন্ত্রীনা মখা তানা হায়খি মদুদি হিথাংফমশিং অমসুং মসিগা মরী লৈনবা থবকশিংদা হেন্না মীৎয়েং চঙলে, মফম অসিদা অহেনবা থবক ফংহনবা ঙমগনি। শ্যামা প্রসাদ মুখর্জি পোর্ত পাকথোক-চাউথোক্নবা কেন্দ্র সরকারনা য়াম্লবা শেনফমশিং থাদরে। সাগরমালা স্কিমগী মখাদা, হিথাংফমশিং অসি য়ৌবা লম্বী শেমগৎলে। থবকশিং অসিগী ফলশিং হৌজিক উবা ফংলে। হৌখিবা চহিদা কোলকাতা পোর্তনা কার্গো পুথোক-পুশিনগী অনৌবা রেকোর্দশিং থমখ্রে।
প্রধান মন্ত্রীনা হায়খি মদুদি বালাগরদা শাগদৌরিবা এক্সতেন্দেদ পোর্ত গেত সিষ্টেমনা হুগ্লি অমসুং অকোয়বগী মফমশিংগীদমক অনৌবা খুদোংচাবশিংগী থোঙশিং হাংদোক্লগনি। মসিনা কোলকাতা সহরদা চিনবা হন্থহনগনি। গঙ্গাদা শেমগৎলিবা ঈশিং লম্বী ফাওরগা মখা তানা কার্গো পুথোক-পুশিন হেনগৎহনগনি। অপুনবা ইনফ্রাষ্ট্রকচর অসিনা হুগ্লি ৱায়ারহাওসিং অমসুং ললোন-ইতিক্কী মফম অমা ওইহনবদা মতেং পাংগনি, লুপা করোর কয়া থাদরক্কনি, থবক লিশিং কয়া ফংহনগনি, অপীকপা ললোনবশিং অমসুং ত্রান্সপোর্তকী থবক তৌরিবশিং কান্নবা ফংগনি অমসুং লৌমীশিংগী অনৌবা কৈথেলশিং ফংহনগনি।
প্রধান মন্ত্রীনা হায়খি মদুদি ঙসি, ভারতনা মল্তি-মোদাল কন্নেক্তিবিতি অমসুং গ্রিন মোবিলিতিদা অকনবা মীৎয়েং চঙলে; অপনবা লৈতনা চৎথোক-চৎশিন য়ানবা, হিথাংফমশিং, তুরেলগী ঈশিং লম্বীশিং, হায়ৱেশিং অমসুং এয়রপোর্তশিং অমগা অমগা শম্নরে। মসিনা পোৎ-চৈ পুথোক-পুশিন্দা চঙবা শেনফম অমসুং মতম হন্থহল্লে। চৎথোক-চৎশিনগী থবকশিংনা মহৌশাগী অকোয়বগী ফিবমদা শোকহন্দনবা থবকশিংসু পায়খৎলে। হায়ব্রিদ ইলেক্ত্রিক হিশিংনা তুরেলদা চৎথোক-চৎশিন তৌবা অমসুং গ্রিন মোবিলিতি ফগৎহনগনি, হুগ্লি তুরেলদা চৎপা লাইহনগনি, পোল্লুসন হন্থহনগনি অমসুং তুরেলগী তুরিজম চাউখৎহনগনি।
প্রধান মন্ত্রীনা হায়খি মদুদি ঙা য়োকপা অমসুং সমুদ্রগী চীঞ্জাক পুথোকপা অমসুং মপান্দা থাদোকপদা ভারত য়াংনা চাউখৎলক্লি। হিরম অসিদা নোংচুপ বেঙ্গলনা মাংজিল থাবা হায়বসি মহাক্কী মঙলান্নি। তুরেলগী ঈশিং লম্বীশিংগীদমক পান্দম অসিগীদমক কেন্দ্র সরকারনা বেঙ্গল শৌগৎলি, অমসুং ঙামীশিং অমসুং লৌমীশিং মসিগী কান্নবা মাঙজৌননা ফংখ্রে। কেন্দ্র সরকারনা পায়খৎলিবা প্রোজেকশিং অসিনা নোংচুপ বেঙ্গলগী চাউখৎপা য়াংশিনহনগনি। প্রোজেকশিং অসিগীদমক মহাক্না মীয়ামদা য়াইফ পাউজেল পীখি।
থৌরম অদুদা শরুক য়াখিবা অতোপ্পা শক্নাইরবা মীওইশিংগী মনুংদা, নোংচুপ বেঙ্গলগী রাজ্যপাল শ্রী সি.ভি বোস, য়ুনিয়ন মিনিষ্টরশিং, শ্রী সর্বনন্দা সোনোৱাল, শ্রী সান্তানু থাকুর, শ্রী সুকান্ত মজুমদার য়াওখি।
নুঙগীৱারোল
প্রধান মন্ত্রীনা হুগ্লি জিলাগী শিঙ্গুরদা লুপা করোর ৮৩০ হেনবগী তোঙান তোঙানবা চাউখৎ-থৌরাংগী প্রোজেকশিং শঙ্গাখ্রে, উরেপ-উয়ুং তমখ্রে অমসুং লমথাখ্রে।
ইনলেন্দ ৱাতর ত্রান্সপোর্ত (আই দব্লিউ তি) তর্মিনেল অমা অমসুং রোদ ওভর ব্রিজ অমা য়াওনা, প্রধান মন্ত্রীনা বালাগরদা এক্সতেন্দেদ পোর্ত গেত সিষ্টেমগী উরেপ-উয়ুং তমখ্রে।
বালগরগী একর ৯০০ রোম পাক-চাউবা মফম অমা চহি অমদা মিল্লিয়ন তন ২.৭ রোমগী কেপাসিতিগী পান্দম অমগা লোয়ননা অনৌবা কার্গো হেন্দলিং তর্মিনেল অমা শেমগৎকনি। প্রোজেক অসিদা কার্গো হেন্দলিং জেতি অনি শাবা, অমনা কন্তেন্নরশিংগী কার্গোগী অমসুং অমনা দ্রাই বল্ক কার্গোগী ওইগনি।
য়াম্না চিনবা সহরগী লম্বীশিংদগী অচৌবা কার্গোশিং পুবা থৈদোরক্তুনা কার্গো লৌথোকপগী থবক ফগৎহন্নবা বালাগর প্রোজেক্না পান্দম থম্লি। মসিনা কোলকাতা সহরদা লম্বীদা অশোই-অঙাম থোক্তবা হেনগৎহনগনি, গারি চিনবা অমসুং পোল্লুসন হন্থহনগনি অমসুং মীয়ামগী হিংবগী থাক ৱাংখৎহনগনি। মল্তিমোদালগী চৎথোক-চৎশিন ফগৎহনবা অমসুং লোজিষ্টিক্স ফগৎহনবনা লমদম অসিগী উদ্যোগশিং, এম.এস.এম.ইশিং অমসুং লৌউ-শিংউগী পোৎথোকশিং পুথোক্লিবশিংদা শেন য়াম্না চঙদনা কৈথেলশিং য়ৌবা ঙমহনগনি। প্রোজেক অসিনা নাকোইননা অমসুং হকথেংননা থবক কয়া পীগনি হায়না পানরি অমসুং লোজিষ্টিক্স, তর্মিনেলগী থবকশিং, ত্রান্সপোর্তকী থবকশিং, শেমজিন-শাজিনবা অমসুং মরী লৈনবা থবকশিংদা লমদম অসিগী মীয়াম থবক ফংগনি।
প্রধান মন্ত্রীনা কোলকাতদা অফবা অমসুং অনৌবা ইলেক্ত্রিক কাতামারন অমসু হৌদোকখ্রে। মসি কংফালগী ঈশিং লম্বীদা চৎথোক-চৎশিন তৌনবা কোচিন সিপয়ার্দ লিমিতেদনা শাবা ইলেক্ত্রিক কাতামারন ৬ গী মনুংদা অমনি। পেসেঞ্জর ৫০ চনবা হায়ব্রিদ ইলেক্ত্রিক এলুমিনিয়ম কাতামারন অসিদা অৱাংবা থাক্কী ইলেক্ত্রিক প্রোপুলসন সিষ্টেমশিং অমসুং লিথিয়ম-তাইতানেত বেত্তরি তেক্নোলোজি য়াওরি অমসুং মসি মপুংফানা ইলেক্ত্রিক জিরো-ইমিসন মোদ অমসুং হায়ব্রিদ মোদতা থবক তৌবা ঙম্মী। ভেসেল অসিনা সহরগী তুরেলদা চৎথোক-চৎশিন তৌবা, ইকো-তুরিজম অমসুং হুগ্লি তুরেল পরিংদা মনুং-হুঞ্জিনবা মফমদা পেসেঞ্জর চৎথোক-চৎশিন ঙমহগনি।
প্রধান মন্ত্রীনা জয়রাম্বতি-বোরোগোপিনাথপুর-মৈনাপুর ন্যু রেল লাইনসু শঙ্গাখ্রে। লাইন অসি তারকেশ্বর-বিষ্ণুপুর ন্যু রেল লাইন প্রোজেক্কী মরুওইবা শরুক অমনি। অনৌবা রেল লাইন অসিগা লোয়ননা, বোরোগোপিনাথপুরদা খামগদবা মৈনাপুর অমসুং জয়রাম্বতিগী মরক্ত অনৌবা ত্রেন অমসু লমথাগনি। মসিনা বঙ্কুরাগী মীয়ামদা হকথেংননা রেলদা চৎনবগী খুদোংচাবা পীগনি, চৎথোক-চৎশিন্দা ভারা হেন্না চঙহল্লোই অমসুং নুমিৎ খুদিংগী চৎথোক-চৎশিন তৌরিবা মীওইশিং, মহৈরোয়শিং অমসুং লাই খুরুম্বা লাকপা মীওইশিংদা খুদোংচাহনগনি।
প্রধান মন্ত্রীনা অমৃত ভারত এক্সপ্রেস ত্রেন অহুম লমথাখ্রে: কোলকাতা(হাওরা)–অনন্দ বিহার তর্মিনেল অমৃত ভারত এক্সপ্রেস; কোলকাতা(সিলদাহ)–বারানাস অমৃত ভারত এক্সপ্রেস; কোলকাতা(সন্ত্রাগাচি)-তাম্বারাম অমৃত ভারত এক্সপ্রেস।
***
(रिलीज़ आईडी: 2215907)
आगंतुक पटल : 13
इस विज्ञप्ति को इन भाषाओं में पढ़ें:
Malayalam
,
English
,
Urdu
,
Marathi
,
हिन्दी
,
Bengali
,
Assamese
,
Gujarati
,
Tamil
,
Telugu
,
Kannada