Haba khot ïa ka jingïaid lynti kaba shiphew snem jong ka Startup India kum ka jingkylla ba la pynwandur da ki million ki jingangnud bad ka jingmut jingpyrkhat jong ki samla, u Myntri Rangbahduh ka ri u Narendra Modi u la ong ba kane ka sienjam kam dei shuh tang ka skhim sorkar hynrei ka la kylla sha ka jingïakhih jong ka India kaba thymmai, katba u dang ai jingkren sha ki nongseng ia ki startup, ki nongsaindur thymmai, bad ki samla nongseng kam ha ka Bharat Mandapam, New Delhi ha ka National Startup Day, mynta ka sngi.

Haba ban jur ba ka India ka la paw kum ka ri kaba lai ha ka pyrthei kaba heh tam ha ki kam startup tang ha ki shiphew snem, u la ong ba ka jingdon jong ki startup ka la kiew na kaba duna ïa ka 500 ha u snem 2014 sha palat ar lak mynta, katba ka jingdon jong ki unicorn ka la kiew na ka saw sha jan 125 tylli, ha kaba ki startup na India ki la kyntiew ia ka jingplie ia ki IPO, ki lad ioh kam bad khring ia ka jingphaikhmat jong ka pyrthei.

U Myntri Rangbahduh u la ong ba haduh 44,000 tylli ki startup ki la pynrung kyrteng tang ha u snem 2025—kaba heh tam ha kano kano ka snem—kaba ban jur ia ka jingkiew stet jong ka kam. Haba pynkynmaw ïa ki jingïakren bad ki samla nongsaindur thymmai na ki kam kum ka rep ka riang, ka fintech, ki lad ka leit ka wan, ka koit ka khiah, bad ka jingpynneh pynsah, u la ong ba ki jingmut, ka jingsngew skhem, bad ka jingangnud jong ki ka pynpaw ïa ka India kaba thymmai kaba pynleit jingmut ha kaba pynbeit ïa ki jingeh. U Myntri Rangbahduh u la pynpaw ïa ka jingsngewkmen ban ïakynduh ïa ki samla bad ïaroh ïa ka jingshlur jong ki ban don ki jingthmu kiba heh, da kaba ong ba ka Startup India ka plie lad ia ki ban saindur thymmai bad ba bun na ki samla nongseng kam kiba don mynta kin long ka nuksa hi ki por ban wan ha kaba iadei bad ka kam Startup jong ka India.

U Myntri ka Tnad Commerce and Industry jong ka Sorkar Pdeng, u Piyush Goyal, haba ai jingkren ha kane ka sngi u la ong ba shiphew snem mynshwa mynta ka sngi, u Myntri Rangbahduh ka Ri u la wanrah ia ka rukom pyrkhat ba thymmai ha ka ri, da kaba khot ia ki samla ba kin pynkylla ialade na ki nongwad kam sha ki nongpynmih kam. U la ong ba ka ri ka sngew sarong ban sakhi ïa kane ka jingkylla ka dang wan dur hapoh ka jingïalam jong u Myntri Rangbahduh.

U Goyal u la pynkynmaw ba ha ka por ba la sdang ïa ka sienjam Startup India ha u snem 2016, ki don tang kumba 400 tylli ki startup ha ka ri. Mynta, kane ka jingïakhih ka la nang iar, ha kaba palat ar lak tylli ki startup ki la pynrung kyrteng bad ka Tnad Promotion of Industry and Internal Trade (DPIIT). U la bynrap ruh ba kine ki startup ki la pynmih haduh 21 lak tylli ki kam ha kylleng ka ri.

Haba Ban jur ïa ka jingktah jong ka Startup India, u Myntri u la ong ba ha ki jingïakren jong u bad ki samla pule bad ki nonghikai ha ki jingïalang jong ki skulbah, u la sakhi ïa ka jingsngew skhem ba thymmai hapdeng ki samla. U la ong ba katto katne ki jaka pule ki la kylla long ki “mini Shark Tank”, ha kaba ki samla pule ki thrang ban pynkylla ïa ki jingmut jong ki sha ka jingshisha. Kane ka jingkylla, u la ong, ka la urlong lyngba ka jingïalam ba ïohi jngai bad ka jingai mynsiem ba man ka por jong u Myntri Rangbahduh ka ri.

Haba ïasam ïa ka jingshem jong u shaphang ka jingïatreilang bad ki startup ha IIT Madras’ Center for Innovation, u Goyal u la ong ba u itynnad bha ïa ka jinglong shitrhem, ka jingsaindur thymmai, bad ka bor jong ki samla pule ban pynbeit ïa ki jingeh. U la ban jur ba ka sap bad ka jingtbit jong ki ka pynpaw ïa ki lad ba ka India ka don ban weng ïa ki jingeh ha ka pyrthei bad ban pyni ïa ka jingsaindur thymmai ha ka rynsan jong ka pyrthei.

U Myntri u la ong ba ki startup jong ka India mynta ki dang treikam ha palat 50 jait ki kam, kynthup ïa ka Deep Tech, Artificial Intelligence, Machine Learning, Quantum Computing, Agri-Tech, Space Tech, Drone Technology, Aerospace, bad ka  Rocket Technology. U la ong ba ki startup ki kiew bha ha baroh ki kam kiba kongsan bad kiba ktah jur ia ka ioh ka kot.

Ban pynkhlain ia ka rukom treikam jong ki startup, u Goyal u la pynkynmaw ba ka Sorkar ka la sdang ia ka Fund of Funds kaba shongdor T.10,000 klur ha u snem 2016 ban pynbiang pisa ban sdang ia ki kam bad plie lad ia ki startup ba kin pdiang ia ki jingma da ka jingsngewthuh. Hadien ka jingpyndonkam kaba jop ia ka bynta kaba nyngkong, la mynjur ia ka bynta kaba ar kaba T.10,000 klur ha ka mang tyngka jong ka sorkar pdeng kaba la dep. U la ong ba ka Sorkar ka thmu ban pynlut ïa ka bynta kaba kongsan jong kane ka pisa ha ka deep tech bad ki kam high-tech ban pynshlur shuh shuh ïa ki samla ban seng kam seng jam.

U Myntri u la pynpaw shuh shuh ba u Myntri Rangbahduh u la pynbna ïa ka jingbei tyngka kaba T.1 lak klur kaba la aiti na ka bynta ka jingwad bniah, ka jingkyntiew, bad ka jingsaindur thymmai, ka ban kyrshan ïa ki nongwad bniah, ki stad saian, bad ki startup ha kaba pynlong ia ki jingwad bniah ha ka deep tech kaba ïaryngkat bad ki jinglong jingman ha kylleng ka pyrthei.

U Goyal u la ong ba ki startup mynta ki don ha man la ki dong jong ka ri, ha kaba jan 50 percent ki mih na ki nongbah Tier-II bad Tier-III, kaba pyni ba ka jingkylla jong ki startup ka la long shisha ka jingïakhih jong ka ri. U la kdew ia ka thain shatei lammihngi kum ka nuksa ba kongsan, da kaba kdew ia ka jingtrei jong ki startup ha Sikkim kaba dei ban ai jingiaroh bad ka jingiatreilang hapdeng ki nongrep slasha bad ki samla ha Assam ban wanrah ia ki rukom rep kiba katkum ka juk mynta. Ha ki bynta ba shathie jong ka India, u la ong ba ka Andhra Pradesh ka dang paw kum ka jaka pdeng na ka bynta ki kam drone jong ka ri, katba ka Karnataka bad ka Tamil Nadu ki la long ki jaka pdeng na ka bynta ka deep tech bad ki AI startup.

Haba kren shaphang ka pyrthei ka peit ïa ka India da ka jingkyrmen kaba khraw, u Goyal u la ong ba ha ki por ba wan ki nongmihkhmat nabar ri bad ki jingïakren ïa ka Free Trade Agreement, katto katne ki ri ki la pynpaw ka jingangnud ban sdang ia ki jingiatreilang bad ka India ha kaba iadei bad ki startup. U la antad ba haduh 100 tylli ki ri ki kwah ban ïatreilang bad ka kam startup jong ka India lyngba ki jingïatreilang hapdeng ki startup.

U Myntri u la pynkut da kaba pynpaw ïa ka jingngeit skhem ba ka Startup India, ba la sdang hapoh ka jingïalam jong u Myntri Rangbahduh ka ri u Narendra Modi, kan dang ïai seisoh bad kan don ka bynta kaba kongsan ban pynurlong ïa ka jingthmu jong ka Viksit Bharat, ka jingangnud jong ki 140 klur ngut ki nong India.

Katba ka India ka pyndep ïa ki shiphew snem ba kongsan jong ka sienjam Startup India, ka Tnad Promotion of Industry and Internal Trade (DPIIT), ka Tnad Commerce and Industry, ka kynmaw burom ïa ki shiphew snem jong ki sienjam hapoh ki polisi ban tei ïa ka ri kaba khlaiñ, kaba kynthup lang, bad kaba la ïalam da ka jingpynmih jingmut thymmai. Ki jingrakhe ki la kut mynta ka sngi, da kaba rakhe ïa ka National Startup Day bad ka Jingpynbna ïa ki Resol jong ki bynta ba 5 jong ki kam buh kyrdan ia ki Startup jong ki Jylla bad ka National Startup Awards, kaba pynïasoh lang ïa kito kiba don bynta ha ka kam startup na kylleng ka pyrthei.

La sdang ha ka 16 tarik Kyllalyngkot 2016 da u Myntri Rangbahduh ka ri, u Narendra Modi, la saindur ia ka Startup India kum ka sienjam kaba pynkylla ban kyntiew ia ka jingsaindur thymmai, ban kyntiew ia ka kam seng kam seng jam, bad ban plie lad ia ka roi ka par kaba wan na ka jingbei tyngka ryngkat ka jingthmu ba ka India kan long ka ri jong ki nongai kam ha ka jaka jong ki nongwad kam.
 

Ha kine ki shiphew snem ba la leit, kane ka sienjam ka la paw kum u mawjam jong ka jingtei ia ka ïoh ka kot bad ka jingpynmih jingmut thymmai jong ka India, kaba pynkhlain ïa ki rukom treikam, kaba pynïar ïa ki lad ban ïoh ïa ka pisa bad ki jingialam lynti, bad kyntiew ïa ka jinglong jingman ha kaba ki startup ki lah ban pyniar ia ki kam bad ki jaka pyntreikam. Kum ka jingithuh ia ka bynta kaba kongsan ba ki startup ha ka jingtei ia ka ri, ka jingkyntiew ia ka roi ka par bad ka ioh ka kot ha ka imlang sahlang, bad ka jinglah ban kyrshan dalade, u Myntri Rangbahduh, ha u snem 2022, u la pynbna ia ka 16 tarik Kyllalyngkot kum ka National Startup Day.

Ha kine ki shiphew snem ba la dep, ka kam Startup jong ka India ka la sakhi ïa ka jingiar ka bum pat ju iohi, ha kaba palat 2,00,000 tylli ki startup la ithuh da ka DPIIT ha kylleng ka ri. Kine ki karkhana ki la paw kum ki nongplie lad kiba kongsan na ka bynta ka jingai kam, ka jingkiew ka ioh ka kot ba la pynlong da ka jingsaindur thymmai, bad ka jingpynkhlain ia ka jingpynbha ia ki kam hapoh ka ri. Lyngba ka jingkyrshan ki polisi ba iaineh, ka jingpynsuk ia ki jaka treikam, bad ka jingiatreilang ha ka kam, ka sienjam Startup India ka dang iai bteng ban kyntiew ia ka jingthmu jong ka ri na ka bynta ka Viksit Bharat @ 2047 da kaba kyntiew ia ka seng kam seng jam kum ka jingpynkylla ia ka roi ka par kaba kynthup lang ia baroh, ka jingkiew ha ka teknoloji, bad ka bor ban iaineh ha kaba iadei bad ka ioh ka kot.

Kum shi bynta jong ka jingrakhe ïa ka National Startup Day, ka DPIIT ka la pynbna ïa ki resol jong ka bynta kaba san jong ka National Startup Awards (NSA 5.0) bad ka States’ Startup Ranking Exercise (SRF 5.0), ar tylli ki sienjam ba kongsan kiba la paw kum ki rynsan ba kongsan jong ka ri na ka bynta ban wanrah ia ka jingseisoh ha ki kam bad ban ithuh ïa ka jingtrei bha ha baroh ki kam ba iadei bad ki startup.
 

Ia ka National Startup Awards la saindur ban ithuh ia ki startup kiba pyni ia ka jingtbit ha ka jingsaindur thymmai, ka jinglah ban pynheh, bad ka jingktah ha ka imlang sahlang, katba ka pynbiang ia ka rynsan kaba la buh ryntih ha ka ri ban pyni ia ki kam kiba don ka jingktah kaba khraw. Ka bynta kaba san jong ki khusnam, kaba iahaplang bad ka jingdap shiphew snem ka Startup India, ka dei ka dak jong ka jingkiew shaphrang jong ki kam lyngba ka jingwanrah ia ki jait khusnam kiba thymmai bad kiba iadei bad ka lawei. La pynphriang ha ki 20 tylli ki thup ai khusnam, kane ka bynta jong ka National Startup Awards ka kynthup ïa ka jingithuh ïa ki startup na ki nongbah Tier II bad Tier III, ka jingpynwandur ïa ka deep-tech, bad ki kam kiba dang sdang mih kiba ïahap bad ki jingthmu na ka bynta ka roi ka par jong ka ri.

Ka States’ Startup Ranking Framework ka long kum ka polisi bad ka atiar synshar kaba lah ban treikam ban bishar bniah haduh katno ki Jylla bad ki Union Territory ki dang plie lad ia ka jingkiew ki startup. Da kaba pynshlur ia ka jingiakhun bad ka jingiatreilang hapdeng ki sorkar jylla, ka rukom treikam ka kyrshan ia ka jingkyntiew ia ki kam startup kiba khlain ha kylleng ka ri.

Ka bynta kaba san jong ka States’ Startup Ranking Framework ka tei halor ki jinghikai na ki bynta ba mynshuwa bad ka ban kham jur ha ki jingseisoh ba lah ban ithuh, ka jingiaineh, bad ka jingkhlain jong ki kam startup. La bishar bniah ia ki Jylla bad ki Union Territory ha kylleng ki hynriew tylli ki bynta jong ka jingpynkylla bad khatkhyndai tylli ki mat treikam ba la batai shai, kiba kynthup ïa ki polisi bad ki jingkyrshan jong ki tnat treikam, ki jingdon jingem, ka jingïoh pisa, ka jingïoh ïa ka iew bad ki jingïadei, ka jingkyntiew ïa ka bor treikam jong ki nongseng kam bad kito kiba don bynta ha kine ki kam, bad ka roi ka par ba la ïalam da ka jingsaindur thymmai. Ka jingïashim bynta na ki 34 tylli ki Jylla bad ki Union Territory ha kane ka bynta kaba mynta ka pyni ïa ka jingkular lang jong ka ri ban kyntiew ïa ka jingpyntreikam, ban pynkhlain ïa ka jinglong jingman, bad plie lad ïa ki startup ban kiew ha baroh ki thaiñ.

Ka National Startup Awards bad ka States’ Startup Ranking Exercise ki la pynkylla thymmai kumno ban ithuh ïa ka jingjop jong ki startup bad kumno ban thew ïa ka jingtreikam ha kaba iadei bad ki startup ha kylleng ka ri. Da kaba ai khusnam ia ki startup kiba treikam bha bad bishar bniah ia ki kam jong ka sorkar ha ki Jylla, kine ki sienjam ki la wanrah ia ka jingkitkhlieh, ki la kyntiew ia ki kyrdan, bad ki la pynsted ia ka jingkiew shaphrang jong kane ka kam ha ka ri baroh kawei.

Katba ka Startup India ka dap shiphew snem, kine ki shiphew snem ki paw namar ka jingthmu ba shai ha ka polisi, ka jingpyntreikam kaba beit, bad ka jingshaniah ha ki nongseng kam seng jam kaba nangroi. Ki startup mynta kim dei tang ki kor jong ka jingpynmih jingmut bad ka jingthaw kam thaw jam hynrei ki long ruh ki nongnoh synniang kiba kongsan ha ka jingkhlain ha ka ioh ka kot bad ka bor ban shaniah halade, kaba pynskhem ia ka kyrdan jong ka India kum ka jaka ba pawnam ha ka pyrthei na ka bynta ka jingseng kam seng jam bad ka jingpynmih jingmut thymmai.

Annexure–I: National Startup Awards (NSA 5.0) – Ki nongjop

Annexure–II: States’ Startup Ranking Framework (SRF 5.0) Results

***