સેન્ટ્રલ કન્ઝ્યુમર પ્રોટેક્શન ઓથોરિટી (CCPA)એ ઈ-કોમર્સ પ્લેટફોર્મ પર વોકી-ટોકી (પર્સનલ મોબાઈલ રેડિયો PMRs) ના મોટા પાયે ગેરકાયદેસર લિસ્ટિંગ અને વેચાણની સ્વતઃ સંજ્ઞાન (suo motu cognisance) લીધી છે અને ગ્રાહક સુરક્ષા અને ટેલિકોમ નિયમોના ઉલ્લંઘન બદલ અગ્રણી ઓનલાઈન માર્કેટપ્લેસ પર નાણાકીય દંડ લાદ્યો છે.

આ કાર્યવાહી પ્લેટફોર્મ પર 16,970થી વધુ બિન-સંગત વોકી-ટોકી લિસ્ટિંગની ઓળખ બાદ કરવામાં આવી છે. એમેઝોન (Amazon), ફ્લિપકાર્ટ (Flipkart), મીશો (Meesho), જિયોમાર્ટ (JioMart), મેટા (ફેસબુક માર્કેટપ્લેસ), ટોક પ્રો (Talk Pro), ચીમિયા (Chimiya), માસ્કમેન ટોય્ઝ (MaskMan Toys), ઇન્ડિયા માર્ટ (India Mart), ટ્રેડઇન્ડિયા (TradeIndia), અંતરિક્ષ ટેકનોલોજીસ (Antriksh Technologies), વરદાનમાર્ટ (Vardaanmart) અને ક્રિષ્ના માર્ટ સહિત 13 ઈ-કોમર્સ સંસ્થાઓને નોટિસ જારી કરવામાં આવી હતી.

ઓથોરિટીએ જોયું કે કેટલાંક પ્લેટફોર્મ્સ ફરજિયાત વૈધાનિક મંજૂરીઓ અથવા ખુલાસાઓ વિના, પ્રતિબંધિત અને સંવેદનશીલ રેડિયો ફ્રીક્વન્સી બેન્ડ્સ પર કાર્યરત વોકી-ટોકીના વેચાણની સુવિધા આપી રહ્યા હતા. આ ઉપકરણો ગ્રાહકોને નીચેની બાબતો વિશે જાણ કર્યા વિના વેચવામાં આવ્યા હતા:

• ઉપકરણ કઈ રેડિયો ફ્રીક્વન્સી રેન્જ પર કાર્ય કરે છે
• શું ઉપકરણ માટે સરકારી લાઇસન્સની જરૂર છે
• શું તેણે ઇક્વિપમેન્ટ ટાઇપ એપ્રૂવલ (ETA) મેળવ્યું છે. તે ટેલિકોમ્યુનિકેશન વિભાગ (DoT) દ્વારા જારી કરાયેલ એક ફરજિયાત ટેકનિકલ મંજૂરી છે જે સુનિશ્ચિત કરે છે કે વાયરલેસ ઉપકરણો ભારતમાં (WPC) ઉપયોગ માટે સુસંગત, સુરક્ષિત અને પરવાનગીપાત્ર છે.

આમાંના ઘણા ઉપકરણો અલ્ટ્રા હાઈ ફ્રીક્વન્સી (UHF) બેન્ડમાં કાર્ય કરતા જોવા મળ્યા હતા, જે એક નિયંત્રિત સ્પેક્ટ્રમ છે જેનો ઉપયોગ પોલીસ, કટોકટી સેવાઓ, આપત્તિ પ્રતિભાવ એજન્સીઓ અને અન્ય જટિલ સંચાર નેટવર્ક દ્વારા પણ કરવામાં આવે છે. ઘણા ઉત્પાદનોની "લાઇસન્સ-મુક્ત" અથવા "100% કાયદેસર" તરીકે ખોટી જાહેરાત કરવામાં આવી હતી, ભલે તેમના ઉપયોગ માટે સરકારી મંજૂરીની જરૂર હોય. કેટલાક કિસ્સાઓમાં, વોકી-ટોકી રમકડાં તરીકે વેચવામાં આવ્યા હતા પરંતુ તેમની સંચાર શ્રેણી 30 કિલોમીટર સુધીની હતી. વધુમાં, ઘણા ઉત્પાદન લિસ્ટિંગમાં ઓપરેટિંગ ફ્રીક્વન્સી અથવા ઉપકરણ પાસે ઇક્વિપમેન્ટ ટાઇપ એપ્રૂવલ (ETA) છે કે કેમ તે જેવી મહત્વની વિગતો સ્પષ્ટપણે દર્શાવવામાં આવી ન હતી, જે ગ્રાહકો માટે ઉત્પાદન ખરીદવા અને વાપરવા માટે કાયદેસર છે કે કેમ તે જાણવું મુશ્કેલ બનાવે છે.

ભારતમાં વોકી-ટોકીનું વેચાણ, આયાત અને ઉપયોગ નીચે મુજબ નિયંત્રિત થાય છે:

• ઇન્ડિયન ટેલિગ્રાફ એક્ટ, 1885
• ઇન્ડિયન વાયરલેસ ટેલિગ્રાફી એક્ટ, 1933
• ધ યુઝ ઓફ લો પાવર એન્ડ વેરી લો પાવર શોર્ટ રેન્જ રેડિયો ફ્રીક્વન્સી ડિવાઈસીસ (લાઇસન્સિંગ આવશ્યકતામાંથી મુક્તિ) નિયમો, 2018

આ નિયમો હેઠળ, માત્ર 446.0–446.2 MHz ફ્રીક્વન્સી બેન્ડમાં સખત રીતે કાર્યરત વોકી-ટોકીને જ લાઇસન્સિંગમાંથી મુક્તિ આપવામાં આવી છે. આવા લાઇસન્સ-મુક્ત ઉપકરણોએ પણ ભારતમાં આયાત અથવા વેચાણ કરતા પહેલા ETA પ્રમાણપત્ર મેળવવું આવશ્યક છે. આ જરૂરિયાતોનું પાલન કરવામાં નિષ્ફળતા એ ગ્રાહક સુરક્ષા અધિનિયમ, 2019 હેઠળ ભ્રામક જાહેરાત, અયોગ્ય વેપાર પદ્ધતિ અને સેવામાં ઉણપ ગણાય છે અને ગ્રાહક સુરક્ષા (ઈ-કોમર્સ) નિયમો, 2020 નું ઉલ્લંઘન કરે છે.

આવા ઉલ્લંઘનોના પુનરાવર્તનને રોકવા માટે, CCPA એ ટેલિકોમ્યુનિકેશન વિભાગ (DoT) અને ગૃહ મંત્રાલય (MHA) ના પરામર્શમાં, ઈ-કોમર્સ પ્લેટફોર્મ્સ પર વોકી-ટોકી સહિત રેડિયો સાધનોના ગેરકાયદેસર લિસ્ટિંગ અને વેચાણના નિવારણ અને નિયમન માટેની માર્ગદર્શિકા, 2025 સૂચિત કરી છે.

આ માર્ગદર્શિકા મુજબ ઈ-કોમર્સ પ્લેટફોર્મ્સે આ કરવું જરૂરી છે:

• લિસ્ટિંગની મંજૂરી આપતા પહેલા ફ્રીક્વન્સી પાલનની ચકાસણી કરવી
• વેચાણ પૂર્વે ETA પ્રમાણપત્ર સુનિશ્ચિત કરવું
• ગ્રાહકોને લાઇસન્સિંગ આવશ્યકતાઓ વિશે સ્પષ્ટપણે જણાવવું
• "લાઇસન્સ-મુક્ત" અથવા "100% કાયદેસર" જેવા ગેરમાર્ગે દોરતા દાવાઓ પર પ્રતિબંધ મૂકવો
• ગેરકાયદે લિસ્ટિંગ માટે ઓટોમેટેડ મોનિટરિંગ અને ટેકડાઉન (હટાવવા માટેની) સિસ્ટમ તૈનાત કરવી

મુખ્ય કમિશનર શ્રીમતી નિધિ ખરે અને કમિશનર શ્રી અનુપમ મિશ્રાની આગેવાની હેઠળની CCPA એ આઠ કેસમાં અંતિમ આદેશો જારી કર્યા છે, જે નીચે મુજબ છે:

1. મીશો (Fashnear Technologies Pvt. Ltd.)
2. ટોક પ્રો (Iconet Services Pvt. Ltd.)
3. માસ્કમેન ટોય્ઝ
4. ચીમિયા
5. જિયોમાર્ટ
6. મેટા પ્લેટફોર્મ્સ ઇન્ક. (ફેસબુક માર્કેટપ્લેસ)
7. ફ્લિપકાર્ટ ઇન્ટરનેટ પ્રાઇવેટ લિમિટેડ
8. એમેઝોન સેલર સર્વિસીસ પ્રા. લિ.

અંતરિક્ષ ટેકનોલોજીસ, ઇન્ડિયા માર્ટ, ટ્રેડઇન્ડિયા, વરદાનમાર્ટ અને ક્રિષ્ના માર્ટ સામેની કાર્યવાહી હાલમાં તપાસ અથવા સુનાવણીના વિવિધ તબક્કે છે.

Chimiya.com ને લગતી બાબતમાં, CCPAને જાણવા મળ્યું કે પ્લેટફોર્મ UHF 400-470 MHz બેન્ડમાં કાર્યરત રિચાર્જેબલ ટુ-વે વોકી-ટોકી રેડિયો વેચાણ માટે ઓફર કરી રહ્યું હતું, જે ભારતમાં અનુમતિપાત્ર લાઇસન્સ-મુક્ત સ્પેક્ટ્રમની બહાર આવે છે. આ ઉપકરણો વિદેશી અધિકારક્ષેત્રોમાંથી આયાત કરવામાં આવ્યા હતા અને ઇક્વિપમેન્ટ ટાઇપ એપ્રૂવલ (ETA) અને સખત રીતે 446.0–446.2 MHz બેન્ડમાં કામગીરીની ચકાસણી સહિતની ફરજિયાત નિયમનકારી જાહેરાતો વિના લિસ્ટેડ કરવામાં આવ્યા હતા. આવા ઉપકરણો જરૂરી વૈધાનિક મંજૂરીઓ વિના ભારતમાં આયાત, જાહેરાત કે વેચી શકાતા નથી. CCPA એ ઠેરવ્યું હતું કે પ્લેટફોર્મ યોગ્ય કાળજી (due diligence) લેવામાં નિષ્ફળ રહ્યું હતું અને ગ્રાહક સુરક્ષા અધિનિયમ, 2019 અને લાગુ ટેલિકોમ નિયમોનું ઉલ્લંઘન કર્યું હતું.

ઈ-કોમર્સ પ્લેટફોર્મ જિયોમાર્ટ (JioMart) (www.jiomart.com) લાઇસન્સિંગ જરૂરિયાતો અને નિયમનકારી પાલન અંગે સ્પષ્ટ અને પ્રત્યક્ષ ખુલાસાઓ વિના વેચાણ માટે વોકી-ટોકી ઉપકરણો ઓફર કરતું હોવાનું જણાયું હતું. બે વર્ષના ગાળામાં, પ્લેટફોર્મ દ્વારા આવા ઉપકરણોના 58 યુનિટ વેચવામાં આવ્યા હતા. ઓથોરિટીએ નોંધ્યું હતું કે ફરજિયાત માહિતીની બાદબાકી ગ્રાહકોને વાયરલેસ કોમ્યુનિકેશન ઇક્વિપમેન્ટના અનધિકૃત ઉપયોગ સાથે સંકળાયેલા કાયદાકીય અને તકનીકી જોખમોમાં મૂકી શકે છે.

CCPAને જાણવા મળ્યું કે ટોક પ્રો (Iconet Services Pvt. Ltd.) એ UHF 400–1200 MHz સહિત વિશાળ ફ્રીક્વન્સી રેન્જમાં કાર્યરત વોકી-ટોકી ઉપકરણોને લિસ્ટ કર્યા અને વેચ્યા હતા, જ્યારે તેમને "100% કાયદેસર" અને "લાઇસન્સ-મુક્ત" તરીકે ખોટી રીતે રજૂ કર્યા હતા. સંસ્થાએ ઉપકરણોની ઓપરેશનલ રેન્જ અંગે પણ ગેરમાર્ગે દોરતા અને વિરોધાભાસી દાવાઓ કર્યા હતા, જેમાં અન્યત્ર જાહેર કરાયેલી રેન્જ કરતા નોંધપાત્ર રીતે વધુ રેન્જની જાહેરાત કરવામાં આવી હતી. તપાસમાં સાબિત થયું કે આ ઉપકરણો લાઇસન્સિંગ જવાબદારીઓ અથવા ETA આવશ્યકતાઓના ખુલાસા વિના વેચવામાં આવ્યા હતા, જે ભ્રામક જાહેરાત અને અયોગ્ય વેપાર પદ્ધતિ સમાન છે.

મીશો (Meesho) (Fashnear Technologies Pvt. Ltd.)ની બાબતમાં, CCPAએ ફરજિયાત લાઇસન્સિંગ અથવા પ્રમાણપત્ર વિગતો રજૂ કર્યા વિના બહુવિધ વિક્રેતાઓ દ્વારા વોકી-ટોકી ઉપકરણોના મોટા પાયે લિસ્ટિંગ અને વેચાણનું અવલોકન કર્યું હતું. એવું નોંધવામાં આવ્યું હતું કે વિગતો માત્ર એક વિક્રેતાના સંબંધમાં રજૂ કરવામાં આવી હતી, જેની વિગતો નોટિસ સાથે જોડવામાં આવી હતી, જે દર્શાવે છે કે તે એકલા વિક્રેતા દ્વારા સંબંધિત ઉત્પાદનના 2,209 યુનિટ વેચવામાં આવ્યા હતા. વધુમાં, પ્લેટફોર્મ પર અસંખ્ય વોકી-ટોકી લિસ્ટિંગમાં ETA પ્રમાણપત્ર અથવા ફ્રીક્વન્સી સ્પષ્ટીકરણો જાહેર કરવામાં આવ્યા ન હતા, અને પ્લેટફોર્મ અસરકારક વિક્રેતા ચકાસણી અથવા નિયમનકારી પાલન પદ્ધતિ દર્શાવવામાં અસમર્થ હતું. આવી ખામીઓ ગ્રાહક સુરક્ષા અધિનિયમ, 2019 અને ગ્રાહક સુરક્ષા (ઈ-કોમર્સ) નિયમો, 2020 ના ઉલ્લંઘનમાં હોવાનું જણાયું હતું.

માસ્કમેન ટોય્ઝ (MaskMan Toys)ની બાબતમાં, CCPA એ જોયું કે 10 કિમી, 20 કિમી અને 30 કિમી સહિતની વિવિધ સંચાર શ્રેણીની વોકી-ટોકી ફ્રીક્વન્સી રેન્જ, લાઇસન્સિંગ જરૂરિયાતો અથવા ETA/WPC પ્રમાણપત્ર સ્થિતિના ખુલાસા વિના લિસ્ટેડ હતી. રમકડાં તરીકે માર્કેટિંગ કરવામાં આવતું હોવા છતાં, ઉપકરણોની તકનીકી ક્ષમતાઓ રમકડાંના વર્ગીકરણ કરતાં વધી ગઈ હતી. પાયાની નિયમનકારી માહિતીની ગેરહાજરીથી ગ્રાહકો માટે ઉત્પાદનોની કાયદેસરતા નક્કી કરવી અશક્ય બની હતી અને તે ગ્રાહક સુરક્ષા અધિનિયમ, 2019 હેઠળ ગંભીર ચૂક હતી.

ફ્લિપકાર્ટ (Flipkart) ને લગતી બાબતમાં, CCPA ને જાણવા મળ્યું કે ફ્રીક્વન્સી રેન્જ, લાઇસન્સિંગ આવશ્યકતાઓ અને ETA/WPC પ્રમાણપત્ર સ્થિતિને લગતી ફરજિયાત જાહેરાતો વિના પ્લેટફોર્મ પર વોકી-ટોકી ઉપકરણો લિસ્ટેડ હતા અને વેચવામાં આવ્યા હતા. મોટી સંખ્યામાં વિક્રેતાઓએ આવા ઉપકરણો લિસ્ટ કર્યા હોવાનું જાણવા મળ્યું હતું, જેના પરિણામે નોંધપાત્ર વેચાણ થયું હતું. રજૂ કરાયેલા ડેટા પરથી જાણવા મળ્યું છે કે 42,275 યુનિટ્સ ચોક્કસ લાઇસન્સ-મુક્ત ફ્રીક્વન્સી રેન્જ જાહેર કરીને વેચવામાં આવ્યા હતા, જ્યારે 65,931 યુનિટ્સ એવા વેચવામાં આવ્યા હતા જ્યાં ફ્રીક્વન્સી રેન્જ કાં તો ખાલી રાખવામાં આવી હતી અથવા મુક્તિ આપવામાં આવેલી રેન્જની બહાર હતી. ઓથોરિટીએ અવલોકન કર્યું કે આવી માહિતીની ચકાસણી અને ખુલાસો કરવામાં નિષ્ફળતાએ ગ્રાહકોના માહિતગાર થવાના અધિકાર સાથે સમજૂતી કરી હતી અને ગ્રાહક સુરક્ષા અધિનિયમ, 2019 હેઠળ ભ્રામક જાહેરાત અને અયોગ્ય વેપાર પદ્ધતિની રચના કરી હતી.

ફેસબુક માર્કેટપ્લેસ (Facebook Marketplace) ના કિસ્સામાં, CCPA ને જાણવા મળ્યું કે લાઇસન્સિંગ જરૂરિયાતો, ફ્રીક્વન્સી સ્પષ્ટીકરણો અથવા ETA/WPC પ્રમાણપત્રના ખુલાસા વિના વોકી-ટોકી ઉપકરણો લિસ્ટેડ કરવામાં આવ્યા હતા, હોસ્ટ કરવામાં આવ્યા હતા અને જાહેરાત કરવામાં આવી હતી. નોટિસ પછી હટાવવા છતાં, પ્લેટફોર્મ પર પૂરતી નિવારક સલામતી વિના નિયંત્રિત રેડિયો કોમ્યુનિકેશન ડિવાઈસનું વારંવાર લિસ્ટિંગ કરવામાં આવતું હોવાનું જણાયું હતું. ઓથોરિટીએ ઠેરવ્યું હતું કે આવા લિસ્ટિંગ ભ્રામક જાહેરાતો સમાન છે અને નિયંત્રિત ઉત્પાદનોના સાર્વજનિક પ્રચારની સુવિધા આપતા પ્લેટફોર્મ્સે તેમની સ્કેલ અને તકનીકી ક્ષમતા મુજબ યોગ્ય કાળજી (due diligence) રાખવી જરૂરી છે, જેના પગલે ઓથોરિટીના હસ્તક્ષેપના પરિણામે આવા કુલ 710 લિસ્ટિંગને દૂર કરવામાં આવ્યા હતા.

એમેઝોન સેલર સર્વિસીસ પ્રા. લિ. (Amazon Seller Services Pvt. Ltd.) ને લગતી બાબતમાં, CCPA એ પ્લેટફોર્મ પર જરૂરી વૈધાનિક ખુલાસાઓ વિના વોકી-ટોકી (જેને પર્સનલ મોબાઈલ રેડિયો PMRs તરીકે પણ ઓળખવામાં આવે છે) ની મોટી સંખ્યામાં લિસ્ટિંગ અને વેચાણનું સ્વતઃ સંજ્ઞાન (સુઓ મોટો) લીધી હતી. પ્લેટફોર્મની તપાસમાં બહાર આવ્યું છે કે વિક્રેતાઓ દ્વારા વોકી-ટોકી માટે 467 ઉત્પાદન લિસ્ટિંગ મૂકવામાં આવ્યા હતા, જેમાંથી મોટા ભાગનાએ ઓપરેટિંગ ફ્રીક્વન્સી બેન્ડવિડ્થ અથવા ટેલિકોમ્યુનિકેશન વિભાગ (DoT) પાસેથી મેળવેલા પ્રમાણપત્રનો ખુલાસો કર્યો ન હતો. વધુમાં, પ્રતિભાવના પરિશિષ્ટમાં રજૂ કરાયેલ ડેટા સૂચવે છે કે જાન્યુઆરી 2023 થી મે 2025 ના સમયગાળા દરમિયાન 2,602 યુનિટ્સ વેચવામાં આવ્યા હતા, જેમાં સંબંધિત વિક્રેતાઓ અને સંબંધિત ઓર્ડર અને ઇનવોઇસની વિગતો હતી. ઓથોરિટીએ અવલોકન કર્યું કે આવી બાદબાકીએ ગ્રાહકોને માહિતગાર નિર્ણય લેવા માટે જરૂરી ભૌતિક માહિતીથી વંચિત રાખ્યા હતા અને ગ્રાહક સુરક્ષા અધિનિયમ, 2019 હેઠળ ભ્રામક જાહેરાત અને અયોગ્ય વેપાર પદ્ધતિ સમાન છે.

દંડ અને નિર્દેશો કેટલાક ઈ-કોમર્સ પ્લેટફોર્મ્સે દાવો કર્યો હતો કે તેઓ માત્ર મધ્યસ્થી (intermediaries) છે અને તૃતીય-પક્ષ વિક્રેતાઓ (third-party sellers) દ્વારા લિસ્ટેડ ઉત્પાદનો માટે જવાબદાર નથી. CCPA એ આ દાવાને ફગાવી દીધો અને સ્પષ્ટ કર્યું કે જે પ્લેટફોર્મ નિયંત્રિત ઉત્પાદનોના લિસ્ટિંગ, પ્રચાર અને વેચાણની મંજૂરી આપે છે તેઓ જવાબદારીમાંથી બચી શકે નહીં. આવી સુરક્ષા ત્યારે જ ઉપલબ્ધ થાય છે જ્યારે પ્લેટફોર્મ યોગ્ય તપાસ અને યોગ્ય કાળજી (due diligence) રાખે.

ઓથોરિટીએ મીશો, ફ્લિપકાર્ટ, એમેઝોન અને મેટા પ્લેટફોર્મ્સ ઇન્ક પર ₹10 લાખ દરેકને અને ચીમિયા, જિયોમાર્ટ, ટોક પ્રો અને માસ્કમેન ટોય્ઝ પર ₹1 લાખ દરેકને દંડ ફટકાર્યો છે. કેટલાક પ્લેટફોર્મ્સે પહેલેથી જ દંડની રકમ ચૂકવી દીધી છે, જ્યારે બાકીની સંસ્થાઓ પાસેથી ચુકવણીની રાહ જોવાઈ રહી છે.

CCPAએ તમામ પ્લેટફોર્મ્સને નિર્દેશ આપ્યો છે કે વોકી-ટોકી અને અન્ય રેડિયો સાધનો જરૂરી સરકારી મંજૂરીઓ વિના લિસ્ટેડ અથવા વેચવામાં ન આવે તે સુનિશ્ચિત કરે. પ્લેટફોર્મ્સને નિયમિત સેલ્ફ-ઓડિટ કરવા, અનુપાલન પ્રમાણપત્રો (compliance certificates) પ્રકાશિત કરવા અને જ્યાં સુધી તે કાયદાનું સંપૂર્ણ પાલન ન કરે ત્યાં સુધી કોઈ નિયંત્રિત વાયરલેસ સાધનો વેચવામાં ન આવે તેની ખાતરી કરવા પણ કહેવામાં આવ્યું છે.

જાહેર સલામતી અને રાષ્ટ્રીય સુરક્ષા અસરો ઓથોરિટીએ નોંધ્યું હતું કે અનધિકૃત રેડિયો ઉપકરણો કાયદા અમલીકરણ એજન્સીઓ, આપત્તિ વ્યવસ્થાપન સત્તાધિકારીઓ અને કટોકટી સેવાઓ દ્વારા ઉપયોગમાં લેવાતી સંચાર પ્રણાલીઓમાં હાનિકારક હસ્તક્ષેપ કરી શકે છે, જે જાહેર સલામતી, જાહેર વ્યવસ્થા અને રાષ્ટ્રીય સુરક્ષા માટે ગંભીર જોખમો ઊભા કરે છે.

CCPAએ પુનરોચ્ચાર કર્યો હતો કે ગ્રાહકો ખરીદી કરતી વખતે ઓનલાઈન વર્ણનો અને સ્પષ્ટીકરણો પર ઘણો આધાર રાખે છે. બિન-સંગત વોકી-ટોકીનું વેચાણ ગ્રાહકોને ગેરમાર્ગે દોરે છે, તેમને કાયદાકીય અને નિયમનકારી જોખમોમાં મૂકે છે અને ડિજિટલ માર્કેટપ્લેસમાં વિશ્વાસ ઘટાડે છે.

ઓથોરિટીએ ગ્રાહક અધિકારોનું રક્ષણ કરવા, અયોગ્ય વેપાર પદ્ધતિઓને રોકવા અને સુરક્ષિત અને પારદર્શક ડિજિટલ માર્કેટપ્લેસ સુનિશ્ચિત કરવા માટે તેની પ્રતિબદ્ધતાની પુષ્ટિ કરી હતી અને તમામ ઈ-કોમર્સ પ્લેટફોર્મ્સને રેડિયો કોમ્યુનિકેશન ડિવાઈસ લિસ્ટ કરતી વખતે કડક નિયમનકારી ચકાસણી અને સચોટ ખુલાસો કરવા વિનંતી કરી હતી.

(અંતિમ આદેશ સેન્ટ્રલ કન્ઝ્યુમર પ્રોટેક્શન ઓથોરિટીની વેબસાઇટ પર ઉપલબ્ધ છે: https://doca.gov.in/ccpa/orders-advisories.php?page_no=1)

SM/DK/GP/JD