وزیر اعظم جناب نریندر مودی نے آج نئی دہلی میں پونگل کی تقریبات سے خطاب کیا۔ تمل زبان میں مبارکباد پیش کرتے ہوئے جناب مودی نے کہا، ’’آج پونگل ایک عالمی تہوار بن چکا ہے‘‘، جو دنیا بھر میں تمل برادری اور تمل ثقافت سے محبت کرنے والوں کے جوش و خروش کے ساتھ منایا جاتا ہے، اور میں خود بھی ان میں سے ایک ہوں۔ انہوں نے کہا کہ اس خاص تہوار کو سب کے ساتھ منانا ان کے لیے خوش قسمتی کی بات ہے۔ وزیر اعظم نے کہا کہ تمل زندگی میں پونگل ایک خوشگوار تجربے کی مانند ہے، جو کسانوں کی محنت، زمین اور سورج کے تئیں شکرگزاری کے جذبات کو ظاہر کرتا ہے اور ہمیں فطرت، خاندان اور معاشرے میں توازن قائم کرنے کی رہنمائی کرتا ہے۔ جناب مودی نے کہا کہ اس وقت ملک کے مختلف حصے لوہڑی، مکر سنکرانتی، ماگھ بہو اور دیگر تہواروں کی خوشیوں میں بھی ڈوبے ہوئے ہیں۔ انہوں نے بھارت اور دنیا بھر میں رہنے والے تمام تمل بھائیوں اور بہنوں کو پونگل کی دل کی گہرائیوں سے مبارکباد دی اور تمام تہواروں کے لیے نیک خواہنشات کا اظہار کیا۔

جناب نریندر مودی نے کہا کہ انہیں بہت خوشی ہے کہ گزشتہ سال انہیں تمل ثقافت سے جُڑے کئی پروگراموں میں حصہ لینے کا موقع ملا۔ انہوں نے بتایا کہ انہوں نے تمل ناڈو میں ہزار سال قدیم گنگئی کونڈا چولپورم مندر میں پوجا کی۔ وزیر اعظم نریندر مودی نے بتایا کہ وارانسی میں کاشی تمل سنگم کے دوران وہ مسلسل ثقافتی اتحاد کی توانائی کو محسوس کرتے رہے اور اس کے ساتھ جڑے رہے۔ انہوں نے یاد دلایا کہ جب وہ پمبن پل کے افتتاح کے لیے رامیشورم گئے تو انہوں نے ایک بار پھر تمل تاریخ کی عظمت کا مشاہدہ کیا۔ جناب نریندر مودی نے زور دیا کہ تمل ثقافت پورے ملک کی مشترکہ وراثت ہے اور حقیقت میں یہ پوری انسانیت کی مشترکہ وراثت بھی ہے اور انہوں نے یہ بھی کہا کہ’’ایک بھارت، شریشٹھ بھارت‘‘ کے جذبے کو پونگل جیسے تہوار مزید مضبوط کرتے ہیں۔

وزیر اعظم نے کہا کہ دنیا کی تقریباً تمام تہذیبیں فصلوں سے متعلق کسی نہ کسی تہوار کو مناتی ہیں۔ انہوں نے بتایا کہ تمل ثقافت میں کسان کو زندگی کی بنیاد سمجھا جاتا ہے۔ جناب مودی نے کہا کہ تِرُک کورل میں زراعت اور کسانوں پر وسیع تحریریں موجود ہیں۔ انہوں نے زور دیا کہ کسان ملک کی تعمیر کے مضبوط ساتھی ہیں اور ان کی کوششیں آتم نربھر بھارت مہم کو بہت طاقت دے رہی ہیں۔ وزیر اعظم نے اس بات پر بھی زور دیا کہ مرکزی حکومت بھی کسانوں کو بااختیار بنانے کے لیے مسلسل کام کرنے کے لیے پرعزم ہے۔

وزیر اعظم مودی نے کہا کہ پونگل کا تہوار ہمیں یہ تحریک دیتا ہے کہ فطرت کے تئیں شکرگزاری صرف الفاظ تک محدود نہ رہے بلکہ ہماری طرزِ زندگی کا حصہ بن جائے۔ انہوں نے زور دیا کہ جب زمین ہمیں اتنا کچھ دیتی ہے تو اسے سنبھالنا ہمارا فرض ہے۔ جناب نریندر مودی نے اس بات پر زور دیا کہ اگلی نسل کے لیے مٹی کو صحت مند رکھنا، پانی کو محفوظ کرنا اور وسائل کا متوازن استعمال کرنا سب سے ضروری ہے۔ انہوں نے بتایا کہ مشن جیسے ’’مشن لائف‘‘ ، ’’ایک پیڑ ماں کے نام‘‘اور ’’امرت سروور‘‘ اسی جذبے کو آگے بڑھاتے ہیں۔ وزیر اعظم نے کہا کہ حکومت زراعت کو مزید پائیدار اور ماحول دوست بنانے کے لیے مسلسل کام کر رہی ہے۔ انہوں نے ذکر کیا کہ آنے والے وقت میں پائیدار زرعی طریقے، پانی کا بندوبست،ان کی مسلسل اپیل ’’پر ڈرپ، مور کراپ‘‘—قدرتی کاشتکاری ، زرعی ٹیکنالوجی اور  قدر میں اضافہ جیسی پہل اہم کردار ادا کریں گی۔ جناب نریندر مودی نے کہا کہ ان تمام شعبوں میں نوجوان نئی سوچ کے ساتھ آگے بڑھ رہے ہیں۔ انہوں نے یاد دلایا کہ چند ماہ پہلے وہ تمل ناڈو میں قدرتی کاشتکاری سے متعلق ایک کانفرنس میں شامل ہوئے تھے، جہاں انہوں نے دیکھا کہ تمل نوجوان شاندار کام کر رہے ہیں، اور وہ پیشہ وارانہ زندگی کی بڑی چیزیں چھوڑ کر کھیتوں میں کام کررہے ہیں۔ وزیر اعظم نے اپنے نوجوان تمل دوستوں سے درخواست کی کہ وہ پائیدار زراعت میں انقلاب لانے کے اس مشن کو اور آگے بڑھائیں۔ انہوں نے زور دیا کہ ہمارا مقصد یہ ہونا چاہیے کہ ہماری پلیٹ بھری رہے، ہماری جیب بھری رہے، اور ہماری زمین محفوظ رہے۔

جناب مودی نے زور دیتے ہوئے کہاکہ’’تمل ثقافت دنیا کی سب سے قدیم زندہ تہذیبوں میں سے ایک ہے‘‘۔انہوں نے بتایا کہ تمل ثقافت صدیوں کو جوڑتی ہے، تاریخ سے سیکھتی ہے اور حال کو مستقبل کی طرف رہنمائی فراہم کرتی ہے۔ وزیر اعظم نے کہا کہ اسی تحریک سے آج کا بھارت اپنی جڑوں سے طاقت حاصل کر رہا ہے اور نئے امکانات کی طرف آگے بڑھ رہا ہے۔ انہوں نے ذکر کیا کہ پونگل کے اس مقدس موقع پر ہم اس بھروسے کو محسوس کر رہے ہیں جو بھارت کو آگے بڑھا رہا ہے،ایک ایسا ملک جو اپنی ثقافت سے جڑا ہوا ہے، اپنی زمین کا احترام کرتا ہے اور اپنے مستقبل کے بارے میں اعتماد سے بھرپور ہے۔ وزیر اعظم نریندر مودی نے تمل زبان میں مبارکباد پیش کرتے ہوئے خطاب کا اختتام کیا اور ایک بار پھر سب کو پونگل کی نیک خواہشات پیش کرنے کے ساتھ شکریہ ادا کیا۔

نئی دہلی میں مرکزی وزیر ڈاکٹر ایل مروگن کی رہائش گاہ پر پونگل کی تقریبات کا انعقاد کیا گیا ۔ مرکزی وزراء جناب جی کشن ریڈی، جناب کے رام موہن نائیڈو، جناب ارجن رام میگھوال، جناب وی سومناّ اور دیگر معززین اس تقریب میں موجود تھے ۔

********

ش ح۔ع ح۔ش ت

UN-NO - 566