ঙসি আসামগী গুৱাহাতিদা নুমিৎ নিনিগী নেস্নেল তেক্সতাইল্স মিনিস্তর্স কনফরেন্স হৌখ্রে, মসিদা ভারতকী তেক্সতাইল সেক্তরগী তুংগী রোদমেপকী মতাংদা খন্ন-নৈনবগীদমক লৈবাক শিনবা থুংবগী রাজ্যশিং অমসুং য়ুনিয়ন তেরিতোরীশিংগী তেক্সতাইল মন্ত্রীশিং অমসুং মকোক থোংবা ওফিসিএলশিং শরুক য়াখ্রে।

ভারত সরকারগী তেক্সতাইল্স মন্ত্রালয়না শিন্দুনা কনফরেন্স অসি 'ভারতকী তেক্সতাইল্স: ৱিভিং গ্রোথ, হেরিতেজ অমসুং ইন্নোবেসন' হায়বা থিমগী মখাদা পাংথোক্লি। থৌরম অসিনা কোওপরেতিব ফেদরেলিজম মপাঙ্গল কনখৎহন্নবা অমসুং ভারতপু তেক্সতাইল, এপরেল অমসুং তেক্নিকেল তেক্সতাইলগী মালেমগী হব অমা ওইহন্নবা কেন্দ্র অমসুং রাজ্যশিংগী মরক্তা তেংবাং পীন্দুনা পাইখৎপা থবকশিং ফগৎহন্নবা পান্দম থম্লি। হৌদোকপগী সেসন অদুদা তেক্সতাইল্সকী কেন্দ্রগী মন্ত্রী, শ্রী গিরিরাজ সিংহ, মধ্য প্রদেশকী মুখ্য মন্ত্রী, দোক্তর মোহন য়াদব, তেক্সতাইল্সকী রাজ্য মন্ত্রী, শ্রী পবিত্রা মার্গেরিতা অমসুং অতোপ্পা মকোক থোংবা মীওইশিংনা শরুক য়াখি।

হৌদোকপগী মীফম অদুদা ৱা ঙাংলদুনা, তেক্সতাইল্স মন্ত্রী শ্রী গিরিরাজ সিংহনা হায়খি মদুদি তেক্সতাইল সেক্তরদা পোৎ পুথোকপা, মপালদা থাদোকপা অমসুং তুং কোইনা চৎপা ঙম্নবা কেন্দ্র সরকারনা লেপ্পা লৈতনা অমসুং থোং মান্ননা চৎমিন্নদুনা থবক তৌরি। মহাক্না হায়খি নেস্নেল তেক্সতাইল্স মিনিস্তর্স কনফরেন্স অসি ভারতকী তেক্সতাইল ইন্দস্ত্রী মপাঙ্গল কনখৎহন্নবা মপাঙ্গল কনবা রোদমেপ অমা শেমগৎপদা মতেং পাংনবা ৱাখল্লোন পুন্না খন্ন-নৈনবা, ইন্নোবেসন অমসুং ৱাখল্লোনশিং শেয়র তৌবদা পুক্নিং থৌগৎনবা পান্দম থম্লি। কেন্দ্রগী মন্ত্রীনা তোঙান তোঙানবা রাজ্যশিং অমসুং য়ু.তি.শিংগী তেক্সতাইল্স মন্ত্রীশিংদা ইনভেস্তর ফ্রেন্দলী পোলিসীশিং শেম্নবা তকশিনখি অমসুং রাজ্যগী থাক্তা তেক্সতাইল সেক্তরদা অহেনবা ইনভেস্তমেন্ত লাকহন্নবগী তঙাইফদবা অদুদা অকনবা ৱাফম থমখি। কনফরেন্স অসিদা নুমিৎ নিনিগী ওইনা পাংথোক্কদবা খন্ন-নৈনবা অসিনা মাংলোমদা চংশিন্নবগী লম্বী য়াৎপদা মতেং পাংগনি হায়না মহাক্না থাজবা ফোংদোকখি। অৱাং-নোংপোক লমদমগী মতাংদা পল্লদুনা, শ্রী গিরিরাজ সিংহনা হায়খি মদুদি প্রধান মন্ত্রীনা লমদমশিং অসিগী শাহৌ লৈনবা অমসুং চাউখৎ খোঙচৎতা অহেনবা মীৎয়েং চংলি অমসুং সরকারনা তঙাই ফদবা ইনফ্রাস্ত্রকচর মপাঙ্গল কনখৎহন্নবা অমসুং অৱাং-নোংপোক লমদমগী অপুনবা চাউখৎপা খোঙজেল য়াংখৎহন্নবা কন্না হোৎনরি।

মীফম অদুদা ৱা ঙাংলদুনা মধ্য প্রদেশকী মুখ্য মন্ত্রী দা. মোহন য়াদবনা হায়খি মদুদি ভারত্তা তেক্সতাইল ইন্দস্ত্রী অসি য়াম্না থুনা চাউখৎলক্লি অমসুং লৈবাক অসিগী আর্তিস্তশিংগী আর্তিস্তিক স্কিল অসি মালেমগী কৈথেলশিংদা য়ৌবগী কান্নবা ফংহনগদবনি। নেস্নেল তেক্সতাইল মিনিস্তর্স কনফরেন্স অসিনা তেক্সতাইল ইন্দস্ত্রীগী গ্রোথ খোঙজেল য়াংখৎহন্নবা তুংগী থবক থৌরমশিং থৌরাং তৌনবগীদমক মপুং ফাবা রোদমেপ অমা পীগনি হায়না মহাক্না মখা তাখি।

কনফরেন্স অদুদা ৱা ঙাংলদুনা তেক্সতাইল্সকী রাজ্য মন্ত্রী, শ্রী পবিত্রা মার্গরিতানা হায়খি মদুদি নেস্নেল তেক্সতাইল্স মিনিস্তর্স কনফরেন্স গুৱাহাতিদা পাংথোক্লিবা অসি চাউথোকচনীংঙাই ওইবা তাঞ্জা অমনি। মসিনা তেক্সতাইল সেক্তরগী রোদমেপ পুন্না শেম্নবা কেন্দ্র অমসুং রাজ্যশিংবু পুনশিনগনি। কেন্দ্র অমসুং রাজ্য সরকারশিংগী মীহুৎশিংগা ৱারী শানদুনা অমসুং চৎমিন্নদুনা, কনফরেন্স অসিনা ভারতকী তেক্সতাইল ইন্দস্ত্রীবু মালেমগী কৈথেলদা মখোয়গী মফম পাকথোক চাউথোকহনবদা মতেং পাংগনি হায়না মহাক্না মখা তাখি। প্রধান মন্ত্রী নরেন্দ্র মোদীগী লুচিং মখাদা ভারতনা দোল্লর বিল্লিয়ন ৩৫০গী তেক্সতাইল ইকোনোমী অমা শেমগৎনবা পান্দম থম্লে হায়না শ্রী মার্গেরিতানা মখা তানা ফোংদোকখি। ২০১৯-২০গী হেন্দলুম সেন্সসকী মতাংদা পল্লদুনা শ্রী মার্গেরিতানা হায়খি মদুদি লৈবাক অসিগী অপুনবা হেন্দলুম পুথোকপদা অৱাং-নোংপোক লমদমনা ৫২% শরুক তম্লি।

তেক্সতাইল্সকী সেক্রেতরী শ্রীমতী নীলম শামী রাওনা হায়খি মদুদি লৈবাক অসিদা তেক্সতাইল ইন্দস্ত্রীনা লৈবাক অসিগী খুন্নাই অমসুং শেন্মিৎলোনগী পুন্সিদা মরুওইবা মফম অমা লৌদুনা লৈরি অমসুং লৈবাক অসিগী জিলা ৫০০ রোম্না তেক্সতাইল প্রদক্ত অমা নৎত্রগা অমদগী হেনবা মালেমগী কৈথেলদা এক্সপোর্ত তৌরি। হৌদোকপগী মীফমদা ৱা ঙাংলদুনা তেক্সতাইল্সকী এদিস্নেল সেক্রেতরী রোহিত কন্সালনা হায়খি মদুদি ভারত অসি মালেমদা খ্বাইদগী চাউবা তেক্সতাইল পুথোকপা লৈবাকশিংগী মনুংদা অমনি, অমসুং সেক্তর অসি য়াম্না থুনা চাউখৎলি, অমসুং তেক্সতাইল সেক্তরগী চাউখৎপা হেনগৎহন্নবা কেন্দ্র সরকারনা রাজ্য সরকারশিংগা লোয়ননা পুন্না থবক তৌমিন্নরি।

হৌদোকপগী সেসন অদুদা ভারতকী তেক্সতাইলগী শক্তি, ইন্নোবেসন অমসুং ‌ইনাক খুল্লবা হেরিতেজ উৎলিবা একজিবিসন অমসুং পেভিলিয়ন অমা হাংদোকখি। ইন্দিয়াগী তেক্সতাইল এতলাস: স্তেৎ কম্পেন্দিয়ম ২০২৫ হায়বা রিপোর্ত অমা ঙসি ফোংখ্রে।

নুমিৎ অদুগী মনুংদা, লংজম, মুগা, লিমোন, শামতু, তেক্নিকেল তেক্সতাইলস অমসুং ন্যু এজ ফাইবরশিং য়াওনা ইনফ্রাস্ত্রকচর, ইনভেস্তমেন্তস, রো মেতরিএল অমসুং ফাইবরশিংদা মীৎয়েং থমদুনা সেসন কয়া অমা পাংথোকখি।

তোঙান তোঙানবা রাজ্যশিং অমসুং য়ু.তি.এস.শিংগী মন্ত্রীশিং অমসুং ওফিসিএলশিংনা সেক্তর অসিবু হেন্না মপাঙ্গল কনখৎহন্নবগীদমক খ্বাইদগী ফবা থবকশিং, ইনভেস্তমেন্তকী খুদোংচাবশিং, শিংনবশিং অমসুং পোলিসীগী ৱাফমশিং থমখি।

কনফরেন্স অসি মপান্দা থাদোকপা, ব্রান্দিং, হেন্দলুম অমসুং হেন্দিক্রাফশিং য়াওনা হীরম কয়াদা মখা তানা খন্ন-নৈনদুনা হয়েং মখা চত্থগনি।

***