Ka National Textiles Ministers’ Conference kaba ar sngi ka la sdang mynta ka sngi ha Guwahati, Assam, ha kaba la wanrah lang ia ki Myntri ka Tnad Textiles bad ki heh ophisar na ki jylla bad ki Union Territory ha kylleng ka ri, ban iamir jingmut shaphang ka jingpynkhreh kam ha ka kam shna jain jong ka India ha ki por ban wan.

Ia kane ka jingialang la pynlong da ka Tnad Textiles jong ka Sorkar India hapoh ka phang pdeng “India’s Textiles: Weaving Growth, Heritage & Innovation”. Kane ka jingïalang ka thmu ban pynkhlain ïa ka jingïatreilang jong ka sorkar pdeng bad ki Sorkar jylla ban kyntiew ïa ki sienjam ïatreilang hapdeng ka Sorkar Pdeng bad ki Jylla ban kyntiew ïa ka India kum ka jaka pdeng ha kylleng ka pyrthei na ka bynta ki kam shna jain, bad ki technical textiles. Ha ka jingialang plie la iadonlang u Myntri Sorkar Pdeng ba dei peit ia ka Tnad Textiles u Giriraj Singh, u Myntri Rangbah ka jylla Madhya Pradesh u Dr. Mohan Yadav, Myntri Khynnah ka Tnad Textiles, u Pabitra Margherita lem bad kiwei de ki kynrem ki lyndan.

Haba ai jngkren ha ka jingialang plie, u Myntri Sorkar Pdeng ba dei peit ia ka Tnad Textiles u Giriraj Singh u la ong ba ka sorkar pdeng ka trei ha ka rukom kaba thikna bad kaba ryntih ban pyniadei ia ka jingpynmih, ka jingshalan shabar ri, bad ka jingpynneh pynsah ha ka kam shna jain. U la ong ba ka National Textiles Ministers’ Conference ka thmu ban pynshlur ia ka jingpyrkhat, ka jingsaindur thymmai, bad ka jingiasam jingmut ban iarap ban tei ia ka jingpynkhreh kam kaba khlain ban pynkhlain ia ka kam shna jain jong ka India. U Myntri Sorkar Pdeng u la kyntu ia ki Myntri ka tnad Textiles jong ki jylla bad ki UT bapher bapher ban thaw ia ki polisi kiba iahap bad ki nongbei tyngka bad u la ban jur ia ka jingdonkam ban khring shuh shuh ia ki nongbei tyngka ha ka kam ba iadei bad ki jain ha ka jylla. U la pynpaw ka jingkyrmen ba ki jingïamir jingmut ba ar sngi ha kane ka jingïalang kan ïarap ban prat lynti shakhmat. Haba kren shaphang ka thain shatei lammihngi, u Giriraj Singh u la ong ba u Myntri Rangbahduh u la buh hakhmat eh ia ka jingkiew bad roi ka par jong ki thain bad ka Sorkar ka trei shitom ban pynkhlain ia ki jingdon jingem ba kongsan bad ban pynsted ia ka roi ka par baroh ha ka thain shatei lammihngi.

Haba ai jingkren ha ka jingialang, u Dr. Mohan Yadav, Myntri Rangbah ka jylla Madhya Pradesh, u la ong ba ka kam shna jain ha India ka sakhi ia ka jingkiew stet bad ba ka jingtbit ha ka kam shna jain jong ka ri ka dei hok ban ioh kham bun ki lad ban rung sha ki iew ki hat jong ka pyrthei. U la bynrap ba ka National Textiles Ministers’ Conference kan ai ka jingpynkhreh kam kaba bniah na ka bynta ban wanrah ia ki kam ha ki por ban wan ban pynsted ia ka jingkiew jong ka kam shna jain.

Haba ai jingkren ha kane ka jingïalang, u Myntri Khynnah ka tnad Textiles, u Pabitra Margherita u la ong ba ka long ka khyllipmat jong ka jingsngew sarong ba ia ka National Textiles Ministers’ Conference la pynlong ha nongbah Guwahati, kaba la wanrah lang ïa ka Sorkar Pdeng bad ki Jylla ban ïatreilang ban wanrah ïa ka jingpynkhreh kam na ka bynta ka kam shna jaiñ. U la bynrap ruh ba lyngba ka jingiakren bad ka jingiatreilang hapdeng ki nongmihkhmat jong ka Sorkar Pdeng bad ki Sorkar Jylla, kane ka jingialang kan iarap ia ka kam shna jain jong ka India ban pyniar ia ka jingdon jong ka ha ka iew kylleng ka pyrthei. U Margherita u la pynskhem shuh shuh ba hapoh ka jingïalam jong u Myntri Rangbahduh ka ri u Narendra Modi, ka India ka la buh ïa ka thong kaba khraw ban tei ïa ka ïoh ka kot kaba USD 350 billion ha ka kam ba iadei bad ki jain. Haba ïadei bad ka Handloom Census 2019–20, u Margherita u la ban jur ba ka thaiñ Shatei Lammihngi ka dei ka jaka kaba pynmih bun tam ha ka ri ia jain ba shna da ka kti, kaba noh synñiang kumba 52 percent na ka jingmih baroh jong ki jingthain jain.

Ka Secretary, Textiles, ka Neelam Shami Rao ka la ong ba ka kam shna jain ha ka ri ka dang iai bteng ban bat ia ka jaka kaba kongsan ha ka imlang sahlang bad ka ioh ka kot jong ka ri bad jan 500 tylli ki district ha kylleng ka ri ki shalan ia kawei ne bun ki jait jain sha ka iew kylleng ka pyrthei. Haba ai jingkren ha ka jingialang plie u Additional Secretary ka Tnad Textiles, u Rohit Kansal u la ong ba ka India ka dei kawei na ki ri kaba khlain bha ha ka kam pynmih jain ha ka pyrthei, bad kane ka kam ka nang kiew stet, bad ka Sorkar Pdeng ka iatreilang bad ki Sorkar Jylla ban kyntiew ia ka jingkiew jong ka kam shna jain.

Ha ka jingïalang plie paidbah la don ruh ka jingplie ïa ka Exhibition and Pavilion, kaba pyni ïa ka bor jong ka India ha ka kam shna jain, ka jingsaindur thymmai, bad ka pateng kaba riewspah. La Pyllait ruh ia ka kaiphod; India's Textile Atlas: State Compendium 2025 mynta ka sngi.

Ha kane ka sngi, la pynlong ïa ki jingïalang ba bun kiba pynleit jingmut ha ki jingdon jingem, ki jingbei tyngka ia ki tiar ba donkam bad ki ksai kiba kynthup ïa u cotton, silk, u sainalia, u sai wul, ki Technical Textiles bad ki ksai ba thymmai.

Ki Myntri bad ki ophisar sorkar na ki Jylla & ki UT bapher bapher ki la ïasam ïa ki rukom treikam kiba bha tam, ki lad ban bei tyngka, ki jingeh bad ki jingai jingmut halor ki polisi ban pynkhlain shuh shuh ïa kane ka kam.

Kane ka jingialang kan dang bteng lashai ka sngi ha kaba yn sa ïatai sani bha halor ki phang bapher bapher kiba kynthup ïa ka jingshalan mar shabar ri, ka jingpynpaw nam, ki jingthain jain bad ki mar ba shna da ki kti.

******