مرکزی وزیر داخلہ اور امدادِ باہمی کے وزیر جناب امت شاہ نے آج آسام کے گوہاٹی میں جیوتی بشنو انٹرنیشنل آرٹ سینٹر کا افتتاح کیا۔ اس موقع پر انہوں نے نئے تعمیر شدہ پولیس کمشنر آفس کی عمارت، انٹیگریٹڈ کمانڈ اینڈ کنٹرول سینٹر اور تین نئے فوجداری قوانین پر مبنی ریاستی سطح کی ایک نمائش کا بھی افتتاح کیا۔ اس تقریب میں آسام کے وزیر اعلیٰ ڈاکٹر ہمنتا بسوا شرما، مرکزی وزیر جناب سربانند سونووال اور دیگر معزز شخصیات موجود تھے۔

اپنے خطاب میں مرکزی وزیر داخلہ اور امدادِ باہمی کے وزیر جناب امت شاہ نے کہا کہ آج ایک ہی دن میں آسام میں ترقی، شناخت، ثقافت اور سلامتی کے تمام پہلوؤں کا احاطہ کرنے والے متعدد پروگرام منعقد کیے گئے ہیں۔ انہوں نے بتایا کہ 111 کروڑ روپے کی لاگت سے تعمیر کیے گئے نئے پولیس کمشنر آفس کا افتتاح آج کیا گیا ہے، جو نہ صرف جدید طرزِ تعمیر کا حامل ہے بلکہ جدید سہولیات سے بھی لیس ہے۔ انہوں نے مزید کہا کہ 178 کروڑ روپے کی لاگت سے تعمیر کیا گیا انٹیگریٹڈ کمانڈ اینڈ کنٹرول سینٹر بھی آج افتتاح کے بعد عوام کے لیے وقف کر دیا گیا ہے، جس کا مقصد اسمارٹ پولیسنگ کے تصور کو عملی شکل دینا ہے۔

جناب شاہ نے کہا کہ تین نئے فوجداری قوانین کو بھی ایک نمائش کے ذریعے پیش کیا گیا ہے، جو آنے والے دنوں میں تین سال کے اندر آسام میں سیشن عدالت سے لے کر سپریم کورٹ تک بروقت انصاف کی فراہمی کو یقینی بنائیں گے۔

مرکزی وزیر داخلہ نے کہا کہ آج صبح ناگاؤں میں سریمنتا شنکر دیو کی ایک عظیم الشان یادگار کا بھی افتتاح کیا گیا۔ انہوں نے بتایا کہ 162 ایکڑ اراضی سے دراندازوں کی تجاوزات ہٹا کر سریمنتا شنکر دیو کی یادگار کی تعمیر آسام کی ثقافت کے احیاء کی ایک اہم علامت ہے۔ انہوں نے مزید کہا کہ آج شری جیوتی بشنو آڈیٹوریم کا بھی افتتاح کیا گیا ہے۔ تقریباً 291 کروڑ روپے کی لاگت سے تعمیر کیا گیا یہ آڈیٹوریم، جس میں 5,000 افراد کے بیٹھنے کی گنجائش ہے، آسام کی ترقی اور ثقافتی عروج کی عکاسی کرتا ہے۔ یہ آڈیٹوریم دو عظیم ادیبوں اور فنکاروں جیوتی پرساد اگروالا اور بشنو پرساد رابھا کی یاد میں تعمیر کیا گیا ہے۔

جناب امت شاہ نے کہا کہ شری جیوتی پرساد اگروالا اور آرٹ گرو شری بشنو پرساد رابھا کے بارے میں جتنا بھی کہا جائے، وہ کم ہے۔ انہوں نے بتایا کہ اگروالا نے آسام کی پہلی فلم "جوئموتی" بنا کر آسامی سنیما کی بنیاد رکھی۔ انہوں نے موسیقی، تھیٹر اور ادب کو حب الوطنی کے جذبے سے جوڑ کر آسام کے عوام میں آزادی کی خواہش کو بیدار کیا۔ انہوں نے کہا کہ اگروالا نے آسام کے لوگوں کے دلوں میں خودداری اور حب الوطنی کے جذبات کو جگایا، جنہیں بعد میں گوپی ناتھ بوردولوی نے ایک مضبوط تحریک کی شکل دی، جس کے نتیجے میں پہلے وزیر اعظم کو یہ یقینی بنانا پڑا کہ آسام ہندوستان کا اٹوٹ حصہ رہے۔

مرکزی وزیر داخلہ نے کہا کہ آرٹ گرو بشنو پرساد رابھا نے فن کے ذریعے آزادی کے انقلاب کو تقویت بخشی۔ انہوں نے کہا کہ رابھا نے اپنی فطری سادگی اور ادبی اظہار کے ذریعے عام عوام—مزدوروں، کسانوں اور قبائلی برادریوں—کو تحریک آزادی سے جوڑا۔ انہوں نے مزید کہا کہ رابھا نے غیر ملکی بدانتظامی اور اس کے نتیجے میں پیدا ہونے والی غربت، عدم مساوات اور سماجی ناانصافی کے خلاف عوام میں بیداری پیدا کی۔

جناب امت شاہ نے کہا کہ آسام ایک طویل اور خوفناک خواب جیسے دور سے نکل کر آگے بڑھا ہے۔ انہوں نے یاد دلایا کہ ایک دہائی قبل آسام میں بم دھماکے، ناکہ بندیاں، فائرنگ، پرتشدد گروہ اور مسلسل مظاہرے عام تھے۔ انہوں نے کہا کہ گزشتہ 11 برسوں میں وزیر اعظم جناب نریندر مودی کی قیادت میں آسام ترقی کی راہ پر گامزن ہوا ہے اور اب ملک کے دیگر حصوں کے ساتھ ہم قدم ہو کر آگے بڑھ رہا ہے۔

انہوں نے بتایا کہ دراندازوں نے پورے آسام میں زمینوں پر تجاوزات قائم کی تھیں، لیکن گزشتہ 10 برسوں میں، خصوصاً ڈاکٹر ہمنتا بسوا شرما کے دورِ حکومت کے آخری پانچ برسوں کے دوران، 1 لاکھ 29 ہزار بیگھا اراضی کو تجاوزات سے آزاد کرایا گیا ہے۔

مرکزی وزیر داخلہ اور امدادِ باہمی کے وزیر نے کہا کہ جو لوگ آج آسام کے فن، ادب اور ثقافت کی بات کرتے ہیں، وہی لوگ تھے جنہوں نے 1983 میں دراندازوں کو یہاں آباد کرنے کے لیے قانون بنایا تھا۔ انہوں نے کہا کہ دراندازوں کی آمد کے بعد آسام کا فن، ثقافت، موسیقی اور زبان محفوظ نہیں رہ سکتی۔ انہوں نے مزید کہا کہ ووٹ بینک کی سیاست کے لیے اپوزیشن نے آسام کے وجود پر سوالیہ نشان لگا دیا تھا۔

جناب امت شاہ نے کہا کہ ان کی جماعت گزشتہ 10 برسوں سے آسام میں اقتدار میں ہے اور آئندہ پانچ برسوں میں آسام سے ہر قسم کی دراندازی کو مکمل طور پر ختم کر دیا جائے گا۔ انہوں نے کہا کہ یہی واحد راستہ ہے جس سے آسام کی ثقافت، زبان اور موسیقی کا تحفظ یقینی بنایا جا سکتا ہے۔

مرکزی وزیر داخلہ اور امدادِ باہمی کے وزیر نے کہا کہ مودی حکومت نے ریاست کے تمام پرتشدد گروہوں کے ساتھ معاہدے کرکے آسام میں امن قائم کیا ہے۔ انہوں نے بتایا کہ ان معاہدوں کے نتیجے میں 10 ہزار سے زائد نوجوانوں نے ہتھیار ڈال کر قومی دھارے میں شمولیت اختیار کی ہے اور آسام اب تیزی سے ترقی کی راہ پر گامزن ہو رہا ہے۔

انہوں نے کہا کہ آج آسام میں لاکھوں اور کروڑوں روپے کی صنعتیں قائم کی جا رہی ہیں، بنیادی ڈھانچے کو مضبوط کیا جا رہا ہے، کازی رنگا ملک کے اہم ترین سیاحتی مقامات میں شامل ہو چکا ہے، اور لچیت بورفوکن کے بلند قامت مجسمے کے ذریعے ان کی عظیم میراث کو نوجوان نسل کے دلوں میں راسخ کرنے کی کوششیں کی گئی ہیں۔

مرکزی وزیر داخلہ نے مزید کہا کہ ایک طویل عرصے کے بعد آسام تحریک کے شہداء کے لیے ایک باوقار اور مناسب یادگار بھی تعمیر کی گئی ہے، جو ان کے لیے انصاف کی ایک علامتی شکل ہے۔

***

UR-4017

(ش ح۔اس ک  )