કેન્દ્રીય ગૃહમંત્રી અને સહકારિતા મંત્રી શ્રી અમિત શાહે આજે પંચકુલામાં હરિયાણા પોલીસના પાસિંગ-આઉટ પરેડ સમારોહને સંબોધિત કર્યો હતો.આ પ્રસંગે હરિયાણાના મુખ્યમંત્રી શ્રી નાયબ સિંહ સૈની, મુખ્ય સચિવ, પોલીસ મહાનિર્દેશક અને અન્ય અનેક મહાનુભાવો ઉપસ્થિત રહ્યા હતા.

કેન્દ્રીય ગૃહમંત્રીએ જણાવ્યું હતું કે હરિયાણા અને તેની બાજુમાં આવેલા દેશની રાજધાનીની સુરક્ષાની મહત્વપૂર્ણ જવાબદારી હવે વિશ્વાસ, કાર્યક્ષમતા અને ટેકનોલોજીથી પ્રશિક્ષિત યુવા પોલીસ કર્મચારીઓ પર છે. તેમણે કહ્યું કે આજના 5,161 જવાનોની 93મી બેચમાં મહિલાઓએ મુખ્ય સ્થાન મેળવ્યું છે. શ્રી શાહે કહ્યું કે જ્યારે દેશની યુવાન દીકરીઓ સંરક્ષણની પહેલી હરોળમાં ઉભી રહે છે, ત્યારે રાષ્ટ્રની સુરક્ષામાં વિશ્વાસ અનેકગણો વધી જાય છે. ગૃહમંત્રીએ કહ્યું કે આ પહેલી બેચ છે જેમાં 85 ટકા યુવાનો ગ્રેજ્યુએટ અથવા ડબલ ગ્રેજ્યુએટ છે, જે આજે હરિયાણા પોલીસમાં જોડાઈ રહ્યા છે. તેમણે ઉમેર્યું કે આ પહેલી બેચ છે જેની સરેરાશ ઉંમર સૌથી ઓછી- 26 વર્ષ છે.

શ્રી અમિત શાહે કહ્યું કે પ્રધાનમંત્રી શ્રી નરેન્દ્ર મોદીના નેતૃત્વમાં, આ એવો સમય છે જ્યારે બ્રિટિશરો દ્વારા બનાવવામાં આવેલા જૂના કાયદાઓને બદલવામાં આવી રહ્યા છે, અને નવી ફોજદારી ન્યાય પ્રણાલી - ભારતીય ન્યાય સંહિતા , ભારતીય નાગરિક સુરક્ષા સંહિતા અને ભારતીય સાક્ષા અધિનિયમ - દેશના લોકોને ન્યાય પહોંચાડવાનું કાર્ય ચાલી રહ્યું છે. તેમણે કહ્યું કે હરિયાણા પોલીસની આ પહેલી બેચ છે જેણે ત્રણ નવા ફોજદારી કાયદાઓમાં તાલીમ મેળવી છે અને હવે તે તેમના હેઠળ ફરજો સંભાળી રહી છે. શ્રી શાહે કહ્યું કે અંબાલામાં પોલીસ એકેડમીની સ્થાપના 1966માં થઈ હતી. ત્યારથી આજ સુધી, પાસ આઉટ થયેલા તમામ બેચે અંગ્રેજો દ્વારા બનાવેલા કાયદાઓનો અભ્યાસ કર્યો છે અને શીખ્યા છે. આ પહેલી બેચ છે જેને ભારતની સંસદ દ્વારા ઘડવામાં આવેલા નવા કાયદાઓમાં તાલીમ આપવામાં આવી છે અને હવે તેઓ લોકોની સેવા કરવા માટે આગળ વધશે. તેમણે ઉમેર્યું કે 2023માં, હરિયાણા પોલીસને ઉત્કૃષ્ટ કામગીરીની સતત અને પ્રશંસનીય સફરને માન્યતા આપવા માટે રાષ્ટ્રપતિ દ્વારા રાષ્ટ્રપતિ કલર એનાયત કરવામાં આવ્યો હતો. આજે, તાલીમાર્થી જવાનોએ એ જ પરંપરાને આગળ ધપાવવાની છે.

કેન્દ્રીય ગૃહમંત્રીએ જણાવ્યું હતું કે હરિયાણાની રચના સમયે માત્ર એક પોલીસ રેન્જ અને 6 જિલ્લાઓ હતા.આજે, હરિયાણા પોલીસ એક મોટું વટવૃક્ષ બની ગઈ છે, જેમાં 5 રેન્જ, 19 જિલ્લાઓ, રેલ્વે પોલીસ, સાયબર ક્રાઈમ યુનિટ્સ અને પોલીસ દળની વિવિધ શાખાઓ અને પાંખોનો સમાવેશ થાય છે.તેમણે કહ્યું કે હરિયાણા પોલીસની ગણતરી દેશના અગ્રણી પોલીસ દળોમાં થાય છે. 77,૦૦૦ ની મંજૂર સંખ્યા સાથે હરિયાણા પોલીસ કાર્યબળ હંમેશા રાજ્યના લોકોની સેવામાં ઉપલબ્ધ રહે છે. તેમણે કહ્યું કે વિશ્વાસ, કાર્યક્ષમતા અને ટેકનોલોજીથી સજ્જ હરિયાણા પોલીસ ફરજને સર્વસ્વ ગણીને આગળ વધી રહી છે .

શ્રી અમિત શાહે કહ્યું કે દસ વર્ષ પહેલાં દેશ કાયદો અને વ્યવસ્થાના સંદર્ભમાં ત્રણ મોટા પડકારોનો સામનો કરી રહ્યો હતો - ડાબેરી ઉગ્રવાદ, જમ્મુ અને કાશ્મીરમાં આતંકવાદ અને ઉત્તર-પૂર્વમાં સક્રિય સશસ્ત્ર જૂથો. જોકે, મોદી સરકારે આ ત્રણેય પ્રદેશોમાં શાંતિ સ્થાપિત કરી છે. તેમ છતાં, આંતરિક સુરક્ષાની જવાબદારી આજે પણ એટલી જ મહત્વપૂર્ણ છે. કેન્દ્રીય ગૃહમંત્રીએ કહ્યું કે જનતાની સેવામાં નવી ટેકનોલોજીનો અમલ કરવો એ આ બેચ માટે સૌથી મોટો પડકાર હશે. તેમણે ઉમેર્યું કે નવા કાયદાઓમાં ફોરેન્સિક વિજ્ઞાનની ભૂમિકા સ્પષ્ટ રીતે વ્યાખ્યાયિત કરવામાં આવી છે. સાત વર્ષ કે તેથી વધુ સજા પામેલા કોઈપણ ગુના માટે, ગુનાના સ્થળે ફોરેન્સિક મુલાકાત ફરજિયાત બનાવવામાં આવી છે. આ જોગવાઈનો એકમાત્ર ઉદ્દેશ્ય એ સુનિશ્ચિત કરવાનો છે કે દોષિતોને યોગ્ય સજા મળે. તેમણે કહ્યું કે મોદી સરકાર ટેકનોલોજી આધારિત પુરાવા દ્વારા સચોટ ન્યાય સુનિશ્ચિત કરી રહી છે.

કેન્દ્રીય ગૃહમંત્રીએ જણાવ્યું હતું કે સાપ્તાહિક ડેટાની સમીક્ષા દર્શાવે છે કે હરિયાણા પોલીસ ત્રણ નવા કાયદાઓ અને સુધારાઓના અમલીકરણમાં દેશભરમાં પ્રથમ સ્થાન મેળવી રહી છે. તાલીમાર્થી પોલીસ કર્મચારીઓએ આ પરંપરાને આગળ ધપાવવી જોઈએ. શ્રી શાહે કહ્યું કે આગામી દિવસોમાં, હરિયાણા દેશનું એક અગ્રણી રાજ્ય બનશે, જોકે તેમાં કેટલાક પડકારો પણ છે. તેમણે કહ્યું કે આગામી દિવસોમાં, હરિયાણા પોલીસે ડ્રગ્સની હેરફેર, માનવ તસ્કરી, સાયબર ક્રાઇમ અને ગેરવસૂલી સાથે સંકળાયેલા સંગઠિત ગુના નેટવર્ક જેવા મોટા પડકારોનો અસરકારક રીતે સામનો કરવો પડશે. તેમણે ઉમેર્યું કે, આ ચારેય પડકારોનો સામનો કરવા માટે, પ્રધાનમંત્રી શ્રી નરેન્દ્ર મોદીના નેતૃત્વ હેઠળ ભારત સરકારના ગૃહ મંત્રાલયે વ્યાપક તૈયારીઓ કરી છે. અમે રાજ્યો સાથે ખડકની જેમ ઉભા છીએ.

શ્રી અમિત શાહે કહ્યું કે હરિયાણામાં સૌથી મોટી ફરિયાદ એ હતી કે નોકરી મેળવવા માટે પૈસા ચૂકવવા પડતા હતા અને ભલામણ ચિટ્ઠી બનાવવી પડતી હતી. તેમણે કહ્યું કે પહેલા ફક્ત ચોક્કસ જાતિના અને લાંચ આપવાની ક્ષમતા ધરાવતા લોકોને જ નોકરી મળતી હતી. તેમણે ઉમેર્યું કે, નાયબ સિંહ સૈનીજીએ હરિયાણાને એક એવું રાજ્ય બનાવીને તેના લોકોની ખૂબ જ મહત્વપૂર્ણ સેવા કરી છે જ્યાં પૈસા કે ભલામણ ચિઠ્ઠી વિના નોકરીઓ આપવામાં આવે છે. આજે, લગભગ 5,000 યુવાનો રાજ્યની રક્ષા કરવા અને તેમની યોગ્યતાના આધારે તેની સેવા કરવા તૈયાર છે.

SM/IJ/GP/JT

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com