ભારતના ઉપરાષ્ટ્રપતિ શ્રી સી. પી. રાધાકૃષ્ણને આજે ઉપરાષ્ટ્રપતિ એન્ક્લેવ ખાતે સંસદ સભ્ય પ્રો. (ડૉ.) સિકંદર કુમાર દ્વારા લિખિત પુસ્તક “ઇકોનોમિક એમ્પાવરમેન્ટ ઓફ ભારત ઇન ધ મોદી એરા” (મોદી યુગમાં ભારતનું આર્થિક સશક્તિકરણ)નું વિમોચન કર્યું હતું.

આ પ્રસંગે સભાને સંબોધતા ઉપરાષ્ટ્રપતિએ કહ્યું કે આ પ્રકાશન પ્રધાનમંત્રી શ્રી નરેન્દ્ર મોદીના વિઝન, નેતૃત્વ અને પરિવર્તનકારી આર્થિક નીતિઓનો એક શક્તિશાળી પુરાવો છે.

ઉપરાષ્ટ્રપતિએ અવલોકન કર્યું કે છેલ્લા એક દાયકામાં ભારતે અદભૂત આર્થિક પરિવર્તન અને નવેસરથી રાષ્ટ્રીય આત્મવિશ્વાસ જોયો છે. તેમણે કહ્યું કે આજે ભારત વિશ્વની ચોથી સૌથી મોટી અર્થવ્યવસ્થા તરીકે ઉભરી આવ્યું છે અને તે સૌથી ઝડપથી વિકસતી મુખ્ય અર્થવ્યવસ્થા પણ છે.

ઉપરાષ્ટ્રપતિએ નોંધ્યું કે આ પુસ્તક નાદારીના કાયદા (insolvency laws), ડિજિટલ ગવર્નન્સ અને પારદર્શક બેંકિંગ સિસ્ટમ જેવા મુખ્ય માળખાગત સુધારાઓ પર પ્રકાશ પાડે છે. તેમણે ભારપૂર્વક જણાવ્યું હતું કે આ સુધારાઓ માત્ર નીતિ વિષયક પહેલો નહોતી પરંતુ દાયકાઓ જૂની બિનકાર્યક્ષમતા અને ભ્રષ્ટાચારને નાબૂદ કરવાના ઉદ્દેશ્યથી લેવાયેલા સાહસિક પગલાં હતા. તેમણે કહ્યું કે પ્રધાનમંત્રીનું "મિનિમમ ગવર્નમેન્ટ, મેક્સિમમ ગવર્નન્સ" (લઘુત્તમ સરકાર, મહત્તમ શાસન) નું વિઝન કાર્યક્ષમતા અને શિસ્તના કાર્યકારી મોડેલમાં પરિવર્તિત થયું છે.

ઉપરાષ્ટ્રપતિએ કહ્યું કે પ્રધાનમંત્રી નરેન્દ્ર મોદી 100 ટકા લાભો લાભાર્થીઓ સુધી પહોંચે તે સુનિશ્ચિત કરવા પર ખૂબ ભાર મૂકે છે. તેમણે નોંધ્યું કે JAM ટ્રિનિટી (જન ધન-આધાર-મોબાઇલ)એ ડાયરેક્ટ બેનિફિટ ટ્રાન્સફરને સક્ષમ બનાવ્યું છે, ગળતર ઘટાડ્યું છે અને શાસનમાં પારદર્શિતા અને કાર્યક્ષમતા વધારી છે. તેમણે કહ્યું કે અત્યાર સુધીમાં ₹47 લાખ કરોડથી વધુની રકમ સીધી લાભાર્થીઓના બેંક ખાતામાં ટ્રાન્સફર કરવામાં આવી છે.

ઉપરાષ્ટ્રપતિએ ગુડ્સ એન્ડ સર્વિસીસ ટેક્સ (GST) ને આ યુગના અન્ય એક મહત્વપૂર્ણ સીમાચિહ્ન તરીકે વર્ણવ્યો હતો. તેમણે કહ્યું કે GST એ ટેક્સ સ્ટ્રક્ચરને સરળ બનાવીને, અનુપાલન (compliance) વધારીને અને સહકારી સંઘવાદને મજબૂત કરીને ભારતને એક સંકલિત રાષ્ટ્રીય બજારમાં ફેરવી દીધું છે. તેમણે કહ્યું કે આંતરરાજ્ય ચેકપોસ્ટો હટાવવાથી માલસામાનની અવરજવર સુવ્યવસ્થિત થઈ છે અને લાખો માનવ-કલાકો તથા ઈંધણની બચત થઈ છે. તેમણે નોંધ્યું કે GST ને સ્વતંત્ર ભારતમાં હાથ ધરવામાં આવેલા સૌથી મોટા સુધારાઓમાંના એક તરીકે વ્યાપકપણે સ્વીકારવામાં આવે છે.

ઉપરાષ્ટ્રપતિએ જણાવ્યું હતું કે ભારતનું આર્થિક સશક્તિકરણ સર્વસમાવેશકતા પરના મજબૂત ધ્યાન દ્વારા સંચાલિત છે. ડિજિટલ ઇન્ડિયા, મેક ઇન્ડિયા, સ્ટાર્ટઅપ ઇન્ડિયા અને UPI ના ઝડપી વિસ્તરણ જેવી પહેલોએ નાગરિકો, ઉદ્યોગસાહસિકો અને નાના વ્યવસાયોને સશક્ત બનાવ્યા છે.

તેમણે ઉમેર્યું કે પ્રધાનમંત્રીનું 'આત્મનિર્ભર ભારત'નું વિઝન પરાવલંબનમાંથી સ્વનિર્ભરતા તરફનો નિર્ણાયક બદલાવ દર્શાવે છે, જ્યારે ભારતને વૈશ્વિક સપ્લાય ચેઇનમાં એક વિશ્વસનીય ભાગીદાર તરીકે સ્થાપિત કરે છે. આ સફર, તેમણે કહ્યું કે, 'વિકસિત ભારત'ની વ્યાપક આકાંક્ષા સાથે સુસંગત છે, જ્યાં આર્થિક વૃદ્ધિ સામાજિક ન્યાય, પર્યાવરણીય ટકાઉપણું અને તકનીકી ઉન્નતિ સાથે સંતુલિત છે.

પ્રધાનમંત્રી નરેન્દ્ર મોદીના નેતૃત્વમાં ભારત પોલિસી પેરાલિસિસ (નીતિ વિષયક મડાગાંઠ) થી હેતુપૂર્ણ શાસન તરફ, ગરીબીની માનસિકતાથી સમૃદ્ધિના મિશન તરફ અને પરાવલંબનથી સ્વનિર્ભરતા તરફ આગળ વધ્યું છે. ઉપરાષ્ટ્રપતિએ નાગરિકોને 'વિકસિત ભારત@2047' તરફ આગળ વધતા એક નવા ભારત - જે આત્મવિશ્વાસપૂર્ણ, સક્ષમ અને કરુણાપૂર્ણ છે - તેને ઉજવવા આહવાન કર્યું હતું.

SM/BS/GP/JD