U Myntri Sorkar Pdeng ba dei khmih ia ka Tnad Jal Shakti, u C. R. Patil mynta ka sngi u la plie paidbah ia ka ‘Jal Shakti Hackathon–2025’ & Bharat-WIN Portal ha Shram Shakti Bhawan, New Delhi. Kane ka sienjam ka ïahap bad ka jingthmu jong u Myntri Rangbahduh ka ri u Narendra Modi bad ka jingban jur jong u ïa ka ‘Water Vision @2047’ ban pynkhlain ïa ki lad pynbeit lyngba ka saian bad teknoloji ha ki kam kiba iadei bad ka um jong ka ri India.

Haba ai jingkren ha ka jingïalang, u C. R. Patil u la batai ïa ka Jal Shakti Hackathon–2025 kum ka jingïakhih jong ka ri ym kum ka jingïakhun kaba malu mala, kaba la saindur ban pyndonkam ïa ka sap ba ïatylli jong ka ri ban tei ïa ka lawei jong ka um kaba shngain, kaba kynthup ia baroh bad kaba la pynïaid da ka teknoloji na ka bynta ka ri India .

Ka bha ka miat jong ki Paidbah na ka bynta ka jingïashim bynta ha kylleng ka Ri

Ka Hackathon ka thmu ban kyntiew ia ka jingsaindur thymmai ha ka kam ba iadei bad ka um bad ban pynlong ia ka kum ka jingbha paidbah kaba shisha, kaba lah ban ioh da baroh kiba don bynta. Ka shim ia ka rukom treikam jong ka Sorkar Baroh kawei bad ka Imlang Sahlang Baroh kawei (Jan Bhagidari), kaba plie lad ia ka jingiashim bynta kaba iar na ki nongshong shnong, ki nongwad bniah, ki karkhana, bad ki nongsaindur thymmai.

La pynlong ha ka https://bharatwin.mowr.gov.in, ka portal ka long shi bynta jong ka rynsan jong ka ri BHARAT–WIN (Water Innovation Network) bad ka ialeh ban kyntiew ia ki lad ki lynti kiba lah ban treikam, kiba lah ban pynheh bad kiba la pynkhreh na ka bynta ki jingeh ha kaba iadei bad ka um ha ki jaka nongkyndong. Kine ki kynthup ia ka jingpynneh pynsah ia ka um ha ki jaka rep, ka jinglong ka um ha ki jaka nongkyndong, ka jingpeit bniah kaba kham bha, ka jingkhyllie im biang ia ki rukom pyndonkam um tynrai, ka jingiada na ka jingshlei um bad ka jingtyrkhong.

Ka sienjam ka pyniar ia ka jingwad bniah ha ka kam ba iadei bad ka um bad ka bym sahkut ha tang katto katne ki jaka treikam, kaba pynthikna ia ka jingiashim bynta kaba iar na kito kiba don bynta ha kane ka kam kynthup ia ki Startup, ki MSME, ki Karkhana, ki Scientist, ki jaka pule, ki Laboratory, ki Incubator, ki Samla Nongsaindur, ki Samla ha ki jaka Nongkyndong bad ki longkmie, ki kompeni shimet, bad ki jaka treikam kylleng ka pyrthei.

Ki Bynta ba Kongsan

• Ka jingpynlong ia ki hackathon man ka por bad ka jingkhot na ka bynta ki jingtyrwa halor ki jingthmu ba kongsan jong ka ri kiba iadei bad ka um.
• Ka jingpynthikna ia ka jingai jingmut kaba shai, ka jingbishar bniah, bad ka jingbuddien ia ki jingmut.
• Ka ailad ia ka jingiashim bynta na ki Startup, ki MSME, ki jaka pule, ki karkhana, bad ki nongsaindur thymmai na ka thain shatei lammihngi bad ki karkhana ba ialam da ki kynthei.
• Ka Jingkyrshan ïa ka jingsaindur thymmai ba ïatreilang lyngba ka Jan Bhagidari.

Hapoh ka skhim halor ka ‘‘Research and Development Programme in Water Sector and Implementation of National Water Mission’, ka DoWR, RD&GR, MoJS, kin ai jingiarap pisa ha ka dur jong ki grant-in-aid na ka bynta ki jingsaindur thymmai ba la jied.

Ki nongjop ha ka Hackathon kin ioh ia ka jingiarap pisa kaba T.1 lak na ka bynta ban shna ia ka Proof-of-Concept (PoC). Ki bynta ba kongsan ki kynthup, ka jingiada ia ki tyllong um, ka jingpynkhuid ia ka um jakhlia, ka jingpyndonkam hok ia ka um, ka ioh ka kot kaba iasoh lang, ka bor ban ialeh pyrshah ia ka jingkylla ka suinbneng, ka IoT & ki smart water grid, ka rep ka riang kaba thikna, ka jinglum ia ka um slap, ka jingpyniaid ia ki wah bad ki jingshlei um, bad ka jingpynwandur ia ka kam um bad kiwei kiwei.

Ia ka National Institute of Hydrology (NIH), Roorkee, la jied kum ka Project Implementation Agency (PIA) ban bishar bniah ia ki jingtyrwa ba la aiti bad ban pynsuk ia ka jingmynjur jong u Secretary, DoWR, RD&GR.

***