اقلیتی امور کی وزارت نے آج اجمیر میں ایک جائزہ میٹنگ کی جس میں 17 دسمبر 2025 سے شروع ہونے والے درگاہ خواجہ صاحب کے 814 ویں عرس کی تیاریوں کا جائزہ لیا گیا ۔  جائزے میں عرس کے دوران متوقع طور پر درگاہ آنے والے زائرین  کی حفاظت ، سلامتی اور سہولت کے لیے جامع انتظامات کو یقینی بنانے پر توجہ مرکوز کی گئی ۔  وزارت کے عہدیداروں نے تقریب کے ہموار اور پرامن انعقاد کو یقینی بنانے کے لیے تمام متعلقہ ایجنسیوں کے درمیان قریبی تال میل کی ضرورت پر زور دیا ۔

ایک دیرینہ روایت کے طور پر ، وزیر اعظم جناب نریندر مودی ہر سال درگاہ خواجہ صاحب پر چادر بھیجتے ہیں ، جو ہندوستان کے بھرپور ثقافتی اور روحانی ورثے کے احترام کے جذبے کی عکاسی کرتا ہے ۔

میٹنگ کے دوران اہم انتظامات کا جائزہ لیا گیا ، جن میں اہم مقامات پر سی سی ٹی وی کیمرے نصب کئے جانے ، پینے کے پانی اور بیت الخلاء کی مناسب فراہمی ، پارکنگ کی سہولیات ، حفظان صحت اور صفائی ستھرائی کی دیکھ بھال ،بھیڑ بھاڑ کے موثر انتظام اور ڈی کے ایس کے علاقے سے آوارہ جانوروں کو ہٹانا شامل ہیں ۔  ضلعی انتظامیہ نے بتایا کہ تمام ضروری اقدامات کیے جا رہے ہیں اور متعلقہ محکموں کو مکمل طور پر تیار رہنے کی ہدایت دی گئی ہے ۔

زمینی سطح پر جائزے کے ایک حصے کے طور پر ، وزارت کے عہدیداروں نے اجمیر کے مضافات میں تقریبا 150 بیگھا اراضی پر تعمیر کی جانے والی آرام گاہ آشرے استھلی  (مسافر خانہ) کا بھی دورہ کیا تاکہ عرس کے دوران زائرین  کے قیام  اور سہولت کے لیے بنائے جانے والے مرکز  کا جائزہ لیا جا سکے ۔

وزارت نے ضلعی انتظامیہ کی طرف سے مشترکہ تیاریوں پر اطمینان کا اظہار کیا اور کسی بھی ابھرتے ہوئے مسائل کو فوری طور پر حل کرنے کے لیے عرس کی مدت کے دوران مسلسل نگرانی کی اہمیت پر زور دیا ۔ اس میٹنگ کی صدارت اقلیتی امور کی وزارت کے ڈائریکٹر جناب ایس پی سنگھ تیوتیا نے کی اور اس میں ضلعی انتظامیہ کے حکام اور درگاہ خواجہ صاحب (ڈی کے ایس) کے نمائندوں نے شرکت کی ۔

اقلیتی امور کی وزارت نے ریاستی اور ضلعی حکام کے ساتھ مل کر کام کرنے کے اپنے عزم کا اعادہ کیا تاکہ اس بات کو یقینی بنایا جا سکے کہ زائرین  814 ویں عرس کے دوران  محفوظ اورپرسکون  ماحول میں اپنی عقیدت کا اظہار  کر سکیں ۔

*****

ش ح-ا ع خ  ۔ر  ا

U-No- 3107