ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ସ୍ବତନ୍ତ୍ର ମତବିନିମୟ କାର୍ଯ୍ୟକ୍ରମ, ପରୀକ୍ଷା ପେ ଚର୍ଚ୍ଚା (ପିପିସି), ଏହାର ୯ମ ସଂସ୍କରଣ ସହିତ ଫେରିଛି। ନୂଆ ସଂସ୍କରଣ ଜାନୁଆରୀ ୨୦୨୬ରେ ଅନୁଷ୍ଠିତ ହେବ, ଯେଉଁଠାରେ ଭାରତ ଏବଂ ବିଦେଶର ଛାତ୍ରଛାତ୍ରୀ, ଅଭିଭାବକ ଏବଂ ଶିକ୍ଷକମାନେ ତାଙ୍କ ସହିତ ପରୀକ୍ଷା ଚାପ, ପରୀକ୍ଷାକୁ ଏକ ଉତ୍ସବ ଏବଂ ଜୀବନର ଏକ ଅବିଚ୍ଛେଦ୍ୟ ଅଂଶ ଭାବରେ କିପରି ବ୍ୟବହାର କରିବେ ସେ ବିଷୟରେ ଆଲୋଚନା କରିବେ। 
ଏହି କାର୍ଯ୍ୟକ୍ରମର ଅଂଶଗ୍ରହଣକାରୀମାନଙ୍କୁ ଚୟନ କରିବା ପାଇଁ, ଡିସେମ୍ବର ୧, ୨୦୨୫ରୁ ଜାନୁଆରୀ ୧୧, ୨୦୨୬ ପର୍ଯ୍ୟନ୍ତ ମାଇଗଭ୍ ପୋର୍ଟାଲରେ (https://innovateindia1.mygov.in/) ଏକ ଅନଲାଇନ୍ ଏମସିକ୍ୟୁ-ଆଧାରିତ ପ୍ରତିଯୋଗିତା ଆୟୋଜନ କରାଯାଉଛି। ଯେଉଁଥିରେ ଷଷ୍ଠରୁ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ଛାତ୍ରଛାତ୍ରୀ ତଥା ଶିକ୍ଷକ ଏବଂ ଅଭିଭାବକମାନେ ଅଂଶଗ୍ରହଣ କରିପାରିବେ। ଏହି କାର୍ଯ୍ୟକଳାପ ସମାପ୍ତ କରୁଥିବା ସମସ୍ତ ପଞ୍ଜିକୃତ ଅଂଶଗ୍ରହଣକାରୀମାନଙ୍କୁ ମାଇଗଭରୁ ଏକ ଅଂଶଗ୍ରହଣ ପ୍ରମାଣପତ୍ର ମଧ୍ୟ ମିଳିବ।
ପରୀକ୍ଷା ପେ ଚର୍ଚ୍ଚାର ଅଷ୍ଟମ ସଂସ୍କରଣ ୧୦ ଫେବୃଆରୀ, ୨୦୨୫ରେ ପ୍ରସାରିତ ହୋଇଥିଲା। ଏହି ଆଲୋଚନା ଏକ ନୂତନ ଏବଂ ଅଭିନବ ଢାଞ୍ଚାରେ ନୂଆଦିଲ୍ଲୀର ସୁନ୍ଦର ନର୍ସରୀରେ ଅନୁଷ୍ଠିତ ହୋଇଥିଲା, ଯେଉଁଥିରେ ସରକାରୀ ସ୍କୁଲ, କେନ୍ଦ୍ରୀୟ ବିଦ୍ୟାଳୟ, ସୈନିକ ସ୍କୁଲ, ଏକଲବ୍ୟ ମଡେଲ ଆବାସିକ ସ୍କୁଲ, ସିବିଏସଇ-ସମ୍ବନ୍ଧିତ ସ୍କୁଲ ଏବଂ ନବୋଦୟ ବିଦ୍ୟାଳୟ ସମେତ ପ୍ରତ୍ୟେକ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳର ୩୬ ଜଣ ଛାତ୍ରଛାତ୍ରୀ ସାମିଲ ହୋଇଥିଲେ। ପ୍ରେରଣା ଆଲୁମନି ଏବଂ କଳା ଉତ୍ସବ ଏବଂ ବୀର ଗାଥାର ବିଜେତାମାନେ ମଧ୍ୟ ଏଥିରେ ଅଂଶଗ୍ରହଣ କରିଥିଲେ। ଏହି ସଂସ୍କରଣରେ କ୍ରୀଡା ଏବଂ ଶୃଙ୍ଖଳା ଓ ମାନସିକ ସ୍ୱାସ୍ଥ୍ୟ ଠାରୁ ଆରମ୍ଭ କରି ପୁଷ୍ଟିସାର, ପ୍ରଯୁକ୍ତିବିଦ୍ୟା ଏବଂ ଆର୍ଥିକ, ତଥା ସୃଜନଶୀଳତା ଏବଂ ସକାରାତ୍ମକତା ପର୍ଯ୍ୟନ୍ତ ସାତଟି ଭିନ୍ନ ଏପିସୋଡ୍ ମଧ୍ୟ ଅନ୍ତର୍ଭୁକ୍ତ ହୋଇଥିଲା, ଯେଉଁଥିରେ ଜଣାଶୁଣା ବ୍ୟକ୍ତିତ୍ୱଙ୍କ ପ୍ରେରଣାଦାୟକ ପରାମର୍ଶ ମଧ୍ୟ ଅନ୍ତର୍ଭୁକ୍ତ ହୋଇଥିଲା।
୨୦୨୫ ମସିହାରେ, ପରୀକ୍ଷା ପେ ଚର୍ଚ୍ଚା ୨୪୫ରୁ ଅଧିକ ଦେଶର ଛାତ୍ରଛାତ୍ରୀ, ୧୫୩ଟି ଦେଶର ଶିକ୍ଷକ ଏବଂ ୧୪୯ ଟି ଦେଶର ଅଭିଭାବକଙ୍କ ଅଂଶଗ୍ରହଣ ସହିତ ଏକ ବିରଳ ଗିନିଜ୍ ବିଶ୍ୱ ରେକର୍ଡ ସ୍ଥାପନ କରିଥିଲା। ବିଗତ କିଛି ବର୍ଷରେ ଏହି କାର୍ଯ୍ୟକ୍ରମରେ ଅଂଶଗ୍ରହଣକାରୀଙ୍କ ସଂଖ୍ୟାରେ ଏକ ଅଭୁତପୂର୍ବ ବୃଦ୍ଧି ଘଟିଛି । ୨୦୧୮ ମସିହାରେ ପ୍ରଥମ ସଂସ୍କରଣରେ ମାତ୍ର ୨୨,୦୦୦ ଅଂଶଗ୍ରହଣକାରୀ ଥିବାବେଳେ ୨୦୨୫ରେ ଅଷ୍ଟମ ସଂସ୍କରଣରେ ଏହା ୩୫.୬ ନିୟୁତ ପଞ୍ଜୀକରଣରେ ପହଞ୍ଚିଥିଲା । ଏହି ବିପୁଳ ଅଂଶଗ୍ରହଣ ଏହାର ପ୍ରାସଙ୍ଗିକତା ଏବଂ ଲୋକପ୍ରିୟତାକୁ ସ୍ପଷ୍ଟ ଭାବରେ ପ୍ରଦର୍ଶନ କରୁଛି। ଏହା ସହିତ, ପରୀକ୍ଷା ପେ ଚର୍ଚ୍ଚା ୨୦୨୫ ସହିତ ଜଡିତ ଦେଶବ୍ୟାପୀ ଜନ ଆନ୍ଦୋଳନମୂଳକ କାର୍ଯ୍ୟକଳାପଗୁଡ଼ିକରେ  ପ୍ରାୟ ୧.୫୫ କୋଟି ଲୋକ ଅଂଶଗ୍ରହଣ କରିଥିଲେ । ଫଳରେ ଏଥିରେ ମୋଟ ଅଂଶଗ୍ରହଣ ପ୍ରାୟ ୫ କୋଟିକୁ ବୃଦ୍ଧି ପାଇଛି ।

TKM