রেলৱে মন্ত্রালয়
ইন্দিয়ন রেলৱেজনা কাশি তামিল সঙ্গমম ৪.০ গীদমক তামিল নাদুদগী বনারস ফাওবগী অখন্নবা ত্রেন তরেৎ চলাইরি
प्रविष्टि तिथि:
02 DEC 2025 2:51PM by PIB Imphal
ইন্দিয়ন রেলৱেজনা কাশি তামিল সঙ্গমম ৪.০ দা পাক শন্না মীয়াম্না শরুক য়াহন্নবগীদমক কনিয়াকুমারী, চেন্নাই, কোইম্বেতুর অমদি বনারসকী মরক্তা অখন্নবা ত্রেন তরেৎ চলাইদুনা তামিল লোল ঙাংবা মফমশিং অমদি কাশিগী অরিবা লাইনিংগী মফমগী মরক্তা নাৎকী মরী চেৎশিনহল্লি। অখন্নবা ত্রেনশিং অসি নুমিৎ কয়ানি চুপ্না চত্থগদবা নাৎকী থৌরমশিং শরুক য়াবা লাক্লিবা মীওইশিংগীদমক অপনবা লৈতবা খোঙচৎ, নুংঙাইবা লমশাঙ লম্বী, অমদি মতম চানা থুংবা ঙম্নবগীদমক শিন লাংলি।
সর্ভিসশিং অসি নবেম্বর ২৯, ২০২৫ দগী কনিয়াকুমারীদগী অহানবা ত্রেন খোঙশান্দুনা হৌখ্রে। মসিগী তুংদা ঙসি চেন্নাইদগী অতোপ্পা অখন্নবা ত্রেন অমা খোঙশানখি। মথঙগী খোঙশানবগী মতম কোইম্বেতুরদগী দিসেম্বর ৩, চেন্নাইদগী দিসেম্বর ৬, কনিয়াকুমারীদগী দিসেম্বর ৭, কোইম্বেতুরদগী দিসেম্বর ৯, অমদি অতোপ্পা সর্ভিস অমা চেন্নাইদগী দিসেম্বর ১২, ২০২৫ দা ওইগনি। খোঙশানবগী থৌরাং অসিগা লোয়ননা নীংথিনা শিন লাংদুনা অমদি তাঙ্কক নাইনা তামিল নাদুগী মরুওইবা হৌরকফম সহরশিংদগী বনারস ফাওবা পুন্না অখন্নবা ত্রেন তরেৎ চলাইগনি।
হনখিবগী খোঙচৎ মতম চানা লৈহন্নবগীদমক ইন্দিয়ন রেলৱেজনা বনারসতগী অখন্নবা রিতর্ন সর্ভিস সেরিজ অমা শিন্দুনা থম্লে। মখোয়গী মনুংদা কনিয়াকুমারীগীদমক দিসেম্বর ৫, চেন্নাইগীদমক দিসেম্বর ৭, অমদি কোইম্বেতুরগীদমক দিসেম্বর ৯ দা খোঙশানগনি, অমদি মসিগী তুংদা অহেনবা রিতর্ন সর্ভিসশিং চেন্নাইগীদমক দিসেম্বর ১১, কনিয়াকুমারীগীদমক দিসেম্বর ১৩, কোইম্বেতুরগীদমক দিসেম্বর ১৫, অমদি অমুক হন্না চেন্নাইগীদমক দিসেম্বর ১৭, ২০২৫ দা খোঙশানগনি।
ঙসি হৌগদৌরিবা কাসি তামিল সঙ্গমম ৪.০ না তামিল নাদু অমসুং কাশিগী মরক্তা মতম শাংনা লৈরক্লবা নাৎকী মরী মখা শমথরি। ইদিসন অসি “ঐখোয় তামিল তমসি – তামিল করকলম” হায়বা থীমদা য়ুম্ফম ওইদুনা বরানসিগী মহৈ লোয়শঙশিংদা তামিল তম্বা, কাশিদগী তামিল নাদু ফাওবা মহৈরোয়শিংগী স্তদী তুর, অমদি তেনকাসিদগী কাশি ফাওবগী সেজ অগস্ত্য ভেহিকল এক্সপিদিসনগী খুত্থাঙদা লমদম অনিসীগী মরক্তা লোল অমদি নাৎকী এক্সচেঞ্জ য়োকখৎকনি।
কাশি তামিল সঙ্গমম ৪.০ দা এক ভারত শ্রেস্থ ভারতকী ৱাখল্লোন য়াওবগা লোয়ননা মীয়ামবু মখোয় মশাগী ইনাক খুল্লবা নাৎপু খঙনবা অমদি লৌশিন্নবা পুক্নিং থৌগৎলি। এজুকেসন মন্ত্রালয়না থৌবু ওইরগা, IIT মদ্রাস অমদি বনারস হিন্দু য়ুনিভর্সিতীনা প্রিন্সিপাল নোলেজ পার্ত্নর ওইদুনা, অমদি রেলৱেজ য়াওনা মন্ত্রালয় তরানা শরুক য়াদুনা লমদম অনিসিগী মহৈরোয়, খুৎহৈবা, স্কোলার, লাইনিংগী লুচিংবশিং, ওজা অমদি কলচরেল প্রাক্তিস্নরশিং পুনশিন্নহন্দুনা মখোয়গী মরক্তা ৱাখল্লোন, নাৎকী থবক থৌরম, অমদি চৎনবগী ৱাখল লৌশিং এক্সচেঞ্জ তৌননবা খুদোংচাবা পীরি।
অখন্নবা ত্রেন তরেৎ অসি চেলহন্দুনা অমদি নাৎকী মচাকশিং য়াওরবা আইতিনরী অহোবা লৈন্দুনা শিন লাংদুনা, ইন্দিয়ন রেলৱেজনা লৈবাক অসিগী খেন্নবা মফমশিংগী মরক্তা মরী শাগৎপদা মরুওইবা থৌদাং অমা লৌরি অমদি তামিল নাদু অমসুং কাশিগী মরক্তা মান্নবা পারী পুরীগী লনশিং মপাঙ্গল কনখৎহল্লি।
***
(रिलीज़ आईडी: 2199578)
आगंतुक पटल : 8