ہندوستان کے نائب صدر جناب سی پی رادھا کرشنن نے کاشی اور تمل ناڈو کے درمیان پائیدار ثقافتی بندھن کا جشن مناتے ہوئے کاشی تمل سنگمم کے چوتھے ایڈیشن کے موقع پر ایک خصوصی ویڈیو پیغام دیا۔

نائب صدر جمہوریہ نے کہا کہ آزادی کا امرت مہوتسو کے دوران 2022 میں کاشی تمل سنگمم کے آغاز کے بعد سے یہ پہل ایک بڑے قومی پلیٹ فارم میں تبدیل ہوگئی ہے جو گنگا کی ثقافت اور کاویری کی روایات کو یکجا کرتی ہے، جو شمال اور جنوب کے ثقافتی اتحاد اور ان کے مشترکہ تہذیبی ورثے کی علامت ہے۔

انہوں نے 30 نومبر کو ’من کی بات‘ کی نشریات میں وزیر اعظم کے حالیہ ریمارکس کو یاد کیا ، جہاں وزیر اعظم نے سنگمم کو دنیا کے قدیم ترین شہروں میں سے ایک کے ساتھ دنیا کی قدیم ترین زبانوں میں سے ایک کا ملاپ قرار دیا تھا۔

نائب صدر جمہوریہ نے اس بات پر اطمینان کا اظہار کیا کہ تمل کو اس کا صحیح مقام مل رہا ہے اور اسے مسلسل قومی حمایت حاصل ہے۔  انہوں نے اس سال کے تھیم ’آئیے تمل سیکھیں‘ کا خیر مقدم کیا ، جو لسانی اور ثقافتی ہم آہنگی کو تقویت دیتا ہے۔

انہوں نے چنئی میں سنٹرل انسٹی ٹیوٹ آف کلاسیکل تمل کے ذریعے تربیت یافتہ پچاس ہندی بولنے والے تمل اساتذہ اور کوآرڈنیٹرز کی پہل کی تعریف کی ، جو 15 دن کی مدت میں پچاس سرکاری اور نجی اسکولوں کے 1500 سے زیادہ طلباء کو بنیادی تمل سکھانے کے لیے وارانسی پہنچے ہیں۔

تمل ناڈو اور کاشی کے درمیان قدیم ثقافتی راستوں کو دوبارہ دریافت کرنے کی کوششوں پر روشنی ڈالتے ہوئے ، نائب صدر جمہوریہ نے تینکاسی سے کاشی تک علامتی اگاتھیار یاترا کا حوالہ دیا ، جو 2 دسمبر کو شروع ہوئی اور 10 دسمبر کو اختتام پذیر ہوگی۔  یہ سفر پانڈیا بادشاہ اتیویرا پراکرما پانڈیان کے ذریعے پھیلائے گئے اتحاد کے پیغام کی یاد دلاتا ہے، جن کے سفر نے تمل ناڈو کو کاشی سے جوڑا اور تمل ناڈو کے ایک قصبے تینکاسی کو اس کی شناخت دی، جس کے نام کا مطلب جنوبی کاشی ہے۔

انہوں نے اس پہل کا بھی خیر مقدم کیا جس کے تحت اتر پردیش کے 300 طلباء دس گروپوں میں تمل ناڈو کے سرکردہ اداروں کا سفر کریں گے، جس میں سنٹرل انسٹی ٹیوٹ آف کلاسیکل تمل بھی شامل ہے ، جس سے دو طرفہ ثقافتی افہام و تفہیم اور تبادلے کو تقویت ملے گی۔

سنگمم کو ایک بھارت، شریشٹھ بھارت کا مجسمہ قرار دیتے ہوئے نائب صدر جمہوریہ نے مشاہدہ کیا کہ کاشی اور تمل ناڈو بھارت کی قدیم تہذیب کے روشن چراغ کے طور پر کھڑے ہیں، جو ملک کو اپنی ثقافتی دولت سے روشن کرتے ہیں۔

نائب صدر جمہوریہ نے اس ثقافتی اتحاد پروگرام کو اتنے شاندار طریقے سے منعقد کرنے کے لیے وزارت تعلیم، حکومت اترپردیش اور دیگر مرکزی وزارتوں کی تعریف کی۔

نائب صدر جمہوریہ نے کاشی تمل سنگمم کو ایک شاندار ثقافتی ، روحانی اور دانشورانہ جشن بنانے کے لیے نیک خواہشات کا اظہار کیا۔  انہوں نے اس امید کے ساتھ اپنی بات ختم کی کہ سنگمم چمکتا رہے گا ، کاشی اور تمل ناڈو کے درمیان تعلق ہزاروں سالوں تک مضبوط ہوتا رہے گا  اور اتحاد کا یہ جذبہ ملک کو اس بھارت کی طرف رہنمائی کرے گا جس کا تصور وزیر اعظم کی دور اندیش قیادت نے کیا تھا۔

******

ش ح۔ ف ا۔ م ر

U-NO. 2231