മാന്യരേ...

ആവേശത്തോടെ കരഘോഷം മുഴക്കാൻ തയ്യാറായിരിക്കൂ!

IFFI-യുടെ കിരീടം- സുവർണ്ണമയൂരം - അതിൻ്റെ പുതിയ ഇരിപ്പിടത്തിനായി ഒരുങ്ങിയിരിക്കുന്നു!

ഇന്ന് ഗോവയിലെ ഡോ. ശ്യാമ പ്രസാദ് മുഖർജി ഇൻഡോർ സ്റ്റേഡിയത്തിൽ നടന്ന തിളക്കമാർന്ന സമാപന ചടങ്ങിൽ വിയറ്റ്നാമീസ് ചിത്രമായ "സ്കിൻ ഓഫ് യൂത്ത്" മികച്ച ചലച്ചിത്രത്തിനുള്ള അഭിമാനകരമായ 'സുവർണ്ണമയൂരം' നേടി. ഗോവ മുഖ്യമന്ത്രി ഡോ. പ്രമോദ് സാവന്തും കേന്ദ്ര വാർത്താ വിതരണ, പ്രക്ഷേപണ, പാർലമെൻ്ററി കാര്യ സഹമന്ത്രി ഡോ. എൽ. മുരുഗനും ചേർന്ന് പുരസ്കാരം സമ്മാനിച്ചു.

സംവിധായിക ആഷ്‌ലീ മേഫെയർ, നിർമ്മാതാക്കളായ ട്രാൻ തോ ബിച്ച് എൻഗോക്, ആഷ് മേഫെയർ, ഫ്രാൻ ബോർജിയ എന്നിവർ സംയുക്തമായി ഗോൾഡൻ പീക്കോക്ക് ട്രോഫിയും സർട്ടിഫിക്കറ്റും 40,00,000 രൂപ ക്യാഷ് പ്രൈസും പങ്കിടും.

1990-കളിൽ സൈഗോണിൽ നടക്കുന്ന ഈ ചിത്രം, ലിംഗമാറ്റ ശസ്ത്രക്രിയ സ്വപ്നം കാണുന്ന ട്രാൻസ്‌ജെൻഡർ ലൈംഗിക തൊഴിലാളിയായ സാനും, തൻ്റെ മകനെ പിന്തുണയ്ക്കാൻ പോരാടുന്ന നാമും തമ്മിലുള്ള തീവ്രമായ പ്രണയത്തെ പര്യവേക്ഷണം ചെയ്യുന്നു. സാൻ ഒരു സ്ത്രീയായി ജീവിക്കാൻ തീരുമാനമെടുത്തിരിക്കുന്നു. അതേസമയം നാം അവളുടെ ശസ്ത്രക്രിയയ്ക്ക് പണം സമ്പാദിക്കാൻ ക്രൂരമായ പീഡനങ്ങൾ സഹിക്കുന്നു. അക്രമാസക്തമായ അധോലോകവും സാമൂഹിക മുൻവിധികളും, അരാജകവാദികളും ഉയർത്തുന്ന പ്രതിസന്ധികൾ അവരുടെ പ്രണയത്തെ കഠിനമായ വെല്ലുവിളികൾ നിറഞ്ഞതാക്കുന്നു

ചിത്രത്തെക്കുറിച്ച് ജൂറി പറഞ്ഞതിങ്ങനെ: “ആദ്യ ഫ്രെയിമിൽ തന്നെ ആകർഷകമായ ഛായാഗ്രഹണവും ധീരമായ നിർമ്മാണ രൂപകൽപ്പനയും വഴി സംവിധായകൻ രണ്ട് നായക കഥാപാത്രങ്ങളുടെയും അവിസ്മരണീയ പ്രകടനത്തെ എടുത്തു കാണിക്കുന്നു. ഊഷ്മളമായ സംഗീതം, മികച്ച എഡിറ്റിംഗ്, സൂക്ഷ്മമായ ആഖ്യാനം എന്നിവയുടെയെല്ലാം സംഗമമാണ് ഈ ചലച്ചിത്രം. ധീരവും, അതിശയകരവും, നൂതന രീതിയിലുള്ളതുമായ ഈ ചിത്രം, നമ്മളിൽ ചുരുക്കം ചിലർ മാത്രം കണ്ടിട്ടുള്ള ഒരു ലോകത്തിലെ സ്നേഹവും ത്യാഗവും പര്യവേക്ഷണം ചെയ്യുന്നു. ദീർഘകാലം നമ്മുടെ മനസ്സിൽ തങ്ങിനിൽക്കുന്ന ഒരു കലാമൂല്യമുള്ള സൃഷ്ടിയാണിത്".

നേരത്തെ ഒരു വാർത്താ സമ്മേളനത്തിൽ ചിത്രത്തെക്കുറിച്ച് സംസാരിച്ച സംവിധായിക ആഷ്‌ലീ മേഫെയർ ഇങ്ങനെ പറഞ്ഞു: “ഇത് വളരെ വ്യക്തിപരമായ ഒരു കഥയാണ്. ഞാൻ മൂന്ന് സഹോദരങ്ങളിൽ ഒരാളാണ്, എൻ്റെ ഇളയ സഹോദരൻ ഒരു ട്രാൻസ്‌ജെൻഡറാണ്. ഈ ചിത്രം അവളുടെ-  അന്തസ്സ്, അവകാശങ്ങൾ, ഭയങ്ങൾ, സ്വത്വം എന്നിങ്ങനെ അവളുടെ യാത്രയെ പര്യവേക്ഷണം ചെയ്യുന്നു. ഈ കഥയിൽ, ട്രാൻസ്‌ജെൻഡർ സമൂഹത്തിലെ പലരും അവരുടെ ജീവിതത്തെ സ്വയം കാണുമെന്ന് ഞാൻ വിശ്വസിക്കുന്നു.”

ഈ വർഷം, ആഗോള സിനിമയുടെ ഊർജ്ജസ്വലമായ ഭൂമികയെ പ്രതിനിധീകരിച്ചുകൊണ്ട് പതിനഞ്ച് മികവുറ്റ ചലച്ചിത്രങ്ങളാണ് ഗോൾഡൻ പീക്കോക്ക് പുരസ്കാരത്തിനായി മത്സരിച്ചത്.

***