Ha ka sienjam kaba khraw, ka Election Commission jong ka ri India ka dang shna ia ka digital interface kaba thymmai kaba lah ban pyndonkam na ka bynta ki nongjied bad kiwei pat ki nongshim bynta jong ka kum ki ophisar ba dei khmih ia ka kam elekshon, ki seng sain pyrthei bad ki kynhun ha ka imlang sahlang. Kawei ka rynsan kaba thymmai, ka ECINET, kan pynïasoh bad pynkylla dur ïa palat 40 tylli ki mobile bad web application ba la don lypa jong ka ECI.

Ka ECINET kan don ia ka User Interface (UI) bad ka (UX) kaba kham suk ban pyndonkam da kaba pynbiang kawei ka rynsan na ka bynta baroh ki kam ba iadei bad ka elekshon. Ia kane ka sienjam la saindur ruh ban pynduna ka jingbankhia jong ki nongpyndonkam na ka bynta ban download bad iaid lyngba ia ki Apps kiba bun bad ban kynmaw ia ki login bapher bapher.

Ia kane ka rynsan la thmu da u Chief Election Commissioner (CEC) jong ka Ri India u Gyanesh Kumar ha ka jingialang jong ki Chief Electoral Officers (CEO) kaba la long ha u bnai Lber 2025, ha ka jingiadon lang ki Election Commissioner u Dr. Sukhbir Singh Sandhu bad Dr. Vivek Joshi.

Ka ECINET kan pynlah ruh ïa ki nongpyndonkam ban ïoh ïa ki jingtip ba ïadei bad ka elekshon ha ki Desktop ne Smartphone jong ki. Ban pynthikna ba ki jingtip kin long kiba thikna katba lah, ia ki jingtip ha ka ECINET yn pynrung tang da u ophisar ka ECI ba la ai bor. Ka jingpynrung da u heh ophisar ba dei peit kan pynthikna ba ki jingtip ba la pynbiang sha ki nongshim bynta kin long kiba thikna katba lah. Hynrei lada don kano kano ka jingïakynad, yn pynksan ia ki jingtip ba kongsan kumba la pyndap hok ha ki phom ba la buh da ka aiñ.

Ka ECINET kan pynrung ïa ki App kiba la don lypa kum ka Voter Helpline App, Voter Turnout App, cVIGIL, Suvidha 2.0, ESMS, Saksham bad KYC App kiba la ïoh palat 5.5 klur ki download (ka thup ba pura jong ki App la suh lang). La khmih lynti ba ka ECINET kan ai jingmyntoi ia jan 100 klur ngut ki nongjied bad ki kam baroh ba dei khmih ia ka kam elekshon kaba kynthup ia palat 10.5 lak ngut ki Booth Level Officer (BLO), kumba 15 Lak ki Booth Level Agent (BLA) kiba la thung da ki Seng Sainpyrthei, jan 45 Lak ki Poling Official, 15,597 ngut ki Electoral Registration Officers (AERO), 4,123 ngut ki ERO bad 767 ngut ki District Election Officer (DEO) ha kylleng ka ri.

Ka ECINET ka la dep ban poi sha ka kyrdan kaba kham shalor jong ka jingpynkhreh bad dang pynlong ïa ki jingpyrshang ban pynthikna ïa ka jingtreikam kaba ryntih, ka jingsuk ban pyndonkam, bad ki lad jingïada cybersecurity kiba khlaiñ. La pynwandur ia ka hadien ka jingiamir jingmut kaba bniah a kaba la kynthup ia 36 ngut ki CEO jong baroh ki Jylla/UT, 767 ngut ki DEO bad 4,123 ngut ki ERO jong ki Jylla/UT jong ki bad hadien ba la bishar bniah ia ki 76 tylli ki kot kiba kynthup ia 9,000 sla jong ka rukom treikam jong ka elekshon, ki jingbthah bad ki kot lyngkdop ba la pynmih da ka ECI na ka por sha ka por.

Ia ki jingtip ba la ai lyngba ka ECINET yn pyniasoh hapoh ka ain ba la buh da ka ain ba la pynbiang lyngba ka Representation of People Act 1950, 1951, Registration of Electoral Rules, 1960 Conduct of Election Rules, 1961 bad ki jingbthah ba la pynmih da ka ECI na ka por sha ka por.

******

Ka Thup jong 40 tylli ki Application jong ka ECI ba la don lypa

***