“Zindegi Laila Hai, Use Majnu Ki Tarah Pyaar Karo…”

Kine ki kyntien ki sawa jur ha ka kamra kum ka jingiakren ba sdang jong ka drama Hindi ba pawnam — kaba shlur, kaba sngew myllung bad kaba shongkhia. Ka jingong kaba pawnam jong uwei na ki nongthoh Hindi ba pawnam jong ka spah snem kaba 20, u Padmabhushan Amritlal Nagar, u briew u bym shym la shu im tang ka jingim— hynrei uba la pyni ia ka, uba la niewkor ia ka, bad uba la pynkylla ia ka sha ka jingrakhe kaba iaineh.

Bad ha ka IFFI-2025, kata ka jingrakhe ka la paw na ki artylli ki khana kiba sngewtynnad, haba ki kynhun jong ka ‘Vanya’ bad ka ‘Chowk University’ ki la ïawan lang na ka bynta ka jingïalang bad ki lad pathai khubor ha kaba la sngew kumba ar tylli ki pyrthei bapher bapher ki ïakynduh ha ka rynsan jong ki phlim.

Ha kawei ka liang la don ka drama ‘Vanya’ kaba dap da ki jingsngew, kaba dap da ka mariang, ha kaba u Director Badiger Devendra bad ka aktres ka Meghna Belawadi ki batai ïa ka jingïaid lynti jong ki ban shim ïa ka jingïadei kaba iaineh jong u briew bad ka khlaw. Ha kawei pat ka liang, ki Director ka Savita Sharma Nagar bad u Rajesh Amrohi ki la pyni ia ki kam jong u Nagar Ji—u nongthoh kot uba la ktah ia ki pateng da ki jingthoh jong u ba dap da ka jingsamrkhie, ka jinglong briew, bad ka jingjylliew jong ka kolshor.

Wanphai u briew ba tbit ha ki kam thoh ha ka phlim

Ki director ka Savita Sharma Nagar bad u Rajesh Amrohi ki la kren shaphang ka phlim jong ki shaphang u nongthoh ba la burom bha u Amritlal Nagar—u nongsaindur ba ki la batai kum “ka jingrakhe halade.”

Ka Savita Sharma Nagar ka la ong, “Ka phlim ka rakhe ïa ki jingkmen bym kut ha ka jingim, ka rukom im jong u Nagar Ji—ha ka rukom kaba sngewtynnad bha. Ka jingdynda jong u, ka jinglong lui lui, ka jingjylliew ki jingmut jingpyrkhat .... baroh kine ki dei kiba hap ban pyni ha ka phlim.”

Ka la ong ba ka kynhun ka la pynlut san snem ban wad bniah bad ban thaw biang ïa ki por na ka jingim jong u Nagar Ji. Da kaba don tang khyndiat eh ki dur kiba lah ban ioh, ki la shaniah ha ki jingkynmaw, ki jingiakren bad ki jaka ba pynneh ia ki jingthoh bad ki la shna hynriew tylli ki jingthoh na ka bynta kane ka khana. "Ngim ju rakhe ia ki nongthoh jong ngi haduh katta katta. Kane ka phlim ka dei ka jingburom jong ngi ia uwei u riewkhraw," ka la ong.

U Co-Director u Rajesh Amrohi u la bynrap, "U Amritlal Nagar um shym la thoh tang na ka bynta ka jingpynbyrngia. U la buh jingthoh shaphang ka kolshor bad ka imlang sahlang jong ka ri jong ngi. U dei uwei na ki sur ba bun bynta ha ka thoh ka tar jong ka India ba mynta.”

Ka phlim jong ki ka wanrah biang ïa ki jingjia bad ki jingïakren ba bniah bad ki critic, ki nongthoh, bad ka longïing jong u Nagar hi ban pyni ïa ka jingim jong u briew uba ka thoh ka tar jong u ka dang pyni ïa ka imlang sahlang da ka jingïahap kaba phylla.

VANYA: Ka jingiakhun hapdeng ki jaka khlaw bad ka pyrthei – Bad ka jingieid

Ha kane ka juh ka rynsan, u Director Badiger Devendra u la wanrah ïa ka phlim Kannada jong u kaba kyrteng ka Vanya—ka jingïathuhkhana shaphang uwei u tymmen uba kyntait ban iehnoh ïa ka ïing khlaw jong u wat haba don ka jingpyrshang ban pynkynriah jubor ïa ki briew. U Devendra u la batai ia ka phlim kum “ka jingiapher hapdeng ki jingkhuslai kiba sngap jar jong ka jingim ha sor bad ki jingshisha kiba sngap jar bad kiba don mynsiem jong ka khlaw.”

Ka aktres Meghna Belawadi, kaba ak kum ka khun jong u tymmen, ka la pyrkhat halor ka jingbun bynta jong ka jinglong jong ka. “Kam ju pynpaw pyrthei. Ka long kaba bitar, kaba ïaleh pyrshah, bad kaba la shah ring sha ka jingma kaba khraw ban pynngeit ïa u kpa jong ka. Hynrei wat la um ju ong ba u ieit ïa ka, hynrei u pynpaw ïa kata — bad kata ka jinglong kaba ka la ktah jur ïa nga,” ka la bynrap.

Ha kaba iadei bad ka jingtrei lang bad ka actor ba dang khynnah, ka la ong:

“Ha ki jaka ring phlim, nga la pynthikna ba ka sngewshngaiñ—nga ktik ïa ka, bad ïalehkai bad ki shniuh jong ka—kumta ka jingïadei ha ka phlim ka sngew kumba ka long kaba don tynrai bad kaba khlem jingeh.”

Ka kynhun ka la batai ïa ka jingjynjar ban ring ia ka phlim bad ruh ka jingsngewtynnad hapoh khlaw, ha kaba hap ban trei tang ha ka por ba dang shai bad kaba la ker sawdong da ki mrad khlaw. “Hynrei ki nongshong shnong ki la pdiang sngewbha ïa ngi. Ka jingshaniah jong ki, kaba la tei lyngba ki bnai jong ki jingleit jngoh shwa ban pynmih ïa ka phlim, ka la kylla long kum u budlum jong ka phlim,” la ong ka Meghna.

Ka Meghna ka la pynkut da kaba ong, “Ngam kheiñ ïalade kum ka aktor ba pawnam. Nga shu shaniah ha ka jingïohi jong u Director—ka jingshai jong u, ki jingsngewthuh jong u ia ki jingsngew—bad nga la rung sha ka pyrthei kaba u la thaw.”

Peit ia baroh kawei ka jingiakren bad ki lad pathai khubor hangne:

Ban ioh jingtip shuh shuh, nion ha ka:

IFFI Website: https://www.iffigoa.org/

PIB’s IFFI Microsite: https://www.pib.gov.in/iffi/56/

PIB IFFIWood Broadcast Channel: https://whatsapp.com/channel/0029VaEiBaML2AU6gnzWOm3F

X Handles: @IFFIGoa, @PIB_India, @PIB_Panaji

* * *