#IFFIWood, 25 नोव्‍हेंबर 2025

दिग्दर्शक आशुतोष सिंगाचो पदार्पण फिल्म ‘खोया पाया’ आयज 56व्या भारतीय आंतरराष्ट्रीय चित्रपट महोत्सवांत खास प्रदर्शित केलो. कुंभमेळ्याच्या अफाट गर्दीत सोडून दिल्ल्या आवयचेर हो चित्रपट आधारित आसा. हो चित्रपट एका जाण्टे आवयची कथा सांगता, जिका तिच्या पुतान सोडून दिल्या. अनोळखी लोकां मदीं तिका अनपेक्षीत इश्ट मेळटात आनी निमाणें विश्वासघात करपी पश्चात्तापी पुताक वळखुपाक ती न्हयकार दिता.

पुराय भरिल्ल्या चित्रपटघरांत हो चित्रपट प्रदर्शीत जाले उपरांत महोत्सवाच्या सुवातेर आयोजीत केल्ले पीआयबी पत्रकार परिशदेंत फिल्माचे निर्माते, दिग्दर्शक आनी मुखेल कलाकारांनी प्रसार माध्यमां कडेन संवाद सादलो.

आवयची भूमिका साकारपी नामनेची अभिनेत्री सीमा विश्वास हिणें जाण्टे आवय-बापाय कडेन गैरवर्तन ह्या चित्रपटाच्या विशयाचेर आपले भावपूर्ण विचार मांडले. ही समस्या खूप व्यापक आशिल्ल्याचे सांगत तिणे म्हळें; "हावे अशी जायतीं फामिली पळयल्यात जंय जाण्ट्या आवय-बापायक वायट वागणूक मेळटा.सिनेमा हे एक शक्तिशाली माध्यम,जें समाजाचेर प्रभाव घालूंक शकता. जाण्ट्या आवय-बापायप्रति वाढती असंवेदनशीलताये विशीं उलोवप म्हत्वाचें". जाण्टे आवय-बापायक एकटी सोडून वचपी भुरगीं भारता सारकिल्ल्या समाजांत चड आसूंक फावना, जंय परंपरागत तीन पिळग्यो एकठांय रावतात अशें तिणें आपलें मत उक्तायलें. तिणें सांगलें की ह्या पटकथेचो रोखडोच तिचेर परिणाम जालो आनी म्हणलें: "हांव त्या सोडून दिल्ल्या आवयच्या जाग्यार आशिल्ली जाल्यार हांव परत येवची नाशिल्ली. स्वाभिमान गरजेचो;आदराशिवाय, कौटुंबिकबंधनांक कसलोच अर्थ ना." शूटिंगाच्या आदींच्या कार्यशाळांक लागून पंगडाक पात्रांक बऱ्या तरेन समजून घेवपाक मदत जाली अशें फामाद अभिनेत्रीन सांगलें.

पुताची भूमिका करपी अभिनेता चंदन रॉय सान्याल हाणें सांगलें, कलाकारांक चड करून समाजीक नदरेन मान्य नाशिल्लीं पात्रां करचीं पडटात. भारतांत आवयची पुजा जाता तरी कांय जाण जाण्टे आवय-बापायक भार मानतात म्हणून हो सिनेमा खूब प्रासंगीक आसा अशें ताका दिसता. ताच्या पात्राची अपराधीपणाची वेदनादायक  भावना हो चित्रपटांतलो एक म्हत्वाचो भावनीक भाग.

अभिनेत्री अंजली पाटील हाणी सांगले, तिणें चित्रपटाततली भूमिका कथेतल्या  साधेपणाखातीर स्वीकारली, जी समकालीन चित्रपटात दुर्मिळ आसा आनी दिग्गज अभिनेत्री सीमा बिस्वास हिच्या बरोबर काम करपाची आनी शिकपाची संद ह्या निमतान मेळी.
फिल्माचो निर्मातो हिमांशु राय हाणें एक वर्स आदीं गोंयांत पटकथा आयकली आनी ताचे ताकदीन आपूण रोखडोच प्रभावित जालो असो उगडास केलो.काळी बाजू आसली तरी आवय आनी भुरग्या मदल्या सगळ्यांत घट नात्या विशीं आसा म्हणून हे कथेचो सार आपल्या मनांत प्रतिध्वनीत जालो अशें तांणी सांगलें.ताका ही काणी खूब सशक्त दिसता.

दिग्दर्शक म्हणून पदार्पण करपी आशुतोष सिंगान महाकुंभांतल्या अफाट गर्देत ह्या सिनेमाचें शुटींग केलें. हो वाठार ताचो गांव. कोट्यांनी भक्तांनी भेट दिल्ल्या महाकुंभाच्या गर्दे मदीं 10-12 दिसांनी चित्रीकरण पुराय जाले. "ह्या सिनेमाचो रंग महाकुंभांतुच सापडलो" अशें तांणी सांगलें. तशेंच परंपरा आनी आधुनिकतेचो सोबीत संगमुय ताणें अधोरेखित केलो. डिजिटल साधनां घेवन भोंवपी यात्रेकरु, उमेदी लोकसंगीताचें वातावरण आनी चित्रपटाक आकार दिवपी दृश्य – हे सगळे चित्रपटांतल्यान दिसून येतात अशें तांणी नदरेक हाडलें.

स्वताच्या गांवांत शूटिंग करपाक मजा आयली, तरी कुंभांत शूटिंग करप हो सगळ्यांत कठीण भाग आशिल्लो अशें तांणी सांगलें. "अशी ताकदवान कलाकारांची फळी आसतना चित्रीकरण करप म्हळ्यार फिल्म स्कूलात प्रशिक्षण घेवपासारखे आसता. एका फिल्मा खातीर बरे कलाकार आसप खूब म्हत्वाचें" अशें तांणी सांगलें.

कुंभसारख्या प्रत्यक्ष सुवातेर शूटिंग करतना गर्दी कशी हाताळपाची हाचे विशीं चड तपशील दितना आशुतोष हांणी सांगले पुराय कलाकार आनी तंत्रीक पंगड थळाव्या लोकां सारके कपडे घालताले, कोणेच फॅन्सी "बोम्बैया कपडे" घालूंक नाशिल्ले. अशें तरेन ते सहजपणान गर्देचो एक भाग जाले! जायते लोक व्हिडियो कॅमेरे घेवन भोंवताले देखून शूटिंग उपकरणांचो वापर केल्ल्यान ते चड वेगळे दिसूंक ना अशें दिग्दर्शकान सांगलें. पूण आव्हान एकूच आशिल्लें - गर्देंत फिल्मांतले पात्र वेगळे दिसपाक जाय.

कुंभमेळ्यात चित्रीकरण करप हे विलक्षण आनी आव्हानात्मक आशिल्लें, पूण साहसी आनी रोमांचक आशिल्लें अशें चित्रपटाच्या मुखेल कलाकारांनी सांगलें. "गर्देन चित्रीकरण प्रक्रियेत चड हस्तक्षेप करूंक ना आनी खूब सहकार्य आनी आदार दिवपी आशिल्ले, भोंवतणी अस्तित्वांत आशिल्ल्या आध्यात्मिक  वातावरणाक लागून आसूं येता”अशें सीमा बिस्वास हांणी सांगलें.

IFFI विशीं

1952 वर्सा सुरु जाल्लो भारतीय आंतरराष्ट्रीय चित्रपट महोत्सव (IFFI) दक्षिण आशियांतलो सगळ्यांत पोरनो आनी सगळ्यांत व्हडलो चित्रपट महोत्सव. राष्ट्रीय चित्रपट विकास म्हामंडळ (एनएफडीसी), म्हायती आनी प्रसारण मंत्रालय, भारत सरकार आनी गोंय मनरिजवण सोसायटी (ईएसजी) गोंय राज्य सरकार हांणी संयुक्तपणान आयोजीत केल्लो हो महोत्सव आता जागतिक चित्रपटसृष्टीतले शक्तीघर जाला. इफ्फीक खऱ्या अर्थान चमकावपी गजाल म्हळ्यार ताचे अद्वितीय मिश्रण -आंतरराष्ट्रीय सर्ती, सांस्कृतीक प्रदर्शनां, मास्टरक्लास आनी उच्च उर्जा आशिल्लो 'व्हेवज’ (WAVES) फिल्म बाजार, जंय कल्पना, वेव्हार आनी सहयोग आकार घेतात. 20 ते 28 नोव्हेंबर मजगती गोयांत जावपी ह्या 56व्या आवृत्तीत भाशा, शैली, नवोन्मेष आणि आवाजांचो एक दोळे दिपकावपी संग्रह सादर जातलो - जागतिक स्तराचेर भारताच्या सर्जनशील प्रतिभेचो एक मन भुलोवपी उत्सव.

For more information, click on:

IFFI Website: https://www.iffigoa.org/

PIB’s IFFI Microsite: https://www.pib.gov.in/iffi/56/

PIB IFFIWood Broadcast Channel: https://whatsapp.com/channel/0029VaEiBaML2AU6gnzWOm3F

X Handles: @IFFIGoa, @PIB_India, @PIB_Panaji

* * *

PIB IFFI CAST AND CREW | सुभाष जाण/मोनाली प्रभू/दर्शना राणे | IFFI 56