પ્રધાનમંત્રી શ્રી નરેન્દ્ર મોદી 26 નવેમ્બરના રોજ સવારે 10 વાગ્યે વીડિયો કોન્ફરન્સિંગ દ્વારા GMR એરોસ્પેસ અને ઇન્ડસ્ટ્રિયલ પાર્ક - SEZ, રાજીવ ગાંધી ઇન્ટરનેશનલ એરપોર્ટ, હૈદરાબાદ ખાતે સ્થિત સફરાન એરક્રાફ્ટ એન્જિન સર્વિસીસ ઈન્ડિયા (SAESI) સુવિધાનું ઉદ્ઘાટન કરશે.

SAESIએ LEAP (લીડિંગ એજ એવિએશન પ્રોપલ્શન) એન્જિન માટે સફરાનની સમર્પિત જાળવણી, સમારકામ અને ઓવરહોલ (MRO) સુવિધા છે, જે એરબસ A320neo અને બોઇંગ 737 MAX એરક્રાફ્ટને પાવર આપે છે. આ સુવિધાની સ્થાપના એક મહત્વપૂર્ણ સીમાચિહ્નરૂપ છે, કારણ કે તે માત્ર સૌથી મોટી વૈશ્વિક એરક્રાફ્ટ એન્જિન MRO સુવિધાઓમાંની એક નથી, પરંતુ પ્રથમ વખત, વૈશ્વિક એન્જિન OEM (મૂળ ઉપકરણ ઉત્પાદક) એ ભારતમાં MRO કામગીરી સ્થાપિત કરી છે.

GMR એરોસ્પેસ અને ઇન્ડસ્ટ્રિયલ પાર્ક - SEZ ની અંદર 45,000 ચોરસ મીટરમાં ફેલાયેલ, આ અત્યાધુનિક સુવિધા લગભગ ₹1,300 કરોડના પ્રારંભિક રોકાણ સાથે વિકસાવવામાં આવી છે. વાર્ષિક 300 LEAP એન્જિન સુધી સેવા આપવા માટે રચાયેલ, SAESI સુવિધા 2035 સુધીમાં સંપૂર્ણ કાર્યકારી ક્ષમતા પ્રાપ્ત કર્યા પછી 1,000 થી વધુ ઉચ્ચ કુશળ ભારતીય ટેકનિશિયન અને એન્જિનિયરોને રોજગારી આપશે. આ સુવિધામાં વિશ્વ કક્ષાની એન્જિન જાળવણી અને સમારકામ સેવાઓ પ્રદાન કરવા માટે અદ્યતન પ્રક્રિયા સાધનો હશે.

MRO સુવિધા ઉડ્ડયન ક્ષેત્રમાં આત્મનિર્ભરતાના લક્ષ્ય તરફ એક મોટું પગલું હશે. MROમાં સ્વદેશી ક્ષમતાઓ વિકસાવવાથી વિદેશી વિનિમયનો પ્રવાહ ઓછો થશે, ઉચ્ચ-મૂલ્ય રોજગારનું સર્જન થશે, સપ્લાય-ચેઇન સ્થિતિસ્થાપકતાને મજબૂત બનાવવામાં આવશે અને ભારતને વૈશ્વિક ઉડ્ડયન કેન્દ્ર તરીકે સ્થાન મળશે. ભારત સરકાર આ ક્ષેત્રના ઝડપી વિકાસને ટેકો આપવા માટે એક મજબૂત MRO ઇકોસિસ્ટમ બનાવવા માટે સક્રિયપણે કામ કરી રહી છે. સરકારની મુખ્ય નીતિગત પહેલો - જેમાં 2024માં GST સુધારા, MRO માર્ગદર્શિકા 2021 અને રાષ્ટ્રીય નાગરિક ઉડ્ડયન નીતિ 2016નો સમાવેશ થાય છે એ કર માળખાને તર્કસંગત બનાવીને અને રોયલ્ટી બોજ ઘટાડીને MRO પ્રદાતાઓ માટે કામગીરીને સરળ બનાવી છે.

SM/BS/GP/JD