#IFFIWood, 22 नोव्‍हेंबर 2025

इफ्फी 2025 मध्ये प्रसिद्ध कास्टिंग डायरेक्टर मुकेश छाब्रा यांच्या एका सत्राने एका विशेष मास्टरक्लास मालिकेचा प्रारंभ झाला. कोलकात्यातील सत्यजित रे फिल्म अँड टेलिव्हिजन इन्स्टिट्यूट (एसआरएफटीआय), पुण्यातील फिल्म अँड टेलिव्हिजन इन्स्टिट्यूट ऑफ इंडिया (एफटीआयआय), तसेच इटानगर येथील फिल्म अँड टेलिव्हिजन इन्स्टिट्यूट ऑफ इंडिया (एफटीआयआय) या संस्थेच्या विद्यार्थ्यांसाठी ही मालिका तयार करण्यात आली आहे. या तीन राष्ट्रीय चित्रपट संस्थांमधील उदयोन्मुख चित्रपट व्यावसायिकांना एकत्र आणून सहयोगात्मक शिक्षणाचा अनुभव देणे, हा या मालिकेचा उद्देश आहे.

या मालिकेची सुरुवात गोव्यातील कला अकादमीच्या ब्लॅक बॉक्स थिएटर येथे "द प्रोसेस ऑफ कास्टिंग" या विषयावरील एका विस्तृत सत्राने झाली. दंगल, छिछोरे, गँग्स ऑफ वासेपूर आणि बजरंगी भाईजान यासारख्या चित्रपटांसाठी प्रसिद्ध असलेले मुकेश छाब्रा यांनी या सत्रात कास्टिंगची कला आणि प्रक्रियेची तपशीलवार माहिती दिली. कास्टिंग म्हणजे केवळ कलाकारांची निवड नव्हे तर प्रत्येक पात्राचे सखोल आकलन, खऱ्या अर्थाने योग्य प्रतिभेचा शोध, आणि चित्रपटाच्या भावनिक गाभ्याला दृढ करणाऱ्या अभिनयाची घडण, अशी  ही एक व्यापक प्रक्रिया आहे. 

दिग्दर्शकाचा दृष्टीकोन आणि अभिनेत्याच्या भाव व्यक्त करण्यात कास्टिंग कसे दुवा बनते, तसेच नवीन कलाकारांना शोधताना अंत: प्रेरणा, निरीक्षण आणि संवेदनशीलता किती महत्त्वाची असते, हे देखील त्यांनी अधोरेखित केले.

विद्यार्थ्यांनी सत्रात सक्रिय सहभाग घेत उद्योगातील पद्धती, कॅरेक्टर ब्रेकडाऊन आणि ऑडिशन प्रक्रियेबद्दल प्रश्न विचारले आणि माहिती मिळवली. छाब्रा यांनी विद्यार्थ्यांना प्रामाणिकपणा, शिस्त आणि कुतूहलाने चित्रपट क्षेत्राकडे पाहण्यास प्रोत्साहित केले. प्रत्येक भूमिका, मग ती मोठी असो किंवा लहान, चित्रपटाच्या व्यापक कथारचनेत  योगदान देते, याची त्यांनी आठवण करून दिली. त्यांनी कास्टिंग पद्धतींबद्दलचे त्यांची अंतर्दृष्टी सामायिक केली, तसेच उदयोन्मुख कलाकार आणि चित्रपट निर्मात्यांना कास्टिंगशी संबंधित करिअर मार्गदर्शन केले आणि व्यावहारिक टिप्स देखील दिल्या.

या सत्राने मास्टरक्लास मालिकेसाठी एक रचनात्मक आणि प्रेरणादायी वातावरण निर्माण केले. 27 नोव्हेंबर 2025 पर्यंत ही मालिका सुरू राहणार आहे. पुढील काही दिवसांत दिग्दर्शन, पटकथालेखन, छायांकन, ध्वनी रचना आणि निर्मिती यासारख्या विविध क्षेत्रातील अग्रणी उद्योग तज्ज्ञ  विद्यार्थ्यांमध्ये व्यावसायिक कौशल्ये आणि सर्जनशील आत्मविश्वास बळकट करण्यासाठी परस्परसंवादी सत्रे घेणार आहेत. उदयोन्मुख प्रतिभेचे संगोपन करण्यासाठी आणि चित्रपट निर्मात्यांच्या पुढच्या पिढीसाठी सहयोगी शिक्षणाचे व्यासपीठ तयार करण्यासाठी इफ्फीची निरंतर बांधिलकी या उपक्रमातून प्रतिबिंबित होते.

इफ्फीविषयी

वर्ष 1952 मध्ये सुरु झालेला भारतीय आंतरराष्ट्रीय चित्रपट महोत्सव (इफ्फी) हा दक्षिण आशियात सर्वप्रथम सुरु झालेला आणि चित्रपटांशी संबंधित असा सर्वात मोठा उत्सव समजला जातो. राष्ट्रीय चित्रपट विकास महामंडळ (एनएफडीसी), केंद्रीय माहिती आणि प्रसारण मंत्रालय, एन्टरटेनमेंट सोसायटी ऑफ गोवा (ईएसजी) ही संस्था तसेच गोवा राज्य सरकार यांच्या संयुक्त विद्यमाने आयोजित होत असलेला हा महोत्सव आता, जेथे पुनर्संचयित अभिजात कलाकृती धाडसी प्रयोगांना सामोऱ्या जातात आणि दिग्गज कलाकार निर्भय नव-कलाकारांसोबत एकत्र येऊन काम करतात, अशा जागतिक चित्रपटीय शक्तीकेंद्राच्या रुपात उदयाला आला आहे. इफ्फीला खऱ्या अर्थाने चमकदार स्वरूप देणारे घटक म्हणजे त्यातील विजेसारख्या तळपणाऱ्या मिश्र आंतरराष्ट्रीय स्पर्धा, सांस्कृतिक सादरीकरणे, मास्टर क्लासेस,श्रद्धांजलीपर उपक्रम तसेच  कल्पना, व्यवहार आणि सहयोगी संबंधांना झेप घेऊ देणारा, चैतन्याने भारलेला वेव्हज चित्रपट बाजार. गोव्यातील जबरदस्त आकर्षक समुद्रकिनाऱ्याच्या पार्श्वभूमीवर, 20 ते 28 नोव्हेंबर दरम्यान होत असलेला महोत्सवाचा 56 वा भाग भाषा, शैली, नवोन्मेष आणि आवाजांचा झळाळता पिसारा घेऊन जागतिक मंचावर भारताच्या सर्जक प्रतिभेचा गुंगवून टाकणारा सोहळा सादर करत आहे.

For more information, Click on:

https://www.pib.gov.in/PressReleasePage.aspx?PRID=2191742

https://www.pib.gov.in/PressReleasePage.aspx?PRID=2190381

IFFI Website: https://www.iffigoa.org/

PIB’s IFFI Microsite: https://www.pib.gov.in/iffi/56new/

PIB IFFIWood Broadcast Channel: https://whatsapp.com/channel/0029VaEiBaML2AU6gnzWOm3F

X Handles: @IFFIGoa, @PIB_India, @PIB_Panaji

* * *

PIB IFFI CAST AND CREW | सोनाली काकडे/श्रद्धा मुखेडकर/दर्शना राणे | IFFI 56