#IFFIWood, 22 नोव्‍हेंबर 2025

‘ब्रीद एंड इमोशन: अ मास्टरक्लास ऑन परफॉरमेंस’, जाचे  थिएटरचे  उस्ताद आनी  आदिशक्तीचे  विनय कुमार के. जे. हांणी नेतृत्व  केले. हो मास्टरक्लास अंदू वर्सा इफ्फीत सगळ्यात बौद्धिकदृष्ट्या उत्तेजक आणि तल्लीन करपी सत्र म्हणून उदेलों. दिवंगत थिएटर गुरु वीणापाणि चावला हांचे शिश्य आनी आदिशक्ति लेबोरेटरी फॉर थिएटर आर्ट्स रिसर्च हाचे आर्टिस्टिक डायरेक्टर विनय हाणें माचयेर खरपण, परंपरा आनी मूर्त बुध्दीचो एक खाशेलो मेळ हाडलो.

अधिवेशन सुरू जावचे पयलीं म्हायती आनी प्रसारण मंत्रालयाचे अतिरिक्त सचीव श्री प्रभात हांणी वक्त्याचो भोवमान केलो. हो मास्टरक्लास  सकारात्मक रीतीन मंच आनी प्रेक्षकांच्या मर्यादे भायर पावलो. विनय परत परत माचयेवयल्यान देंवतालो, प्रेक्षकां कडेन थेट संवाद सादतालो, प्रस्न विचारतालो, बारीकसाणेन आयकतालो आनी हॉलाक एक्सप्लोर करपाच्या सामायिक सुवातेत रूपांतरित करतालो.

विनय हांणी प्रेक्षकांक भावनांच्याच कल्पनेचेर परतून विचार करपाक प्रवृत्त करून सत्राची सुरवात केली. लोक चड करून एकाच छप्परा खाला रावतात पूण एकामेकांच्या भावनिक संवसाराविशी  अनभिज्ञ आसतात अशें तांणी नदरेक हाडलें. दशकां आदीं ज्यो भावना निर्माण जाल्यो ताका आयज  प्रासंगिकताय उरची ना, कारण  भावना काळा वांगडा, संदर्भा वांगडा आनी संस्कृतीक परिस्थिती प्रमाण विकसीत जातात.

उपरांत ताणें भावनांची जाणीव जावपाक आनी व्यक्त करपाक कुडीची भुमिका हाचेर संबोधन केले आनी आमची खंयचीच शारिरीक हालचाल पुरायपणान अंतर्ज्ञानी ना अशें  तांणी सुचयलें. समाजीक जाग्या सावन भौशीक वातावरण मेरेन आमचे हावभावांक शिकलेल्या वागणुकींनी आकार मेळटा. देखून भावना फकत भितरल्यानच जाणवना पूण बाह्यरित्याय जाणवता, खूप फावटीं जाणीवपूर्वक जाणीविकाय नासतनाय, अशे तांणी सांगले.

मास्टरक्लासाच्या एका खासा भागांत विनय हाणें मेंदू न्हय तर स्वास हो मनशाच्या यंत्रणेचो मुखेल नियंत्रक अशें मत मांडलें. दर एका स्वासाक लागून दाब निर्माण जाता; दाबांतल्या दर एका बदलाक लागून स्नायूंचे बदल जातात. ही शारिरीकताच ताचो आदार थारता जाका आमी भावना म्हणटात अशें तांणी स्पश्ट केलें. 72 bpm हार्ट रेट समतोलाचो संकेत दिवंक शकता, जाल्यार उणी वा चड श्रेणींत उदासीनताय, भंय वा अस्वस्थताय दिसून येता. अशे तरेन भावना मानसिक व्याख्या जावपाआदीं एक शारीरिक प्रतिक्रिया जाता. 

विनय हाणें ह्या विचारांक पुर्विल्ल्या भारतीय गिन्यान पद्दतीकडेन जोडून, सुर्वेच्या वैजांनी, खास करून आयुर्वेदांत, परिसंचरण आनी कुडीच्या अंतर्गत तालांतल्यान भावनांचो अभ्यास केल्लो अशे  प्रेक्षकांमुखार मांडले. पूण आयज व्यक्ती अपूर्व भावनिक गुंतागुंती मदीं रावतात, मनशाची कूड हो भार सैमीक रितीन व्हरपाक तयार केल्ली ना.

ह्या बुन्यादीचेर विनय हाणें प्रेक्षकांक नव रसांत व्हरून दर एका रसाची शारीरिक प्रतिक्रिया, श्वासाची पद्धत आणि स्नायूंची स्वाक्षरी कशी आसता हें दाखयलें. विनय हाणें आमी चड फावटीं दुर्लक्ष करतात त्या सूक्ष्म तालांचेरूय  भासाभास केली: आयकुप्याची मान हालोवप, वक्त्याचे हातवारे आनी श्वासोच्छवासाचे संकेत भावनिक संवादाक मार्गदर्शन करता अशे तांणी  सांगले .

निदर्शनां, उपक्रम आनी सेगीत  संवादांतल्यान विनय कुमारान बौध्दिक नदरेन गिरेस्त आनी अणभवाचेर आदारिल्लो मास्टरक्लास दिलो. स्वास, कुड आनी भावना एकठांय कशीं काम करतात हाची खोलायेन म्हायती वाटेकर जावप्यांक मेळ्ळी. हें गिन्यान फकत कलाकारां खातीर न्हय तर मनशाची स्थिती अधिक पुरायपणान समजून घेवपाक सोदपी दर एकल्याखातीर गरजेचें.

IFFI विशीं

1952 वर्सा सुरु जाल्लो भारतीय आंतरराष्ट्रीय चित्रपट महोत्सव (IFFI) दक्षिण आशियांतलो सगळ्यांत पोरनो आनी सगळ्यांत व्हडलो चित्रपट महोत्सव. राष्ट्रीय चित्रपट विकास म्हामंडळ (एनएफडीसी), म्हायती आनी प्रसारण मंत्रालय, भारत सरकार आनी गोंय मनरिजवण सोसायटी (ईएसजी) गोंय राज्य सरकार हांणी संयुक्तपणान आयोजीत केल्लो हो महोत्सव आता जागतिक चित्रपटसृष्टीतले शक्तीघर जाला. इफ्फीक खऱ्या अर्थान चमकावपी गजाल म्हळ्यार ताचे अद्वितीय मिश्रण -आंतरराष्ट्रीय सर्ती, सांस्कृतीक प्रदर्शनां, मास्टरक्लास आनी उच्च उर्जा आशिल्लो 'व्हेवज’ (WAVES) फिल्म बाजार, जंय कल्पना, वेव्हार आनी सहयोग आकार घेतात. 20 ते 28 नोव्हेंबर मजगती गोयांत जावपी ह्या 56व्या आवृत्तीत भाशा, शैली, नवोन्मेष आणि आवाजांचो एक दोळे दिपकावपी संग्रह सादर जातलो - जागतिक स्तराचेर भारताच्या सर्जनशील प्रतिभेचो एक मन भुलोवपी उत्सव.

For more information, click on:

IFFI Website: https://www.iffigoa.org/

PIB’s IFFI Microsite: https://www.pib.gov.in/iffi/56new/

PIB IFFIWood Broadcast Channel: https://whatsapp.com/channel/0029VaEiBaML2AU6gnzWOm3F

X Handles: @IFFIGoa, @PIB_India, @PIB_Panaji

* * *

PIB IFFI CAST AND CREW | सुभाष जाण/उत्कर्षा भुस्कुटे/दर्शना राणे | IFFI 56