#IFFIWood, 22 नोव्‍हेंबर 2025

भारतीय आंतरराष्ट्रीय चित्रपट महोत्सवांत (IFFI) आयज नामनेचे चित्रपट निर्माते, कलाकार आनी जागतीक महोत्सव फुडाऱ्यां वांगडा मास्टरक्लासांची माळ घडोवन हाडली. सृजनशीलताय, अभिनय आनी सेगीत बदलपी चित्रपटसृष्टीच्या फुडारा विशींच्या ह्या भासाभासांनी प्रेक्षकांक सखोल विचारमंथनात गुंथले. ह्या सत्रांनी फिल्म निर्मातो विधु विनोद चोप्रा आनी लेखक अभिजात जोशी, बर्लिनेलाची महोत्सव संचालक ट्रिसिया टटल आनी इफ्फीचे महोत्सव संचालक श्री शेखर कपूर हांची संवादमैफिल, तशेच आदिशक्तीचे नाट्य गुरू विनयकुमार हांचो सहभाग आशिल्लो.

ह्या परस्पर संवादांक लागून भाग घेवप्यांक चित्रपट निर्मितीचे तंत्र, भावनिक अभिनयाची सूक्ष्मता, तशेच कथाकथन आनी चित्रपट महोत्सवांचेर कृत्रिम बुद्धिमत्तेसारख्या नव्या तंत्रज्ञानाचो जावपी प्रभाव ह्या विशीं सखोल समज निर्माण जालो. इफ्फीत आंतरराष्ट्रीय गाला प्रीमियरांची एक उत्कृश्ट श्रेणी सादर केली, जातूंत संवसारीक पांवड्यार प्रशंसित चित्रपट महोत्सवाच्या प्रेक्षकांसमोर हाडले. ह्या लायनअपांत इटालियन–स्विस चित्रपट ‘Mosquitoes’, पुनर्स्थापित केल्लो इंग्लीश क्लासिक ‘Muriel’s Wedding’, आनी आंतरराष्ट्रीय सर्तींतलो फ्रेंच फिल्म ‘Renoir’हांचो आस्पाव आशिल्लो. ह्या चित्रपटांनी प्रेक्षकांक समकालीन कथानकांची विविधता आनी संवसारीक चित्रपटकलेची समृद्ध परंपरा हांचो एक आकर्शक संगम अणभवपाक दिलो.

IFFI विशीं

1952 वर्सा सुरु जाल्लो भारतीय आंतरराष्ट्रीय चित्रपट महोत्सव (IFFI) दक्षिण आशियांतलो सगळ्यांत पोरनो आनी सगळ्यांत व्हडलो चित्रपट महोत्सव. राष्ट्रीय चित्रपट विकास म्हामंडळ (एनएफडीसी), म्हायती आनी प्रसारण मंत्रालय, भारत सरकार आनी गोंय मनरिजवण सोसायटी (ईएसजी) गोंय राज्य सरकार हांणी संयुक्तपणान आयोजीत केल्लो हो महोत्सव आता जागतिक चित्रपटसृष्टीतले शक्तीघर जाला. इफ्फीक खऱ्या अर्थान चमकावपी गजाल म्हळ्यार ताचे अद्वितीय मिश्रण -आंतरराष्ट्रीय सर्ती, सांस्कृतीक प्रदर्शनां, मास्टरक्लास आनी उच्च उर्जा आशिल्लो 'व्हेवज’ (WAVES) फिल्म बाजार, जंय कल्पना, वेव्हार आनी सहयोग आकार घेतात. 20 ते 28 नोव्हेंबर मजगती गोयांत जावपी ह्या 56व्या आवृत्तीत भाशा, शैली, नवोन्मेष आणि आवाजांचो एक दोळे दिपकावपी संग्रह सादर जातलो - जागतिक स्तराचेर भारताच्या सर्जनशील प्रतिभेचो एक मन भुलोवपी उत्सव.

* * *

PIB IFFI CAST AND CREW | सुभाष जाण/मोनाली प्रभू/दर्शना राणे | IFFI 56