প্ৰধানমন্ত্ৰী শ্ৰী নৰেন্দ্ৰ মোদীয়ে আজি তেলেংগানাৰ ৱাৰংগলত প্ৰায় ৬,১০০ কোটি টকাৰ তেলেংগানাৰ কেইবাটাও গুৰুত্বপূৰ্ণ আন্তঃগাঁথনি উন্নয়ন প্ৰকল্পৰ আধাৰশিলা স্থাপন কৰে। উন্নয়নমূলক কামৰ ভিতৰত আছে ১৭৬ কিলোমিটাৰ দৈৰ্ঘ্যৰ ৫,৫৫০ কোটি টকাৰ ৰাষ্ট্ৰীয় ঘাইপথ প্ৰকল্প আৰু কাজিপেটত ৫০০ কোটি টকাৰ ব্যয় সাপেক্ষে নিৰ্মাণ হ'বলগীয়া ৰে'লৱে নিৰ্মাণ ইউনিট। প্ৰধানমন্ত্ৰীয়ে ভদ্ৰকালী মন্দিৰত দৰ্শন আৰু পূজা আগবঢ়ায়।

অনুষ্ঠানত ভাষণ প্ৰদান কৰি প্ৰধানমন্ত্ৰীয়ে কয় যে তেলেংগানা তুলনামূলকভাৱে এখন নতুন ৰাজ্য আৰু ইয়াৰ অস্তিত্বৰ মাত্ৰ ৯ বছৰ সম্পূৰ্ণ হৈছে। তেলেংগানা আৰু ইয়াৰ জনসাধাৰণে ভাৰতৰ ইতিহাসত গুৰুত্বপূৰ্ণ অৱদান আগবঢ়াইছে। তেলেগু জনসাধাৰণৰ সামৰ্থ্যই সদায়েই ভাৰতৰ সামৰ্থ্য বৃদ্ধি কৰি আহিছে। প্ৰধানমন্ত্ৰীয়ে ভাৰতক বিশ্বৰ পঞ্চম বৃহত্তম অৰ্থনীতি হিচাপে গঢ়ি তোলাৰ ক্ষেত্ৰত তেলেংগানাৰ নাগৰিকসকলৰ গুৰুত্বপূৰ্ণ ভূমিকাৰ কথা উল্লেখ কৰে আৰু বিশ্বই ভাৰতক বিনিয়োগৰ গন্তব্যস্থান হিচাপে চাবলৈ আৰম্ভ কৰাৰ লগে লগে সুযোগৰ বিকাশত বিশ্বাস ব্যক্ত কৰে। তেওঁ লগতে কয়, 'বিকাশ ভাৰত'ৰ বাবে বহু প্ৰত্যাশা আছে।

"আজিৰ যুৱ ভাৰত শক্তিৰে ভৰি আছে", প্ৰধানমন্ত্ৰীয়ে এইদৰে কয়। তেওঁ একবিংশ শতিকাৰ তৃতীয় দশকত এক স্বৰ্ণযুগ আৰম্ভ হোৱা বুলি স্বীকাৰ কৰি সকলোকে এই যুগৰ সদ্ব্যৱহাৰ কৰিবলৈ আহ্বান জনায়। দ্ৰুত বিকাশৰ ক্ষেত্ৰত ভাৰতৰ কোনো অঞ্চল পিছ পৰি থকা উচিত নহয় বুলি উল্লেখ কৰি প্ৰধানমন্ত্ৰীয়ে বিগত ৯ বছৰত তেলেংগানাৰ আন্তঃগাঁথনি আৰু যোগাযোগ ব্যৱস্থাৰ উন্নীতকৰণৰ ওপৰত গুৰুত্ব আৰোপ কৰে। তেওঁ তেলেংগানাৰ জনসাধাৰণক আজিৰ দিনটোত ৬,০০০ কোটিৰো অধিক মূল্যৰ প্ৰকল্পৰ বাবে অভিনন্দন জনায়।

প্ৰধানমন্ত্ৰীয়ে নতুন লক্ষ্যত উপনীত হ'বলৈ নতুন পথৰ সন্ধান কৰাৰ প্ৰয়োজনীয়তাৰ ওপৰত গুৰুত্ব আৰোপ কৰে আৰু কয় যে পুৰণি আন্তঃগাঁথনিৰ সৈতে ভাৰতত দ্ৰুতগতিত বিকাশ সম্ভৱ নহয়। দুৰ্বল যোগাযোগ ব্যৱস্থা আৰু ব্যয়বহুল লজিষ্টিক ব্যয়ৰ বাবে ব্যৱসায়ৰ অগ্ৰগতি বাধাগ্ৰস্ত হৈছে বুলি উল্লেখ কৰি প্ৰধানমন্ত্ৰীয়ে কয় যে চৰকাৰে বিকাশৰ গতি আৰু পৰিসৰ বহুগুণে বৃদ্ধি কৰিছে। তেওঁ ঘাইপথ, এক্সপ্ৰেছৱে, অৰ্থনৈতিক কৰিড'ৰ আৰু ঔদ্যোগিক কৰিড'ৰৰ উদাহৰণ দাঙি ধৰি কয় যে ইয়াৰ জৰিয়তে এটা নেটৱৰ্ক গঢ়ি তোলা হৈছে আৰু দুলেনযুক্ত আৰু চাৰিলেনযুক্ত ঘাইপথসমূহ ক্ৰমে চাৰিলেনযুক্ত আৰু ছয়লেনযুক্ত ঘাইপথলৈ ৰূপান্তৰিত কৰা হৈছে। তেলেংগানাৰ ঘাইপথৰ দৈৰ্ঘ্য ২৫০০ কিলোমিটাৰৰ পৰা ৫০০০ কিলোমিটাৰলৈ দুগুণ বৃদ্ধি কৰা হৈছে বুলি প্ৰধানমন্ত্ৰীয়ে জানিবলৈ দিয়ে। তেওঁ লগতে উল্লেখ কৰে যে ২৫০০ কিলোমিটাৰ ৰাষ্ট্ৰীয় ঘাইপথ নিৰ্মাণৰ কাম বিভিন্ন পৰ্যায়ত চলি আছে। তেখেতে লগতে কয় যে ভাৰতমালা প্ৰকল্পৰ অধীনত নিৰ্মাণ হৈ থকা কেইবাটাও কৰিড'ৰ তেলেংগানাৰ মাজেৰে পাৰ হৈ যায়। তেওঁ হায়দৰাবাদ-ইন্দোৰ অৰ্থনৈতিক কৰিড'ৰ, চেন্নাই-সুৰাট অৰ্থনৈতিক কৰিড'ৰ, হায়দৰাবাদ-পাঞ্জি অৰ্থনৈতিক কৰিড'ৰ আৰু হায়দৰাবাদ-বিশাকাপট্টনম আন্তঃমাৰ্গ কৰিড'ৰৰ উদাহৰণ দাঙি ধৰে। প্ৰধানমন্ত্ৰীয়ে কয় যে এক প্ৰকাৰে, তেলেংগানা চাৰিওফালৰ অৰ্থনৈতিক কেন্দ্ৰসমূহক সংযোগ কৰিছে আৰু অৰ্থনৈতিক কাৰ্যকলাপৰ কেন্দ্ৰ হৈ পৰিছে।

আজি আধাৰশিলা স্থাপন কৰা নগাঁৱৰ মঞ্চিয়াল-ৱাৰংগল অংশৰ লগতে বিজয়াৱদাৰ কৰিড'ৰৰ কথা উল্লেখ কৰি প্ৰধানমন্ত্ৰীয়ে কয় যে এই অংশটোৱে তেলেংগানাক মহাৰাষ্ট্ৰ আৰু অন্ধ্ৰপ্ৰদেশৰ সৈতে আধুনিক সংযোগ প্ৰদান কৰাৰ লগতে মঞ্চিয়াল আৰু ৱাৰংগলৰ মাজৰ দূৰত্ব হ্ৰাস কৰিব আৰু যান-বাহনৰ সমস্যা দূৰ কৰিব। "এই অঞ্চলটো বহুতো জনজাতীয় সম্প্ৰদায়ৰ বাসস্থান আৰু দীৰ্ঘদিন ধৰি অৱহেলিত হৈ আহিছে", তেওঁ কয়। শ্ৰী মোদীয়ে কয় যে এই কৰিডৰটোৱে ৰাজ্যখনত মাল্টিমডেল সংযোগৰ বাবে এক দৃষ্টিভংগী প্ৰদান কৰিব আৰু কৰিমনগৰ-ৱাৰংগল শাখাৰ চাৰিলেনযুক্ত পথটোৱে হায়দৰাবাদ-ৱাৰংগল ঔদ্যোগিক কৰিডৰ, কাকতিয়া মেগা টেক্সটাইল পাৰ্ক আৰু ৱাৰংগল এছইজেডৰ সৈতে সংযোগ শক্তিশালী কৰিব।

প্ৰধানমন্ত্ৰীয়ে ভাৰতীয় ৰে'লৱেৰ নিৰ্মাণৰ ক্ষেত্ৰত নতুন অভিলেখ আৰু নতুন মাইলৰ খুঁটি স্থাপনৰ কথাও উল্লেখ কৰে। তেওঁ 'মেড ইন ইণ্ডিয়া' আৰু 'বন্দে ভাৰত' ৰে'লগাড়ীসমূহৰ বিষয়ে আলোকপাত কৰি কয় যে ভাৰতীয় ৰে'লৱেয়ে বছৰ বছৰ ধৰি হাজাৰ হাজাৰ অত্যাধুনিক দবা আৰু ইঞ্জিন নিৰ্মাণ কৰিছে। আজি আধাৰশিলা স্থাপন কৰা কাজিপেটৰ ৰে'লৱে মেনুফেকচাৰিং ইউনিটৰ কথা উল্লেখ কৰি প্ৰধানমন্ত্ৰীয়ে কয় যে ই ভাৰতীয় ৰে'লৱেৰ পুনৰুজ্জীৱিতকৰণ আৰু কাজিপেট মেক ইন ইণ্ডিয়াৰ নতুন শক্তিৰ অংশ হ'ব। ইয়াৰ ফলত, এই ক্ষেত্ৰত নতুন নিয়োগৰ সুযোগ সৃষ্টি হ'ব আৰু প্ৰতিটো পৰিয়াল উপকৃত হ'ব। ভাষণৰ শেষত প্ৰধানমন্ত্ৰীয়ে কয়, "এয়া হ'ল সবকা সাথ, সবকা বিকাশ" আৰু তেলেংগানাক উন্নয়নৰ মন্ত্ৰৰে আগুৱাই নিবলৈ আহ্বান জনায়।

এই অনুষ্ঠানত তেলেংগানাৰ ৰাজ্যপাল ডাঃ তামিলছাই সৌন্দৰৰাজান, কেন্দ্ৰীয় পথ, পৰিবহণ আৰু ঘাইপথ মন্ত্ৰী শ্ৰী নীতিন গাডকাৰী, কেন্দ্ৰীয় পৰ্যটন মন্ত্ৰী শ্ৰী জি কিষাণ ৰেড্ডী আৰু সাংসদ শ্ৰী সঞ্জয় বান্দিও উপস্থিত আছিল।

Speaking at launch of development initiatives in Warangal. The projects will significantly benefit the people of Telangana. https://t.co/NEWqkmH4uC

— Narendra Modi (@narendramodi) July 8, 2023